Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Roma 11:1-36

11  Imtuodek, ngarud, ti Dios inlaksidna aya ti ilina?+ Saan koma a pulos mapasamak dayta! Ta maysaak met nga Israelita,+ iti bin-i ni Abraham, iti tribu ni Benjamin.+  Ti Dios saanna nga inlaksid ti ilina, nga immuna a binigbigna.+ Apay, dikay aya ammo no ania ti kuna ti Kasuratan mainaig ken Elias, bayat nga agdawdawat iti Dios maibusor iti Israel?+  “Jehova, pinapatayda dagiti mammadtom, kinalida dagiti altarmo, ket siak laeng ti nabati, ket sapsapulenda ti kararuak.”+  Kaskasdi, ania ti kuna kenkuana ti nadibinuan a pammakdaar?+ “Nangiteddaak iti pito ribu a lallaki a maipaay kaniak, lallaki a saan a nagparintumeng ken Baal.”+  Iti kastoy a pamay-an, ngarud, iti agdama met a panawen nagparang ti maysa a natda+ maitunos iti maysa a pannakapili+ gapu iti di kaikarian a kinamanangngaasi.  Ita no dayta ket babaen iti di kaikarian a kinamanangngaasi,+ dayta ket saanen a gapu iti ar-aramid;+ ta no saan, ti di kaikarian a kinamanangngaasi saanen nga agbalin a di kaikarian a kinamanangngaasi.+  Ania, ngarud? Ti mismo a banag a sipapasnek a sapsapulen ti Israel saanna a nagun-odan,+ ngem nagun-odan dayta dagidiay napili.+ Ti dadduma ngimmudel dagiti rikriknada;+  kas adda a naisurat: “Ti Dios inikkanna ida iti espiritu ti nargaan a turog,+ matmata a di makakita ken laplapayag a di makangngeg, agingga itoy met laeng nga aldaw.”+  Kasta met, kuna ni David: “Ti lamisaanda agbalin koma kadakuada a maysa a silo ken maysa a palab-og ken maysa a pakaitibkolan ken maysa a pannusa;+ 10  agsipnget koma dagiti matada tapno saan a makakita, ket kanayon a pagrukobem ti bukotda.”+ 11  Gapuna imtuodek, Naitibkolda aya iti kasta napasagda+ a naan-anay? Saan koma a pulos mapasamak dayta! Ngem babaen ti di umiso nga addangda+ adda pannakaisalakan kadagiti tattao iti nasnasion,+ tapno gargarien ida nga agimon.+ 12  Ita no ti di umiso nga addangda kaipapananna ti kinabaknang iti lubong, ket ti ibabassitda kaipapananna ti kinabaknang kadagiti tattao iti nasnasion,+ anian nga ad-adda pay a kaipapananto dayta ti naan-anay a bilangda!+ 13  Ita agsaoak kadakayo a tattao iti nasnasion. Iti kinapudnona, yantangay maysaak nga apostol+ iti nasnasion,+ padayagek+ ti ministeriok,+ 14  no iti aniaman a pamay-an magargarik nga agimon dagidiay bukodko a lasag ket maisalakanko+ ti sumagmamano manipud kadakuada.+ 15  Ta no ti pannakapagtalawda+ kaipapananna ti pannakikappia+ iti lubong, anianto ti kaipapanan ti panangawat kadakuada no di biag manipud kadagiti natay? 16  Kanayonanna, no nasantuan ti paset a naala kas umuna a bungbunga,+ kasta met ti masa; ket no nasantuan ti ramut,+ kasta met dagiti sanga. 17  Nupay kasta, no nasip-ak ti sumagmamano kadagiti sanga ngem sika, nupay maysaka nga atap nga olibo, naisulbongka kadakuada+ ket nagbalinka a makipaset iti kinalukmeg+ ti ramut ti olibo,+ 18  dika agpalangguad kadagiti sanga. No, ngarud, agpalangguadka kadakuada,+ saan a sika ti mangawit iti ramut,+ no di ket ti ramut ti mangawit kenka.+ 19  Kunaemto, ngarud: “Nasip-ak dagiti sanga+ tapno maisulbongak.”+ 20  Ala wen! Gapu iti kaawan ti pammatida+ nasip-akda, ngem agtaktakderka babaen ti pammati.+ Isardengmo ti maaddaan kadagiti nangato a kapampanunotan,+ no di ket agbutengka.+ 21  Ta no ti Dios saanna a pinakawan dagiti nainkasigudan a sanga, saannakanto met a pakawanen.+ 22  Kitaem, ngarud, ti kinamanangngaasi+ ken kinainget+ ti Dios. Kadagidiay maikulbo adda kinainget,+ ngem kenka adda kinamanangngaasi ti Dios, no la ket agtalinaedka+ iti kinamanangngaasina; ta no saan, maputedkanto met.+ 23  Isuda met, no saanda nga agtalinaed iti kaawan ti pammatida, maisulbongdanto;+ ta ti Dios kabaelanna nga isulbong ida manen. 24  Ta no nasigpatka iti kayo nga olibo nga atap ti nakaisigudanna ket naisulbongka+ iti kayo nga olibo iti minuyongan maikaniwas iti nakaisigudan, anian nga ad-adda pay a dagitoy a nainkasigudan maisulbongdanto iti bukodda a kayo nga olibo!+ 25  Ta diak kayat, kakabsat, nga ignorantekayo iti daytoy sagrado a palimed,+ tapno dikay agmasirib iti bukodyo a matmata: a ti panagngudel dagiti rikrikna+ napasamak iti maysa a pasetna iti Israel agingga a nakastrek ti naan-anay a bilang+ dagiti tattao iti nasnasion,+ 26  ket iti kastoy a pamay-an maisalakanto ti intero nga Israel.+ Kas adda a naisurat: “Ti manangispal rummuarto manipud iti Sion+ ket iyadayona ken Jacob+ dagiti di nadiosan nga aramid. 27  Ket daytoy ti tulag iti biangko kadakuada,+ inton ikkatek dagiti basolda.”+ 28  Pudno, no mainaig iti naimbag a damag kabkabusor ida maigapu kadakayo,+ ngem no mainaig iti panangpili [ti Dios] dungdungnguen ida maigapu kadagidi ammada.+ 29  Ta dagiti sagut ken ti panangayab ti Dios ket saan a bambanag a pagbabawyannanto.+ 30  Ta no kasano nga idi napalabas nasukirkayo+ iti Dios ngem naipakitaan itan iti asi+ gapu iti kinasukirda,+ 31  gapuna a kasta met dagitoy ita nagbalinda a nasukir nga agbanag iti asi kadakayo,+ tapno isuda maipakitaanda met koma itan iti asi. 32  Ta ti Dios impupokna ida amin a sangsangkamaysa iti kinasukir,+ tapno maipakitaanna ida amin iti asi.+ 33  O nagunegen ti kinabaknang+ ken sirib+ ken pannakaammo+ ti Dios! Anian a di pannakasukimat kadagiti panangukomna+ ken di pannakatalunton kadagiti dalanna! 34  Ta “siasino ti nakaammo iti panunot ni Jehova,+ wenno siasino ti nagbalin a manangbalakadna?”+ 35  Wenno, “Siasino ti immuna a nangted kenkuana, tapno masupapakan dayta kenkuana?”+ 36  Agsipud ta manipud kenkuana ken babaen kenkuana ken maipaay kenkuana ti amin a bambanag.+ Agpaay koma kenkuana ti dayag iti agnanayon.+ Amen.

Footnotes