Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Proverbio 6:1-35

6  Anakko, no nagserbika a pammasiguro maipaay iti padam a tao,+ no makiinnalamanoka uray iti sangsangaili,+  no nasiluanka iti sasao ti ngiwatmo,+ no natiliwka iti sasao ti ngiwatmo,  agtignayka ngarud a kastoy, anakko, ket ispalem ta bagim, ta dimtengka iti dakulap ti padam a tao:+ Inka ipakumbaba ta bagim ket dupagem ti padam a tao kadagiti pakpakaasi.+  Dika mangipaay kadagita matam iti aniaman a turog, wenno uray aniaman a ridep kadagita agsilnasilnag a matam.+  Ispalem ti bagim kas iti gasela manipud iti ima ken kas iti tumatayab manipud iti ima ti managtiliw iti tumatayab.+  Mapanka iti kuton,+ sika a nasadut;+ kitaem ti daldalanna ket agbalinka a masirib.  Nupay awanan iti komandante, opisial wenno agturay,  isaganana ti taraonna iti mismo a kalgaw;+ nagurnong kadagiti abastona a taraon iti mismo a panagani.  Kasanonto kabayag, sika a nasadut, nga agtalinaedka a nakaidda?+ Kaanonto a bumangonka manipud pannaturogmo?+ 10  Sangkabassit pay a turog, sangkabassit pay nga iriridep, sangkabassit pay a panangidalikepkep kadagiti ima iti panagidda,+ 11  ket ti kinakurapaymo sigurado a dumtengto kas iti asinoman a managsursor,+ ken ti panagkasapulam kas iti maysa nga armado a lalaki.+ 12  Ti tao nga awan kaes-eskanna,+ tao a manangpasakit, magmagna a buyogen ti kinakillo iti panagsao,+ 13  nga agkiddakidday babaen iti matana,+ agsensenias babaen iti sakana, agipaspasimudaag babaen kadagiti ramayna.+ 14  Ti kinabalusingsing adda iti pusona.+ Isu mangparpartuat iti banag a dakes iti isuamin a tiempo.+ Mangparparuar kadagiti rinnupir laeng.+ 15  Dayta ti makagapu a giddato a dumtengto ti pannakadidigrana;+ iti apagdarikmat isu madadaelto, ket awanto ti pannakapaimbag.+ 16  Adda innem a banag a guraen ni Jehova;+ wen, pito ti bambanag a nakarimrimon iti kararuana:+ 17  napalalo a matmata,+ ulbod a dila,+ ken im-ima nga agibukbukbok iti awanan basol a dara,+ 18  puso a mangparpartuat kadagiti makapasakit a gandat,+ saksaka nga agdardaras a tumaray nga agturong iti kinadakes,+ 19  ulbod a saksi nga agyesngaw kadagiti kinaulbod,+ ken asinoman a mangparnuay kadagiti rinnupir iti nagtetengngaan dagiti agkakabsat.+ 20  Salimetmetam, O anakko, ti bilin ni amam,+ ket saanmo a baybay-an ti linteg ni inam.+ 21  Igalutmo ida a patinayon ita pusom;+ ibedbedmo ida ita karabukobmo.+ 22  No magnaka, idalannakanto;+ no agiddaka, nakabantayto kenka;+ ket inton nakariingkan, pakaseknannakanto dayta. 23  Ta ti bilin maysa a pagsilawan,+ ket ti linteg maysa a silaw,+ ket dagiti pannubngar ti disiplina isuda ti dalan ti biag,+ 24  a mangsaluad kenka iti dakes a babai,+ iti kinalamuyot ti dila ti ganggannaet a babai.+ 25  Saanmo a tarigagayan ita pusom ti kinalibnosna,+ ket saannaka koma nga alaen babaen kadagiti rumimatrimat a matana,+ 26  agsipud ta maigapu iti babai a balangkantis manungpal ti maysa iti nagbukel a tinapay;+ ngem no maipapan iti asawa ti sabali a lalaki, aganup uray iti napateg a kararua.+ 27  Mabalin kadi ti maysa a tao ti mangkaraykay a mangurnong iti saklotna iti apuy ket kaskasdi a saan a mapuoran dagiti mismo a kawesna?+ 28  Wenno mabalin kadi ti maysa a tao ti magna iti rabaw dagiti beggang ket saan a masinit dagiti mismo a sakana? 29  Kasta met iti asinoman a makidenna iti asawa ti padana a tao,+ awan ti mangsagid kenkuana nga agtalinaedto a di madusa.+ 30  Dagiti tattao saanda nga umsien ti mannanakaw gapu laeng ta agtakaw tapno pennekenna ti kararuana no isu mabisin. 31  Ngem, no masukalan, subadannanto dayta iti mamimpito ti kaaduna; itednanto amin dagiti sanikua iti balayna.+ 32  Ti asinoman a makikamalala iti maysa a babai awanan iti puso;+ daydiay mangaramid iti dayta daddadaelenna ti bukodna a kararua.+ 33  Makagun-odto iti saplit ken pannakaibabain,+ ket ti met laeng pannakaumsina saanto a mapunas.+ 34  Ta ti pungtot ti maysa a nabaneg a lalaki isu ti imon,+ ket saanto a mangipakita iti panangngaasi iti aldaw ti pammales.+ 35  Saannanto nga ikabkabilangan ti aniaman a kita ti subbot, saanto met a mangipakita iti kinatulok, uray pay kasano kadakkel ti panagiparangkapmo.

Footnotes