Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Proverbio 24:1-34

24  Dika umapal kadagiti dakes a tattao,+ ket saanmo nga ipakita a gargartemam ti makigayyem kadakuada.+  Ta ti panangagaw isu ti agtultuloy a mennamennaen ti pusoda, ket ti riribuk isu ti agtultuloy a sawen dagiti bukodda a bibig.+  Babaen iti kinasirib mabangonto ti maysa a sangakabbalayan,+ ket babaen iti panangilasin mapaneknekanto dayta a naipasdek a sititibker.+  Ket babaen iti pannakaammo mapnonto dagiti makin-uneg a siled iti amin a tagtagipatgen ken makaay-ayo a bambanag nga addaan pateg.+  Daydiay masirib iti panagusar iti pigsa maysa a nabaneg a lalaki,+ ket ti tao nga addaan pannakaammo patibkerenna ti pannakabalin.+  Ta babaen iti nasigo a panangiwanwan itultuloymonto ti gubatmo,+ ket iti kinaadu dagiti manangbalakad adda pannakaisalakan.+  Iti maysa a maag nangato unay ti pudno a sirib;+ iti ruangan saannanto a ngangaen ti ngiwatna.  No maipapan iti asinoman nga agganggandat nga agaramid iti dakes, isu maawaganto nga apo laeng kadagiti dakes a kapanunotan.+  Ti nalulok a kababalin ti kinamaag ket basol,+ ket ti managuy-uyaw nakarimrimon iti sangatauan.+ 10  Impakitam kadi a naupayka iti aldaw ti rigat?+ Kurangto ti bilegmo. 11  Ispalem dagidiay maipampanaw nga agturong ken patay; ket dagidiay agbarbariring nga agturong iti pannakagudas, O igawidmo koma ida.+ 12  No kas pagarigan kunaem: “Adtoy! Saanmi a naammuan daytoy,”+ saanto aya a mailasin dayta daydiay mangtingtingiting kadagiti puso,+ ken maammuan+ daydiay mangsalsalimetmet iti kararuam ket pudno unay a supapakanna ti naindagaan a tao sigun iti aramidna?+ 13  Anakko, manganka iti diro, ta naimbag dayta; ket ti nasam-it a diro ti kalaba adda koma iti ngadasmo.+ 14  Iti isu met laeng a wagas, ammuem ti sirib maipaay iti kararuam.+ No nasarakamon dayta, iti kasta adda maysa a masanguanan, ket ti bukodmo a namnama saanto a makeltay.+ 15  Saanmo a padaanan, kas maysa a nadangkes, ti disso a pagyanan daydiay nalinteg;+ saanmo nga agawen ti lugar a paginanaanna.+ 16  Ta daydiay nalinteg mabalin a matuang iti uray mamimpito a daras, ket sigurado a tumakderto;+ ngem dagidiay nadangkes maitibkoldanto babaen iti didigra.+ 17  No ti kabusormo matuang, dika agragsak; ket no isu maitibkol, ta pusom saan koma nga agrag-o,+ 18  tapno saan a makita ni Jehova ket agbalin dayta a dakes kadagiti matana ket pudno unay nga ibaw-ingna ti ungetna manipud kenkuana.+ 19  Dika agpudpudot kadagiti managaramid iti dakes. Dika agbalin a naapal iti nadangkes a tattao.+ 20  Ta awanto ti masanguanan iti asinoman a dakes;+ maiddepto ti mismo a pagsilawan dagiti nadangkes a tattao.+ 21  Anakko, agbutengka ken Jehova ken iti ari.+ Kadagidiay mayat iti panagbalbaliw, dika makibiang.+ 22  Ta ti pannakadidigrada tumaudto a giddato unay,+ iti kasta siasino ti makaammo iti pannakapukaw dagidiay mayat iti panagbalbaliw?+ 23  Dagitoy met a sasao agpaay kadagidiay masirib:+ Ti panangipakita iti panangidumduma iti panangukom saan a nasayaat.+ 24  Ti agkuna iti daydiay nadangkes: “Nalintegka,”+ isu ilunodto dagiti ili, isu kondenarento dagiti nasional a bunggoy. 25  Ngem kadagidiay mangtubngar kenkuana makaay-ayonto dayta,+ ket kadakuada umayto ti bendision a naimbag.+ 26  Daydiay sumungbat a sibabatad umagepto kadagiti bibig.+ 27  Isaganam dagiti trabahom iti ruar, ket saganaem maipaay kenka iti tay-ak.+ Kalpasanna masapul a bangonem met ti sangakabbalayam. 28  Dika agbalin a saksi maibusor iti padam a tao nga awan kadagiti pangibatayan.+ No kasta agbalinka a maag babaen kadagiti bibigmo.+ 29  Saanmo a kunaen: “Kas iti inaramidna kaniak, kasta ti aramidek kenkuana.+ Supapakakto ti tunggal maysa sigun iti panagtignayna.”+ 30  Limmabasak iti igid ti talon ti nasadut a tao+ ken iti igid ti kaubasan ti tao nga awanan iti puso.+ 31  Ket, adtoy! isuamin dayta nangpataud kadagiti dakes a ruot.+ Dagiti siitan inabbonganda ti mismo a rabawna, ket ti met laeng bato a paderna narban.+ 32  Gapuna kinitak, siak; rinugiak nga impapuso dayta;+ nakitak, inawatko ti disiplina:+ 33  Bassit a pannaturog, bassit nga iriridep, bassit a panangidalikepkep kadagiti ima tapno agidda,+ 34  ket kas iti maysa a tulisan sigurado a dumtengto ti kinakurapaymo ken ti kinamarigrigatmo kas iti maysa nga armado a lalaki.+

Footnotes