Proverbio 19:1-29
19 Ti asinoman a bassitan iti sanikua a magmagna iti kinatarnawna nasaysayaat+ ngem daydiay nakillo kadagiti bibigna, ken daydiay a maag.+
2 Kasta met, a ti kararua no awanan pannakaammo saan a nasayaat,+ ket daydiay aggangganat kadagiti sakana agbasbasol.+
3 Ti kinamaag ti naindagaan a tao isu ti mangkilkillo iti dalanna,+ ket ngarud ti pusona makapungtot a maibusor ken Jehova a mismo.+
4 Ti kinabaknang isu ti mangnayon iti adu a kakadua,+ ngem ti maysa a nanumo maisina uray iti kaduana.+
5 Ti ulbod a saksi saanto a mawayawayaan iti pannakadusa,+ ket daydiay agyesngaw kadagiti kinaulbod saanto a makatalaw.+
6 Adu dagidiay mangpalukneng iti rupa ti maysa a natan-ok,+ ket ti tunggal maysa kadua ti tao a mangmangted kadagiti sagut.+
7 Ti maysa a bassitan iti sanikua ginura ti amin a kakabsatna.+ Anian nga ad-adda pay nga immadayo kenkuana ti kabukbukodanna a gagayyem!+ Isu kumamat nga addaan bambanag nga isao; awandan.+
8 Daydiay manggunggun-od iti puso+ ay-ayatenna ti bukodna a kararua. Daydiay mangsalsaluad iti panangilasin makasarak iti naimbag.+
9 Ti ulbod a saksi saanto a makaliklik iti pannakadusa,+ ket daydiay agyesngaw kadagiti kinaulbod mapukawto.+
10 Ti kinaluho saan a mayanatup iti asinoman a maag.+ Anian nga ad-adda a saan a mayanatup a ti adipen agturay kadagiti prinsipe!+
11 Ti pannakatarus ti maysa a tao pudno unay a pabannayatenna ti ungetna,+ ket kinapintas iti biangna ti panangpalabas iti salungasing.+
12 Ti panagpungtot unay ti maysa nga ari ket panaguga a kas iti panaguga ti burboran a bumaro a leon,+ ngem ti naimbag a nakemna ket kas iti linnaaw iti mulmula.+
13 Ti maag nga anak kaipapananna dagiti panagrigat iti amana,+ ket dagiti pannakirinnupir ti asawa a babai kaslada iti agtedtedted nga atep a mamagtalaw iti maysa.+
14 Ti tawid kadagiti amma isu ti balay ken kinabaknang,+ ngem ti masirib nga asawa a babai aggapu ken Jehova.+
15 Ti kinasadut mangipagteng iti nargaan a turog,+ ket ti managbaybay-a a kararua agbisin.+
16 Daydiay mangsalimetmet iti bilin salimetmetanna ti kararuana;+ daydiay mangumsi iti daldalanna mapapatayto.+
17 Daydiay mangipakpakita ti pabor iti daydiay nanumo agpapautang ken Jehova,+ ket ti panangtratona Isu supapakannanto kenkuana.+
18 Dusaem ti anakmo bayat nga adda pay namnama;+ ket iti panangpapatay kenkuana saanmo nga itag-ay ti tarigagay ta kararuam.+
19 Daydiay addaan iti dakkel a pungtot ibaklaynanto ti multa;+ ta no isu ispalem, itultuloymonto met nga aramiden dayta a maulit-ulit.+
20 Imdengam ti pammatigmaan ket awatem ti disiplina,+ tapno iti kasta sumiribka iti masanguanam.+
21 Adu dagiti gakat iti puso ti maysa a tao,+ ngem ti pammatigmaan ni Jehova isunto ti agtalinaed.+
22 Ti matarigagayan a banag iti naindagaan a tao isu ti naayat a kinamanangngaasina;+ ket ti maysa a bassitan iti sanikua naim-imbag ngem iti naulbod a tao.+
23 Ti panagbuteng ken Jehova mangiturong iti biag,+ ket ti maysa sipepennek a busbosennanto ti rabii;+ ti maysa saanto a sarungkaran ti dakes.+
24 Daydiay nasadut inlemmengna ti imana iti malukong ti bangkete;+ saanna a maisubli dayta uray iti bukodna a ngiwat.+
25 Ti managuy-uyaw rebbeng a kabilem,+ tapno daydiay awanan kapadasan agbalin a nasaldet;+ ket rebbeng nga adda panangtubngar iti daydiay mannakaawat, tapno mailasinna ti pannakaammo.+
26 Daydiay mangirurumen iti ama ken mangabug iti ina+ ket maysa nga anak nga agtigtignay a nakababain ken nakaal-alas.+
27 Sardayam, anakko, ti umimdeng iti disiplina ket kaipapanannanto ti pannakaiwawa manipud iti sasao ti pannakaammo.+
28 Ti awan kaes-eskanna a saksi uyawenna ti hustisia,+ ket ti mismo a ngiwat dagiti nadangkes a tattao alun-onenna ti makapasakit.+
29 Dagiti panangukom naipasdeken a sititibker maipaay kadagiti managuy-uyaw,+ ken dagiti saplit maipaay iti bukot dagidiay maag.+
