Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Proverbio 17:1-28

17  Nasaysayaat ti sangkapisi a namaga a tinapay a nabuyogan iti kinaulimek+ ngem iti maysa a balay a napno kadagiti sakripisio ti panagririri.+  Ti adipen a mangipakpakita iti pannakatarus iturayannanto ti anak nga agtigtignay a nakababain,+ ket iti tengnga dagiti agkakabsat isu maaddaanto ti binglay iti tawid.+  Ti paggugoran a banga agpaay iti pirak ket ti urno agpaay iti balitok,+ ngem ni Jehova isu ti manangsukimat kadagiti puso.+  Ti managaramid iti dakes ipangagna ti bibig a manangpasakit.+ Ti palsipikador umimdeng iti dila a mangpataud kadagiti panagrigat.+  Daydiay mangaramid a mauy-uyaw ti maysa a bassitan iti sanikua inumsina ti Nangaramid kenkuana.+ Daydiay agrag-o iti pannakadidigra ti sabali saanto a mawayawayaan iti pannakadusa.+  Ti korona ti lallakay isu dagiti appoko,+ ket ti pintas ti annak isu dagiti ammada.+  Ti bibig ti kinapalungdo saan a mayanatup iti asinoman a nakuneng.+ Anian nga ad-adda pay a kasta ti bibig ti kinaulbod maipaay iti maysa a natan-ok!+  Ti sagut ket maysa a bato a manggun-od iti pabor kadagiti mata ti naindaklan a makinkukua iti dayta.+ Iti sadinoman a pagbaw-inganna isu agballigi.+  Daydiay mangab-abbong iti salungasing sapsapulenna ti ayat,+ ket daydiay agtultuloy a mangisarita ti maipapan iti maysa a banag pagsisinaenna dagidiay nasinged iti maysa ken maysa.+ 10  Ti pammabalaw naun-uneg ti maaramidanna iti maysa nga addaan pannakaawat+ ngem ti panangkabil iti maysa a maag iti sangagasut a daras.+ 11  Panagrebelde laeng ti sapsapulen daydiay dakes,+ ket naulpit ti mensahero a maibaon maibusor kenkuana.+ 12  Makasabat koma lattan ti maysa a tao iti oso a naulila kadagiti urbonna+ imbes nga iti asinoman a maag iti kinamaagna.+ 13  No maipapan iti asinoman a mangisupapak ti dakes maipaay iti naimbag,+ ti dakes saanto a pumanaw iti balayna.+ 14  Ti panangirugi iti rinnupir ket kas iti maysa a mangibubuang iti dandanum;+ gapuna sakbay a tumbuak ti riri, pumanawkan.+ 15  Ti asinoman a mangibatbatad a nalinteg daydiay nadangkes+ ken ti asinoman a mangibatbatad a nadangkes daydiay nalinteg+—uray isuda a dua nakarimrimonda ken Jehova.+ 16  Apay a ti gatad a panggun-od iti sirib adda iti ima ti maysa a maag,+ idinto ta isu awanan iti puso?+ 17  Ti pudno a kadua agayat iti isuamin a tiempo,+ ken ti kabsat a mayanak no adda rigat.+ 18  Ti tao nga awanan iti puso makialamano,+ nga agserbi a naan-anay a pammasiguro iti sanguanan ti kaduana.+ 19  Ti asinoman a mangay-ayat iti salungasing mangay-ayat iti dangadang.+ Ti asinoman a mangipangpangato iti seserrekanna agsapsapul iti pannakarpuog.+ 20  Daydiay nakillo ti pusona saanto a makasarak iti naimbag,+ ket daydiay nagtallikud iti dilana agtinnagto iti didigra.+ 21  Ti asinoman nga agbalin nga ama ti maag nga ubing—ladingit kenkuana dayta;+ ket ti ama ti nakuneng nga ubing saan nga agrag-o.+ 22  Ti puso a narag-o nasayaat a pangagas,+ ngem ti espiritu a nadanar magmaganna dagiti tulang.+ 23  Ti maysa a nadangkes mangalanto uray iti pasuksok manipud iti saklot+ tapno pilkogenna dagiti dana ti panangukom.+ 24  Ti sirib adda iti sanguanan ti rupa daydiay mannakaawat,+ ngem dagiti mata daydiay maag addada iti ungto ti daga.+ 25  Ti maag nga anak ket pakasemseman iti amana+ ken kinapait iti daydiay nangipasngay kenkuana.+ 26  Kanayonanna pay, ti panangipatay iti multa iti daydiay nalinteg saan a nasayaat.+ Ti panangkabil kadagiti natan-ok ket maibusor iti nalinteg.+ 27  Ti asinoman a mangmedmed iti sasaona agtagikua iti pannakaammo,+ ket ti tao nga addaan panangilasin nalamiis ti espirituna.+ 28  Uray ti asinoman a maag, no agtalinaed a siuulimek, maibilangto kas masirib;+ ti asinoman a mangikaem kadagiti bukodna a bibig, kas addaan iti pannakaawat.

Footnotes