Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Numeros 9:1-23

9  Ket ni Jehova nagsao ken Moises idiay let-ang ti Sinai iti maikadua a tawen ti iruruarda manipud daga ti Egipto, iti umuna a bulan,+ a kunkunana:  “Ita rebbeng nga isagana ti annak ti Israel ti sakripisio iti paskua+ iti naituding a tiempona.+  Iti maikasangapulo ket uppat nga aldaw iti daytoy a bulan iti nagbaetan ti dua a rabii+ rebbeng nga isaganayo dayta iti naituding a tiempona. Maitunos iti amin a paglinteganna ken iti amin a kadawyan a pamay-anna rebbeng nga isaganayo.”+  Gapuna nagsao ni Moises iti annak ti Israel tapno isaganada ti sakripisio iti paskua.  Idin insaganada ti sakripisio iti paskua iti umuna a bulan, iti maikasangapulo ket uppat nga aldaw ti bulan iti nagbaetan ti dua a rabii, idiay let-ang ti Sinai. Maitunos iti isuamin nga imbilin ni Jehova ken Moises, kasta ti inaramid ti annak ti Israel.+  Ita adda idi lallaki a narugitan babaen ti natauan a kararua+ iti kasta saanda a maisagana idi ti sakripisio iti paskua iti dayta nga aldaw. Gapuna dimmatagda iti sanguanan da Moises ken Aaron iti dayta nga aldaw.+  Kalpasanna kinuna kenkuana dagidiay a lallaki: “Narugitkami gapu iti natauan a kararua. Apay a mapawilankami a mangidatag iti daton+ ken Jehova iti naituding a tiempona iti tengnga ti annak ti Israel?”  Gapu itoy kinuna kadakuada ni Moises: “Agtakderkayo dita, ket bay-anyo a denggek ti ibilin ni Jehova maipapan kadakayo.”+  Kalpasanna ni Jehova nagsao ken Moises, a kunkunana: 10  “Agsaoka iti annak ti Israel, a kunaem, ‘Nupay ti asinoman a tao kadakayo wenno kadagiti kaputotanyo marugitan babaen ti kararua+ wenno agbambaniaga iti adayo, masapul met nga isaganana ti sakripisio iti paskua ken Jehova. 11  Iti maikadua a bulan,+ iti maikasangapulo ket uppat nga aldaw iti nagbaetan ti dua a rabii, rebbeng nga isaganada dayta. Rebbeng a kanenda agraman kadagiti di pinaalsa a tinapay ken napait a natnateng.+ 12  Saandanto a mangitedda iti aniaman iti dayta agingga iti bigat,+ ket rebbeng nga awan ti tukkolenda a tulang iti dayta.+ Rebbeng nga isaganada a maitunos iti intero a paglintegan ti paskua.+ 13  Ngem no nadalus idi ti tao wenno saan nga agbambaniaga ket liniwayanna nga isagana ti sakripisio iti paskua, dayta a kararua masapul ngarud a magessat kadagiti kailianna,+ agsipud ta ti daton ni Jehova saanna nga indatag iti naituding a tiempona. Manungsungbatto dayta a tao iti basolna.+ 14  “‘Ket no kas pagarigan ti maysa a ganggannaet nga agnanaed makipagtaeng kadakayo kas ganggannaet, masapul met nga isaganana ti sakripisio iti paskua ken Jehova.+ Maitunos iti paglintegan ti paskua ken maitunos iti kadawyan a pamay-an isu ti wagas a rebbeng nga aramidenna.+ Rebbeng nga adda maymaysa a paglintegan maipaay kadakayo, agpadpada a maipaay iti ganggannaet nga agnanaed ken maipaay iti katutubo iti daga.’”+ 15  Ita iti aldaw a pannakaipasdek ti tabernakulo,+ ti ulep inabbonganna ti tabernakulo ti tolda ti Pammaneknek,+ ngem iti rabii nagtalinaed ti kasla apuy+ iti rabaw ti tabernakulo agingga iti bigat. 16  Kasta idi a patinayon: Abbongan dayta ti ulep iti aldaw, ket ti langa ti apuy iti rabii.+ 17  Ket kaanoman nga agpangato ti ulep manipud rabaw ti tolda, agluas a dagus kalpasanna ti annak ti Israel,+ ket iti disso a pagtalinaedan ti ulep, sadiay ti pagpakarsuan ti annak ti Israel.+ 18  Iti panagbilin ni Jehova agluas ti annak ti Israel, ket iti panagbilin ni Jehova agpakarsoda.+ Iti amin nga al-aldaw a panagtaeng ti ulep iti rabaw ti tabernakulo, agtalinaedda a nakapakarso. 19  Ket no ibaybayag ti ulep ti panagyanna iti rabaw ti tabernakulo iti adu nga aldaw, salimetmetan met ti annak ti Israel ti pagrebbenganda ken Jehova iti kasta saanda nga agluas.+ 20  Ket no dadduma agtalinaed ti ulep iti sumagmamano nga aldaw iti rabaw ti tabernakulo. Iti panagbilin+ ni Jehova agtalinaedda a nakapakarso, ket iti panagbilin ni Jehova agluasda. 21  Ket no dadduma agtalinaed ti ulep+ manipud rabii agingga iti bigat; ket ti ulep nagpangato iti bigat, ket nagluasda. Uray no iti aldaw wenno iti rabii ti panagpangato ti ulep, nagluasda met.+ 22  Uray no dua nga aldaw wenno makabulan wenno ad-adu nga aldaw ti panangibaybayag ti ulep ti panagyanna iti rabaw ti tabernakulo babaen ti panagtaengna iti rabaw dayta, nagtalinaed a nakapakarso ti annak ti Israel ket saanda nga agluas, ngem agluasda no agpangato.+ 23  Iti panagbilin ni Jehova agpakarsoda, ket iti panagbilin ni Jehova agluasda. Sinalimetmetanda ti pagrebbenganda+ ken Jehova iti panagbilin ni Jehova babaen ken Moises.+

Footnotes