Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Numeros 6:1-27

6  Ket ni Jehova nagsao pay ken Moises, a kunkunana:  “Agsaoka iti annak ti Israel ket masapul a kunaem kadakuada, ‘No kas pagarigan ti maysa a lalaki wenno maysa a babai mangaramid iti naisangsangayan a kari nga agbiag kas maysa a Nazareo+ ken Jehova,  rebbeng nga umadayo iti arak ken makabartek nga inumen. Rebbeng a saanna nga inumen ti suka ti arak wenno ti suka ti makabartek nga inumen,+ wenno uray uminum iti aniaman a likido a naaramid manipud iti ubas, wenno uray mangan iti ubas a naganus wenno uray naipagango.  Iti amin nga al-aldaw ti kina-Nazareona rebbeng a saan a pulos mangan iti aniaman a naaramid manipud iti puon ti ubas, manipud kadagiti naata nga ubas agingga kadagiti ukis.  “‘Iti amin nga al-aldaw ti kari ti kina-Nazareona awan koma ti labaha nga aglasat iti rabaw ti ulona;+ agingga a dumteng iti pannakaan-anay ti al-aldaw a pannakaisinana maipaay ken Jehova, rebbeng a nasantuan babaen ti panangipalubos nga umatiddog dagiti linabag+ ti buok ti ulona.  Iti amin nga aldaw ti panagtalinaedna a naisina maipaay ken Jehova saanna a mabalin ti umasideg iti aniaman a natay a kararua.+  Saanna a mabalin a tulawan ti bagina uray gapu iti amana wenno inana wenno kabsatna a lalaki wenno kabsatna a babai no matayda,+ agsipud ta ti pagilasinan ti kina-Nazareona iti Diosna adda iti rabaw ti ulona.  “‘Iti amin nga al-aldaw ti kina-Nazareona isu nasantuan ken Jehova.  Ngem no kas pagarigan pettat a matay iti sibayna+ ti asinoman a matmatay iti kasta natulawanna ti ulo ti kina-Nazareona, masapul ngarud a kiskisanna+ ti ulona iti aldaw ti panangipasdek iti pannakagugorna. Rebbeng a kiskisanna iti maikapito nga aldaw. 10  Ket iti maikawalo nga aldaw rebbeng a mangyeg iti dua a pagaw wenno dua nga urbon nga atap a kalapati iti padi iti pagserkan ti tolda ti gimong.+ 11  Ket ti padi masapul nga aramatenna ti maysa kas daton gapu iti basol+ ket ti sabali kas daton a mapuoran+ ket mangaramid iti panangabbong maipaay kenkuana, yantangay nagbasol gapu iti natay a kararua. Kalpasanna masapul a santipikarenna ti ulona iti dayta nga aldaw. 12  Ket masapul nga agbiag kas Nazareo+ ken Jehova iti al-aldaw ti kina-Nazareona, ket masapul a mangyeg iti urbon a kalakian a karnero a tumawenen kas daton gapu iti babak;+ ket saanto a maibilang ti immun-una nga al-aldaw gapu ta tinulawanna ti kina-Nazareona. 13  “‘Ita daytoy ti linteg maipapan ti Nazareo: Iti aldaw a dumteng iti pannakaan-anay ti al-aldaw ti kina-Nazareona,+ maiyegto iti pagserkan ti tolda ti gimong. 14  Ket masapul a mangidatag kas datonna ken Jehova iti maysa a nasalun-at nga urbon a kalakian a karnero a tumawenen kas daton a mapuoran+ ken maysa a nasalun-at a kabaian a kordero a tumawenen kas daton gapu iti basol+ ken maysa a nasalun-at a kalakian a karnero kas pakikaykaysa a sakripisio,+ 15  ken sangalabba a di pinaalsa a nagtimbukel a tintinapay ti nasayaat nga arina,+ a nababasa iti lana,+ ken di pinaalsa a galgalieta a napulagidan iti lana,+ ken ti datonda a bukbukel+ ken ti datdatonda nga inumen.+ 16  Ket masapul nga idatag ida ti padi iti sanguanan ni Jehova ket idatagna ti datonna gapu iti basol ken ti datonna a mapuoran.+ 17  Ket idatagnanto ti kalakian a karnero kas pakikaykaysa a sakripisio+ ken Jehova agraman ti labba dagiti di pinaalsa a tinapay; ket masapul nga idatag ti padi ti datonna a bukbukel+ ken ti datonna nga inumen. 18  “‘Ket ti Nazareo masapul a kiskisanna+ ti ulo ti kina-Nazareona iti pagserkan ti tolda ti gimong, ket masapul nga alaenna ti buok ti ulo ti kina-Nazareona ket ikabilna iti apuy nga adda iti baba ti pakikaykaysa a sakripisio. 19  Ket ti padi masapul a mangala iti nailambong+ nga abaga manipud iti kalakian a karnero ken maysa a di pinaalsa a nagtimbukel a tinapay manipud iti labba, ken maysa a di pinaalsa a galieta,+ ket ikabilna ida kadagiti dakulap ti Nazareo kalpasan a nakiskisannan ti pagilasinan ti kina-Nazareona. 20  Ket ti padi masapul nga ililina ida nga agsublisubli kas daton a mailili iti sanguanan ni Jehova.+ Nasantuan a banag dayta iti padi, agraman ti barukong+ ti daton a mailili ken ti luppo ti kontribusion.+ Ket kalpasanna ti Nazareo mabalinna ti uminum iti arak.+ 21  “‘Daytoy ti linteg maipapan ti Nazareo+ nga agkari—ti datonna ken Jehova gapu iti kina-Nazareona, malaksid iti daydiay kabaelanna. Maitunos iti karina nga aramidenna, kasta ti rebbeng nga aramidenna gapu iti linteg ti kina-Nazareona.’” 22  Kalpasanna ni Jehova nagsao ken Moises, a kunkunana: 23  “Agsaoka ken Aaron ken iti annakna, a kunaem, ‘Kastoy ti rebbeng a panangbendisionyo+ iti annak ti Israel, a kunaenyo kadakuada: 24  “Bendisionannaka koma ni Jehova+ ken aywanannaka.+ 25  Pagsilnagen koma kenka ni Jehova ti rupana,+ ket paraburannaka koma.+ 26  Itannawag koma kenka ni Jehova ti rupana+ ket itudingannaka iti talna.”’+ 27  Ket masapul nga ikabilda ti naganko+ iti annak ti Israel, tapno siak bendisionak ida.”+

Footnotes