Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Numeros 5:1-31

5  Ket ni Jehova nagsao pay ken Moises, a kunkunana:  “Bilinem ti annak ti Israel a paruarenda manipud pakarso ti tunggal agkukutel a tao+ ken tunggal maysa nga addaan iti panagpasayasay+ ken tunggal maysa a narugit gapu iti kararua a pimmusay.+  Uray no lalaki wenno babai rebbeng a paruarenyo ida. Rebbeng nga ibaonyo ida iti ruar ti pakarso,+ tapno saanda a maakaran+ dagiti pakarso dagidiay nga iti tengngada agtabtabernakuloak.”+  Ket ti annak ti Israel inaramidda ti kasta, ti mismo a panangibaon kadakuada iti ruar ti pakarso. Kas iti sinao ni Jehova ken Moises, kasta ti inaramid ti annak ti Israel.  Ket intuloy ni Jehova ti nagsao ken Moises, a kunkunana:  “Sawem iti annak ti Israel, ‘No maipapan iti maysa a lalaki wenno babai, no kas pagarigan aramidenda ti aniaman kadagiti amin a basol ti sangatauan iti panangaramidda ti tignay a di kinamatalek maikaniwas ken Jehova, nakabasol met dayta a kararua.+  Ket masapul nga ipudnoda+ ti basolda a naaramidanda, ket masapul nga isublina ti pakabuklan ti gatad ti pannakabasolna, kasta met a manginayon ti apagkalimana iti dayta,+ ket masapul nga itedna iti daydiay nangaramidanna iti dakes.  Ngem no ti naud-udi a nadakamat awan asideg a kabagianna a pangisublian iti gatad ti pannakabasol, ti gatad ti pannakabasol a maisubli ken Jehova kukua ti padi, malaksid pay ti kalakian a karnero ti panangabbong a pangaramidnanto iti panangabbong a maipaay kenkuana.+  “‘Ket ti tunggal kontribusion+ ti amin a nasantuan a bambanag+ ti annak ti Israel, nga idatagdanto iti padi, rebbeng nga agbalin a kukuana.+ 10  Ket dagiti nasantuan a banag ti tunggal maysa agtalinaedto a kukuana. Aniaman nga ited ti tunggal maysa iti padi, agbalinto dayta a kukuana.’” 11  Ket intultuloy ni Jehova ti agsao ken Moises, a kunkunana: 12  “Agsaoka iti annak ti Israel, ket masapul a kunaem kadakuada, ‘No kas pagarigan sumiasi ti asinoman nga asawa ti maysa a lalaki ta mangaramid iti tignay a di kinamatalek maikaniwas kenkuana,+ 13  ket ti sabali a lalaki pudno a makikaidda kenkuana ket agparuar iti semilia,+ ket nailimed dayta kadagiti mata ti asawana a lalaki+ ken nagtalinaed a di natakuatan, ket isu, iti biangna, tinulawanna ti bagina ngem awan saksi maibusor kenkuana, ket isu saan a natiliwan; 14  ket ti espiritu ti panagimon+ immapay kenkuana, ket nagatap iti kinamatalek ti asawana a babai, ket iti kinapudnona tinulawanna ti bagina, wenno ti espiritu ti panagimon immapay kenkuana, ket nagatap iti kinamatalek ti asawana a babai, ngem iti kinapudnona saanna a tinulawan ti bagina; 15  ngarud ti lalaki masapul nga iyegna ti asawana iti padi+ ket iyegna ti datonna a maikuyog kenkuana, apagkapullo ti maysa nga efa a sebada nga arina. Saannanto a bukbokan iti lana wenno ikkan iti olibano,+ agsipud ta maysa dayta a bukbukel a daton ti panagimon, maysa a pakalaglagipan a daton a bukbukel a mangipalagip iti biddut. 16  “‘Ket masapul nga isu iyadani ti padi ket pagtakderenna iti sanguanan ni Jehova.+ 17  Ket masapul a mangala ti padi iti nasantuan a danum iti damili a pagkargaan, ket mangalanto ti padi iti sumagmamano iti tapok nga adda iti suelo ti tabernakulo, ket masapul nga ikabilna iti danum. 18  Ket ti padi masapul a pagtakderenna ti babai iti sanguanan ni Jehova ket pawakrayna ti buok ti ulo ti babai ket ikabilna kadagiti dakulapna ti pakalaglagipan a daton a bukbukel, awan sabali, ti daton a bukbukel ti panagimon,+ ket iti ima ti padi rebbeng nga adda ti napait a danum a mangyeg iti lunod.+ 19  “‘Ket masapul a pagsapataen ti padi, ket masapul a kunaenna iti babai: “No awan lalaki a nakikaidda kenka ken no bayat ti kaaddam iti sidong ti asawam+ dika simiasi a nagturong iti aniaman a kinarugit, mawayawayaanka iti ibunga daytoy napait a danum a mangyeg iti lunod. 20  Ngem sika, no kas pagarigan simiasika bayat ti kaaddam iti sidong ti asawam+ ken no kas pagarigan tinulawam ta bagim ket adda lalaki a nangikabil kenka iti agruar a semiliana,+ malaksid iti asawam,—” 21  Masapul a ti padi pagsapataenna ita ti babai iti sapata a pakairamanan ti panangilunod,+ ket ti padi masapul a kunaenna iti babai: “Ni Jehova isaadnaka koma a maysa a lunod ken maysa a sapata iti tengnga dagiti kailiam babaen ti panangipalubos ni Jehova a kumbet ti luppom,+ ken bumsog ti tianmo. 22  Ket daytoy a danum a mangyeg iti lunod sumrekto kadagiti bagismo tapno pabussogenna ti tianmo ken pakebbetenna ti luppom.” Iti daytoy masapul a kunaen ti babai: “Amen! Amen!” 23  “‘Ket masapul nga isurat ti padi dagitoy a panangilunod iti libro+ ket masapul a punasenna+ ida iti napait a danum. 24  Ket masapul a painumenna ti babai iti napait a danum a mangyeg iti lunod,+ ket ti danum a mangyeg iti lunod sumrekto kenkuana kas maysa a banag a napait. 25  Ket ti padi masapul nga alaenna ti bukbukel a daton+ ti panagimon iti ima ti babai ket ililina nga agsublisubli ti daton a bukbukel iti sanguanan ni Jehova, ket masapul nga iyegna iti asideg ti altar. 26  Ket ti padi masapul a mangpetpet iti sumagmamano iti daton a bukbukel kas mangipalagip+ iti dayta ket masapul a pagasukenna iti rabaw ti altar, ket kalpasanna painumennanto ti babai iti danum. 27  Inton napainumnan iti danum, mapasamakto met a no natulawanna ti bagina ta nakaaramid iti tignay a di kinamatalek iti asawana,+ ti danum a mangyeg iti lunod sumrekto ngarud kenkuana a kas maysa a banag a napait, ket bumsogto ti tianna, ken kumbetto ti luppona, ket ti babai agbalinto a lunod iti tengnga dagiti kailianna.+ 28  Nupay kasta, no ti babai saanna a natulawan ti bagina no di ket isu nadalus, siwayawayanto ngarud iti kasta a pannakadusa;+ ket mapagsikogto babaen iti semilia. 29  “‘Daytoy ti linteg maipapan ti panagimon,+ no ti maysa a babai sumiasi+ bayat ti kaaddana iti sidong ti asawana,+ ket tulawanna ti bagina, 30  wenno iti kaso ti maysa a lalaki a ti espiritu ti panagimon umapay kenkuana, ket atapenna ti asawana a babai iti di kinamatalek; ket masapul a pagtakderenna ti asawa a babai iti sanguanan ni Jehova, ket ti padi masapul nga itungpalna kenkuana amin daytoy a linteg. 31  Ket ti lalaki awananto iti basol, ngem dayta nga asawa a babai manungsungbatto iti biddutna.’”

Footnotes