Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Numeros 36:1-13

36  Ket immasideg dagiti pannakaulo ti amma ti pamilia ti annak ni Galaad nga anak ni Maquir+ nga anak ni Manases iti pampamilia ti annak ni Jose ket nagsaoda iti sanguanan ni Moises ken dagiti panguluen, dagiti pannakaulo ti amma ti annak ti Israel,  ket kinunada: “Ni Jehova binilinna ni apok nga itedna ti daga kas tawid babaen ti binnunot+ iti annak ti Israel; ket ni apok binilin ni Jehova nga itedna ti tawid ni Zelofehad a kabsatmi iti annakna a babbai.+  No mapasamak nga alaen ida kas assawa ti asinoman iti annak ti sabsabali a tribu ti annak ti Israel, maikkatto met ti tawid dagiti babbai manipud iti tawid dagiti ammami ket mainayonto iti tawid ti tribu a mangtagikua kadakuada, iti kasta maikkat dayta manipud iti bingay ti tawidmi.+  Ita no maaramid ti Jubileo+ iti annak ti Israel, ti tawid dagiti babbai mainayonto met iti tawid ti tribu a mangtagikua kadakuada; iti kasta maikkat ti tawidda manipud iti tawid ti tribu dagiti ammami.”  Idin binilin ni Moises ti annak ti Israel iti panagbilin ni Jehova, a kunkunana: “Umiso ti sasawen ti tribu ti annak ni Jose.  Daytoy ti sao nga imbilin ni Jehova maipaay iti annak a babbai ni Zelofehad,+ a kunkunana, ‘Mabalinda ti makiasawa iti asinoman a naimbag kadagiti matada. Isuna laeng ta rebbeng a makiasawada iti pamilia ti tribu dagiti ammada.+  Ket awan tawid ti annak ti Israel ti rebbeng nga agrikus iti trinibuntribu, agsipud ta ti annak ti Israel rebbeng a kumpetda tunggal maysa iti tawid ti tribu dagidi ammana.  Ket tunggal anak a babai a mangtagikua iti tawid manipud kadagiti tribu ti annak ti Israel, rebbeng nga agbalin nga asawa ti maysa iti pamilia ti tribu ni amana,+ tapno ti annak ti Israel mangtagikuada tunggal maysa iti tawid dagidi ammana.  Ket awan ti tawid nga agrikus manipud maysa a tribu agingga iti sabali a tribu, agsipud ta dagiti tribu ti annak ti Israel rebbeng a kumpetda tunggal maysa iti bukodna a tawid.’” 10  Kas iti imbilin ni Jehova ken Moises, kasta ti inaramid ti annak a babbai ni Zelofehad.+ 11  Iti kasta da Mala, Tirza ken Hogla ken Milca ken Noe, ti annak a babbai ni Zelofehad,+ nagbalinda nga assawa ti annak ti kakabsat ni amada. 12  Nagbalinda nga assawa ti sumagmamano kadagiti pamilia ti annak ni Manases nga anak ni Jose, tapno ti tawidda makapagtalinaed a mairaman iti tribu ti pamilia ni amada. 13  Dagitoy ti bilbilin+ ken dagiti hudisial a pangngeddeng nga imbilin ni Jehova babaen ken Moises iti annak ti Israel iti desierto a tantanap ti Moab iti igid ti Jordan idiay Jerico.+

Footnotes