Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Numeros 34:1-29

34  Ket ni Jehova nagsao pay ken Moises, a kunkunana:  “Bilinem ti annak ti Israel, ket masapul a kunaem kadakuada, ‘Sumrekkayo iti daga ti Canaan.+ Daytoy ti daga a maitumpongto kadakayo babaen ti tawid,+ ti daga ti Canaan sigun kadagiti beddengna.+  “‘Ket ti sikiganyo iti abagatan agbalinto a manipud let-ang ti Zin iti abay ti Edom,+ ket ti beddengyo iti abagatan manipudto iti ungto ti Asin a Baybay+ iti daya.  Ket agbaliwto ti turong ti beddengyo manipud abagatan ti sasang-atan ti Acrabbim+ ken bumallasiw nga agturong iti Zin, ket ti paginggaanna idiayto abagatan ti Cades-barnea;+ ket rummuarto nga agturong iti Hazar-addar+ ken bumallasiw nga agturong iti Azmon.  Ket agbaliwto ti turong ti beddeng idiay Azmon nga agturong iti naapres a ginget ti Egipto,+ ket sadiayto Baybay+ ti paginggaanna.  “‘No maipapan iti beddeng iti laud,+ agpaayto kadakayo ti Dakkel a Baybay ken ti takdang. Daytoy ti agbalinto a beddengyo iti laud.  “‘Ita daytoy ti agbalinto a beddengyo iti amianan: Manipud Dakkel a Baybay markaanyonto agingga iti Bantay Hor+ kas beddeng maipaay kadakayo.  Manipud Bantay Hor markaanyonto ti beddeng agingga iti seserkan ti Hamat,+ ket ti paginggaan ti beddeng idiayto Zedad.+  Ket rummuarto ti beddeng agingga iti Zifron, ket ti paginggaanna idiayto Hazar-enan.+ Daytoy ti agbalinto a beddengyo iti amianan. 10  “‘Kalpasanna kas beddengyo iti daya masapul a markaanyo maipaay kadakayo ti manipud Hazar-enan agingga iti Sefam. 11  Ket sumalogto ti beddeng manipud Sefam agingga iti Ribla iti daya ti Ain, ket sumalogto ti ketegan ket aglayon iti makindaya a darisdis ti baybay ti Kinneret.+ 12  Ket sumalogto ti ketegan agingga iti Jordan, ket ti paginggaanna idiayto Asin a Baybay.+ Daytoy ti agbalinto a dagayo+ sigun kadagiti beddengna iti intero nga aglawlaw.’” 13  Gapuna binilin ni Moises ti annak ti Israel, a kunkunana: “Daytoy ti daga a pagbibingayanyonto a kas sanikua babaen ti binnunot,+ kas iti imbilin ni Jehova nga ited iti siam ket kagudua a tribu.+ 14  Ta immawaten ti tribu ti annak dagiti Rubenita sigun iti balay dagiti ammada ken ti tribu ti annak dagiti Gadita sigun iti balay dagiti ammada, ket innalan ti kagudua a tribu ni Manases ti tawidda.+ 15  Ti dua ket kagudua a tribu innaladan ti tawidda iti rehion ti Jordan iti abay ti Jerico iti agpadaya nga agturong iti leleggakan ti init.”+ 16  Ket ni Jehova nagsao pay ken Moises, a kunkunana: 17  “Dagitoy ti nagnagan dagiti lallaki a mangbingayto iti daga kadakayo tapno tagikuaenyo, ni Eleazar+ a padi ken ni Josue nga anak ni Nun.+ 18  Ket mangalakayto iti maysa a panguluen manipud iti tunggal tribu a mangbingay iti daga a maipaay a sanikua.+ 19  Ket dagitoy ti nagnagan dagiti lallaki: Iti tribu ni Juda,+ ni Caleb nga anak ni Jefune;+ 20  ket iti tribu ti annak ni Simeon,+ ni Semuel nga anak ni Amihud; 21  iti tribu ni Benjamin,+ ni Elidad nga anak ni Kislon; 22  ket iti tribu ti annak ni Dan+ maysa a panguluen, ni Buqui nga anak ni Jogli; 23  iti annak ni Jose,+ iti tribu ti annak ni Manases+ maysa a panguluen, ni Haniel nga anak ni Efod; 24  ket iti tribu ti annak ni Efraim+ maysa a panguluen, ni Quemuel nga anak ni Siftan; 25  ket iti tribu ti annak ni Zabulon+ maysa a panguluen, ni Elizafan nga anak ni Parnac; 26  ket iti tribu ti annak ni Isacar+ maysa a panguluen, ni Paltiel nga anak ni Azan; 27  ket iti tribu ti annak ni Aser+ maysa a panguluen, ni Ahihud nga anak ni Selomi; 28  ket iti tribu ti annak ni Neftali+ maysa a panguluen, ni Pedahel nga anak ni Amihud.” 29  Dagitoy ti binilin ni Jehova a mamagbalin iti annak ti Israel nga agtagikua iti daga ti Canaan.+

Footnotes