Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Numeros 22:1-41

22  Kalpasanna nagluas ti annak ti Israel ket nagpakarsoda iti desierto a tantanap ti Moab+ iti ballasiw ti Jordan manipud Jerico.  Ket nakita ni Balak+ nga anak ni Zippor ti isuamin nga inaramid ti Israel kadagiti Amoreo.  Ket naaliaw unay ti Moab kadagiti umili, gapu ta aduda; ket nangrugi a makarikna ti Moab iti mamagsakit nga alinggaget gapu iti annak ti Israel.+  Ket kinuna ti Moab kadagiti lallakay ti Midian:+ “Ita daytoy a kongregasion amilennanto ti amin nga aglawlawtayo a kas iti toro nga amilenna ti berde a mula iti talon.” Ket ni Balak+ nga anak ni Zippor isu ti ari ti Moab iti dayta a mismo a tiempo.  Nangibaon ita kadagiti mensahero a mapan ken Balaam+ nga anak ni Beor idiay Petor,+ nga adda iti igid ti Karayan+ iti daga ti annak ti tattaona, tapno ayabanna, a kunkunana: “Adtoy! Rimmuar ti maysa nga ili manipud Egipto. Adtoy! Inabbongandan ti daga agingga iti kabaelan a kitaen ti maysa,+ ket agnanaedda iti mismo a sanguanak.  Ket ita umayka, pangngaasim; ilunodmo+ daytoy nga ili maipaay kaniak, ta nabilbilegda ngem siak. Bareng kabaelak a kabilen ida ket mapagtalawko ida iti daga; ta pagaammok unay a daydiay bendisionam maysa a bendito ket daydiay ilunodmo mailunod.”+  Gapuna dagiti lallakay ti Moab ken dagiti lallakay ti Midian nagdaliasatda nga adda iti im-imada dagiti bayad iti panagpadles+ ket napanda ken Balaam+ ket sinaoda kenkuana ti sasao ni Balak.  Iti kasta kinunana kadakuada: “Agdaguskayo ditoy ita a rabii, ket sigurado a mangisubliakto kadakayo iti sao kas iti sawen kaniak ni Jehova.”+ Gapuna nakipagyan ken Balaam dagiti prinsipe ti Moab.  Idin ti Dios immay ken Balaam ket kinunana:+ “Siasino dagitoy lallaki nga adda kenka?” 10  Gapuna kinuna ni Balaam iti pudno a Dios: “Ni Balak+ nga anak ni Zippor, ti ari ti Moab, nagbaon kaniak, a kunkunana, 11  ‘Adtoy! Dagiti umili a rumrummuar manipud Egipto, ket ab-abbonganda ti daga agingga iti kabaelan a kitaen ti mata.+ Ita umayka, ilunodmo ida maipaay kaniak.+ Bareng kabaelak ti makirupak kadakuada ket pudno a mapagtalawko ida.’” 12  Ngem ti Dios kinunana ken Balaam: “Dika kumuyog kadakuada. Dika ilunod dagiti umili,+ ta benditoda.”+ 13  Kalpasan dayta bimmangon ni Balaam iti bigat ket kinunana kadagiti prinsipe ni Balak: “Mapankayo iti pagilianyo, agsipud ta ni Jehova nagkitakit a mamalubos kaniak a kumuyog kadakayo.” 14  Gapuna timmakder dagiti prinsipe ti Moab ket dimtengda ken Balak ket kinunada: “Nagkitakit ni Balaam a kumuyog kadakami.”+ 15  Nupay kasta, nangibaon manen ni Balak kadagiti sabali a prinsipe nga ad-adu ken nadaydayaw ngem kadagiti immun-una. 16  Kalpasanna dimtengda ken Balaam ket kinunada kenkuana: “Daytoy ti kinuna ni Balak nga anak ni Zippor, ‘Dika koma paigawid, pangngaasim, iti iyaaymo kaniak. 17  Ta di bumurong a padayawankanto iti kasta unay,+ ket ti isuamin a sawem kaniak aramidekto.+ Gapuna umayka, pangngaasim. Ilunodmo daytoy nga ili maipaay kaniak.’” 18  Ngem simmungbat ni Balaam ket kinunana kadagiti adipen ni Balak: “Uray no ited koma kaniak ni Balak ti balayna a napno iti pirak ken balitok, saanko a kabaelan ti lumbes iti bilin ni Jehova a Diosko, tapno aramidek ti maysa a banag a bassit wenno dakkel.+ 19  Ket ita agyankayo met ditoy, pangngaasiyo, ita a rabii tapno maammuak no ania ti kanayonan a pakisawanto kaniak ni Jehova.”+ 20  Idin ti Dios immay ken Balaam iti rabii ket kinunana kenkuana: “No dagitoy a lallaki immayda tapno ayabandaka, tumakderka, kumuyogka kadakuada. Ngem ti laeng sao a sawekto kenka ti mabalinmo a sawen.”+ 21  Kalpasan dayta bimmangon ni Balaam iti bigat ket siniliaanna ti asnana ket kimmuyog kadagiti prinsipe ti Moab.+ 22  Ket nangrugi a gumil-ayab ti unget ti Dios agsipud ta isu mapan idi; ket ti anghel ni Jehova nagsaad iti dalan tapno sarangtenna.+ Ket sisasakay idi iti asnana, ket dua a katulonganna ti naikuyog kenkuana. 23  Ket ti asna nakitana ti anghel ni Jehova a nagsaad iti dalan a siiiggem iti naasut a kampilanna;+ ket pinadas ti asna ti sumiasi iti dalan tapno makapan iti talon, ngem rinugian ni Balaam a bauten ti asna tapno iturongna iti dalan. 24  Ket ti anghel ni Jehova nagtalinaed a sitatakder iti akikid a dalan iti nagbaetan dagiti kaubasan, nga addaan bato a pader iti daytoy a sikigan ken bato a pader iti dayta a sikigan. 25  Ket ti asna nagtultuloy a nakitana ti anghel ni Jehova ket rinugianna nga ipideg ti bagina iti pader ket iti kasta malipitna iti pader ti saka ni Balaam; ket ad-adda a binautbautna. 26  Ita limmabas manen ti anghel ni Jehova ket nagtakder iti akikid a lugar, a sadiay awan ti dalan a pangliklikan nga agpakannawan wenno agpakannigid. 27  Idi a ti asna nakitana ti anghel ni Jehova, nagidda ita iti baba ni Balaam; iti kasta gimmil-ayab ti unget ni Balaam,+ ket binabautna ti asna babaen ti sarukodna. 28  Kamaudiananna linuktan ni Jehova ti ngiwat ti asna+ ket kinunana ken Balaam: “Ania ti inaramidko kenka iti kasta binautnak kadagitoy namitlo?”+ 29  Gapu itoy kinuna ni Balaam iti asna: “Agsipud ta nakadawdawelka kaniak. No adda koma laeng kampilan iti imak, napapatayka koma itan!”+ 30  Idin ti asna kinunana ken Balaam: “Saan aya a siak ti asnam a nagsaksakayam iti unos ti amin a panagbiagmo agingga itoy nga aldaw? Kadawyanko aya nga aramiden kenka ti kastoy?”+ Iti dayta kinunana: “Saan!” 31  Ket linuktan ni Jehova dagiti mata ni Balaam,+ iti kasta nakitana ti anghel ni Jehova a nagsaad iti dalan a siiiggem iti naasut a kampilanna. Madagdagus a nagrukob ket inruknoyna ti bagina buyogen ti rupana. 32  Idin kinuna kenkuana ti anghel ni Jehova: “Apay a binautmo ti asnam kadagitoy namitlo? Adtoy! Siak—rimmuarak a sumaranget, agsipud ta ti dalanmo sumarakusok a maibusor iti pagayatak.+ 33  Ket nakitanak ti asna ket pinadasna ti lumiklik iti sanguanak kadagitoy namitlo.+ Kas pagarigan saan a simiasi iti sanguanak! Sika a mismo napatayka koma itan,+ ngem isu tinaginayonko koma a sibibiag.” 34  Gapu itoy kinuna ni Balaam iti anghel ni Jehova: “Nagbasolak,+ agsipud ta saanko nga ammo a sika ti naisaad iti dalan a sumabet kaniak. Ket ita, no dakes dayta kadagita matam, bay-annak nga agsubli.” 35  Ngem ti anghel ni Jehova kinunana ken Balaam: “Kumuyogka kadagiti lallaki;+ ket awan sabalin no di ti sao a sawekto kenka ti mabalinmo a sawen.”+ Ket nagtultuloy ni Balaam a nakikuyog kadagiti prinsipe ni Balak. 36  Idi nangngeg ni Balak a dimteng ni Balaam, madagdagus a rimmuar a sumabet kenkuana iti siudad ti Moab, nga adda iti igid ti Arnon, nga adda iti ungto ti teritoria.+ 37  Kalpasanna ni Balak kinunana ken Balaam: “Saan aya nga iti kinapudnona nagbaonak kenka tapno ayabanka? Apay a dika immay kaniak? Saan kadi a pudpudno ken agpaypayso a kabaelak ti mangpadayaw kenka?”+ 38  Gapu itoy ni Balaam kinunana ken Balak: “Adtoy immayak kenka itan. Kabaelakto kadi latta ti agsao iti maysa a banag?+ Ti sao nga ikabilto ti Dios iti ngiwatko isu ti sawek.”+ 39  Gapuna ni Balaam kimmuyog ken Balak ket dimtengda iti Kiriat-huzot. 40  Ket ni Balak nagisakripisio iti bakbaka ken karkarnero+ ket pinatulodanna iti sumagmamano ni Balaam ken dagiti prinsipe a naikuyog kenkuana. 41  Ket naaramid iti bigat a ni Balak innalana ni Balaam ket insang-atna iti Bamot-baal,+ tapno makitana manipud sadiay ti pakabuklan dagiti umili.+

Footnotes