Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Numeros 21:1-35

21  Ita ti Canaanita nga ari ti Arad,+ a nagnaed idiay Negeb,+ nangngegna a ti Israel immay a dimmalan iti Atarim, ket rinugianna ti makirupak iti Israel ken mangipanaw iti sumagmamano kadakuada kas kautibo.  Iti kasta ti Israel nagkari ken Jehova ket kinunana:+ “No di bumurong nga iyawatmonto daytoy nga ili iti imak, sigurado nga ipaaykonto met dagiti siudadda iti pannakadadael.”+  Gapuna immimdeng ni Jehova iti timek ti Israel ket inyawatna dagiti Canaanita; ket impaayda ida ken dagiti siudadda iti pannakadadael. Ngarud pinanagananda dayta a disso iti Horma.+  Bayat ti panagtultuloyda nga agdaliasat manipud Bantay Hor+ a dumalan iti Nalabaga a Baybay tapno likawenda ti daga ti Edom,+ nangrugi a nabannogan ti kararua dagiti umili gapu iti dalan.  Ket sinasao dagiti umili maibusor iti Dios+ ken ni Moises:+ “Apay nga inaondakami idiay Egipto tapno mataykami iti let-ang?+ Ta awan tinapay ken awan danum,+ ket karuroden ti kararuami ti uumsien a tinapay.”+  Gapuna nangibaon ni Jehova kadagiti nagita a serpiente+ iti tengnga dagiti umili, ket kinagkagatda dagiti umili, iti kasta natay ti adu a tattao ti Israel.+  Kamaudiananna dagiti umili immayda ken Moises ket kinunada: “Nagbasolkami,+ agsipud ta nagsaokami maibusor ken Jehova ken maibusor kenka. Mangibabaetka ken Jehova tapno ikkatenna kadakami dagiti serpiente.”+ Ket nangibabaet ni Moises maigapu kadagiti umili.+  Idin ni Jehova kinunana ken Moises: “Mangaramidka maipaay kenka iti umap-apuy nga uleg ket ikabilmo iti maysa a pagilasinan a teddek. Ket mapasamakto a no ti asinoman nakagat, kasapulan ngarud a kumita iti dayta ket iti kasta agtalinaedto a sibibiag.”+  Madagdagus a nangaramid ni Moises iti serpiente a gambang+ ket inkabilna iti pagilasinan a teddek;+ ket napasamak a no ti maysa a serpiente nakagatna ti maysa a tao ket minatmatanna+ ti gambang a serpiente, nagtalinaed ngarud a sibibiag.+ 10  Kalpasan dayta nagluas ti annak ti Israel ket nagpakarsoda idiay Obot.+ 11  Kalpasanna nagluasda manipud Obot ket nagpakarsoda idiay Iye-abarim,+ iti let-ang nga agturong iti sango ti Moab, nga agpaleleggakan ti init. 12  Manipud sadiay nagluasda ket nagpakarsoda iti abay ti naapres a ginget ti Zered.+ 13  Manipud sadiay nagluasda ket nagpakpakarsoda iti rehion ti Arnon,+ nga adda iti let-ang a mayunnat manipud ketegan dagiti Amoreo; ta ti Arnon isu ti beddeng ti Moab, iti nagbaetan ti Moab ken dagiti Amoreo. 14  Dayta ti makagapu a naikuna iti libro ti Gubgubat ni Jehova: “Ti Vaheb idiay Sufa ken dagiti naapres a ginget ti Arnon, 15  ken ti wangawangan dagiti naapres a ginget, a nagbakkug a tumurong iti nagtugawan ti Ar+ ken nagsadag iti ketegan ti Moab.” 16  Sumaganad manipud sadiay nagturongda iti Beer.+ Daytoy ti bubon a maipapan iti dayta kinuna ni Jehova ken Moises: “Ummongem dagiti umili, ket ipaayak ida iti danum.”+ 17  Iti dayta a tiempo kinanta ti Israel daytoy a kanta:+ “Agburayokka, O bubon! Sumungbatkayo iti dayta, dakayo a tattao! 18  Ti maysa a bubon, kinutkot dagiti prinsipe. Kinali dagiti natan-ok ti ili, Babaen iti sarukod ti komandante,+ babaen kadagiti bukodda a sarukod.” Kalpasanna manipud let-ang nagturongda iti Mattana. 19  Ket manipud Mattana nagturongda iti Nahaliel, ket manipud Nahaliel nagturongda iti Bamot.+ 20  Ket manipud Bamot nagturongda iti ginget nga adda iti tay-ak ti Moab,+ iti ngatuen ti Pisga,+ ket tuman-aw iti turong ti sanguanan ti Jesimon.+ 21  Ti Israel nangibaon ita kadagiti mensahero a mapan ken Sihon+ nga ari dagiti Amoreo, a kunkunana: 22  “Bay-annak a lumasat iti dagam. Saankamto a sumiasi nga agturong iti talon wenno iti kaubasan. Awanto ti bubon nga inumanmi iti danum. Aglasatkamto iti dalan ti ari agingga a makalabaskami iti teritoriam.”+ 23  Ket ni Sihon saanna a pinalubosan ti Israel a lumasat iti teritoriana,+ no di ket inummong ni Sihon ti amin a tattaona ket rimmuarda a sumabet iti Israel idiay let-ang, ket dimtengda iti Jahaz+ ket rinugianda ti nakirupak iti Israel. 24  Iti kasta isu kinabil ti Israel babaen ti tadem ti kampilan+ ket tinagikuana ti dagana+ manipud Arnon+ agingga iti Jaboc,+ iti asideg ti annak ti Ammon; agsipud ta ti Jazer+ ti ketegan ti annak ti Ammon.+ 25  Gapuna innala ti Israel amin dagitoy a siudad, ket nangrugi a nagnaed ti Israel kadagiti amin a siudad dagiti Amoreo,+ idiay Hesbon+ ken kadagiti amin nga agpampannuray nga ilina. 26  Ta ti Hesbon isu ti siudad ni Sihon.+ Isu idi ti ari dagiti Amoreo,+ ket isu daydiay nakirupak iti ari ti Moab idi unana ket innalana ti intero a dagana manipud imana agingga iti Arnon.+ 27  Dayta ti makagapu a kunaen dagiti manangisao kadagiti rabrabak a daniw: “Umayka iti Hesbon. Maibangon koma ti siudad ni Sihon ket maipasdek a sititibker. 28  Ta rimmuar ti apuy manipud Hesbon,+ maysa a gil-ayab manipud ili ti Sihon. Inibusna ti Ar+ ti Moab, dagiti makinkukua kadagiti nangato a disso ti Arnon. 29  Asika pay, Moab! Sigurado a mapukawkanto, O tattao ni Kemos!+ Sigurado nga iyawatnanto ti annakna a lallaki kas dagidiay nakatalaw ken ti annakna a babbai iti pannakakautibo iti ari dagiti Amoreo, ni Sihon. 30  Gapuna panaentayo ida. Sigurado a mapukawto ti Hesbon agingga iti Dibon,+ Ken dagiti babbai agingga iti Nofa, dagiti lallaki agingga iti Medeba.”+ 31  Ket nangrugi nga agnaed ti Israel iti daga dagiti Amoreo.+ 32  Kalpasanna nangibaon ni Moises iti sumagmamano nga agsimisim iti Jazer.+ Gapuna kinautiboda dagiti agpampannuray nga ilina ken inikkatanda iti sanikua dagiti Amoreo nga adda idi sadiay.+ 33  Kalpasan dayta nagbaw-ingda ket simmang-atda iti dalan ti Basan.+ Gapu itoy ni Og+ nga ari ti Basan rimmuar a sumabet kadakuada, isu ken ti amin a tattaona, iti bakal ti Edrei.+ 34  Ni Jehova kinunana ita ken Moises: “Dika agbuteng kenkuana,+ ta sigurado nga isu ken ti amin a tattaona ken ti dagana iyawatkonto ita imam;+ ket masapul nga aramidem kenkuana ti kas iti inaramidmo ken Sihon, ti ari dagiti Amoreo, nga agnanaed idi idiay Hesbon.”+ 35  Gapuna isu kinabilda ken ti annakna ken ti amin a tattaona, agingga nga awan ti nakalasat a nabati kenkuana;+ ket tinagikuada ti dagana.+

Footnotes