Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Numeros 16:1-50

16  Ket ni Kore+ nga anak ni Izar,+ ti anak ni Cohat,+ ti anak ni Levi,+ timmakder, agraman kada Datan+ ken Abiram+ nga annak ni Eliab,+ ken ni On nga anak ni Peleth, ti annak ni Ruben.+  Ket timmakderda iti sanguanan ni Moises, isuda ken ti dua gasut ket limapulo a lallaki iti annak ti Israel, papanguluen ti gimong, dagidiay napaayaban iti gimong, agdindinamag a lallaki.  Gapuna naguummongda a maibusor+ kada Moises ken Aaron ket kinunada kadakuada: “Umanayen dayta kadakayo, agsipud ta ti intero a gimong nasantuanda amin+ ket ni Jehova adda iti tengngada.+ Apay, ngarud, nga ipangatoyo ti bagbagiyo iti ngatuen ti kongregasion ni Jehova?”+  Idi nangngeg dayta ni Moises, inruknoyna a madagdagus ti rupana.  Kalpasanna nagsao ken Kore ken iti intero a gimongna, a kunkunana: “Inton bigat ipakaammonto ni Jehova no asino ti kukuana+ ken no asino ti nasantuan+ ken no asino ti masapul nga umasideg kenkuana,+ ket ti siasinoman a pilienna+ umasidegto kenkuana.  Aramidenyo daytoy: Iyalaanyo ti bagbagiyo kadagiti pagikkan ti apuy,+ ni Kore ken ti intero a gimongna,+  ket mangikabilkayo iti apuy kadakuada ken mangikabilkayo iti insienso kadakuada iti sanguanan ni Jehova inton bigat, ket mapasamakto a ti lalaki a pilien ni Jehova,+ isu ti santo. Umanayen dayta kadakayo, dakayo nga annak ni Levi!”+  Ket ni Moises kinunana ken Kore: “Umimdengkayo, pangngaasiyo, dakayo nga annak ni Levi.  Bassit kadi a banag kadakayo a ti Dios ti Israel inlasinnakayo+ manipud gimong ti Israel tapno maidatagkayo kenkuana a mangaramid ti panagserbi iti tabernakulo ni Jehova ken tapno agtakderkayo iti sanguanan ti gimong nga agserbi kadakuada,+ 10  ket iti kasta rebbeng nga iyadaninaka ken amin a kakabsatmo nga annak ni Levi a maikuyog kenka? Gapuna masapul kadi a padasenyo met a gun-oden ti kinapadi?+ 11  Iti dayta a rason sika ken ti intero a gimongmo nga aguurnong a sangsangkamaysa ket bumusorkayo ken Jehova.+ No maipapan ken Aaron, ania isuna tapno agtanabutobkayo maibusor kenkuana?”+ 12  Idi agangay nagbaon ni Moises tapno paayabanna da Datan ken Abiram+ nga annak ni Eliab, ngem kinunada: “Saankami a sumang-at!+ 13  Bassit unay a banag aya nga inaonnakami iti daga a pagay-ayusan ti gatas ken diro tapno papatayennakami iti let-ang,+ iti kasta padasem met nga akmen ti kinaprinsipe kadakami agingga iti pagpatinggaan?+ 14  Iti kinapudnona, saannakami nga inyeg iti aniaman a daga a pagay-ayusan ti gatas ken diro,+ tapno maipaayannakami iti tawid a talon ken kaubasan. Ti kadi matmata dagidiay a tattao ti kayatmo a suaten? Saankami a sumang-at!” 15  Gapu itoy nakaunget unay ni Moises ket kinunana ken Jehova: “Dika kumita iti datonda a bukbukel.+ Saanak a nangala iti maysa a kalakian nga asno kadakuada, saanak met a nangdangran iti maysa kadakuada.”+ 16  Kalpasanna ni Moises kinunana ken Kore:+ “Sika ken ti intero a gimongmo, dumatagkayo iti sanguanan ni Jehova,+ sika ken isuda ken ni Aaron, inton bigat. 17  Ket alaen tunggal maysa ti pagikkanna iti apuy, ket masapul a mangikabilkayo iti insienso kadakuada ket idatag tunggal maysa ti pagikkanna iti apuy iti sanguanan ni Jehova, dua gasut ket limapulo a pagikkan ti apuy, ket sika ken ni Aaron tunggal maysa ti pagikkanna iti apuy.” 18  Gapuna innalada tunggal maysa ti pagikkanna iti apuy ket nangikabilda iti apuy kadakuada ken nangikabilda iti insienso kadakuada ket nagtakderda iti pagserkan ti tolda ti gimong agraman kada Moises ken Aaron. 19  Idi naurnongen ni Kore ti intero a gimong+ maibusor kadakuada iti pagserkan ti tolda ti gimong, idin nagparang ti dayag ni Jehova iti intero a gimong.+ 20  Nagsao ita ni Jehova kada Moises ken Aaron, a kunkunana: 21  “Isinayo+ ti bagbagiyo iti tengnga daytoy a gimong, tapno matalipuposko+ ida iti apagdarikmat.” 22  Gapu itoy inruknoyda dagiti rupada ket kinunada: “O Dios, ti Dios dagiti espiritu ti tunggal kita ti lasag,+ maysa laeng kadi a tao ti agbasol ket agrurodka maibusor iti intero a gimong?”+ 23  Kalpasanna ni Jehova nagsao ken Moises, a kunkunana: 24  “Agsaoka iti gimong, a kunaem: ‘Umadayokayo iti aglawlaw dagiti tabernakulo da Kore, Datan ken Abiram!’”+ 25  Kalpasan dayta timmakder ni Moises ket napan kada Datan ken Abiram, ket dagiti lallakay+ ti Israel kimmuyogda kenkuana. 26  Idin isu nagsao iti gimong, a kunkunana: “Suminakayo, pangngaasiyo, manipud iti sanguanan dagiti tolda dagitoy nadangkes a lallaki ket dikay sagiden ti aniaman a banag a kukuada,+ tapno saankayo a mapunas iti isuamin a basolda.” 27  Dagus nga immadayoda iti sanguanan ti tabernakulo da Kore, Datan ken Abiram, manipud iti tunggal sikigan, ket rimmuar da Datan ken Abiram, nagtakderda iti pagserkan dagiti toldada,+ agraman assawada, ken annakda ken ubbingda. 28  Kalpasanna kinuna ni Moises: “Babaen itoy maammuanyonto nga imbaonnak ni Jehova a mangaramid kadagitoy amin nga aramid,+ a saan a nagtaud iti bukodko a puso:+ 29  No maitunos iti ipapatay ti intero a sangatauan a matayto dagitoy a tattao ket iti dusa ti intero a sangatauan a maiyegto kadakuada ti pannusa,+ ngarud saan a ni Jehova ti nangibaon kaniak.+ 30  Ngem no maysa dayta a banag a naparsua a parsuaento ni Jehova,+ ket ngangaen ti daga ti ngiwatna ket alun-onenna ida+ ken ti isuamin a kukuada ket makaranukonda a sibibiag iti Sheol,+ sigurado a maammuanyonto ngarud a dagitoy a lallaki saanda a rinaem ni Jehova.”+ 31  Ket naaramid nga apaman a nalpasna a sinao amin dagitoy a sasao, nangrugi nga agrengngat ti daga nga adda iti babada.+ 32  Ket nginanga ti daga ti ngiwatna ket inalun-onna ida ken dagiti sangakabbalayanda ken dagiti amin a tattao a kadua ni Kore ken amin dagiti sanikua.+ 33  Gapuna isuda nakaranukonda, ken amin a kukuada, a sibibiag nga agturong iti Sheol, ket ginaburan ida ti daga,+ iti kasta napukawda iti tengnga ti kongregasion.+ 34  Ket nagtataray dagiti amin nga Israelita nga adda iti aglikmutda gapu iti panagriawda, ta kinunada: “Mabutengkami di la ket ta alun-onennakami ti daga!”+ 35  Ket rimmuar ti apuy manipud ken Jehova+ ket inibusna ti dua gasut ket limapulo a lallaki a mangidatdaton iti insienso.+ 36  Ni Jehova nagsao ita ken Moises, a kunkunana: 37  “Sawem ken Eleazar nga anak ni Aaron a padi a rebbeng nga alaenna dagiti pagikkan ti apuy+ manipud gil-ayab, ‘Ket iwarismo sadiay ti apuy; ta nasantuanda, 38  uray dagiti pagikkan ti apuy dagitoy a tattao a nagbasol maikaniwas kadagiti bukodda a kararua.+ Ket masapul nga aramidenda ida a naingpis a plata a metal kas kalupkop maipaay iti altar,+ agsipud ta indatagda ida iti sanguanan ni Jehova, iti kasta nagbalinda a nasantuan; ket rebbeng nga agserbida kas pagilasinan iti annak ti Israel.’”+ 39  Iti kasta ni Eleazar a padi innalana dagiti gambang a pagikkan ti apuy,+ nga indatag dagidiay napuoran, ket pinitpitda ida a pinagbalin a kalupkop maipaay iti altar, 40  kas pakalaglagipan maipaay iti annak ti Israel, iti panggep nga awan koma ti umasideg a ganggannaet+ a tao a saan a kameng iti kaputotan ni Aaron tapno mangpaasuk iti insienso iti sanguanan ni Jehova,+ ken awan koma ti agbalin a kas ken Kore ken ti gimongna,+ kas iti sinao kenkuana ni Jehova babaen ken Moises. 41  Ket iti met laeng sumaganad nga aldaw nangrugi nga agtanabutob ti intero a gimong ti annak ti Israel maibusor kada Moises ken Aaron,+ a kunkunada: “Dakayo, pinapatayyo dagiti tattao ni Jehova.” 42  Ket naaramid nga idi nakapaguummong ti gimong maibusor kada Moises ken Aaron, idin simmangoda iti tolda ti gimong; ket, adtoy! inabbongan dayta ti ulep, ket nangrugi nga agparang ti dayag ni Jehova.+ 43  Ket da Moises ken Aaron immayda iti sanguanan ti tolda ti gimong.+ 44  Idin ni Jehova nagsao ken Moises, a kunkunana: 45  “Dakayo, umikkatkayo iti tengnga daytoy a gimong, tapno matalipuposko ida iti apagdarikmat.”+ Gapu itoy inruknoyda dagiti rupada.+ 46  Kalpasan dayta ni Moises kinunana ken Aaron: “Alaem ti pagikkan ti apuy ket ikkam iti apuy manipud iti rabaw ti altar+ ken mangikabilka iti insienso ket mapanka a sidadaras iti gimong ket mangaramidka iti panangabbong maipaay kadakuada,+ agsipud ta ti rurod rimmuar manipud iti rupa ni Jehova.+ Nangrugin ti saplit!” 47  Madagdagus nga innala ni Aaron, kas iti sinao ni Moises, ket napan a nagtaray iti tengnga ti kongregasion; ket, adtoy! nangrugin ti saplit kadagiti tattao. Gapuna inkabilna ti insienso ket rinugianna ti nangaramid iti panangabbong maipaay kadagiti tattao. 48  Ket nagtalinaed a sitatakder iti nagbaetan dagiti natay ken dagiti sibibiag.+ Idi agangay napasardeng ti pannaplit.+ 49  Ket dagidiay natay iti pannaplit nagdagup iti sangapulo ket uppat a ribu pito gasut, malaksid kadagidiay natay maigapu ken Kore. 50  Idi a ni Aaron nagsubli kamaudiananna ken Moises iti pagserkan ti tolda ti gimong, napasardengen ti pannaplit.

Footnotes