Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Numeros 15:1-41

15  Ket ni Jehova nagsao pay ken Moises, a kunkunana:  “Agsaoka iti annak ti Israel, ket masapul a kunaem kadakuada, ‘Inton sumrekkayo kamaudiananna iti daga dagiti disso a pagnaedanyo, nga itdek kadakayo,+  ket masapul a mangidatagkayo iti naipuor a daton ken Jehova,+ maysa a daton a mapuoran+ wenno maysa a sakripisio a pangaramid iti naisangsangayan a kari wenno siboboluntario+ wenno bayat dagiti naipanapanawen a piestayo,+ tapno mangaramidkayo iti makabang-ar a sayamusom ken Jehova,+ manipud iti pangen wenno manipud iti arban;  daydiay mangidatdatag iti datonna masapul met a mangidatag ken Jehova iti daton a bukbukel a nasayaat nga arina,+ apagkapullo ti maysa nga efa, a nababasa iti lana a kakapat ti maysa a hin.  Ket rebbeng a mangidatagka iti arak kas daton nga inumen,+ ti kakapat ti maysa a hin, agraman ti daton a mapuoran wenno maipaay iti sakripisio ti tunggal kalakian a kordero.  Wenno maipaay iti kalakian a karnero rebbeng a mangidatagka iti daton a bukbukel a dua nga apagkapullo ti nasayaat nga arina, a nababasa iti lana a kakatlo ti maysa a hin.  Ket rebbeng a mangidatagka iti arak kas daton nga inumen, kakatlo ti maysa a hin, kas makabang-ar a sayamusom ken Jehova.  “‘Ngem no kas pagarigan mangidatagka iti maysa a kalakian iti pangen kas daton a mapuoran+ wenno sakripisio a pangaramid iti naisangsangayan a kari+ wenno saksakripisio a pakikaykaysa ken Jehova,+  ti maysa masapul met a mangidatag mairaman iti kalakian iti pangen iti daton a bukbukel+ a tallo nga apagkapullo ti nasayaat nga arina, a nababasa iti lana a kagudua ti maysa a hin. 10  Ket rebbeng a mangidatagka iti arak kas daton nga inumen,+ kagudua ti maysa a hin, kas naipuor a daton, a makabang-ar a sayamusom ken Jehova. 11  Kastoy ti rebbeng a maaramid iti tunggal toro wenno iti tunggal kalakian a karnero wenno iti maysa nga ulo kadagiti kalakian a kordero wenno kadagiti kalding. 12  Aniaman ti bilang ti idatagyo, kasta ti rebbeng nga aramidenyo iti tunggal maysa sigun iti bilangda. 13  Tunggal katutubo rebbeng nga idatagna dagitoy iti kastoy a wagas iti pangidatagna iti naipuor a daton, a makabang-ar a sayamusom ken Jehova.+ 14  “‘Ket no kas pagarigan adda makipagtataeng kadakayo kas ganggannaet a maysa a ganggannaet nga agnanaed wenno maysa nga adda iti tengngayo iti kinapkaputotanyo, ket mangidatagto iti naipuor a daton, a makabang-ar a sayamusom ken Jehova, no kasano ti rebbeng a panangaramidyo, kasta ti rebbeng a panangaramidna.+ 15  Dakayo a kameng ti kongregasion ken ti ganggannaet nga agnanaed nga agtataeng kas ganggannaet addaankayto iti maymaysa a paglintegan.+ Maysanto a paglintegan agingga iti tiempo a di nakedngan maipaay kadagiti kaputotanyo. Ti ganggannaet nga agnanaed rebbeng a kas met laeng kadakayo iti sanguanan ni Jehova.+ 16  Rebbeng nga adda maymaysa a linteg ken maymaysa a hudisial a pangngeddeng maipaay kadakayo ken maipaay iti ganggannaet nga agnanaed a makipagtataeng kadakayo kas ganggannaet.’”+ 17  Ket intultuloy ni Jehova ti agsao ken Moises, a kunkunana: 18  “Agsaoka iti annak ti Israel, ket masapul a kunaem kadakuada, ‘Iti iseserrekyo iti daga a pangipanak kadakayo,+ 19  mapasamakto met a no kanenyo ti aniaman iti tinapay ti daga,+ rebbeng a mangikontribusionkayo ken Jehova. 20  Rebbeng a mangikontribusionkayo kadagiti umuna a bunga+ ti nagasal a ginilingyo kas nagtimbukel a tintinapay. Kas iti kontribusion ti maysa a pagirikan kasta ti panangikontribusionyo iti dayta. 21  Ti sumagmamano kadagiti umuna a bunga ti nagasal a ginilingyo rebbeng nga itedyo kas kontribusion ken Jehova iti intero a kapkaputotanyo. 22  “‘Ita no kas pagarigan agbiddutkayo ket saanyo nga aramiden amin dagitoy a bilin,+ a sinao ni Jehova ken Moises, 23  isuamin nga imbilin kadakayo ni Jehova babaen ken Moises manipud iti aldaw a panagbilin ni Jehova ken agpatpatuloy maipaay kadagiti kaputotanyo, 24  mapasamakto ngarud a no di inranranta a naaramid dayta nga adayo kadagiti mata ti gimong, masapul ngarud a ti intero a gimong mangidatag iti maysa nga urbon a toro kas daton a mapuoran a maipaay a makabang-ar a sayamusom ken Jehova, ken ti datonna a bukbukel ken ti datonna nga inumen sigun iti kadawyan a pamay-an,+ ken maysa nga urbon dagiti kalding kas daton gapu iti basol.+ 25  Ket ti padi masapul a mangaramid iti panangabbong+ maipaay iti intero a gimong ti annak ti Israel, ket mapakawanto dayta kadakuada; agsipud ta maysa a biddut dayta,+ ket isuda, iti biangda, nangyegda kas datonda iti naipuor a daton ken Jehova ken ti datonda gapu iti basol iti sanguanan ni Jehova maipaay iti biddutda. 26  Ket mapakawanto+ ti intero a gimong ti annak ti Israel ken ti ganggannaet nga agnanaed nga agtataeng kas ganggannaet iti tengngada, agsipud ta di inranranta dayta iti biang dagiti amin nga umili. 27  “‘Ket no ti asinoman a kararua di inranranta nga agbasol,+ ngarud masapul a mangidatag iti kabaian a kalding a tumawenen a maipaay a daton gapu iti basol.+ 28  Ket ti padi masapul a mangaramid iti panangabbong maipaay iti kararua a nakaaramid iti biddut babaen ti basol a di inggagara iti sanguanan ni Jehova, tapno mangaramid iti panangabbong maipaay iti dayta, ket mapakawanto dayta kenkuana.+ 29  No maipapan iti katutubo iti annak ti Israel ken ti ganggannaet nga agnanaed nga agtataeng kas ganggannaet iti tengngada, rebbeng nga adda maymaysa a linteg maipaay kadakayo no maipapan iti panangaramid iti maysa a banag a di inggagara.+ 30  “‘Ngem ti kararua a mangaramid iti maysa a banag nga inggagara,+ uray no isu katutubo wenno ganggannaet nga agnanaed, isu nga agsasao a sibabassawang ken Jehova,+ iti dayta a kaso masapul a magessat dayta a kararua iti tengnga dagiti kailianna.+ 31  Agsipud ta sao ni Jehova ti inumsina+ ken bilinna ti sinalungasingna,+ dayta a kararua rebbeng a magessat a di bumurong.+ Ti bukodna a biddut adda kenkuana.’”+ 32  Bayat ti panagtalinaed ti annak ti Israel idiay let-ang, iti naminsan nakasarakda iti lalaki nga agum-ummong kadagiti pedaso a kayo iti aldaw ti sabbath.+ 33  Kalpasanna dagidiay nakasarak kenkuana nga agum-ummong kadagiti pedaso a kayo impanda isuna kada Moises ken Aaron ken iti intero a gimong. 34  Gapuna inyawatda iti pannakaipupok,+ agsipud ta saan pay a silalawag a naibaga no ania ti rebbeng a maaramid kenkuana. 35  Idi agangay ni Jehova kinunana ken Moises: “Di bumurong a ti lalaki rebbeng a mapapatay,+ nga isu uboren ti intero a gimong iti batbato idiay ruar ti pakarso.”+ 36  Ngarud isu inyeg ti intero a gimong iti ruar ti pakarso ket inuborda iti batbato iti kasta natay, kas iti imbilin ni Jehova ken Moises. 37  Ket kinuna ni Jehova daytoy ken Moises: 38  “Agsaoka iti annak ti Israel, ket masapul a kunaem kadakuada nga iyaramidandanto ti bagbagida kadagiti nabarayubayan a pingir kadagiti pandiling ti kawkawesda iti intero a kapkaputotanda, ket masapul a mangikabilda iti asul a linas iti ngatuen ti nabarayubayan a pingir ti pandiling,+ 39  ‘Ket agserbinto kadakayo a kas nabarayubayan a pingir, ket makitayonto dayta ket malagipyo dagiti amin a bilin+ ni Jehova ken aramidenyo ida, ket dikay suroten dagiti pusoyo ken dagiti matayo,+ a sursurotenyo iti imoral a pannakidenna.+ 40  Ti panggep ket tapno malagipyo ken sigurado nga aramidenyo dagiti amin a bilinko ket pudno nga agbalinkayo a nasantuan iti Diosyo.+ 41  Siak ni Jehova a Diosyo, a nangiruar kadakayo manipud daga ti Egipto tapno agbalinak a Diosyo.+ Siak ni Jehova a Diosyo.’”+

Footnotes