Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Numeros 11:1-35

11  Ita nagbalin dagiti umili a kas tattao nga addaan dakes a banag nga ireklamo kadagiti lapayag ni Jehova.+ Idi nangngeg dayta ni Jehova, idin bimmara ti ungetna, ket ti apuy ni Jehova nangrugi a gumil-ayab maibusor kadakuada ken mangibus iti sumagmamano iti ungto ti pakarso.+  Idi a nangrugi dagiti umili nga umkis ken Moises, ngarud isu immararaw ken Jehova,+ ket nagiddep ti apuy.  Ket ti nagan dayta a disso naawagan iti Tabera,+ agsipud ta ti apuy ni Jehova gimmil-ayab a maibusor kadakuada.  Ket ti naglalaok a bunggoy+ nga adda iti tengngada nangipeksa iti managimbubukodan a pannakail-iliw,+ ket dagiti met annak ti Israel nangrugida manen nga agsangit ken agkuna: “Siasinonto ti mangted kadakami iti karne a kanenmi?+  Anian ta malagipmi ti ikan a kinkinnanmi idiay Egipto nga awan bayadna,+ dagiti pipino ken dagiti sandia ken dagiti kutsay ken dagiti lasona ken ti bawang!  Ngem ita mamagmagan ti kararuami. Awan lattan ti makitkita dagiti matami no di ti manna.”+  Kabayatanna, ti manna+ kasla bukel ti kulantro,+ ket ti langana kasla iti langa ti tutot ti bedelio.+  Nagwaras dagiti umili ket nagpidutda+ ket ginilingda kadagiti paggilingan a pusiposen ti ima wenno binayoda iti alsong, ket inlambongda kadagiti paglutuan a banga+ wenno pinagbalinda a nagbukel a tintinapay, ket ti ramanna kasla idi iti raman ti nalanaan a nasam-it a tinapay.+  Ket idi a ti linnaaw bimmaba iti pakarso iti rabii, ti manna bumaba iti rabaw dayta.+ 10  Ket nangngeg ni Moises nga agsangsangit dagiti umili iti pampamiliada, tunggal tao iti pagserkan ti toldana. Ket bimmara unay ti unget ni Jehova,+ ket kadagiti mata ni Moises dakes idi dayta.+ 11  Idin ni Moises kinunana ken Jehova: “Apay a pinataudmo ti dakes iti adipenmo, ken apay a saanak a nakasarak iti pabor kadagita matam, iti panangikabilmo kaniak ti awit daytoy intero nga ili?+ 12  Siak aya ti nangyinaw iti daytoy intero nga ili? Siak aya ti nangipasngay kadakuada, tapno kunaem kaniak, ‘Ubbaem ida ita barukongmo,+ kas iti panangubba ti lalaki a manangtagibi iti maysa nga agsussuso,’+ agingga iti daga a maipapan iti dayta nagsapataka kadagidi ammada?+ 13  Sadino ti pangalaak iti karne nga itedko iti daytoy intero nga ili? Ta agsangsangitda kaniak, a kunkunada, ‘Ikkannakami iti karne, ket mangankami!’ 14  Saanko a kabaelan, a sisiak, nga awiten daytoy intero nga ili, agsipud ta nadagsenda unay kaniak.+ 15  Gapuna no kastoy ti pampamay-am kaniak, pangngaasim ta pukawennak a naan-anay,+ no nakasarakak iti pabor kadagita matam, ket saanmo nga ipalubos a makitak ti didigrak.” 16  Ni Jehova kinunana ken Moises kalpasanna: “Iyummongannak iti pitopulo a lallaki kadagiti lallakay ti Israel,+ isuda nga ammom a lallakay kadagiti umili ken op-opisial kadakuada,+ ket masapul nga iyegmo ida iti tolda ti gimong, ket masapul a makipagsaadda kenka sadiay. 17  Ket bumabaakto+ ket makisaoak kenka sadiay;+ ket mangalaakto iti espiritu+ nga adda kenka ket ikabilko kadakuada, ket tulongandakanto a mangibaklay iti awit dagiti umili tapno saanmo nga ibaklay, a siksika laeng.+ 18  Ket rebbeng a kunaem kadagiti umili, ‘Santipikarenyo ti bagbagiyo maipaay inton bigat,+ ta sigurado a mangankayto iti karne, agsipud ta nagsangitkayo kadagiti lapayag ni Jehova,+ a kinunayo: “Siasinonto ti mangted kadakami iti karne a kanenmi, ta nakasaysayaatkami idi idiay Egipto?”+ Ket sigurado nga ikkannakayto ni Jehova iti karne, ket pudno a mangankayto.+ 19  Mangankayto, saan nga iti maysa nga aldaw wenno dua nga aldaw wenno lima nga aldaw wenno sangapulo nga aldaw wenno duapulo nga aldaw, 20  no di ket agingga iti makabulan nga al-aldaw, agingga a rummuar dayta kadagiti abut ti agongyo ket nagbalinen a pakarumenanyo,+ agsipud ta linaksidyo ni Jehova, nga adda iti tengngayo, ket nagsangsangitkayo iti sanguananna, a kinunayo: “Apay a rimmuarkami manipud Egipto?”’”+ 21  Idin kinuna ni Moises: “Ti ili nga iti tengngana addaak innem a gasut a ribuda a lallaki+ a magmagna, ket kaskasdi sika—kinunam, ‘Ikkakto ida iti karne, ket sigurado a mangandanto iti makabulan nga al-aldaw’! 22  Maipartiandanto kadi iti ar-arban ken pangpangen, tapno makaanay kadakuada?+ Wenno ti isuamin nga ikan ti baybay matiliwto kadi a maipaay kadakuada, tapno makaanay kadakuada?” 23  Gapu itoy, ni Jehova kinunana ken Moises: “Immababa kadi ti ima ni Jehova?+ Ita makitamto no ti kunaek mapagteng kenka wenno saan.”+ 24  Kalpasan dayta rimmuar ni Moises ket sinaona kadagiti umili ti sasao ni Jehova. Ket nangummong iti pitopulo a lallaki manipud iti lallakay kadagiti umili ket pinagtakderna ida iti aglawlaw ti tolda.+ 25  Idin bimmaba ni Jehova iti ulep+ ket nagsao kenkuana+ ket nangala iti espiritu+ nga adda kenkuana ket inkabilna iti tunggal maysa iti pitopulo a lallakay. Ket naaramid nga apaman a nakapagsaad kadakuada ti espiritu, idin nagakemda kas mammadto; ngem saanda nga inaramid manen dayta.+ 26  Ita adda dua kadagiti lallaki a nagbati iti pakarso. Ti nagan ti maysa Eldad, ket ti nagan ti sabali Medad. Ket ti espiritu nangrugi nga agsaad kadakuada, yantangay nairamanda kadagidiay naisurat, ngem saanda a rimmuar a napan iti tolda. Gapuna nagakemda kas mammadto iti pakarso. 27  Ket ti maysa nga agtutubo a lalaki napan a nagtaray ket impadamagna ken Moises ket kinunana: “Da Eldad ken Medad agak-akemda kas mammadto iti pakarso!” 28  Idin ni Josue nga anak ni Nun, ti ministro+ ni Moises manipud kinaagtutubona nga agpatpatuloy, simmungbat ket kinunana: “Apok a Moises, pawilam ida!”+ 29  Nupay kasta, kinuna kenkuana ni Moises: “Agim-imonka kadi maipaay kaniak? Saan, tarigagayak nga amin a tattao ni Jehova mammadtoda, agsipud ta ikabil ni Jehova ti espirituna kadakuada!”+ 30  Idi agangay pimmanaw ni Moises a nagturong iti pakarso, isu ken dagiti lallakay ti Israel. 31  Ket simmiplog ti maysa nga angin+ manipud ken Jehova ket rinugianna ti mangbugaw kadagiti pugo manipud baybay+ ket binay-anna ida nga agtinnag iti ngatuen ti pakarso iti agarup maysa nga aldaw a panagbaniaga iti daytoy a turong ken agarup maysa nga aldaw a panagbaniaga iti dayta a turong, iti intero nga aglawlaw ti pakarso, ken agarup dua a kasiko iti ngatuen ti rabaw ti daga. 32  Idin bimmangon dagiti umili iti dayta nga intero nga aldaw ken intero a rabii ken intero a sumaganad nga aldaw ket inur-urnongda dagiti pugo. Daydiay kabassitan ti naummong nakaurnong iti sangapulo a homer,+ ket insaksaknapda ida a nakalawlawa iti intero nga aglawlaw ti pakarso maipaay iti bagbagida. 33  Adda pay laeng ti karne iti nagbabaetan dagiti ngipenda,+ sakbay a mangalngal, idi a gimmil-ayab ti unget ni Jehova+ kadagiti umili, ket rinugian ni Jehova a kinabil dagiti umili iti dakkel unay a pananggudas.+ 34  Napanaganan dayta a lugar iti Kibrot-hataava,+ agsipud ta sadiay nga intabonda dagiti umili a nangipakita iti naagum a panaggartem.+ 35  Manipud Kibrot-hataava nagluas dagiti umili nga agturong iti Hazerot, ket nagtalinaedda idiay Hazerot.+

Footnotes