Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Nehemias 5:1-19

5  Nupay kasta, naadda ti maysa a dakkel nga ikkis+ dagiti umili ken ti assawada a babbai maibusor kadagiti kakabsatda a Judio.+  Ket adda idi dagidiay nagkunkuna: “Ti annakmi a lallaki ken annakmi a babbai itedmi a kas tani tapno makaalakami iti bukbukel ket mangan ken agtalinaedkami a sibibiag.”+  Ket adda idi dagidiay nagkunkuna: “Dagiti talonmi ken dagiti kaubasanmi ken dagiti balaymi itedmi a kas tani+ tapno makaalakami iti bukbukel bayat ti kinakirang ti taraon.”  Ket adda idi dagidiay nagkunkuna: “Bimmulodkami iti kuarta maipaay iti impuesto ti ari+ kadagiti talonmi ken kadagiti kaubasanmi.+  Ket ita ti lasagmi kas met laeng iti lasag dagiti kakabsatmi;+ ti annakmi kas met laeng iti annakda, ngem adtoy ti annakmi a lallaki ken ti annakmi a babbai pagbalbalinenmi nga ad-adipen,+ ket adda sumagmamano iti annakmi a babbai a napagbalinen; ket awan pannakabalin iti im-imami bayat a dagiti talonmi ken dagiti kaubasanmi kukua ti sabsabali.”  Ita nakaungetak unay apaman a nangngegko ti ikkisda ken dagitoy a sasao.  Gapuna ti pusok nagut-utob iti unegko, ket rinugiak ti agsapul iti biddut+ kadagiti natan-ok ken dagiti diputado nga agtuturay, ket kinunak kadakuada: “Am-am+ ti kalkalikagumanyo, tunggal maysa manipud bukodna a kabsat.” Kanayonanna, nangyurnosak iti dakkel nga asamblea maigapu kadakuada.+  Ket kinunak kadakuada: “Datayo ginatangtayo a binawi+ dagiti bukodtayo a kakabsat a Judio a nailako kadagiti nasion, agingga nga adda iti pannakabalintayo; ket kabayatanna dakayo ilakoyonto kadi dagiti bukodyo a kakabsat,+ ket masapul kadi a mailakoda kadatayo?” Gapu itoy napaumelda, ket saanda a nakasarak iti maysa a sao.+  Ket intultuloyko a kunaen: “Ti banag nga ar-aramidenyo saan a naimbag.+ Saan aya a rebbeng a magnakayo iti panagbuteng+ iti Diostayo+ gapu iti panangumsi+ dagiti nasion, dagiti kabusortayo?+ 10  Ket siak met, ti kakabsatko ken dagiti katulongak agpapautangkami iti kuarta ken bukbukel iti tengngada. Idiantayo koma, pangngaasiyo, daytoy panagpautang nga addaan patubo.+ 11  Pangngaasiyo, iti daytoy nga aldaw isubliyo kadakuada dagiti talonda,+ dagiti kaubasanda, dagiti kaolibuanda ken dagiti balayda, ken ti apagkasangagasut ti kuarta ken ti bukbukel, ti baro nga arak ken ti lana a kalkalikagumanyo kas patubo manipud kadakuada.” 12  Iti daytoy kinunada: “Agisublikamto,+ ket awanto ti kiddawenmi a maisubli manipud kadakuada.+ Aramidenminto nga apagpag-isu kas iti sasawem.”+ Gapuna inayabak ti papadi ket pinagsapatak ida nga aramidenda ti maitunos itoy a sao.+ 13  Kasta met, ti sab-okko winagwagko ket kalpasanna kinunak: “Iti kastoy a pamay-an wagwagen koma ti pudno a Dios manipud balayna ken manipud nagun-odna a sanikua ti tunggal tao a saan a mangitungpal itoy a sao; ket iti kastoy a pamay-an isu agbalin koma a naiwagwag ken ongaong.” Iti daytoy kinuna ti intero a kongregasion: “Amen!”+ Ket rinugianda nga idaydayaw ni Jehova.+ Ket dagiti umili inaramidda ti maitunos iti daytoy a sao.+ 14  Sabali pay a banag: Manipud iti aldaw a pinarebbengannak nga agbalin a gobernadorda+ iti daga ti Juda, manipud iti maikaduapulo+ a tawen agingga iti maikatallopulo ket dua+ a tawen ni Artaxerxes+ nga ari, sangapulo ket dua a tawen, siak ken ti kakabsatko saanmi a kinnan ti tinapay a maiparbeng iti gobernador.+ 15  No maipapan kadagiti immun-una a gobernador iti kasakbayak, pinadagsenanda dagiti umili, ket inal-alaanda ida iti uppat a pulo a siklo a pirak maipaay iti tinapay ken arak iti inaldaw. Kasta met, dagiti met laeng katulonganda inturayanda dagiti umili.+ No maipapan kaniak, saanko nga inaramid ti kasta+ maigapu iti panagbuteng iti Dios.+ 16  Ket, kanayonanna, iti trabaho iti daytoy a pader timmulongak,+ ket saankami a gimmun-od iti talon;+ ket amin dagiti katulongak naummongda a sangsangkamaysa sadiay maipaay iti trabaho. 17  Ket dagiti Judio ken dagiti diputado nga agtuturay, sangagasut ket limapulo a lallaki, ken dagidiay um-umay kadakami manipud kadagiti nasion nga adda iti aglikmutmi addada idi iti lamisaanko.+ 18  No maipapan iti daydiay maisagana idi iti inaldaw, maysa a toro, innem a napili a karnero ken dagiti tumatayab ti naisagana a maipaay kaniak, ket maminsan iti kada sangapulo nga aldaw isuamin a kita ti arak+ a naruay. Ket mairaman iti daytoy saanko a kinalikaguman ti tinapay a maiparbeng iti gobernador, agsipud ta nadagsen ti panagserbi a naiparabaw iti daytoy nga ili. 19  Lagipem maipaay kaniak,+ O Diosko, maipaay iti pagimbagan,+ ti amin nga inaramidko maigapu iti daytoy nga ili.+

Footnotes