Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Nehemias 2:1-20

2  Ket naaramid iti bulan a Nisan,+ iti maikaduapulo+ a tawen ni Artaxerxes+ nga ari, nga adda arak iti sanguananna, ket kas iti gagangay innalak ti arak ket intedko iti ari.+ Ngem pulos a saanak pay idi a nagliday iti kasta iti sanguananna.+  Gapuna kinuna kaniak ti ari: “Apay a naliday ta rupam+ idinto ta saanka a masakit? Daytoy ket awan sabali no di maysa a kinaliday ti puso.”+ Gapu itoy nagbutengak iti kasta unay.  Idin kinunak iti ari: “Ti met laeng ari agbiag koma agingga iti tiempo a di nakedngan!+ Apay koma a saan nga agbalin a naliday ti rupak idinto ta ti siudad,+ ti balay dagiti lugar a pagitabonan dagidi ammak,+ napagwalangwalang, ket dagiti mismo a ruanganna naibus iti apuy?”+  Kalpasanna kinuna kaniak ti ari: “Ania daytoy tartarigagayam a gun-oden?”+ Dagus a nagkararagak+ iti Dios ti langlangit.+  Kalpasan dayta kinunak iti ari: “No naimbag iti ari,+ ken no naimbag ti adipenmo iti sanguanam,+ nga ibaonnak idiay Juda, idiay siudad dagiti lugar a pagitabonan dagidi ammak, tapno bangonek koma manen+ dayta.”  Gapu itoy kinuna kaniak ti ari, bayat a ti bayabayna a reyna situtugaw idi iti sibayna: “Kasanonto kabayag ti panagbaniagam ket kaanonto nga agsublika?” Gapuna nagparang a naimbag+ iti sanguanan ti ari nga ibaonnak, idi impaayko kenkuana ti naituding a tiempo.+  Ket kinunak iti ari: “No naimbag iti ari, adda koma maited kaniak a sursurat+ nga agpaay kadagiti gobernador+ iti labes ti Karayan,+ tapno bay-andak a lumasat agingga a makagtengak idiay Juda;  kasta met ti maysa a surat nga agpaay ken Asaf nga agay-aywan iti parke a kukua ti ari, tapno ikkannak koma iti kaykayo tapno bangonek a tinabla dagiti ruangan ti Kastilio+ a paset ti balay,+ ken maipaay iti pader+ ti siudad ken maipaay iti balay a sumrekak.” Gapuna inted ida kaniak ti ari, maitunos iti naimbag nga ima ti Diosko nga adda kaniak.+  Kamaudiananna dimtengak kadagiti gobernador+ iti labes ti Karayan ket intedko kadakuada dagiti surat ti ari. Mainayon pay, ti ari nangipakuyog kaniak kadagiti panguluen ti puersa militar ken kadagiti kumakabalio. 10  Idi a ni Sanballat+ a Horonita+ ken ni Tobias+ nga adipen, ti Ammonita,+ nangngegda dayta, iti kasta kasla dakes unay+ a banag dayta kadakuada a ti maysa a tao immay a mangsapul iti pagimbagan ti annak ti Israel. 11  Idi agangay dimtengak iti Jerusalem, ket nagtalinaedak sadiay iti tallo nga aldaw. 12  Kalpasanna timmakderak iti rabii, siak ken sumagmamano a lallaki a naikuyog kaniak, ket saanko nga imbaga iti uray maysa a tao+ no ania ti ikabkabil idi ti Diosko iti pusok nga aramiden maipaay iti Jerusalem,+ ket awan idi ti naamo nga animal a naikuyog kaniak malaksid ti naamo nga animal a nagsakayak. 13  Ket iti rabii rimmuarak iti Ruangan ti Ginget+ ken iti sango ti Ubbog ti Dakkel nga Uleg ken agingga iti Ruangan dagiti Gabsuon a Dapo,+ ket kanayon a sinuksukimatko dagiti pader+ ti Jerusalem, no kasano a narbada ket dagiti ruanganna+ inibus ti apuy. 14  Ket limmasatak agingga iti Ruangan ti Ubbog+ ken iti Ban-aw ti Ari, ket awan idi ti disso a lumasatan ti naamo nga animal a pagsaksakayak. 15  Ngem intultuloyko ti simmang-at iti naapres+ a ginget iti rabii, ket sinuksukimatko ti pader; a kalpasan dayta nagsubliak ket simrekak iti Ruangan ti Ginget,+ ket iti kasta nakasubliak. 16  Ket dagiti met laeng diputado nga agtuturay+ saanda nga ammo no sadino ti napanak ken no ania ti inar-aramidko; ket kadagiti Judio ken iti papadi ken kadagiti natan-ok ken kadagiti diputado nga agtuturay ken iti dadduma pay kadagiti managaramid ti trabaho saanko pay nga imbaga ti aniaman a banag. 17  Kamaudiananna kinunak kadakuada: “Makitkitayo ti dakes a sasaaden nga ayantayo, no kasano a ti Jerusalem walangwalang ket dagiti ruanganna napuoran iti apuy. Umaykayo ket bangonentayo manen ti pader ti Jerusalem, tapno saantayo nga agtultuloyen nga umsi.”+ 18  Ket imbagak kadakuada ti maipapan iti ima+ ti Diosko, no kasano a naimbag kaniak,+ ken kasta met ti maipapan iti sasao ti ari+ a sinaona kaniak. Gapu itoy kinunada: “Tumakdertayo, ket masapul a bangonentayo.” Gapuna pinapigsada dagiti imada maipaay iti naimbag nga aramid.+ 19  Ita idi a nangngeg dayta ni Sanballat+ a Horonita ken ni Tobias+ nga adipen,+ ti Ammonita,+ ken ni Gesem+ nga Arabiano,+ rinugiandakami nga uyawen+ ken kitaen a siuumsi ken pagkunaan: “Ania daytoy banag nga ar-aramidenyo? Maibusor kadi iti ari nga agrebrebeldekayo?”+ 20  Nupay kasta, simmungbatak kadakuada ket kinunak kadakuada: “Ti Dios ti langlangit+ isu Daydiay mamagballiginto kadakami,+ ket dakami, nga ad-adipenna, tumakderkaminto, ket masapul nga agbangonkami; ngem dakayo awanankayo iti paset,+ wenno uray nainkalintegan a karbengan, wenno uray pakalaglagipan+ iti Jerusalem.”

Footnotes