Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Mateo 8:1-34

8  Kalpasan a nakasalogen manipud iti bantay simmurot kenkuana ti dadakkel a bunggoy.  Ket, adtoy! immay ti maysa nga agkukutel a lalaki+ ket nangrugi a nagruknoy kenkuana, a kunkunana: “Apo, no kayatmo laeng koma, kabaelannak a dalusan.”  Ket iti kasta, idi inunnatna ti imana, isu sinagidna, a kunkunana: “Kayatko. Madalusanka koma.”+ Ket dagus a nadalusan ti kukutelna.+  Idin kinuna kenkuana ni Jesus: “Siguraduem a dika ibaga iti asinoman,+ no di ket inka, agparangka iti padi,+ ket idatonmo ti sagut+ nga intuding ni Moises, agpaay iti panggep a pangsaksi kadakuada.”  Idi simrek idiay Capernaum,+ immay kenkuana ti maysa nga opisial ti buyot, nga agpakpakaasi kenkuana  ken kunkunana: “Apo, ti adipenko a lalaki naidalit idiay balay nga addaan paralisis, a matutuok unay.”  Kinunana kenkuana: “Inton makagtengak sadiay agasakto.”  Kas sungbat kinuna ti opisial ti buyot: “Apo, saanak a maikari a tao tapno sumrekka iti sirok ti atepko, ngem sawem laeng ti sao ket mapaimbagto ti adipenko a lalaki.  Ta maysaak met a tao a naikabil iti sidong ti autoridad, addaan kadagiti soldado iti babaek, ket kunaek iti daytoy a tao, ‘Inkan!’+ ket isu mapanen, ket iti sabali, ‘Umayka!’ ket isu umay, ket iti adipenko, ‘Aramidem daytoy!’ ket aramidenna dayta.” 10  Idi mangngegna dayta, nagsiddaaw ni Jesus ket kinunana kadagidiay sumursurot kenkuana: “Ibagak kadakayo ti pudno, Awan asinoman iti Israel ti nakasarakak iti kastoy a kadakkel ti pammati.+ 11  Ngem ibagak kadakayo nga adu manipud kadagiti makindaya a paset ken kadagiti makinlaud+ a paset ti umayto ket agsadagda iti panganan a kadua ni Abraham ken ni Isaac ken ni Jacob iti pagarian+ ti langlangit;+ 12  idinto ta ti annak ti pagarian+ maipalladawdanto iti sipnget iti ruar. Sadiay addanto panagsangitda ken panagngaretnget dagiti ngipenda.”+ 13  Kalpasanna kinuna ni Jesus iti opisial ti buyot: “Inkan. Kas iti adda a pammatim, maaramid koma a maipaay kenka.”+ Ket ti adipen a lalaki immimbag iti dayta nga oras. 14  Ket ni Jesus, iti idadatengna iti balay ni Pedro, nakitana ti katuganganna-a-babai+ a siiidda ken aggurigor.+ 15  Gapuna sinagidna ti imana,+ ket ti gurigor pimmanaw kenkuana, ket bimmangon ket rinugianna ti nagserbi kenkuana.+ 16  Ngem idi rumabiin, dagiti tattao nangyegda kenkuana iti adu a tattao a nagunggan ti sairo; ket pinaruarna dagiti espiritu babaen iti sao, ken inagasanna amin nga agsagsagaba iti nakaro; 17  tapno matungpal ti naisao babaen ken ni Isaias a mammadto, a kunkunana: “Isu innalana dagiti sakittayo ken inawitna dagiti sagubanittayo.”+ 18  Idi nakita ni Jesus ti maysa a bunggoy iti aglawlawna, intedna ti bilin nga umalisda iti sabali a bangir.+ 19  Ket immasideg ti maysa nga eskriba ket kinunana kenkuana: “Mannursuro, surotenkanto sadinoman ti papanam.”+ 20  Ngem kinuna kenkuana ni Jesus: “Dagiti sora addaanda kadagiti rukib ket dagiti tumatayab iti langit addaanda kadagiti pagaponan, ngem ti Anak ti tao awan pangisaadanna iti ulona.”+ 21  Idin kinuna kenkuana ti sabali pay kadagiti adalan: “Apo, palubosannak a pumanaw pay nga umuna ket itabonko ni amak.” 22  Kinuna kenkuana ni Jesus: “Itultuloymo ti sumurot kaniak, ket bay-am a dagiti natay itabonda dagiti minatayda.”+ 23  Ket idi nakaluganen iti maysa a barangay,+ simmurot kenkuana dagiti adalanna. 24  Ita, adtoy! rimsua ti dakkel a panagdaleg iti baybay, iti kasta ti barangay masabsabuagan kadagiti dalluyon; isu, nupay kasta, matmaturog idi.+ 25  Ket immayda ket riniingda,+ a kunkunada: “Apo, isalakannakami, mapukawkamin!” 26  Ngem kinunana kadakuada: “Apay nga agkullayaw dagiti pusoyo, dakayo a bassitan pammati?”+ Kalpasanna, idi bimmangon, binabalawna dagiti angin ken ti baybay, ket naglinak unay.+ 27  Gapuna nagsiddaaw dagiti tattao ket kinunada: “Ania a kita ti tao daytoy,+ ta uray dagiti angin ken ti baybay agtulnogda kenkuana?” 28  Idi nakadanon iti sabali a bangir, iti pagilian dagiti Gadareno,+ adda simmabet kenkuana a dua a lallaki a nagunggan ti sairo+ a rumrummuarda manipud kadagiti pakalaglagipan a tanem, a nakaro ti kinarungsotda, iti kasta awan makaitured a lumabas iti dayta a dalan. 29  Ket, adtoy! nagriawda, a kunkunada: “Ania ti bibiangmi kenka, Anak ti Dios?+ Immayka kadi ditoy tapno tuokennakami+ sakbay ti naituding a tiempo?”+ 30  Ngem iti adayo manipud kadakuada adda agar-arab a pangen ti adu a baboy. 31  Gapuna rinugian dagiti sairo ti agpakpakaasi kenkuana, a kunkunada: “No paruarennakami, ibaonnakami iti pangen dagiti baboy.”+ 32  Iti kasta kinunana kadakuada: “Mapankayo!” Rimmuarda ket napanda kadagiti baboy; ket, adtoy! ti intero a pangen nagdaruros iti teppang nga agturong iti baybay ket natayda kadagiti danum.+ 33  Ngem nagtalaw dagiti agtartaraken ket, idi simrekda iti siudad, impadamagda amin a banag, agraman ti pasamak kadagiti lallaki a nagunggan ti sairo. 34  Ket, adtoy! ti intero a siudad rimmuar a sumabet ken Jesus; ket kalpasan a nakitada, sipipinget nga indagadagda kenkuana a pumanaw kadagiti distritoda.+

Footnotes