Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Mateo 6:1-34

6  “Agannadkayo a dikay annuroten ti kinalintegyo+ iti sanguanan dagiti tattao tapno mapaliiwdakayo; ta no saan awanto ti gunggonayo ken ni Amayo nga adda iti langlangit.  Gapuna inton mapanka a mangted kadagiti sagut ti asi,+ dika puyoten ti maysa a trumpeta+ iti sanguanam, a kas iti ar-aramiden dagiti managinsisingpet kadagiti sinagoga ken kadagiti kalsada, tapno idaydayaw ida dagiti tattao. Pudno kunak kadakayo, Aw-awatendan a naan-anay ti gunggonada.  Ngem sika, no mangmangtedka kadagiti sagut ti asi, dika palubosan a maammuan ti makannigid nga imam ti ar-aramiden ti makannawanmo,  tapno dagiti sagutmo ti asi nalimed koma; iti kasta ni Amam a kumitkita iti nalimed supapakannakanto.+  “Kasta met, no agkararagkayo, dikay agbalin a kas kadagiti managinsisingpet; agsipud ta kaykayatda ti agkararag a sitatakder+ kadagiti sinagoga ken kadagiti nagsulian dagiti akaba a dalan tapno makita dagiti tattao.+ Pudno kunak kadakayo, Aw-awatendan a naan-anay ti gunggonada.  Sika, nupay kasta, inton agkararagka, sumrekka iti pribado a siledmo+ ket, kalpasan a nairikepmon ti ridawmo, agkararagka ken ni Amam nga adda iti nalimed;+ iti kasta ni Amam a kumita iti nalimed supapakannakanto.  Ngem no agkarkararagkayo, dikay ulit-uliten a sawen ti isu met laeng a bambanag,+ a kas iti ar-aramiden dagiti tattao iti nasnasion, ta pagarupenda a maipangagdanto gapu iti panagusarda iti adu a sasao.  Gapuna, dikay agbalin a kas kadakuada, ta ti Dios nga Amayo ammona no ania ti bambanag a kasapulanyo+ sakbay pay a dawatenyo kenkuana.  “Agkararagkayo, ngarud, a kastoy:+ “‘Amami nga adda iti langlangit, masantipikar+ koma ti naganmo.+ 10  Umay koma ti pagariam.+ Maaramid koma ti pagayatam,+ kas sadi langit, kasta met iti daga.+ 11  Itedmo kadakami ita nga aldaw ti tinapaymi nga agpaay itoy nga aldaw;+ 12  ket pakawanennakami kadagiti utangmi, a kas met iti panangpakawanmi kadagiti nakautang kadakami.+ 13  Ket saannakami nga iyeg iti pannakasulisog,+ no di ket ispalennakami iti daydiay nadangkes.’+ 14  “Ta no pakawanenyo dagiti tattao kadagiti labsingda, pakawanennakayto met ti nailangitan nga Amayo;+ 15  idinto ta no saanyo a pakawanen dagiti tattao kadagiti labsingda, uray ni Amayo saannanto a pakawanen dagiti labsingyo.+ 16  “No agay-ayunarkayo,+ isardengyo ti agbalin a naliday ti rupana a kas kadagiti managinsisingpet, ta palaadenda dagiti rupada tapno kadagiti tattao agparangda nga agay-ayunar.+ Pudno kunak kadakayo, Aw-awatendan a naan-anay ti gunggonada. 17  Ngem sika, no agay-ayunarka, sapsapuam ta ulom ken diram-osam ta rupam,+ 18  tapno agparangka nga agay-ayunar, saan a kadagiti tattao, no di ket iti Amam nga adda iti nalimed;+ iti kasta ni Amam a kumitkita iti nalimed supapakannakanto. 19  “Isardengyo ti agurnong maipaay iti bagbagiyo kadagiti gameng+ iti daga, sadiay nga ibusen ti sanga ken lati, ken sadiay a serken ken takawen dagiti mannanakaw. 20  Imbes ketdi, agurnongkayo maipaay iti bagbagiyo kadagiti gameng idiay langit,+ sadiay a saan nga ibusen ti sanga wenno uray lati,+ ken sadiay a saan a serreken ken takawen dagiti mannanakaw. 21  Ta no sadino ti ayan ti gamengmo, addanto met sadiay ti pusom. 22  “Ti pagsilawan ti bagi isu ti mata.+ No, ngarud, simple ti matam, ti intero a bagim naraniagto; 23  ngem no nadangkes ti matam,+ ti intero a bagim nasipngetto. No iti kinapudnona ti lawag nga adda kenka ket kinasipnget, anian a nagdakkel dayta a kinasipnget!+ 24  “Awan ti makabalin nga agpaadipen iti dua nga appo; ta mabalin a guraenna ti maysa ket ayatenna ti sabali,+ wenno agtalinaed iti maysa ket umsienna ti sabali. Saanyo a mabalin ti agpaadipen iti Dios ken iti Kinabaknang.+ 25  “Gapu itoy kunak kadakayo: Isardengyo ti maringgoran+ maipapan kadagiti kararuayo no ania ti kanenyonto wenno no ania ti inumenyonto, wenno maipapan iti bagbagiyo no ania ti ikawesyonto.+ Saan kadi a napatpateg ti kararua ngem iti taraon ket ti bagi ngem iti pagan-anay?+ 26  Paliiwenyo a sipapasnek dagiti tumatayab+ iti langit, agsipud ta saanda nga agmula iti bin-i wenno agani wenno agipempen kadagiti kamalig; kaskasdi a ti nailangitan nga Amayo taraonanna ida. Saan kadi a napatpategkayo ngem isuda?+ 27  Siasino kadakayo nga iti panagbalinna a maringgoran manayonanna iti maysa a kasiko ti kaatiddog ti biagna?+ 28  Kasta met, no maipapan iti pagan-anay, apay a maringgorankayo? Agsursurokayo kadagiti lirio+ iti talon, no kasano ti panagdakkelda; saanda nga agbannog, wenno mambi; 29  ngem kunak kadakayo nga uray ni Solomon+ iti isuamin a dayagna saan a nakawesan a kas iti maysa kadagitoy. 30  No, ita, ti Dios kawesanna a kasta ti mulmula iti talon, nga adda ditoy ita nga aldaw ket inton bigat maipuruak iti urno, saan kadi nga ad-adda pay a kawesannakayto, dakayo a bassitan pammati?+ 31  Gapuna dikay pulos maringgoran+ ket kunaenyo, ‘Ania ti kanenmi?’ wenno, ‘Ania ti inumenmi?’ wenno, ‘Ania ti pagkawesmi?’ 32  Ta amin dagitoy isuda ti bambanag a sigagagar a sapsapulen dagiti nasion. Ta ammo ti nailangitan nga Amayo nga amin dagitoy a banag ket kasapulanyo.+ 33  “Itultuloyyo, ngarud, a sapulen nga umuna ti pagarian ken ti kinalintegna,+ ket amin dagitoy sabali pay a bambanag mainayonto kadakayo.+ 34  Gapuna, dikay pulos maringgoran maipapan iti sumaganad nga aldaw,+ ta ti sumaganad nga aldaw addaanto kadagiti bukodna a pakaringgoran. Umdasen iti tunggal aldaw ti bukodna a kinadakes.

Footnotes