Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Mateo 27:1-66

27  Idi a bumigaten, ti amin a panguluen a papadi ken ti lallakay dagiti umili nangangayda iti panagiinnuman a maibusor ken Jesus tapno papatayenda.+  Ket, kalpasan a pinarautanda, inturongda ket inyawatda ken ni Pilato a gobernador.+  Idin ni Judas, a nangliput kenkuana, idi makitkitana nga isu nakondenar, nakarikna iti nasaem a ladingit ket insublina ti tallopulo+ a kapisi a pirak iti panguluen a papadi ken iti lallakay,  a kunkunana: “Nagbasolak idi a liniputak ti nalinteg a dara.”+ Kinunada: “Ania koma dayta kadakami? Makaammoka iti dayta!”+  Gapuna impuruakna dagiti kapisi a pirak iti templo ket pimmanaw, ket napan ket nagbitay.+  Ngem ti panguluen a papadi innalada dagiti kapisi a pirak ket kinunada: “Saan a nainkalintegan nga ipisok ida iti sagrado a pagidulinan iti gameng, agsipud ta dagita ket gatad ti dara.”  Kalpasan a nagiinnumanda, ginatangda babaen kadagita ti talon ti agdamdamili tapno pagitabonan kadagiti ganggannaet.  Gapuna dayta a talon naawagan iti “Talon ti Dara”+ agingga itoy met laeng nga aldaw.  Iti kasta ti naisao babaen ken Jeremias a mammadto natungpal, a kunkunana: “Ket innalada ti tallopulo a kapisi a pirak,+ ti gatad iti tao a nagatadan, daydiay a ginatadan ti sumagmamano iti annak ti Israel, 10  ket intedda ida a maipaay ti talon ti agdamdamili,+ sigun iti imbilin kaniak ni Jehova.” 11  Itan nagtakder ni Jesus iti sanguanan ti gobernador; ket insaludsod kenkuana ti gobernador: “Sika kadi ti ari dagiti Judio?”+ Simmungbat ni Jesus: “Sika kunam dayta.”+ 12  Ngem, bayat nga ak-akusaren+ idi ti panguluen a papadi ken ti lallakay, awan ti insungbatna.+ 13  Idin kinuna kenkuana ni Pilato: “Saanmo aya a mangngeg no mano a bambanag ti pampaneknekanda a maibusor kenka?”+ 14  Kaskasdi nga isu saan a simmungbat kenkuana, saan, saan uray maysa a sao, iti kasta nagsiddaaw unay ti gobernador.+ 15  Ita iti tunggal piesta nagbalin a kaugalian ti gobernador a luk-atan ti maysa a balud kadagiti bunggoy, daydiay kayatda.+ 16  Iti dayta met laeng a tiempo tengtenglenda ti maysa nga agdindinamag ti kinadakesna a balud a naawagan ti Barabas.+ 17  Gapuna idi a naurnongda a sangsangkamaysa kinuna kadakuada ni Pilato: “Siasino ti kayatyo a luk-atak kadakayo, ni Barabas wenno ni Jesus a maaw-awagan Kristo?”+ 18  Ta ammona a gapu iti apal+ isu inyawatda.+ 19  Mainayon pay, bayat nga isu situtugaw idi iti tugaw iti panangukom, ti asawana nagbaon kenkuana, a kunkunana: “Dika bibiangan dayta a nalinteg+ a tao, ta nagsagabaak iti adu ita nga aldaw iti maysa a tagtagainep+ gapu kenkuana.” 20  Ngem ti panguluen a papadi ken ti lallakay ginuyugoyda dagiti bunggoy a dawatenda ni Barabas,+ ngem pukawenda ni Jesus. 21  Ita kas sungbat kinuna kadakuada ti gobernador: “Siasino kadagiti dua ti kayatyo a luk-atak kadakayo?” Kinunada: “Ni Barabas.”+ 22  Kinuna kadakuada ni Pilato: “Ania, ngarud, ti aramidek ken Jesus a maaw-awagan Kristo?” Kinunada amin: “Mailansa koma!”+ 23  Kinunana: “Apay, ania aya ti dakes a banag nga inaramidna?” Kaskasdi nga inyik-ikkisda nga ad-adda pay: “Mailansa koma!”+ 24  Idi makitana a saan a nakapasayaat dayta ngem, imbes ketdi, maysa a derraaw ti tumataud idi, ni Pilato nangala iti danum+ ket binugguanna dagiti imana iti sanguanan ti bunggoy, a kunkunana: “Awan basolko iti dara daytoy a tao. Makaammokayo iti dayta.” 25  Iti kasta amin dagiti tattao kinunada a kas sungbat: “Ti darana umay kadakami ken iti annakmi.”+ 26  Idin linuk-atanna kadakuada ni Barabas, ngem pinasaplitna ni Jesus+ ket inyawatna tapno mailansa.+ 27  Idin dagiti soldado ti gobernador impanda ni Jesus idiay palasio ti gobernador ket inurnongda a sangsangkamaysa kenkuana ti intero a bagi dagiti buyot.+ 28  Ket idi inuksobanda, kinawesanda iti kagay nga eskarlata,+ 29  ket nanglagada iti korona manipud kadagiti sisiitan ket inkabilda dayta iti ulona ken maysa a runo iti makannawan nga imana. Ket, idi nagparintumengda iti sanguananna, isu pinagang-angawanda,+ a kunkunada: “Naimbag nga aldawmo, sika nga Ari dagiti Judio!”+ 30  Ket tinupraanda+ ket innalada ti runo ket rinugianda a kinabkabil ti ulona. 31  Kamaudiananna, idi napagang-angawandan,+ inikkatda ti kagay ket inkabilda kenkuana dagiti makinruar a kawesna ket inturongda tapno mailansa.+ 32  Bayat a rumrummuarda nasarakanda ti maysa a katutubo iti Cirene a managan Simon.+ Daytoy a tao pinilitda nga agserbi tapno awitenna ti kayona a pagtutuokan. 33  Ket idi dimtengda iti disso a naawagan iti Golgotha,+ a makunkuna a, Disso ti Bangabanga, 34  isu inikkanda iti arak a nalaokan iti apro+ tapno inumenna; ngem, kalpasan a maramananna dayta, nagkedked nga uminum.+ 35  Idi nailansadan+ biningbingayda dagiti makinruar a kawesna+ babaen ti panagbibinnunot,+ 36  ket, bayat a nakatugawda, isu binantayanda sadiay. 37  Kasta met, impaskilda iti ngatuen ti ulona ti pammabasol maibusor kenkuana, a naisurat: “Isu daytoy ni Jesus nga Ari dagiti Judio.”+ 38  Idin dua a mannanakaw ti nailansa a naikuyog kenkuana, maysa iti makannawanna ken maysa iti makannigidna.+ 39  Gapuna dagiti lumablabas nangrugida a nagsao a sibabassawang+ kenkuana, nga ingilngilangilda+ dagiti uloda 40  ken kunkunada: “O sika a mangrebba kampay idi iti templo+ ken mangibangon iti dayta iti tallo nga aldaw, isalakanmo ta bagim! No maysaka nga anak ti Dios, umulogka manipud iti kayo a pagtutuokan!”+ 41  Iti umasping met a pamay-an isu rinugian a pinagang-angawan ti panguluen a papadi agraman dagiti eskriba ken lallakay ket kinunkunada:+ 42  “Ti dadduma insalakanna; ti bagina saanna a kabaelan nga isalakan! Isu ket Ari+ ti Israel; umulog koma ita manipud iti kayo a pagtutuokan ket mamatikamto kenkuana.+ 43  Nagtalek iti Dios; Isu ispalenna koma ita+ no Isu kayatenna, ta kinunana, ‘Anaknak ti Dios.’”+ 44  Iti isu met laeng a pamay-an uray dagiti mannanakaw a nailansa a naikuyog kenkuana nangrugida a nangumsi kenkuana.+ 45  Manipuden iti maikanem nga oras immapay ti kinasipnget+ iti intero a daga, agingga iti maikasiam nga oras.+ 46  Iti agarup maikasiam nga oras nagpukkaw ni Jesus buyogen ti natbag a timek, a kunkunana: “Eli, Eli, lama, sabachthani?” a kayatna a sawen, “Diosko, Diosko, apay a binaybay-annak?”+ 47  Idi mangngegda daytoy, rinugian a kunaen ti sumagmamano kadagidiay agtaktakder sadiay: “Daytoy a tao ket ay-ayabanna ni Elias.”+ 48  Ket dagus a maysa kadakuada ti timmaray ket nangala iti espongha ket impasagepsepna iti naalsem+ nga arak ket inkabilna dayta iti maysa a runo ket napanna pinainum.+ 49  Ngem kinuna ti dadduma kadakuada: “Isu bay-anyo! Kitaentayo no umay ni Elias a mangisalakan kenkuana.”+ [[Ti sabali a lalaki nangala iti pika ket dinuyokna ti bakrangna, ket rimmuar ti dara ken danum.]]+ 50  Manen ni Jesus nagpukkaw a buyogen ti natbag a timek, ket inyawatna ti espirituna.+ 51  Ket, adtoy! ti kortina+ ti santuario napisang a nagudua, manipud ngato agingga iti baba,+ ket ti daga nagkintayeg, ket napispisi dagiti dakkel a bato.+ 52  Ket naluktan dagiti pakalaglagipan a tanem ket adu a bagi ti sasanto a nakaturog ti naibangon, 53  (ket dagiti tattao, a rumrummuar manipud kadagiti pakalaglagipan a tanem kalpasan ti pannakapagungarna, simrekda iti nasantuan a siudad,)+ ket nakita ida ti adu a tattao. 54  Ngem ti opisial ti buyot ken dagidiay naikuyog kenkuana a mangbambantay ken Jesus, idi nakitada ti ginggined ken ti bambanag a mapaspasamak, nagbutengda iti kasta unay, a kunkunada: “Pudno unay a daytoy ket Anak ti Dios.”+ 55  Mainayon pay, adu a babbai ti adda idi sadiay nga agbuybuya manipud iti adayo,+ a kimmuyog ken Jesus manipud Galilea tapno agserbida kenkuana;+ 56  a kadakuada adda ni Maria Magdalena, kasta met ni Maria nga ina ni Santiago ken Joses, ken ti ina ti annak ni Zebedeo.+ 57  Itan idi a mumalem unayen, adda immay a maysa a tao a nabaknang a taga Arimatea, a managan Jose, nga isu met a mismo nagbalin nga adalan ni Jesus.+ 58  Daytoy a tao napan ken Pilato ket dinawatna ti bagi ni Jesus.+ Idin imbilin ni Pilato a maited dayta.+ 59  Ket innala ni Jose ti bagi, binalkutna iti nadalus a napino a lienso,+ 60  ket inkabilna dayta iti baro a pakalaglagipan a tanemna,+ nga inkungkongna iti dakkel a bato. Ket, kalpasan ti panangitulidna iti maysa a dakkel a bato iti ruangan ti pakalaglagipan a tanem, isu pimmanaw.+ 61  Ngem ni Maria Magdalena ken ti sabali pay a Maria nagtalinaedda sadiay, a situtugawda iti sanguanan ti tanem.+ 62  Iti sumaganad nga aldaw, a dayta ket kalpasan ti Panagsagana,+ ti panguluen a papadi ken dagiti Fariseo naguurnongda a sangsangkamaysa iti sanguanan ni Pilato, 63  a kunkunada: “Apo, nalagipmi a dayta nga agpampammarang kinunana idi sibibiag pay, ‘Kalpasan ti tallo nga aldaw+ maibangonakto.’ 64  Gapuna ibilinmo a ti tanem maaywanan agingga iti maikatlo nga aldaw, tapno saan a pulos umay dagiti adalanna ket takawenda+ ket kunaenda kadagiti tattao, ‘Isu naibangon manipud kadagiti natay!’ ket daytoy maudi a pananglimlimo dakdakesto ngem ti immuna.” 65  kinuna kadakuada ni Pilato: “Addaankayo iti guardia.+ Inkay aywanan dayta kas iti ammoyo a pamay-an.” 66  Gapuna napanda ket inaywananda ti tanem babaen ti panangtimbreda iti bato+ ken pannakaikabil ti guardia.

Footnotes