Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Mateo 25:1-46

25  “Iti kasta ti pagarian ti langlangit agbalinto a kas iti sangapulo a birhen a nangala kadagiti pagsilawanda+ ket rimmuarda a sumabet iti nobio.+  Lima kadakuada ti naampang,+ ket lima ti masirib.+  Ta dagiti naampang intugotda dagiti pagsilawanda ngem saanda a nangitugot iti lana,  idinto ta dagiti masirib nangitugotda iti lana kadagiti pagkargaanda a mairaman kadagiti pagsilawanda.  Bayat a ti nobio nagtaktak, nagdungsada amin ket nakaturogda.+  Iti mismo a tengnga ti rabii adda timmaud a pukkaw,+ ‘Adtoyen ti nobio! Rummuarkayon a sumabet kenkuana.’  Idin amin dagidiay a birhen timmakderda ket tinarimaanda dagiti pagsilawanda.+  Dagiti naampang kinunada kadagiti masirib, ‘Ikkandakami iti lanayo,+ agsipud ta dagiti pagsilawanmi ngannganida maiddepen.’  Dagiti masirib+ simmungbatda iti sasao nga, ‘Amangan no awan ti makaanay a maipaay kadakami ken kadakayo. Imbes ketdi, inkayo kadagidiay aglaklako iti dayta ket gumatangkayo iti maipaay kadakayo.’ 10  Bayat a mapmapanda gumatang, dimteng ti nobio, ket dagiti birhen a sisasagana simrekda a kimmuyog kenkuana iti padaya ti kasar;+ ket ti ridaw nairikep. 11  Kalpasanna immay met ti dadduma kadagiti birhen, a kunkunada, ‘Apo, apo, ilukatannakami!’+ 12  Kas sungbat kinunana, ‘Ibagak kadakayo ti pudno, Saankayo nga am-ammo.’+ 13  “Agtultuloykayo nga agbantay,+ ngarud, agsipud ta saanyo nga ammo ti aldaw wenno uray ti oras.+ 14  “Ta dayta ket kas idi a ti maysa a tao,+ a nganngani agdaliasat iti sabali a daga,+ inayabanna dagiti adipenna ket intalekna kadakuada dagiti sanikuana.+ 15  Ket iti daydiay maysa isu nangted iti lima a talento, iti sabali dua, iti sabali pay maysa, iti tunggal maysa sigun iti bukodna a kabaelan,+ ket isu napan iti sabali a daga. 16  Dagus a daydiay immawat iti lima a talento napan ket pinagnegosiona ida ket nakagun-od iti lima pay.+ 17  Iti isu met laeng a pamay-an daydiay immawat iti dua nakagun-od iti dua pay. 18  Ngem daydiay immawat iti maysa laeng napan, ket nagkali iti daga ket inlemmengna ti pirak a kuarta ni apona. 19  “Kalpasan ti nabayag a tiempo+ immay ti apo dagidiay nga adipen ket nakikuenta kadakuada.+ 20  Gapuna immasideg daydiay immawat iti lima a talento ket inyegna ti lima a kanayonan a talento, a kunkunana, ‘Apo, intalekmo kaniak ti lima a talento; kitaem, nakagun-odak iti lima pay a talento.’+ 21  Kinuna kenkuana ni apona, ‘Nasayaat unay, naimbag ken matalek nga adipen!+ Matalekka+ iti sumagmamano a banag. Dutokankanto iti adu a banag.+ Sumrekka iti rag-o+ ni apom.’ 22  Sumaganad immasideg daydiay immawat iti dua a talento ket kinunana, ‘Apo, intalekmo kaniak ti dua a talento; kitaem, nakagun-odak iti dua pay a talento.’+ 23  Kinuna kenkuana ni apona, ‘Nasayaat unay, naimbag ken matalek nga adipen! Matalekka iti sumagmamano a banag. Dutokankanto iti adu a banag.+ Sumrekka iti rag-o+ ni apom.’ 24  “Kamaudiananna immasideg daydiay immawat iti maysa a talento+ ket kinunana, ‘Apo, am-ammoka a maysaka a nainget a tao, nga agan-ani iti saanmo a nagmulaan ken agur-urnong sadiay a saanmo a nagtaepan. 25  Gapuna a nagbutengak+ ket napanak ket inlemmengko ti talentom iti daga. Adtoy alaem ti kukuam.’ 26  Kas sungbat kinuna kenkuana ni apona, ‘Nadangkes ken nabuntog nga adipen, ammom, di ngamin, a naganiak iti saanko a nagmulaan ken nagurnongak sadiay a saanko a nagtaepan? 27  No kasta, ngarud, rebbeng koma nga inkumitmo dagiti pirak a kuartak kadagiti bankero, ket iti isasangpetko awatek koma ti kukuak agraman ti patubo.+ 28  “‘Gapuna alaenyo kenkuana ti talento ket itedyo iti daydiay addaan iti sangapulo a talento.+ 29  Ta iti tunggal maysa nga addaan, ad-adunto pay ti maited ket isu maaddaanto iti kinaruay; ngem no maipapan kenkuana nga awanan, uray pay ti adda kenkuana maalanto kenkuana.+ 30  Ket ipalladawyo ti awan kaes-eskanna nga adipen iti sipnget iti ruar. Sadiay nga addanto ti panagsangitna ken ti panagngaretnget dagiti ngipenna.’+ 31  “Inton ti Anak ti tao+ dumteng iti dayagna, ket amin dagiti anghel maikuyogda kenkuana,+ iti kasta agtugawto iti nadayag a tronona.+ 32  Ket amin dagiti nasion maurnongdanto iti sanguananna,+ ket paglalasinennanto+ dagiti tattao iti maysa ken maysa,+ a kas ti maysa a pastor ilasinna dagiti karnero manipud kadagiti kalding. 33  Ket ikabilnanto dagiti karnero iti makannawanna,+ ngem dagiti kalding iti makannigidna.+ 34  “Kalpasanna kunaento ti ari kadagidiay adda iti makannawanna, ‘Umaykayo, dakayo a binendisionan ni Amak,+ tawidenyo+ ti pagarian+ a naisagana kadakayo manipud iti pannakabangon ti lubong.+ 35  Ta nagbisinak ket inikkandak ti kanen;+ nawawak ket inikkandak ti inumen. Maysaak idi a ganggannaet ket inawatdak buyogen ti kinamanagpadagus;+ 36  lamolamoak,+ ket kinawesandak. Nagsakitak ket tinaripatodak. Addaak idi iti pagbaludan+ ket immaykayo kaniak.’ 37  Iti kasta dagiti nalinteg sumungbatdanto kenkuana iti sasao nga, ‘Apo, kaano ti pannakakitami kenka a mabisin ket tinaraonandaka, wenno mawaw,+ ket inikkandaka ti inumen?+ 38  Kaano ti pannakakitami kenka a ganggannaet ket inawatdaka buyogen ti kinamanagpadagus, wenno lamolamo, ket kinawesandaka? 39  Kaano ti pannakakitami kenka a masakit wenno adda iti pagbaludan ket napankami kenka?’ 40  Ket kas sungbat kunaento kadakuada ti ari,+ ‘Pudno kunak kadakayo, No kasano nga inaramidyo dayta iti maysa kadagiti kanunumuan+ kadagitoy kakabsatko,+ inaramidyo dayta kaniak.’+ 41  “Iti kasta kunaennanto, kalpasanna, kadagidiay adda iti makannigidna, ‘Umadayokayo kaniak,+ dakayo a nailunoden, nga agturong iti agnanayon nga apuy+ a naisagana iti Diablo ken kadagiti anghelna.+ 42  Ta nagbisinak, ngem awan ti intedyo kaniak a kanen,+ ken nawawak,+ ngem awan ti intedyo kaniak nga inumen. 43  Maysaak idi a ganggannaet, ngem saandak nga inawat buyogen ti kinamanagpadagus; lamolamoak, ngem saandak a kinawesan;+ masakitak ken addaak iti pagbaludan,+ ngem saandak a tinaripato.’ 44  Iti kasta sumungbatdanto met iti sasao nga, ‘Apo, kaano ti pannakakitami kenka a mabisin wenno mawaw wenno ganggannaet wenno lamolamo wenno masakit wenno adda iti pagbaludan ket saankami a nagserbi kenka?’ 45  Iti kasta sungbatannanto ida iti sasao a, ‘Pudno kunak kadakayo, No kasano a saanyo nga inaramid dayta iti maysa kadagitoy a kanunumuan,+ saanyo nga inaramid+ dayta kaniak.’+ 46  Ket agturongto dagitoy iti agnanayon a pannakagessat,+ ngem dagiti nalinteg iti agnanayon a biag.”+

Footnotes