Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Mateo 22:1-46

22  Kas kanayonan a sungbat nagsao manen kadakuada ni Jesus kadagiti pangngarig, a kunkunana:+  “Ti pagarian ti langlangit nagbalin a kas iti maysa a tao, maysa nga ari, a nangangay iti padaya ti kasar+ maipaay iti anakna a lalaki.  Ket imbaonna dagiti adipenna tapno ayabanda dagidiay naawis iti padaya ti kasar,+ ngem saanda a kinayat ti umay.+  Manen imbaonna dagiti sabali nga ad-adipen,+ a kunkunana: ‘Ibagayo kadagidiay naawis: “Adtoy! Insaganakon ti padayak,+ napartin dagiti toro ken pinalukmeg nga an-animalko, ket amin a bambanag nakasaganan. Umaykayo iti padaya ti kasar.”’+  Ngem napanda a saanda a nangikankano, ti maysa iti bukodna a talon, ti sabali iti komersiona;+  ngem ti dadduma, idi tinengngelda dagiti adipenna, sikukuspag a trinatoda ida ket pinapatayda ida.+  “Ngem nakapungtot ti ari, ket imbaonna dagiti buyotna ket dinadaelna dagidiay a manangpapatay ket pinuoranda ti siudadda.+  Kalpasanna kinunana kadagiti adipenna, ‘Ti padaya ti kasar pudno a nakasaganan, ngem dagidiay naawis saanda a maikari.+  Gapuna mapankayo kadagiti dalan nga agturong iti ruar ti siudad, ket ti asinoman a masarakanyo awisenyo iti padaya ti kasar.’+ 10  Iti kasta dagidiay nga adipen rimmuarda a napan kadagiti dalan ket inurnongda a sangsangkamaysa ti isuamin a nasarakanda, agpadpada dagiti nadangkes ken dagiti naimbag;+ ket ti siled a maipaay kadagiti seremonia ti kasar napno kadagidiay sisasadag+ iti panganan. 11  “Idi a simrek ti ari tapno sukimatenna dagiti sangaili nakitana sadiay ti maysa a tao a saan a nagpagan-anay iti kawes a pakiboda.+ 12  Gapuna kinunana kenkuana, ‘Gayyem, kasano a nakastrekka ditoy a saan a nagpagan-anay iti kawes a pakiboda?’+ Isu saan a nakauni. 13  Idin kinuna ti ari kadagiti adipenna, ‘Punguenyo ti ima ken sakana ket ipalladawyo iti sipnget iti ruar. Sadiay addanto panagsangitna ken panagngaretnget dagiti ngipenna.’+ 14  “Ta adu ti naawis, ngem bassit dagiti napili.”+ 15  Idin napan dagiti Fariseo ket nagnunumoda a sangsangkamaysa tapno siluanda iti panagsasaona.+ 16  Gapuna imbaonda kenkuana dagiti adalanda, agraman dagiti pasurot iti gunglo ni Herodes,+ a kunkunada: “Mannursuro, ammomi a napudnoka ken isurom a sipupudno ti dalan ti Dios, ket saanmo nga ikankano ti asinoman, ta saanka a kumita iti makinruar a langa dagiti tattao.+ 17  Ngarud, ibagam kadakami, Ania ti pagarupmo? Nainkalintegan kadi ti agbayad iti panguluen a buis ken Cesar wenno saan?”+ 18  Ngem ni Jesus, yantangay ammona ti kinadangkesda, kinunana: “Apay a subsubokendak, managinsisingpet?+ 19  Ipakitayo kaniak ti panguluen a buis a sinsilio.” Nangyegda kenkuana iti maysa a denario. 20  Ket kinunana kadakuada: “Makinladawan ken surat daytoy?”+ 21  Kinunada: “Ni Cesar.” Idin kinunana kadakuada: “Ngarud, ibayadyo ken Cesar ti bambanag ni Cesar, ngem iti Dios ti bambanag ti Dios.”+ 22  Ala ket, idi nangngegda dayta, nagsiddaawda, ket idi pinanawanda napandan.+ 23  Iti dayta nga aldaw immay kenkuana dagiti Saduceo, nga agkunkuna nga awan panagungar, ket inimtuodda kenkuana:+ 24  “Mannursuro, kinuna ni Moises, ‘No ti asinoman a lalaki matay a di naaddaan iti annak, ti kabsatna a lalaki masapul nga alaenna nga asawaen ti asawana ket mangpatanor iti putot maipaay iti kabsatna.’+ 25  Ita adda idi pito nga agkakabsat a lallaki kadakami; ket ti umuna nangasawa ket pimmusay, ket, iti kaawan putotna, napanawanna ti asawana a maipaay iti kabsatna.+ 26  Kasta met laeng ti napasamak iti maikadua ken iti maikatlo, agingga iti amin a pito.+ 27  Kaudian ti amin natay ti babai. 28  Iti kasta, inton panagungar, siasinonto kadagiti pito ti makin-asawa kenkuana? Ta isuda amin inikutanda.”+ 29  Kas sungbat kinuna kadakuada ni Jesus: “Agbiddutkayo, agsipud ta saanyo nga ammo dagiti Kasuratan wenno uray ti pannakabalin ti Dios;+ 30  ta inton panagungar saan a mangasawa dagiti lallaki wenno mayasawa dagiti babbai,+ no di ket kaslada kadagiti anghel idiay langit. 31  No maipapan iti panagungar dagiti natay, saanyo aya a nabasa ti sinao kadakayo ti Dios, a kunkunana,+ 32  ‘Siak ti Dios ni Abraham ken ti Dios ni Isaac ken ti Dios ni Jacob’?+ Isu ti Dios, saan a dagiti natay, no di ket dagiti sibibiag.”+ 33  Idi mangngegda dayta, nagsiddaaw unay dagiti bunggoy iti pannursurona.+ 34  Kalpasan a nangngeg dagiti Fariseo a pinagulimekna dagiti Saduceo, naguurnongda kas maysa a bunggoy. 35  Ket ti maysa kadakuada, a nalaing iti Linteg,+ nagimtuod, a subsubokenna: 36  “Mannursuro, ania ti kadakkelan a bilin iti Linteg?”+ 37  Kinunana kenkuana: “‘Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.’+ 38  Daytoy ti kadakkelan ken umuna a bilin. 39  Ti maikadua, nga umasping iti dayta, isu daytoy, ‘Masapul nga ayatem ti padam a tao a kas iti bagim.’+ 40  Kadagitoy dua a bilin nga agpannuray ti intero a Linteg, ken dagiti Mammadto.”+ 41  Ita bayat a naurnong a sangsangkamaysa dagiti Fariseo inimtuod kadakuada ni Jesus:+ 42  “Ania ti pagarupyo maipapan iti Kristo? Makin-anak kenkuana?” Kinunada kenkuana: “Ni David.”+ 43  Kinunana kadakuada: “Kasano, ngarud, a babaen iti paltiing+ isu awagan ni David iti ‘Apo,’ a kunkunana, 44  ‘Kinuna ni Jehova iti Apok: “Agtugawka iti makannawanko agingga nga ikabilko dagiti kabusormo iti baba dagiti sakam”’?+ 45  No, ngarud, isu awagan ni David iti ‘Apo,’ kasano nga isu ket anakna?”+ 46  Ket awan asinoman a nakabalin a mangibaga iti maysa a sao kas sungbat kenkuana, awan met ti asinoman a nakaitured nga agsaludsod pay kenkuana manipuden iti dayta nga aldaw.+

Footnotes