Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Mateo 21:1-46

21  Ala ket, idi nakaasidegda idiay Jerusalem ken dimtengda idiay Betfage iti Bantay dagiti Olibo, iti kasta nangibaon ni Jesus iti dua nga adalan,+  a kunkunana kadakuada: “Inkayo iti purok a matantannawaganyo, ket madagdagus a makasarakkayto iti asno a naigalut, ken maysa nga urbon a naikuyog kenkuana; warwaranyo ida ket iyegyo ida kaniak.+  Ket no adda agsao iti aniaman kadakayo, masapul a kunaenyo, ‘Kasapulan ida ti Apo.’ Iti kasta dagus nga ipatulodnanto ida.”  Daytoy iti kinaagpaysuanna ket naaramid tapno matungpal ti naisao babaen iti mammadto, a kunkunana:  “Ibagayo iti anak a babai ti Sion, ‘Adtoy! Ti Arim um-umayen kenka,+ naalumamay ti kababalinna,+ ket sisasakay iti asno, wen, iti urbon ti asna, a putot ti animal a pagtrabaho.’”+  Gapuna napan dagiti adalan ket inaramidda kas ti imbilin kadakuada ni Jesus.  Ket inyegda ti asno ken ti urbonna, ket imparabawda kadagitoy dagiti makinruar a kawesda, ket nagtugaw a mismo kadakuada.+  Kaaduan iti bunggoy inyaplagda dagiti makinruar a kawesda+ iti dalan, bayat a rinugian ti dadduma ti nangsigpat iti sangsanga manipud iti kaykayo ken nangyaplag kadakuada iti dalan.+  No maipapan kadagiti bunggoy, dagidiay mapmapan nga umun-una kenkuana ken dagidiay sumursurot impukpukkawda: “Mangisalakanka, ikararagmi,+ iti Anak ni David!+ Bendito daydiay umay iti nagan ni Jehova!+ Mangisalakanka kenkuana, ikararagmi, iti kangatuan!”+ 10  Itan idi simrek idiay Jerusalem,+ ti intero a siudad nagkakaribuso, a kunkunada: “Asino daytoy?” 11  Imbagbaga dagiti bunggoy: “Daytoy ti mammadto+ a ni Jesus, manipud Nazaret ti Galilea!” 12  Ket simrek ni Jesus iti templo ket pinaruarna amin dagidiay aglaklako ken aggatgatang idiay templo, ket binalintuagna dagiti lamisaan dagiti agsuksukat iti kuarta ken dagiti bangko dagidiay aglaklako kadagiti kalapati.+ 13  Ket kinunana kadakuada: “Adda a naisurat, ‘Ti balayko maawaganto iti balay a pagkararagan,’+ ngem pagbalbalinenyo a rukib dagiti mannanakaw.”+ 14  Kasta met, dagiti bulsek ken pilay a tattao immasidegda kenkuana idiay templo, ket inagasanna ida. 15  Idi a ti panguluen a papadi ken dagiti eskriba nakitada ti nakaskasdaaw a bambanag nga inaramidna+ ken ti ubbing a lallaki nga agpukpukkaw idiay templo ken kunkunada: “Mangisalakanka, ikararagmi,+ iti Anak ni David!”+ nagrurodda 16  ket kinunada kenkuana: “Mangngegmo kadi ti sasawen dagitoy?” Kinuna kadakuada ni Jesus: “Wen. Saanyo aya a pulos nabasa+ daytoy, ‘Manipud iti ngiwat dagiti ubbing ken agsussuso nangipaayka iti dayaw’?”+ 17  Ket idi pinanawanna ida isu napan iti ruar ti siudad nga agturong idiay Betania ket nagpalabas iti rabii sadiay.+ 18  Bayat nga agsubsubli a nasapa iti bigat idiay siudad, isu nagbisin.+ 19  Ket nakakita iti kayo a higos iti sibay ti dalan ket napan iti dayta, ngem awan ti nasarakanna+ iti dayta no di bulbulong laeng, ket kinunana iti dayta: “Awan koma ti agtauden kenka a bunga iti agnanayonen.”+ Ket giddato a nalaylay ti kayo a higos. 20  Ngem idi a nakita daytoy dagiti adalan, nagsiddaawda, a kunkunada: “Kasano a giddato a nalaylay ti kayo a higos?”+ 21  Kas sungbat kinuna kadakuada ni Jesus: “Pudno kunak kadakayo, No koma laeng addaankayo iti pammati ket saankayo nga agduadua,+ saanyonto laeng nga aramiden ti inaramidko iti kayo a higos, no di ket kasta met a no kunaenyo itoy a bantay, ‘Maibagkat ken maipuruakka idiay baybay,’ mapasamakto dayta.+ 22  Ket amin a bambanag a dawatenyo iti kararag, nga addaankayo iti pammati, awatenyonto.”+ 23  Ita kalpasan a nakapan idiay templo, ti panguluen a papadi ken ti lallakay dagiti umili immasidegda kenkuana bayat a mangisursuro idi ket kinunada:+ “Babaen iti ania nga autoridad nga aramidem dagitoy a banag? Ken siasino ti nangted kenka itoy nga autoridad?”+ 24  Kas sungbat kinuna kadakuada ni Jesus: “Imtuodek met kadakayo ti maysa a banag. No ibagayo dayta kaniak, ibagakto met kadakayo no babaen iti ania nga autoridad nga aramidek dagitoy a banag:+ 25  Ti pammautisar ni Juan, ania ti naggubuayanna? Nagtaud idiay langit wenno nagtaud kadagiti tattao?”+ Ngem rinugianda nga irason iti bagbagida, a kunkunada: “No kunaentayo, ‘Nagtaud idiay langit,’ kunaennanto kadatayo, ‘Apay, ngarud, a saankayo a namati kenkuana?’+ 26  No, ngarud, kunaentayo, ‘Nagtaud kadagiti tattao,’ adda ti bunggoy a pagbutngantayo,+ ta isuda amin ibilangda ni Juan kas maysa a mammadto.”+ 27  Gapuna kas sungbat ken Jesus kinunada: “Saanmi nga ammo.” Kinunana kadakuada kalpasanna: “Uray siak diak met ibaga kadakayo no babaen iti ania nga autoridad nga aramidek dagitoy a banag.+ 28  “Ania ti pagarupyo? Maysa a tao addaan ti dua nga annak.+ Idi napan iti umuna, kinunana, ‘Anak, inka agtrabaho ita nga aldaw idiay kaubasan.’ 29  Kas sungbat kinuna daytoy, ‘Mapanak, apo,’+ ngem saan a napan. 30  Idi immasideg iti maikadua, kinunana ti isu met laeng. Kas sungbat kinuna daytoy, ‘Saanak a mapan.’ Kalpasanna nagbabawi+ ket napan. 31  Siasino kadagiti dua ti nangaramid iti pagayatan ni amana?”+ Kinunada: “Ti naud-udi a nadakamat.” Kinuna kadakuada ni Jesus: “Pudno kunak kadakayo a dagiti agsingsingir iti buis ken dagiti balangkantis mapanda nga umun-una ngem dakayo iti pagarian ti Dios. 32  Ta immay kadakayo ni Juan iti dalan ti kinalinteg,+ ngem saankayo a namati kenkuana.+ Nupay kasta, namati kenkuana dagiti agsingsingir iti buis ken dagiti balangkantis,+ ket dakayo, nupay nakitayo daytoy, saankayo a nagbabawi kalpasanna tapno mamatikayo kenkuana. 33  “Denggenyo ti sabali pay a pangngarig: Adda idi maysa a tao, maysa a bumalay,+ a nagmula iti kaubasan ket nangikabil iti alad iti aglikmut dayta ken nangkali iti pagpespessan iti ubas iti dayta ken nangpatakder iti torre,+ ket impaabangna kadagiti agtaltalon, ket nagdaliasat iti sabali a daga.+ 34  Idi a ti panawen dagiti bunga immasidegen, imbaonna dagiti adipenna a mapan kadagiti agtaltalon tapno alaen dagiti bungana. 35  Nupay kasta, dagiti agtaltalon innalada dagiti adipenna, ket ti maysa minalmaloda, ti sabali pinapatayda, ti sabali inuborda.+ 36  Manen nangibaon kadagiti sabali nga ad-adipen, ad-aduda ngem dagiti immuna, ngem inaramidda kadagitoy ti isu met laeng.+ 37  Kamaudiananna imbaonna kadakuada ti anakna, a kunkunana, ‘Raemendanto ti anakko.’ 38  Idi makitada ti anak kinuna dagiti agtaltalon iti bagbagida, ‘Daytoy ti agtawid;+ umaykayo, papatayentayo ket alaentayo ti tawidna!’+ 39  Gapuna innalada ket pinaruarda iti kaubasan ket pinapatayda.+ 40  Gapuna, inton umay ti makinkukua iti kaubasan, anianto ti aramidenna kadagidiay nga agtaltalon?” 41  Kinunada kenkuana: “Agsipud ta dakesda, mangyegto kadakuada iti dakes a pannakadadael+ ket ipaabangnanto ti kaubasan kadagiti sabali nga agtaltalon, nga agbayadto kenkuana kadagiti bunga inton tiempodan.”+ 42  Kinuna kadakuada ni Jesus: “Saanyo aya a pulos nabasa kadagiti Kasuratan, ‘Ti bato a linaksid dagiti managibangon+ isu ti nagbalin a kangrunaan a bato a pasuli.+ Manipud ken Jehova a naaramid daytoy, ket nakaskasdaaw dayta kadagiti matatayo’? 43  Daytoy ti makagapu a kunak kadakayo, Ti pagarian ti Dios maikkatto kadakayo ket maited iti nasion a mangpatpataud kadagiti bungana.+ 44  Kasta met, ti tao a matnag itoy a bato maburakto. No maipapan iti asinoman a pagtinnaganna, isu tumekento dayta.”+ 45  Itan idi a ti panguluen a papadi ken dagiti Fariseo nangngegda dagiti pangngarigna, nadlawda nga isu agsasao maipapan kadakuada.+ 46  Ngem, nupay ikagkagumaanda a kemmegen, nagbutengda kadagiti bunggoy, agsipud ta isu imbilang dagitoy a maysa a mammadto.+

Footnotes