Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Marcos 3:1-35

3  Naminsan manen isu simrek iti maysa a sinagoga, ket adda idi sadiay ti maysa a lalaki a nagango ti imana.+  Gapuna sinipsiputanda a siiinget tapno kitaenda no agasanna ti lalaki iti sabbath, tapno maakusarda.+  Ket kinunana iti lalaki a nagango ti imana: “Tumakderka ket agpatengngaka.”  Sumaganad kinunana kadakuada: “Nainkalintegan kadi iti sabbath ti agaramid iti naimbag nga aramid wenno agaramid iti dakes nga aramid, mangisalakan wenno mangpapatay iti kararua?”+ Ngem nagulimekda.  Ket kalpasan a kimmita a sirururod iti aglikmut kadakuada, yantangay naan-anay a napaladingit iti kinaawan rikna ti puspusoda,+ kinunana iti lalaki: “Unnatem ta imam.” Ket inunnatna, ket immimbag ti imana.+  Iti kasta rimmuar dagiti Fariseo ket dagus a rinugianda ti nakiinnuman kadagiti pasurot iti gunglo ni Herodes+ maibusor kenkuana, tapno dadaelenda.+  Ngem pimmanaw ni Jesus agraman dagiti adalanna nga agturong iti baybay; ket maysa a dakkel nga umariwekwek manipud Galilea ken manipud Judea ti simmurot kenkuana.+  Uray pay manipud Jerusalem ken manipud Idumea ken manipud iti ballasiw ti Jordan ken iti aglawlaw ti Tiro+ ken Sidon, maysa a dakkel nga umariwekwek ti immay kenkuana, idi mangngegda ti kaadu ti bambanag nga inar-aramidna.  Ket imbagana kadagiti adalanna nga adda koma bassit a barangay nga agtultuloy a mausarna tapno saan a dupudopen ti bunggoy. 10  Ta adu ti inagasanna, a ti nagbanaganna ket amin dagidiay addaan kadagiti nadagsen a sagubanit nagdadarisonda kenkuana tapno isu sagidenda.+ 11  Uray dagiti narugit nga espiritu,+ no isu makitada, agruknoyda iti sanguananna ket agikkisda, a kunkunada: “Sika ti Anak ti Dios.”+ 12  Ngem adu a daras a siiinget a binilinna ida nga isu saanda nga ipakaammo.+ 13  Ket immuli iti maysa a bantay ket inayabanna dagidiay kinayatna,+ ket napanda kenkuana.+ 14  Ket nangbukel iti maysa a bunggoy ti sangapulo ket dua, a ninagananna met iti “apostol,” tapno agtalinaedda kenkuana ken tapno ibaonna ida a mangasaba+ 15  ken tapno maaddaanda iti autoridad a mangparuar kadagiti sairo.+ 16  Ket ti bunggoy ti sangapulo ket dua a binukelna isu da Simon, a pinanagananna met iti Pedro,+ 17  ken Santiago nga anak ni Zebedeo ken ni Juan a kabsat ni Santiago+ (pinanagananna met dagitoy iti Boanerges, a kayatna a sawen Annak ti Gurruod), 18  ken Andres ken Felipe ken Bartolome ken Mateo ken Tomas ken Santiago nga anak ni Alfeo ken ni Tadeo ken Simon a Cananeo 19  ken ni Judas Iscariote, a nangliput kenkuana idi agangay.+ Ket simrek iti maysa a balay. 20  Naminsan pay a naguurnong ti bunggoy, iti kasta saanda idi a mabalin ti uray mangan.+ 21  Ngem idi nangngeg dagiti kabagianna+ ti maipapan iti dayta, rimmuarda tapno tenglenda, ta kinunkunada: “Napukawnan ti nakemna.”+ 22  Kasta met, kinunkuna dagiti eskriba a simmalog manipud Jerusalem: “Adda kenkuana ni Beelzebub, ket paruarenna dagiti sairo babaen ti agturay kadagiti sairo.”+ 23  Gapuna, kalpasan ti panangayabna kadakuada, rinugianna a kunaen kadakuada kadagiti pangngarig: “Kasano a ni Satanas maparuarna ni Satanas? 24  Ay ket, no ti maysa a pagarian mabingbingay maibusor kenkuana met laeng, dayta a pagarian saan a makapagtakder;+ 25  ket no ti maysa a balay mabingbingay maibusor kenkuana met laeng, dayta a balay saannanto a kabaelan ti agtakder.+ 26  Kasta met, no ni Satanas timmakder a maibusor iti bagina ket nabingbingay, isu saan a makapagtakder, no di ket manungpal.+ 27  Kinapudnona, awan asinoman a nakastrek iti balay ti napigsa a tao ti makabael a mangsamsam+ kadagiti maakar a sanikuana no di umuna a parautanna ti napigsa a tao, ket kalpasanna samsamennanto ti balayna.+ 28  Pudno kunak kadakayo nga amin a bambanag mapakawandanto iti annak ti tattao, uray no aniaman a basbasol ken tabtabbaaw ti sitatabbaaw nga aramidenda.+ 29  Nupay kasta, siasinoman nga agtabbaaw a maibusor iti nasantuan nga espiritu awan pannakapakawanna iti agnanayon, no di ket makabasol iti agnanayon a basol.”+ 30  Kastoy, agsipud ta kinunkunada: “Addaan narugit nga espiritu.”+ 31  Ita dimteng ni inana ken ti kakabsatna,+ ket, bayat a sitatakderda idi iti ruar, nangibaonda iti mangayab kenkuana.+ 32  Ket napasamak, maysa a bunggoy ti situtugaw iti aglawlawna, gapuna kinunada kenkuana: “Adtoy! Ni inam ken ti kakabsatmo idiay ruar sapsapulendaka.”+ 33  Ngem kas sungbat kinunana kadakuada: “Siasino ti inak ken ti kakabsatko?”+ 34  Ket idi kimmita kadagidiay situtugaw a naipalawlaw iti aglikmutna, kinunana: “Kitaenyo, ti inak ken ti kakabsatko!+ 35  Siasinoman a mangaramid iti pagayatan ti Dios, daytoy ti kabsatko a lalaki ken kabsatko a babai ken inak.”+

Footnotes