Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Marcos 14:1-72

14  Itan ti paskua+ ken ti piesta+ dagiti di pinaalsa a tinapay ket kalpasan pay ti dua nga aldaw.+ Ket sinapsapul ti panguluen a papadi ken dagiti eskriba no kasano a kemmegenda babaen iti nasikap a pamuspusan ken papatayenda;+  ta maulit-ulit a kinunada: “Saan nga iti piesta; amangan no agderraaw dagiti tattao.”+  Ket bayat nga isu adda idiay Betania iti balay ni Simon nga agkukutel,+ bayat a sisasadag iti panganan, maysa a babai ti immay nga addaan prasko nga alabastro ti bangbanglo a lana, pudpudno a nardo, nangina unay. Idi linuktanna a binuong ti prasko nga alabastro rinugianna nga ibukbok dayta iti ulona.+  Gapu itoy adda idi sumagmamano a mangyeb-ebkas iti rurod iti bagbagida: “Apay a naaramid daytoy a panangsayang iti bangbanglo a lana?+  Ta daytoy a bangbanglo a lana mabalin koma a nailako iti nasurok a tallo gasut a denario ket naited kadagiti napanglaw!” Ket masimronda idi kenkuana iti napalalo.+  Ngem kinuna ni Jesus: “Baybay-anyo. Apay a padasenyo a riribuken? Nangaramid kaniak iti nasayaat nga aramid.+  Ta kankanayon nga adda kadakayo dagiti napanglaw,+ ket kaanoman a kayatyo mabalinyo nga aramiden a kankanayon kadakuada ti naimbag, ngem saanak a kankanayon nga adda kadakayo.+  Inaramidna ti nabalinanna; inkagumaanna nga isapsapo a nasaksakbay iti bagik ti bangbanglo a lana maipaay iti pannakaitabon.+  Pudno kunak kadakayo, Sadinoman a pakaikasabaan ti naimbag a damag iti intero a lubong,+ ti inaramid daytoy a babai maisaritanto met kas pakalaglagipan kenkuana.”+ 10  Ket ni Judas Iscariote, maysa kadagiti sangapulo ket dua, napan iti panguluen a papadi tapno isu liputanna nga agpaay kadakuada.+ 11  Idi nangngegda dayta, nagrag-oda ket inkarida nga isu ikkanda iti pirak a kuarta.+ Gapuna rinugianna nga impamuspusan ti mainugot unay a panangliput kenkuana.+ 12  Ita iti umuna nga aldaw dagiti di pinaalsa+ a tinapay, idi a ti naparti iti paskua insakripisioda kas iti kadawyan, kinuna kenkuana dagiti adalanna:+ “Sadino ti kayatmo a papananmi ket isaganaandaka ti panganam ti paskua?”+ 13  Gapu iti dayta nangibaon iti dua kadagiti adalanna ket kinunana kadakuada: “Mapankayo idiay siudad, ket sumabatto kadakayo ti maysa a tao a siaawit iti dinamili a basehas ti danum.+ Surotenyo, 14  ket sadinoman a sumrekanna kunaenyo iti bumalay, ‘Kuna ti Mannursuro: “Sadino ti ayan ti siled ti sangaili a maipaay kaniak a sadiay ti panganak iti paskua+ a kaduak dagiti adalak?”’+ 15  Ket ipakitananto kadakayo ti dakkel a makinngato a siled, a naisagana nga addaanen kadagiti masapsapul; ket sadiay agsaganakayo iti maipaay kadatayo.”+ 16  Gapuna napan dagiti adalan, ket simrekda iti siudad ket nasarakanda dayta kas iti kinunana kadakuada; ket nagsaganada maipaay iti paskua.+ 17  Kalpasan a dimtengen ti rabii isu immay agraman ti sangapulo ket dua.+ 18  Ket bayat a sisasadagda iti panganan ken mangmanganda, kinuna ni Jesus: “Pudno kunak kadakayo, Maysa kadakayo, a makipangpangan+ kaniak, ti mangliputto kaniak.”+ 19  Nangrugida nga agleddaang ken sinaggaysa nga agkuna kenkuana: “Saan a siak, di ngamin?”+ 20  Kinunana kadakuada: “Maysa kadagiti sangapulo ket dua, daydiay makisawsaw kaniak iti maymaysa a malukong.+ 21  Pudno, ti Anak ti tao mapan, kas iti adda a naisurat maipapan kenkuana, ngem asi pay dayta a tao a babaen kenkuana maliputan ti Anak ti tao! Nasaysayaat koma iti dayta a tao no saanen a nayanak.”+ 22  Ket bayat a nagtultuloyda a nangan, nangala iti tinapay, nangisao iti pamendision, pinispisina ket intedna kadakuada, ket kinunana: “Alaenyo, daytoy kaipapananna ti bagik.”+ 23  Ket idi nangala iti kopa, nangipaay iti panagyaman ket intedna kadakuada, ket imminumda amin manipud iti dayta.+ 24  Ket kinunana kadakuada: “Daytoy kaipapananna ti ‘darak+ iti tulag,’+ a maiparukpok+ maigapu iti adu.+ 25  Pudno kunak kadakayo, Saanakto a pulos uminumen iti nagtaud iti ubas agingga iti dayta nga aldaw inton uminumak iti baro idiay pagarian ti Dios.”+ 26  Kamaudiananna, kalpasan ti panagkantada kadagiti pangidaydayaw,+ rimmuarda a napan idiay Bantay dagiti Olibo.+ 27  Ket kinuna kadakuada ni Jesus: “Maitibkolkayto amin, agsipud ta adda a naisurat, ‘Kabilekto ti pastor,+ ket mawarawaranto dagiti karnero.’+ 28  Ngem kalpasan a maibangonak mapanakto nga umun-una ngem dakayo idiay Galilea.”+ 29  Ngem kinuna kenkuana ni Pedro: “Uray pay no maitibkol amin dagiti dadduma, ngem saanto kaniak.”+ 30  Iti kasta kinuna kenkuana ni Jesus: “Pudno kunak kenka, Sika ita nga aldaw, wen, iti daytoy a rabii, sakbay nga agtaraok iti mamindua ti maysa a kawitan, sika a mismo paglikudannakto iti mamitlo.”+ 31  Ngem rinugianna a kunaen nga ipapilit: “No masapul a matayak a maikanunong kenka, saankanto a pulos paglikudan.” Kasta met, amin dagiti dadduma rinugianda a kinuna ti isu met laeng a banag.+ 32  Gapuna dimtengda iti disso a managan Getsemani, ket kinunana kadagiti adalanna: “Agtugawkayo ditoy bayat nga agkararagak.”+ 33  Ket inkuyogna da Pedro ken Santiago ken Juan,+ ket isu nangrugi nga aglagaw ken mariribukan unay.+ 34  Ket kinunana kadakuada: “Maldaangan unay ti kararuak,+ uray agingga iti ipapatay. Agyankayo ditoy ket agtultuloykayo nga agbantay.”+ 35  Ket idi immadayo pay bassit nagkul-ob iti daga ket rinugianna nga inkararag a, no mabalin, ti oras lumabas koma kenkuana.+ 36  Ket kinunana: “Abba, Ama,+ amin a bambanag mabalin kenka; ikkatem kaniak daytoy a kopa. Ngem saan a ti kayatko, no di ket ti kayatmo.”+ 37  Ket immay ket nasarakanna ida a matmaturog, ket kinunana ken Pedro: “Simon, matmaturogka kadi? Awan aya ti pigsam nga agtultuloy nga agbantay iti maysa nga oras?+ 38  Lallaki, agtultuloykayo nga agbantay ken agkararag,+ tapno saankayo a dumteng iti pannakasulisog. Ti espiritu, siempre, sigagagar, ngem ti lasag nakapuy.”+ 39  Ket napan manen ket nagkararag, a sinaona ti isu met laeng a sao.+ 40  Ket immay manen ket nasarakanna ida a matmaturog, ta dagiti matada ket nadagsenan, ket iti kasta saanda nga ammo no ania ti isungbatda kenkuana.+ 41  Ket immay iti maikatlo a daras ket kinunana kadakuada: “Iti tiempo a kas itoy matmaturog ken agin-inanakayo! Umdasen! Ti oras dimtengen!+ Adtoy! Ti Anak ti tao maliputan a mayawat iti im-ima dagiti managbasol.+ 42  Bumangonkayo, mapantayon.+ Adtoy! Ti mangliput kaniak asidegen.”+ 43  Ket madagdagus, bayat nga agsasao pay laeng, ni Judas, a maysa kadagiti sangapulo ket dua, simmangpet ket naikuyog kenkuana ti maysa a bunggoy nga addaan kadagiti kampilan ken pang-or manipud iti panguluen a papadi ken kadagiti eskriba ken kadagiti lallakay.+ 44  Ita ti mangliput kenkuana inikkanna ida iti napagaanamongan a pagilasinan, a kunkunana: “Siasinoman nga agepak, isu daydiayen; tiliwenyo ket ipanawyo a sitatalged.”+ 45  Ket immay a dagdagus ket immasideg kenkuana ket kinunana: “Rabbi!” ket inagkanna+ a sidudungngo unay. 46  Gapuna isu iniggamanda ket tiniliwda.+ 47  Nupay kasta, ti maysa kadagidiay nakamattider inasutna ti kampilanna ket kinabilna ti adipen ti nangato a padi ket piningasna ti lapayagna.+ 48  Ngem kas sungbat kinuna kadakuada ni Jesus: “Rimmuarkayo aya nga addaan kadagiti kampilan ken pang-or a kas maibusor iti maysa a mannanakaw tapno arestuendak?+ 49  Iti inaldaw-aldaw addaak idi kadakayo idiay templo a mangisursuro,+ ket kaskasdi a saandak a tiniliw. Nupay kasta, dayta ket tapno matungpal+ dagiti Kasuratan.”+ 50  Ket isu binaybay-anda+ amin ket nagtalawda.+ 51  Ngem maysa nga agtutubo a lalaki a sikakawes iti lamolamo a bagina ti maysa a napino a lienso a pagan-anay nangrugi a sumurot kenkuana iti asideg; ket pinadasda a kemmegen,+ 52  ngem imbatina ti lienso a pagan-anayna ket pimmanaw a lamolamo. 53  Impanda itan ni Jesus iti nangato a padi, ket naguummong ti amin a panguluen a papadi ken dagiti lallakay ken dagiti eskriba.+ 54  Ngem ni Pedro, nga adda iti kalalainganna a kaadayo, simmurot kenkuana+ agingga iti paraangan ti nangato a padi; ket nakikatkatugaw kadagiti agserserbi iti balay ken nagin-inudo iti sanguanan ti narangrang nga apuy. 55  Kabayatanna ti panguluen a papadi ken ti intero a Sanhedrin nagsapsapulda iti pammaneknek maibusor ken Jesus tapno papatayenda,+ ngem saanda a nakasarak iti aniaman.+ 56  Adu, kinapudnona, ti nangipapaay iti ulbod a pangsaksi maibusor kenkuana,+ ngem saan nga agtutunos dagiti pammaneknekda.+ 57  Kasta met, adda sumagmamano a timmakder ken nangsaksi iti ulbod maibusor kenkuana, a kunkunada: 58  “Nangngegmi a kunana, ‘Rebbaekto daytoy a templo nga inaramid dagiti ima ket iti tallo nga aldaw mangbangonakto iti sabali a saan nga inaramid dagiti ima.’”+ 59  Ngem saan nga agtutunos ti pammaneknekda uray kadagitoy a pangibatayan. 60  Kamaudiananna ti nangato a padi timmakder iti tengngada ket nagsaludsod ken Jesus, a kunkunana: “Awan kadi ti ibagam kas sungbat? Ania ti pampaneknekan dagitoy maibusor kenka?”+ 61  Ngem nagtalinaed a siuulimek ket awan a pulos ti insungbatna.+ Manen rinugian ti nangato a padi ti agsaludsod kenkuana ket kinunana kenkuana: “Sika kadi ti Kristo nga Anak Daydiay Bendito?”+ 62  Idin kinuna ni Jesus: “Siak; ket dakayo makitayonto ti Anak ti tao+ a situtugaw iti makannawan+ ti pannakabalin ken um-umay a buyogen dagiti ulep ti langit.”+ 63  Gapu itoy ti nangato a padi rinay-abna dagiti makin-uneg a kawesna+ ket kinunana: “Ania pay ti kanayonan a pakasapulantayo kadagiti saksi?+ 64  Nangngegyo ti tabbaaw.+ Ania ti nalawag kadakayo?” Isuda amin kinondenarda a maikari iti ipapatay. 65  Ket isu rinugian a tupraan+ ti dadduma ken abbungotan ti intero a rupana ken danogen ken kunaen kenkuana: “Agipadtoka!” Ket, bayat a tungtungpaenda iti rupa, innala dagiti agserserbi iti pangukoman.+ 66  Itan bayat a ni Pedro adda iti baba idiay paraangan, immay ti maysa kadagiti adipen a babbai ti nangato a padi,+ 67  ket, idi makitana ni Pedro nga agin-inudo, kimmita a naipampamaysa kenkuana ket kinunana: “Sika, met, kaduanaka idi ti Nazareno, daytoy a Jesus.”+ 68  Ngem inlibakna, a kunkunana: “Diak am-ammo ket diak maawatan ti sasawem,” ket isu napan iti ruar idiay bestibulo.+ 69  Sadiay ti adipen a babai, idi makitana, rinugianna manen a kunaen kadagidiay nakamattider: “Daytoy ket maysa kadakuada.”+ 70  Manen inliblibakna dayta. Ket iti naminsan pay kalpasan ti bassit a kanito dagidiay nakamattider rinugianda a kunaen ken Pedro: “Pudno a maysaka kadakuada, ta, iti kinapudnona, taga Galileaka.”+ 71  Ngem rinugianna nga ilunod ken isapata:+ “Diak am-ammo daytoy a tao a sasawenyo.”+ 72  Ket dagus a nagtaraok ti maysa a kawitan iti maikadua a daras;+ ket nalagip ni Pedro ti sasao nga imbaga kenkuana ni Jesus: “Sakbay nga agtaraok ti maysa a kawitan iti mamindua, paglikudannakto iti mamitlo.”+ Ket isu nagkapuy ket nagsangit.+

Footnotes