Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Lucas 9:1-62

9  Idin inayabanna a sangsangkamaysa ti sangapulo ket dua ket inikkanna ida iti pannakabalin ken autoridad kadagiti amin a sairo ken tapno mangagasda kadagiti sakit.+  Ket iti kasta imbaonna ida tapno ikasabada ti pagarian ti Dios ken tapno mangpaimbagda,  ket kinunana kadakuada: “Dikay mangitugot iti aniaman a maipaay iti panagdaliasat, uray sarukod wenno supot ti taraon, wenno uray tinapay wenno pirak a kuarta; saankayo met a maaddaan iti dua a makin-uneg a kawes.+  Ngem sadinoman a serkanyo a pagtaengan, agyankayo sadiay ket sadiay ti pumanawanyo.+  Ket sadinoman a saandakay nga awaten dagiti tattao, iti iruruaryo iti dayta a siudad+ pampagenyo ti tapok kadagiti sakayo maipaay a pangsaksi a maibusor kadakuada.”+  Idin iti panangrugida napanda iti teritoria iti pinuronpurok, a mangidekdeklara ti naimbag a damag ken mangar-aramid kadagiti panangagas iti isuamin a lugar.+  Ita ni Herodes nga agturay iti distrito nangngegna ti amin a bambanag a mapaspasamak, ket nariribukan unay gapu ta kunkunaen ti sumagmamano a ni Juan naibangon manipud kadagiti natay,+  ngem ti sabsabali a ni Elias nagparang, ngem ti sabsabali pay a ti maysa kadagiti kadaanan a mammadto bimmangon.  Kinuna ni Herodes: “Ni Juan pinutolak.+ Ngarud, asino daytoy a maipapan kenkuana mangmangngegko ti kasta a bambanag?” Gapuna tinartarigagayanna+ a makita. 10  Ket idi nagsubli dagiti apostol sinaritada kenkuana no ania a bambanag ti naaramidanda.+ Gapuna inkuyogna ida ket pimmanawda nga agpakni+ iti siudad a maawagan Betsaida. 11  Ngem dagiti bunggoy, idi maammuanda dayta, simmurotda kenkuana. Ket siaasi nga inawatna ida ket nangrugi nga agsao kadakuada maipapan iti pagarian ti Dios,+ ket pinaimbagna dagidiay agkasapulan iti pannakaagas.+ 12  Idin ti aldaw nangrugin nga agleppas. Immasideg itan ti sangapulo ket dua ket kinunada kenkuana: “Pagawidemon ti bunggoy, tapno mapanda kadagiti purok ken aw-away iti aglikmut ket ikagumaanda ti mangala iti pagdagusan ken agsapul kadagiti pagtaraon, agsipud ta ditoy addatayo iti disso a langalang.”+ 13  Ngem kinunana kadakuada: “Ikkanyo ida iti makan.”+ Kinunada: “Awanankami ti nasursurok ngem lima a tinapay ken dua nga ikan,+ malaksid ngata no mapankami a mismo ket gumatangkami iti pagtaraon a maipaay kadagitoy amin a tattao.”+ 14  Isuda ket, iti kinapudnona, agarup lima ribu a lallaki.+ Ngem kinunana kadagiti adalanna: “Pagsadagenyo ida kas iti kaadda kadagiti panganan, a nabungbunggoy iti agarup limapulo ti tunggal maysa.”+ 15  Ket inaramidda ti kasta ket pinagsadagda ida amin. 16  Kalpasanna idi innalana ti lima a tinapay ken ti dua nga ikan, timmangad sadi langit, binendisionanna ida ket pinispisina ida ket rinugianna nga ited ida kadagiti adalan tapno idasarda iti bunggoy.+ 17  Gapuna nanganda amin ket napnekda, ket naurnong dagiti teddada, sangapulo ket dua a labba ti pispisi.+ 18  Idi agangay, bayat nga agkarkararag nga agmaymaysa, immay a sangsangkamaysa kenkuana dagiti adalan, ket sinaludsodanna ida, a kunkunana: “Siasinoak sigun iti panagkuna dagiti bunggoy?”+ 19  Kas sungbat kinunada: “Ni Juan a Mammautisar; ngem ti dadduma, ni Elias, ket ti sabsabali pay, a ti maysa kadagiti kadaanan a mammadto bimmangon.”+ 20  Idin kinunana kadakuada: “Dakayo, nupay kasta, siasinoak iti panagkunayo?” Kas sungbat kinuna ni Pedro:+ “Ti Kristo+ ti Dios.” 21  Idin iti nainget a pannakisarita kadakuada binilinna ida a saanda nga ibagbaga daytoy iti asinoman,+ 22  ngem kinunana: “Ti Anak ti tao masapul nga agpasar iti adu a panagsagaba ket ilaksid dagiti lallakay ken ti panguluen a papadi ken dagiti eskriba, ket mapapatay,+ ket iti maikatlo nga aldaw maibangon.”+ 23  Idin kinunana iti isuamin: “No ti asinoman kayatna ti sumurot kaniak, paglikudanna koma ti bagina+ ket bagkatenna ti kayona a pagtutuokan iti inaldaw-aldaw ket agtultuloy a surotennak.+ 24  Ta siasinoman nga agtarigagay a mangisalakan iti kararuana mapukawnanto dayta; ngem siasinoman a makapukaw iti kararuana maigapu kaniak isu ti makaisalakanto iti dayta.+ 25  Pudno unay, ania ti maigunggona ti maysa a tao iti bagina no magun-odna ti intero a lubong ngem mapukawna ti bagina wenno agsagaba iti pannakadadael?+ 26  Ta siasinoman a mangibain kaniak ken iti sasaok, ti Anak ti tao ibainnanto met daytoy a tao inton dumteng iti dayagna ken iti Ama ken kadagiti nasantuan nga anghel.+ 27  Ngem ibagak kadakayo a sipupudno, Adda sumagmamano kadagidiay sitatakder ditoy a saandanto a pulos maramanan ni patay agingga nga umuna pay a makitada ti pagarian ti Dios.”+ 28  Iti kinapudnona, agarup walo nga aldaw kalpasan dagitoy a sasao, inkuyogna ni Pedro ken ni Juan ken ni Santiago ket immulida iti bantay tapno agkararag.+ 29  Ket bayat nga agkarkararag nagbalbaliw ti langa+ ti rupana ket ti pagan-anayna nagbalin a sumilsilap a puraw.+ 30  Kasta met, adtoy! dua a lallaki ti makisasao kenkuana, nga isu da Moises ken Elias.+ 31  Nagparang dagitoy buyogen ti dayag ket rinugianda a nagsasaritaan ti ipapanawna a naikeddeng a tungpalenna idiay Jerusalem.+ 32  Ita ni Pedro ken dagidiay naikuyog kenkuana makaturturogda unay; ngem idi makariingdan a naan-anay nakitada ti dayagna+ ken ti dua a lallaki nga agtaktakder a kaduana. 33  Ket bayat a maisinsina kenkuana dagitoy, ni Pedro kinunana ken Jesus: “Manangisuro, nasayaat no ditoytayon, gapuna mangibangontayo iti tallo a tolda, maysa ti maipaay kenka ket maysa ti maipaay ken Moises ket maysa ti maipaay ken Elias,” idinto ta saanna nga ammo ti sasawenna.+ 34  Ngem bayat a sasawenna dagitoy a banag nabukel ti maysa nga ulep ket rinugianna a linongan ida. Idi naulepanda, nagbutengda.+ 35  Ket adda timek+ a naggapu iti ulep, a kunkunana: “Daytoy ti Anakko, daydiay napili.+ Agimdengkayo kenkuana.”+ 36  Ket bayat a ti timek napasamak nasarakan nga agmaymaysa ni Jesus.+ Ngem nagtalinaedda a naulimek ket saanda nga impadamag iti asinoman kadagidi nga aldaw ti aniaman kadagiti banag a nakitada.+ 37  Iti sumuno nga aldaw, idi makasalogda manipud iti bantay, simmabet kenkuana ti maysa a dakkel a bunggoy.+ 38  Ket, adtoy! nagikkis ti maysa a lalaki manipud iti bunggoy, a kunkunana: “Mannursuro, ipakaasik kenka a kitaem ti anakko a lalaki, agsipud ta bugbugtongko,+ 39  ket, adtoy! isu alaen ti maysa nga espiritu,+ ket pagammuan agikkis, ket pagkuyegyegenna nga addaan panaglabutab, ket nganngani di pumanaw kenkuana kalpasan ti panangdunorna kenkuana. 40  Ket impakaasik kadagiti adalam a paruarenda dayta, ngem saanda a nabalinan.”+ 41  Kas sungbat kinuna ni Jesus: “O awanan pammati ken tiritir a kaputotan,+ kasano kabayag a masapul nga agtalinaedak kadakayo ken aganusak kadakayo? Iturongmo ti anakmo ditoy.”+ 42  Ngem uray pay bayat nga umas-asideg, isu intublak ti sairo iti daga ket sidadawel a pinagkuyegyegna. Nupay kasta, binabalaw ni Jesus ti narugit nga espiritu ket pinaimbagna ti ubing ket inyawatna ken amana.+ 43  Ala ket, nangrugida amin nga agsiddaaw unay iti natan-ok a pannakabalin+ ti Dios. Ita bayat nga agsidsiddaawda amin idi iti amin a bambanag nga ar-aramidenna, kinunana kadagiti adalanna: 44  “Ilugaranyo dagitoy a sasao kadagiti lapayagyo, ta ti Anak ti tao naikeddeng a mayawat iti im-ima dagiti tattao.”+ 45  Ngem nagtultuloyda nga awanan pannakaawat iti daytoy a sasao. Iti kinapudnona, naitalimeng dayta kadakuada tapno saanda a matarusan, ket nagamakda nga agsaludsod kenkuana maipapan itoy a sasao.+ 46  Idin simrek iti nagtetengngaanda ti panagririnnason no asino ti agbalin a kadakkelan kadakuada.+ 47  Ni Jesus, yantangay ammona ti panagrasrason ti puspusoda, nangala iti maysa nga ubing, inkabilna iti sibayna+ 48  ket kinunana kadakuada: “Siasinoman nga umawat iti daytoy nga ubing maigapu iti naganko awatennak met, ket siasinoman nga umawat kaniak awatenna met ti nangibaon kaniak.+ Ta ti agtigtignay a kas maysa a nanumnumo+ kadakayo amin isu dayta ti naindaklan.”+ 49  Kas sungbat kinuna ni Juan: “Manangisuro, nakakitakami iti maysa a tao a mangparparuar kadagiti sairo+ babaen ti panangusar iti naganmo ket pinadasmi a lapdan,+ agsipud ta saan a sumursurot a kaduami.”+ 50  Ngem kinuna kenkuana ni Jesus: “Saanyo a padasen a lapdan, ta ti saan a bumusor kadakayo dumasig kadakayo.”+ 51  Bayat a dumdumteng idin ti pannakaan-anay dagiti aldaw maipaay iti pannakaipangatona,+ sititibker nga inturongna ti rupana tapno mapan idiay Jerusalem. 52  Gapuna nangibaon kadagiti mensahero nga immun-una ngem isu. Ket napanda ket simrekda iti maysa a purok dagiti Samaritano,+ tapno agsaganada a maipaay kenkuana; 53  ngem isu saanda nga inawat, agsipud ta ti rupana nakaturong iti ipapan idiay Jerusalem.+ 54  Idi a da adalan a Santiago ken Juan+ nakitada daytoy kinunada: “Apo, kayatmo kadi nga ibagami a ti apuy+ bumaba manipud langit ket pukawenna ida?” 55  Ngem simmango ket binabalawna ida. 56  Gapuna napanda iti sabali a purok. 57  Itan bayat a magmagnada iti dalan, adda nagkuna kenkuana: “Surotenkanto iti sadinoman a papanam.”+ 58  Ket kinuna kenkuana ni Jesus: “Dagiti sora addaanda kadagiti rukib ket dagiti tumatayab iti langit addaanda kadagiti pagaponan, ngem ti Anak ti tao awan pangisaadanna iti ulona.”+ 59  Idin kinunana iti sabali pay: “Agbalinka a pasurotko.” Kinuna ti lalaki: “Palubosannak a pumanaw pay nga umuna ket itabonko ni amak.”+ 60  Ngem kinunana kenkuana: “Bay-am a dagiti natay+ itabonda dagiti minatayda, ngem sika mapanka ket ideklaram a sisasaknap ti pagarian ti Dios.”+ 61  Ket kaskasdi kinuna ti sabali: “Sumurotakto kenka, Apo; ngem umuna pay a palubosannak nga agpakada+ kadagidiay adda iti sangakabbalayak.” 62  Kinuna kenkuana ni Jesus: “Awan ti tao a nangyiggem ti imana iti arado+ ket kumita iti bambanag iti likudan+ ti maikari maipaay iti pagarian ti Dios.”

Footnotes