Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Lucas 8:1-56

8  Saan a nagbayag kalpasanna napan nagbambaniaga iti siniudansiudad ken iti pinuronpurok, nga ikaskasabana ken idekdeklarana ti naimbag a damag ti pagarian ti Dios.+ Ket naikuyog kenkuana ti sangapulo ket dua,  ken sumagmamano a babbai+ a naagasan kadagiti nadangkes nga espiritu ken kadagiti sakit, ni Maria a maaw-awagan Magdalena, a rimmuaran ti pito a sairo,+  ken ni Juana+ nga asawa ni Cuza, a pagay-aywanen ni Herodes, ken ni Susana ken adu a sabsabali pay a babbai, a nagserserbi kadakuada manipud kadagiti sanikuada.  Ita idi naguurnongen ti maysa a dakkel a bunggoy agraman dagidiay napan kenkuana manipud iti tunggal siudad, nagsao babaen iti pangngarig:+  “Maysa a managmula ti rimmuar tapno imulana ti bin-ina. Ala ket, bayat nga agimulmula, sumagmamano iti dayta ti nagdisso iti igid ti dalan ket naipayatpayat, ket dagiti tumatayab iti langit kinnanda dayta.+  Ti dadduma pay nagdisso iti dakkel a bato, ket, kalpasan a timmubo, nagango agsipud ta awan dam-egna.+  Ti dadduma nagdisso iti nagbabaetan dagiti sisiitan, ket lineppes dayta dagiti sisiitan a nakigiddan a dimmakkel iti dayta.+  Ti dadduma pay nagdisso iti naimbag a daga, ket, kalpasan a timmubo, nangpataud iti bunga a sagsangagasut.”+ Bayat nga ibagbagana dagitoy a banag, impukkawna: “Ti addaan kadagiti lapayag a pagimdeng, agimdeng koma.”+  Ngem rinugian nga imtuoden kenkuana dagiti adalanna no ania ti kaipapanan daytoy a pangngarig.+ 10  Kinunana: “Naipaay kadakayo ti pannakaawat kadagiti sagrado a palimed ti pagarian ti Dios, ngem kadagiti dadduma dayta ket kadagiti pangngarig,+ tapno iti kasta, nupay kumitkitada, kumitada koma a barengbareng ket, nupay dumdumngegda, saanda a matarusan ti kaipapananna.+ 11  Ita ti pangngarig+ kaipapananna daytoy: Ti bin-i isu ti sao ti Dios.+ 12  Dagidiay adda iti igid ti dalan isuda dagidiay nakangngeg,+ kalpasanna umay ti Diablo+ ket ikkatenna ti sao manipud kadagiti pusoda tapno saanda koma a mamati ket maisalakanda.+ 13  Dagidiay adda iti dakkel a bato isuda dagidiay, inton mangngegda dayta, awatenda ti sao a buyogen iti rag-o, ngem dagitoy awan ti ramutda; mamatida iti maysa a panawen, ngem iti panawen ti pannakasubok umikayda.+ 14  No maipapan iti daydiay nagdisso iti baet dagiti sisiitan, dagitoy isuda dagidiay nakangngeg, ngem, gapu iti pannakayaw-awan kadagiti pakaringgoran ken kinabaknang ken ragragsak+ daytoy a biag, naan-anay a malpesda ket awan ti maan-anayda.+ 15  No maipapan iti daydiay adda iti nasayaat a daga, dagitoy isuda dagidiay a, kalpasan a nangngegda ti sao buyogen ti nasayaat ken naimbag a puso,+ pagtalinaedenda dayta ket agbungada buyogen ti panagibtur.+ 16  “Awan ti asinoman a, kalpasan ti pananggangatna iti pagsilawan, kalubanna dayta iti basehas wenno ikabilna iti sirok ti pagiddaan, no di ket ikabilna iti pagsaadan ti silaw, tapno dagidiay sumrek makitada ti silaw.+ 17  Ta awan ti banag a nailemmeng+ a saanto a maiparangarang, awan uray aniaman a banag a siaannad a naitalimeng a saanto a pulos maammuan ken saanto a pulos mailatak.+ 18  Gapuna, siputanyo no kasano ti panagimdengyo; ta siasinoman nga addaan, ad-adunto pay ti maited kenkuana,+ ngem siasinoman nga awanan, uray pay ti pagarupenna nga adda kenkuana maikkatto kenkuana.”+ 19  Ita immay kenkuana ti inana ken dagiti kakabsatna,+ ngem saanda a nakaasideg kenkuana gapu iti bunggoy.+ 20  Nupay kasta, naipakaammo kenkuana: “Ti inam ken ti kakabsatmo agtaktakderda iti ruar a kayatdaka a kitaen.”+ 21  Kas sungbat kinunana kadakuada: “Ti inak ken ti kakabsatko isuda dagitoy dumngeg iti sao ti Dios ket aramidenda dayta.”+ 22  Kabayatan ti maysa kadagiti aldaw isu ken dagiti adalanna limmuganda iti maysa a barangay, ket kinunana kadakuada: “Bumallasiwtayo iti sabali a bangir ti danaw.” Gapuna naglayagda.+ 23  Ngem bayat nga aglaylayagda isu nakaturog. Ita ti nadawel nga allawig bimmaba iti danaw, ket nangrugida a mapunno iti danum ken agpeggad.+ 24  Kamaudiananna napanda kenkuana ket riniingda, a kunkunada: “Manangisuro, Manangisuro, mapukawkamin!”+ Idi bimmangon, binabalawna+ ti angin ken ti kinadawel ti danum, ket nagtalnada, ket naglinak. 25  Idin kinunana kadakuada: “Sadino ti ayan ti pammatiyo?” Ngem gapu ta napabutnganda, nagsiddaawda, a kunkunada iti maysa ken maysa: “Siasino a pudpudno daytoy, ta bilinenna uray dagiti angin ken ti danum, ket agtulnogda kenkuana?”+ 26  Ket simmangladda iti igid ti baybay iti pagilian dagiti Geraseno, nga adda iti bangir a ballasiw ti Galilea.+ 27  Ngem idi nakadissaag iti daga simmabet kenkuana ti maysa a lalaki manipud iti siudad nga addaan kadagiti sairo. Ket iti adun a tiempo saan a nangikawes iti pagan-anay, ket naggigian, saan nga iti pagtaengan, no di ket kadagiti tanem.+ 28  Idi makitana ni Jesus nagikkis iti napigsa ket nagkurno iti sanguananna, ket iti natbag a timek kinunana: “Ania ti bibiangko kenka,+ Jesus nga Anak ti Kangatuan a Dios? Ipakaasik kenka, saannak a tutuoken.”+ 29  (Ta bilbilinenna ti narugit nga espiritu a rummuar iti lalaki. Ta iti nabayagen a tiempo tinengngelna a siiirut,+ ket maulit-ulit a naparautan kadagiti kawar ken grilios bayat a mabambantayan, ngem pugsatenna dagiti paraut ket iturong ti sairo kadagiti langalang a lugar.) 30  Inimtuod kenkuana ni Jesus: “Ania ti naganmo?” Kinunana: “Lehion,” agsipud ta adu a sairo ti simrek kenkuana.+ 31  Ket nagpakpakaasida+ kenkuana a saanna a bilinen ida a mapan iti yuyeng.+ 32  Ita agar-arab idi idiay bantay ti maysa a pangen ti nakaad-adu a baboy;+ gapuna nagpakaasida kenkuana a palubosanna ida a sumrek kadagidiay.+ Ket pinalubosanna ida. 33  Idin dagiti sairo rimmuarda iti lalaki ket simrekda kadagiti baboy, ket ti pangen nagdaruros iti teppang nga agturong iti danaw ket nalmesda.+ 34  Ngem idi a dagiti agtartaraken nakitada ti napasamak, nagtalawda ket impadamagda iti siudad ken iti aw-away.+ 35  Idin rimmuar dagiti tattao tapno kitaenda no ania ti napasamak, ket dimtengda ken Jesus ket nasarakanda ti lalaki a rimmuaran dagiti sairo, sikakawesen ken nasimbengen ti panunotna, a situtugaw iti sakaanan ni Jesus; ket nagbutengda.+ 36  Dagidiay nakakita iti dayta impadamagda kadakuada no kasano ti pannakapaimbag ti lalaki a nagunggan ti sairo.+ 37  Gapuna ti intero nga umariwekwek manipud iti aglikmut a pagilian dagiti Geraseno kiniddawda kenkuana a pumanaw kadakuada, agsipud ta napabutnganda unay.+ Iti kasta limmugan iti barangay ket pimmanaw. 38  Nupay kasta, ti lalaki a rimmuaran dagiti sairo nagpakpakaasi nga agtalinaed a kumuyog kenkuana; ngem pinagawidna ti lalaki, a kunkunana:+ 39  “Agawidkan iti pagtaengam, ket itultuloymo a salaysayen no ania a bambanag ti inaramid kenka ti Dios.”+ Iti kasta napan, nga iwarwaragawagna iti intero a siudad no ania a bambanag ti inaramid kenkuana ni Jesus.+ 40  Idi nagsubli ni Jesus, siaayat nga inawat ti bunggoy, ta isu pinadpadaananda amin.+ 41  Ngem, adtoy! immay ti maysa a lalaki a managan Jairo, ket daytoy a lalaki maysa idi a mangidadaulo nga opisial iti sinagoga. Ket nagruknoy iti sakaanan ni Jesus ket rinugianna nga ipakaasi kenkuana a sumrek iti balayna,+ 42  agsipud ta addaan iti bugbugtong nga anak a babai nga agarup sangapulo ket dua ti tawenna ken matmatayen.+ Bayat nga isu mapmapan immaribungbong kenkuana dagiti bunggoy.+ 43  Ket maysa a babai, nga agpaspasar iti panagbulos ti dara+ iti sangapulo ket dua a tawenen, a saan a naagasan ti asinoman,+ 44  immasideg manipud iti likudan ket sinagidna ti barayubay+ ti makinruar a kawesna,+ ket giddato a nagsardeng ti panagbulos ti darana.+ 45  Gapuna kinuna ni Jesus: “Asino ti nangsagid kaniak?”+ Idi iliblibakda amin dayta, kinuna ni Pedro: “Manangisuro, ar-aribungbongan ken letletletandaka nga idurduron dagiti bunggoy.”+ 46  Ngem kinuna ni Jesus: “Adda nangsagid kaniak, ta nariknak nga adda rimmuar kaniak+ a pannakabalin.”+ 47  Idi makitana a saan a nakaliklik iti pannakadlaw, ti babai immay nga agpigpigerger ket nagkurno iti sanguananna ket imbutaktakna iti sanguanan ti amin a tattao ti pakaigapuan ti panangsagidna kenkuana ken no kasano a giddato a napaimbag.+ 48  Ngem kinunana kenkuana: “Anak, ti pammatim pinaimbagnaka;+ mapanka a sitatalna.”+ 49  Bayat nga agsasao pay laeng, immay ti maysa a pannakabagi ti mangidadaulo nga opisial iti sinagoga, a kunkunana: “Ti anakmo a babai natayen; saanmon a ringgoren ti mannursuro.”+ 50  Idi mangngegna daytoy, simmungbat kenkuana ni Jesus: “Dika agbuteng, maaddaanka laeng iti pammati,+ ket isu maisalakanto.” 51  Idi dimteng iti balay saanna a pinalubosan ti asinoman a sumrek a kaduana malaksid kada Pedro ken Juan ken Santiago ken ti ama ken ina ti balasitang.+ 52  Ngem dagiti tattao agsangsangitda amin ket sapsaplitenda ti bagbagida iti ladingit gapu kenkuana. Gapuna kinunana: “Sumardengkayo nga agsangsangit,+ ta saan a natay no di ket matmaturog.”+ 53  Gapu itoy rinugianda a katawaan a lalaisen, agsipud ta ammoda a natayen.+ 54  Ngem iniggamanna iti imana ket immawag, a kunkunana: “Balasitang, bumangonka!”+ 55  Ket nagsubli ti espirituna,+ ket bimmangon+ a dagus, ket imbilinna nga adda koma maited kenkuana a makan.+ 56  Ala ket, dagiti nagannakna saanda a natngelan ti riknada; ngem binilinna ida a saanda nga ibagbaga iti asinoman ti napasamak.+

Footnotes