Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Lucas 5:1-39

5  Iti maysa a pasamak idi a ti bunggoy lumetletlet nga umasideg kenkuana ken umim-imdeng iti sao ti Dios, isu sitatakder idi iti igid ti danaw ti Genesaret.+  Ket nakitana ti dua a barangay a naisanglad iti igid ti danaw, ngem dimsaag dagiti mangngalap manipud kadakuada ket ug-ugasanda dagiti iketda.+  Idi limmugan iti maysa kadagiti barangay, a kukua ni Simon, kiniddawna kenkuana nga iyadayona bassit manipud iti daga. Idin nagtugaw, ket manipud iti barangay+ rinugianna nga isuro dagiti bunggoy.  Idi nagsardeng a nagsao, kinunana ken Simon: “Ipanmo iti adalem, ket iwayatyo dagiti iketyo+ tapno makakalap.”  Ngem kas sungbat kinuna ni Simon: “Mannursuro, iti agpatpatnag nagbannogkami ket awan ti naalami,+ ngem gapu iti panangibagam ibabak dagiti iket.”  Ala ket, idi inaramidda daytoy, nakasakawda iti adu unay nga ikan. Iti kinapudnona, nangrugi a napispisang dagiti iketda.  Gapuna sineniasanda dagiti kaduada iti sabali a barangay tapno umayda ken tulonganda ida;+ ket immayda, ket pinunnoda ti dua a barangay, iti kasta nangrugi a lumned dagitoy.  Idi makitana daytoy, ni Simon Pedro+ nagruknoy kadagiti tumeng ni Jesus, a kunkunana: “Adaywannak Apo, agsipud ta maysaak a managbasol a tao.”+  Ta gapu iti nakalapan nga ikan a naalada isu ken amin dagidiay naikuyog kenkuana nalapunosda iti panagmalmalanga, 10  ken kasta met nga agpadpada da Santiago ken Juan, annak ni Zebedeo,+ a kasugpon ni Simon. Ngem ni Jesus kinunana ken Simon: “Isardengmo ti agbuteng. Manipud ita agkalapkan iti tattao a sibibiag.”+ 11  Gapuna insublida dagiti barangay iti daga, ket binaybay-anda ti amin a banag ket simmurotda kenkuana.+ 12  Iti kanayonan pay a pasamak bayat nga isu adda iti maysa kadagiti siudad, adtoy! maysa a lalaki a napno iti kukutel! Idi nakitana ni Jesus inruknoyna ti rupana ket nagpakaasi kenkuana, a kunkunana: “Apo, no kayatmo laeng koma, kabaelannak a dalusan.”+ 13  Ket iti kasta, idi inunnatna ti imana, isu sinagidna, a kunkunana: “Kayatko. Madalusanka koma.” Ket dagus a nagpukaw kenkuana ti kukutel.+ 14  Ket binilinna ti lalaki a saanna nga ibagbaga iti asinoman:+ “Ngem mapanka ket agparangka iti padi,+ ket agidatonka+ mainaig iti pannakadalusmo, kas iti imbilin ni Moises, a maipaay a pangsaksi kadakuada.”+ 15  Ngem ti sao maipapan kenkuana ad-adda a nagsaknap, ket aguurnong dagiti dadakkel a bunggoy tapno agimdengda ken tapno maagasan kadagiti sakitda.+ 16  Nupay kasta, isu nagtultuloy a nagpakni kadagiti desierto ken nagkarkararag.+ 17  Kabayatan ti maysa kadagiti aldaw isu nangisursuro, ket dagiti Fariseo ken mannursuro iti linteg a naggapu iti tunggal purok ti Galilea ken Judea ken Jerusalem situtugawda sadiay; ket ti pannakabalin ni Jehova adda sadiay tapno isu mangpaimbag.+ 18  Ket, adtoy! lallaki a mangaw-awit iti maysa a paralisado a tao nga adda iti pagiddaanna, ket agsapsapulda idi iti pamay-an tapno isu maiserrekda ken maikabilda iti sanguananna.+ 19  Gapuna, idi saanda a makasarak iti pamay-an tapno maiserrekda maigapu iti bunggoy, immulida iti atep, ket kadagiti baldosana isu impababada nga adda iti bassit a pagiddaan iti tengnga dagidiay adda iti sanguanan ni Jesus.+ 20  Ket idi nakitana ti pammatida kinunana: “Lalaki, mapakawan kenka dagiti basolmo.”+ 21  Gapu iti dayta rinugian nga irason dagiti eskriba ken dagiti Fariseo, a kunkunada: “Asino daytoy nga agsasao kadagiti tabbaaw?+ Asino ti mabalin a mangpakawan kadagiti basol malaksid laeng ti Dios?”+ 22  Ngem ni Jesus, yantangay mailasinna dagiti panagrasrasonda, kinunana kas sungbat kadakuada: “Ania ti irasrasonyo iti puspusoyo?+ 23  Ania ti nalaklaka, ti panangikuna, ‘Mapakawan kenka dagiti basolmo,’ wenno ti panangikuna, ‘Bumangonka ket magnaka’?+ 24  Ngem tapno maammuanyo a ti Anak ti tao addaan autoridad ditoy daga a mangpakawan kadagiti basol—” kinunana iti lalaki a paralisado: “Kunak kenka, Bumangonka ket bagkatem ta bassit a pagiddaam ket inkan iti pagtaengam.”+ 25  Ket dagus a timmakder iti sanguananda, binagkatna daydi nagid-iddaanna ket nagawid iti pagtaenganna, nga indaydayawna ti Dios.+ 26  Idin immapay kadakuada amin ti napalaus a ragsak,+ ket nangrugida a mangidayaw iti Dios, ket napnoda iti buteng, a kunkunada: “Nakakitakami iti karkarna a bambanag ita nga aldaw!”+ 27  Ita kalpasan dagitoy a banag isu rimmuar ket nakitana ti maysa nga agsingsingir iti buis nga agnagan Levi a situtugaw iti pagsingiran iti buis, ket kinunana kenkuana: “Agbalinka a pasurotko.”+ 28  Ket idi pinanawanna ti amin a banag+ timmakder ket simmurot kenkuana. 29  Kasta met, nangisagana ni Levi iti dakkel a padaya ti panangabrasa maipaay kenkuana iti balayna; ket adda dakkel a bunggoy dagiti agsingsingir iti buis ken dadduma a kaduada a sisasadag iti panganan.+ 30  Gapu itoy dagiti Fariseo ken dagiti eskribada nangrugida a nagtanabutob kadagiti adalanna, a kunkunada: “Apay a makipangan ken makiinumkayo kadagiti agsingsingir iti buis ken kadagiti managbasol?”+ 31  Kas sungbat kinuna kadakuada ni Jesus: “Dagidiay nasalun-at saanda a kasapulan ti mangngagas,+ no di ket dagidiay masaksakit.+ 32  Immayak agayab, saan a kadagiti nalinteg a tattao, no di ket kadagiti managbasol tapno agturongda iti panagbabawi.”+ 33  Kinunada kenkuana: “Dagiti adalan ni Juan agayunarda a masansan ken mangipaayda iti ar-araraw, ken kasta met dagiti kameng dagiti Fariseo, ngem dagiti adalam mangan ken uminumda.”+ 34  Kinuna kadakuada ni Jesus: “Mabalinyo kadi a pagayunaren ti gagayyem ti nobio bayat nga adda kadakuada ti nobio?+ 35  Ngem umayto dagiti aldaw a ti nobio+ pudno unay a maipanaw kadakuada;+ iti kasta agayunardanto kadagidiay nga aldaw.”+ 36  Kanayonanna, nangipaay kadakuada iti pangngarig: “Awan asinoman a mangtabas iti pangtakup manipud iti baro a makinruar a kawes ket idaitna dayta iti daan a makinruar a kawes; ngem no aramidenna, ngarud agpadpada a ti baro a takup pigisenna ken ti takup manipud baro a pagan-anay saanna a kapadpad ti daan.+ 37  Mainayon pay, awan asinoman a mangikabil iti baro nga arak kadagiti daan a supot a lalat; ngem no aramidenna, ngarud ti baro nga arak bettakenna dagiti supot a lalat,+ ket maibellengto ket ti supot a lalat madadaelto.+ 38  Ngem ti baro nga arak masapul a maikabil kadagiti baro a supot a lalat. 39  Awan asinoman a nakainum iti baak nga arak a kayatna ti baro; ta kunaenna, ‘Ti baak+ nasayaat.’”

Footnotes