Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Lucas 21:1-38

21  Itan idi timmaliaw nakitana dagiti nabaknang a mangipispisok iti sagsagutda kadagiti baul ti gameng.+  Kalpasanna nakitana ti maysa a marigrigat a balo a babai a nangipisok sadiay iti dua a babassit a sinsilio a bassit unay ti pategna,+  ket kinunana: “Ibagak kadakayo a sipupudno, Daytoy a balo, nupay napanglaw, nangipisok iti ad-adu ngem iti impisokda amin.+  Ta amin dagitoy nangipisokda iti sagsagut manipud kadagiti teddada, ngem daytoy a babai manipud iti panagkasapulanna impisokna ti isuamin a pagbiag nga adda kenkuana.”+  Idi agangay, bayat nga agsasao ti sumagmamano maipapan iti templo, no kasano a naarkosan dayta iti nasayaat a batbato ken iti naidedikar a bambanag,+  kinunana: “No maipapan kadagitoy a banag a makitkitayo, umayto dagiti aldaw nga awan ti maysa a bato iti rabaw ti maysa a bato a matda ditoy a saan a marba.”+  Idin nagsaludsodda kenkuana, a kunkunada: “Mannursuro, kaanonto a pudno a mapasamak dagitoy a banag, ket anianto ti pagilasinan inton dagitoy a banag naikeddengda a mapasamak?”+  Kinunana: “Kitaenyo a saankayo a mayaw-awan;+ ta adunto ti umay maibatay iti naganko, a kunkunada, ‘Siak dayta,’ ken, ‘Ti naikeddeng a tiempo immasidegen.’+ Dikay sumurot kadakuada.  Kanayonanna pay, inton makangngegkayo iti gubgubat ken riribuk, dikay mapabutngan.+ Ta dagitoy a banag masapul a mapasamakda nga umuna, ngem saan pay a mapasamak a dagus ti panungpalan.” 10  Idin intultuloyna a kunaen kadakuada: “Ti nasion tumakderto a bumusor iti nasion,+ ken ti pagarian a bumusor iti pagarian;+ 11  ket addanto dadakkel a ginggined, ket iti nadumaduma a disso, dagiti angol ken dagiti kinakirang ti taraon;+ ket addanto dagiti nakabutbuteng a buya ket manipud langit dadakkel a pagilasinan.+ 12  “Ngem sakbay amin dagitoy a banag tiliwendakayto dagiti tattao ket idadanesdakayo,+ nga iyawatdakayo kadagiti sinagoga ken kadagiti pagbaludan, a maisaklangkayo iti sanguanan ti ar-ari ken dagiti gobernador maigapu iti naganko.+ 13  Agbanagto dayta kadakayo a kas pangsaksi.+ 14  Gapuna ikabilyo kadagiti pusoyo a dikay agensayo a nasaksakbay no kasano ti panagikalinteganyo,+ 15  ta ikkankayto iti ngiwat ken sirib, a saanto a kabaelan a sarangten wenno supiaten dagiti amin a bumusbusor kadakayo.+ 16  Mainayon pay, iyawatdakayto uray dagiti nagannak+ ken kakabsat a lallaki ken kakabagian ken gagayyem, ket papatayendanto ti sumagmamano kadakayo;+ 17  ket puntiriakayto ti pananggura ti amin a tattao maigapu iti naganko.+ 18  Ket kaskasdi nga iti aniaman a pamay-an awanto ti mapukaw nga uray maysa a buok+ ti uloyo. 19  Babaen ti panagibturyo magun-odanyonto dagiti kararuayo.+ 20  “Kanayonanna pay, inton makitayo ti Jerusalem a nalikmut+ kadagiti nagkampo a buyot, iti kasta ammuenyo a ti pannakalangalangna immasidegen.+ 21  Iti kasta dagidiay adda idiay Judea rugianda koma ti agkamang iti bambantay, ket dagidiay adda iti tengngana pumanawda koma, ket dagidiay adda iti aw-away saanda koma a sumrek kenkuana;+ 22  agsipud ta dagitoy dagiti aldaw a panangipakat iti kinahustisia, tapno matungpal ti amin a bambanag a naisurat.+ 23  Asi pay dagiti masikog a babbai ken dagidiay agpaspasuso iti ubing kadagita nga aldaw!+ Ta addanto dakkel a panagkasapulan iti daga ken pungtot itoy nga ili; 24  ket mapasagdanto babaen ti tadem ti kampilan ket maipanda a kautibo kadagiti amin a nasion;+ ket ti Jerusalem ibaddebaddekto dagiti nasion, agingga a matungpal ti naituding a pampanawen+ dagiti nasion. 25  “Kasta met, addanto dagiti pagilasinan iti init+ ken bulan ken kadagiti bituen, ket iti daga tuok dagiti nasion, a saanda nga ammo ti ruaran gapu iti panagdaranudor ti baybay+ ken ti panagkiburna,+ 26  bayat a mataltalimudaw dagiti tattao gapu iti buteng+ ken panangpadpadaan iti bambanag nga um-umay iti mapagnaedan a daga;+ ta mapagkintayegto dagiti pannakabalin ti langlangit.+ 27  Ket iti kasta makitadanto ti Anak ti tao+ nga um-umay iti ulep nga addaan pannakabalin ken dakkel a dayag.+ 28  Ngem bayat a mangrugi a mapasamak dagitoy a banag, tumakderkayo a sililinteg ket itangadyo dagiti uloyo, agsipud ta ti pannakaispalyo umas-asidegen.” 29  Gapuna sinaona kadakuada ti maysa a pangngarig: “Imutektekanyo ti kayo a higos ken ti amin a dadduma pay a kayo:+ 30  Inton aguggotdan, babaen ti panangpaliiwyo iti dayta ammoyo a mismo nga itan asidegen ti kalgaw.+ 31  Iti kastoy a pamay-an dakayo met, inton makitayo a mapaspasamak dagitoy a banag, ammuenyo a ti pagarian ti Dios asidegen.+ 32  Pudno kunak kadakayo, Daytoy a kaputotan saanto a pulos lumabas agingga nga amin a bambanag mapasamakda.+ 33  Aglabasto ti langit ken daga,+ ngem dagiti saok saanto a pulos aglabas.+ 34  “Ngem asikasuenyo ti bagbagiyo tapno dagiti pusoyo saanda a pulos madagsenan iti nalabes a pampannangan ken nakaro+ a panagin-inum ken kadagiti pakaringgoran+ iti biag, ket giddato a dayta nga aldaw kellaat nga umay kadakayo+ 35  kas maysa a silo.+ Ta dumtengto dayta kadagidiay amin nga agnanaed iti rabaw ti intero a daga.+ 36  Ngarud, agtalinaedkayo a siririing+ iti isuamin a tiempo nga umar-ararawkayo+ tapno makapagballigikayo iti pananglisi kadagitoy amin a banag a naikeddeng a mapasamak, ken iti panagtakder iti sanguanan ti Anak ti tao.”+ 37  Gapuna iti aldaw mangisursuro idiay templo,+ ngem iti rabii rummuar ket agdagus iti bantay a naawagan ti Bantay dagiti Olibo.+ 38  Ket amin dagiti tattao+ umayda kenkuana a nasapa iti aldaw idiay templo tapno dumngegda kenkuana.

Footnotes