Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Lucas 19:1-48

19  Ket isu simrek iti Jerico+ ket lumaslasat idi.  Ita adda ditoy ti maysa a lalaki a napanaganan Zaqueo; ket isu maysa a panguluen nga agsingsingir iti buis, ken nabaknang.  Ala ket, tartarigagayanna idi a kitaen+ no asino daytoy a Jesus, ngem saanna a mabalinan gapu iti bunggoy, agsipud ta isu pandek.  Gapuna timmaray nga immun-una iti masanguanan a lugar ket kimmalay-at iti kayo a higos-sikomoro tapno isu kitaenna, agsipud ta dandanin lumasat iti dayta a dalan.  Ita idi nakadanonen ni Jesus iti dayta a lugar, timmangad ket kinunana kenkuana: “Zaqueo, darasem ket umulogka, ta ita nga aldaw masapul nga agyanak iti balaymo.”  Gapu iti dayta isu nagdardaras ket immulog ket sirarag-o nga inawatna a kas sangaili.  Ngem idi nakitada dayta, nagdadayamudomda amin,+ a kunkunada: “Simrek a makidagus iti maysa a lalaki a managbasol.”  Ngem timmakder ni Zaqueo ket kinunana iti Apo: “Adtoy! Ti kagudua dagiti sanikuak, Apo, itedko kadagiti napanglaw, ket aniaman a kinikilko iti asinoman babaen iti ulbod a pammabasol+ isublik iti mamimpat a kaadu.”+  Gapu itoy kinuna kenkuana ni Jesus: “Iti daytoy nga aldaw immay ti pannakaisalakan iti daytoy a balay, agsipud ta isu anak met ni Abraham.+ 10  Ta ti Anak ti tao immay tapno sapulen ken isalakanna ti napukaw.”+ 11  Bayat nga im-imdenganda dagitoy a banag sinaona ti maysa a pangngarig kas kanayonan, agsipud ta isu asideg idi idiay Jerusalem ket ipagpagarupda nga agparangto a giddato ti pagarian ti Dios.+ 12  Gapuna kinunana: “Maysa a tao a natan-ok ti pannakayanakna nagdaliasat iti adayo a daga tapno gumun-od iti naarian a pannakabalin maipaay iti bagina ken agsubli.+ 13  Idi inayabanna ti sangapulo nga ad-adipenna inikkanna ida iti sangapulo a mina ket imbagana kadakuada, ‘Agnegosiokayo agingga nga umayak.’+ 14  Ngem isu kinagura dagiti kailianna+ ket nangibaonda iti maysa a bagi dagiti embahador a sumurot kenkuana, tapno kunaen, ‘Saanmi a kayat daytoy a tao nga agbalin nga ari kadakami.’+ 15  “Iti kamaudiananna idi nagsubli kalpasan a nagun-odna ti naarian a pannakabalin, imbilinna a maayaban a mapan kenkuana dagitoy nga adipen a nangtedanna iti pirak a kuarta, tapno ammuenna no ania ti naganansiada babaen iti panagnegosio.+ 16  Idin nagparang ti umuna, a kunkunana, ‘Apo, ti minam nakaganansia iti sangapulo a mina.’+ 17  Gapuna kinunana kenkuana, ‘Nasayaat unay, naimbag nga adipen! Agsipud ta iti bassit unay a banag pinaneknekam ti bagim a matalek, ikutam ti autoridad iti sangapulo a siudad.’+ 18  Itan immay ti maikadua, a kunkunana, ‘Ti minam, Apo, nakapataud iti lima a mina.’+ 19  Kinunana met iti daytoy a tao, ‘Sika met, agaywanka iti lima a siudad.’+ 20  Ngem immay ti sabali pay, a kunkunana, ‘Apo, adtoy ti minam, nga impaknik a nakadulin iti lupot. 21  Ta ammom, nagbutengak kenka, agsipud ta nagubsangka a tao; alaem ti saanmo nga indulin ket aniem ti saanmo nga immula.’+ 22  Kinunana kenkuana, ‘Manipud iti bukodmo a ngiwat+ ukomenka, nadangkes nga adipen. Ammom, di ngamin, a maysaak a nagubsang a tao, nga al-alaek ti saanko nga indulin ket an-aniek ti saanko nga immula?+ 23  Gapuna apay a saanmo nga inkabil ti pirak a kuartak iti banko? Iti kasta iti isasangpetko siningirko koma dayta agraman iti patubona.’+ 24  “Gapu iti dayta kinunana kadagidiay nakamattider, ‘Alaenyo kenkuana ti mina ket itedyo iti daydiay addaan iti sangapulo a mina.’+ 25  Ngem kinunada kenkuana, ‘Apo, isu addaan iti sangapulo a mina!’— 26  ‘Kunak kadakayo, Iti tunggal maysa nga addaan, ad-adunto ti maited; ngem iti daydiay awanan, uray ti adda kenkuana maikkatto.+ 27  Mainayon pay, dagitoy a kabusorko a saanda a kayat nga agbalinak nga ari kadakuada iyegyo ditoy ket papatayenyo ida iti sanguanak.’”+ 28  Gapuna, kalpasan a nasaona dagitoy a banag, nangrugi a mapan nga umun-una, a sumang-at idiay Jerusalem.+ 29  Ket idi nakaasideg idiay Betfage ken Betania iti bantay a naawagan ti Bantay dagiti Olibo,+ nangibaon iti dua kadagiti adalan,+ 30  a kunkunana: “Mapankayo iti purok a matantannawaganyo, ket kalpasan a makastrekkayo makasarakkayto iti urbon ti asna a naigalut, nga iti dayta awan pay a pulos asinoman iti sangatauan ti nagsakay. Warwaranyo ket iyegyo.+ 31  Ngem no iyimtuod kadakayo ti asinoman, ‘Apay a warwarwaranyo?’ kastoy ti masapul a panagsaoyo, ‘Kasapulan dayta ti Apo.’”+ 32  Gapuna dagidiay naibaon napanda ket nasarakanda dayta a kas iti kinunana kadakuada.+ 33  Ngem bayat a warwarwaranda ti urbon ti asna kinuna kadakuada dagiti makinkukua iti dayta: “Apay a warwarwaranyo ti urbon ti asna?”+ 34  Kinunada: “Kasapulan dayta ti Apo.”+ 35  Ket impanda ken Jesus, ket impuruakda dagiti makinruar a kawesda iti rabaw ti urbon ti asna ket impasakayda ni Jesus iti dayta.+ 36  Bayat nga isu mapmapan+ intultuloyda nga inyaplag dagiti makinruar a kawesda iti dalan.+ 37  Apaman a nakaasideg iti agsalog a dalan iti Bantay dagiti Olibo ti intero nga umariwekwek dagiti adalan nangrugida nga agrag-o ken mangidayaw iti Dios buyogen iti natbag a timek maipapan iti amin a mannakabalin nga ar-aramid a nakitada,+ 38  a kunkunada: “Bendito ti Maysa nga um-umay kas Ari iti nagan ni Jehova!+ Talna sadi langit, ken dayag kadagiti kangatuan a disso!”+ 39  Nupay kasta, kinuna kenkuana ti sumagmamano kadagiti Fariseo manipud iti bunggoy: “Mannursuro, babalawem dagiti adalam.”+ 40  Ngem kas sungbat kinunana: “Ibagak kadakayo, No nagtalinaed a siuulimek dagitoy, agikkisto dagiti bato.”+ 41  Ket idi nakaasideg, minatmatanna ti siudad ket sinangitanna dayta,+ 42  a kunkunana: “No sika, sika a mismo, nailasinmo+ koma iti daytoy nga aldaw ti bambanag a maipapan iti talna—ngem ita nailingedda kadagita matam.+ 43  Agsipud ta umayto kenka dagiti aldaw inton dagiti kabusormo mangbangonda iti aglikmutmo iti sarikedked+ nga addaan natirad a kaykayo+ ket lakubendakanto+ ken parigatendaka+ iti tunggal sikigan, 44  ket agingga iti daga rebbekendakanto ken ti annakmo nga adda iti unegmo,+ ket saandanto a mangibati kenka iti bato iti rabaw ti bato,+ agsipud ta saanmo a nailasin ti tiempo a pannakasukimatmo.”+ 45  Ket simrek iti templo ket rinugianna a paruaren dagidiay aglaklako,+ 46  a kunkunana kadakuada: “Adda a naisurat, ‘Ket ti balayko agbalinto a balay a pagkararagan,’+ ngem pinagbalinyo a rukib dagiti mannanakaw.”+ 47  Kanayonanna pay, napan nangisursuro nga inaldaw idiay templo. Ngem isu ikagkagumaan idi a dadaelen ti panguluen a papadi ken dagiti eskriba ken dagiti kangrunaan kadagiti umili;+ 48  ket kaskasdi saanda a nakasarak iti epektibo a banag nga aramidenda, ta nagtalinaed kenkuana dagiti amin nga umili tapno dumngegda kenkuana.+

Footnotes