Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Lucas 16:1-31

16  Idin kinunana met kadagiti adalan: “Adda idi maysa a tao a nabaknang ket addaan iti mayordomo,+ ket naidarum kenkuana daytoy a saysayangenna dagiti sanikuana.+  Gapuna inayabanna ket kinunana kenkuana, ‘Ania daytoy mangmangngegko maipapan kenka? Iyawatmo ti kuentaan+ ti kinamayordomom, ta saanmon a maaywanan ti balay.’  Idin kinuna ti mayordomo iti bagina, ‘Ania ti aramidek, yantangay ti apok+ ikkatennan kaniak ti kinamayordomo? Saan nga umdas ti pigsak nga agkali, mabainak nga agpalimos.  Ah! Ammokon ti aramidek, tapno iti kasta, inton maikkatak iti kinamayordomo, awatendakto dagiti tattao kadagiti pagtaenganda.’+  Ket idi ayabanna ti tunggal maysa kadagiti nakautang iti apona kinunana iti umuna, ‘Mano ti utangmo iti apok?’  Kinunana, ‘Sangagasut a bat a sukat ti lana ti olibo.’ Kinunana kenkuana, ‘Alaem ti naisurat a katulagam ket agtugawka ket darasem nga isurat ti limapulo.’  Sumaganad, kinunana iti sabali, ‘Ita sika, mano ti utangmo?’ Kinunana, ‘Sangagasut a cor a sukat ti trigo.’ Kinunana kenkuana, ‘Alaem ti naisurat a katulagam ket isuratmo ti walopulo.’  Ket ti apona pinadayawanna ti mayordomo, nupay nakillo, agsipud ta nagtignay a buyogen ti praktikal a kinasirib;+ ta ti annak daytoy a sistema ti bambanag nasirsiribda iti praktikal a pamay-an iti mismo a kaputotanda ngem iti annak ti lawag.+  “Kasta met, kunak kadakayo, Makigayyemkayo+ babaen iti nakillo a kinabaknang,+ tapno iti kasta, inton maibus dagita, awatendakayto kadagiti agnanayon a pagnaedan a disso.+ 10  Ti tao a matalek iti kabassitan matalek met iti adu, ket ti tao a nakillo iti kabassitan nakillo met iti adu.+ 11  Gapuna, no saanyo a napaneknekan a matalek ti bagbagiyo mainaig iti nakillo a kinabaknang, asinonto ti mangitalek kadakayo iti napudno?+ 12  Ket no saanyo a napaneknekan a matalek ti bagbagiyo mainaig iti kukua ti sabali,+ asinonto ti mangited kadakayo ti agpaay iti bagbagiyo? 13  Awan adipen iti balay a makapagpaadipen iti dua nga appo; ta, mabalin a guraennanto ti maysa ket ayatenna ti sabali, wenno agtalinaedto iti maysa ket umsienna ti sabali. Saanyo a mabalin ti agpaadipen iti Dios ken iti Kinabaknang.”+ 14  Ita dagiti Fariseo, a managayat iti kuarta, umim-imdengda kadagitoy amin a banag, ket isu rinugianda nga uy-uyongan.+ 15  Gapu itoy kinunana kadakuada: “Dakayo dagidiay mangideklara a nalinteg ti bagbagiyo iti sanguanan dagiti tattao,+ ngem ti Dios ammona dagiti pusoyo;+ agsipud ta ti natan-ok kadagiti tattao makarimon a banag iti imatang ti Dios.+ 16  “Ti Linteg ken dagiti Mammadto naginggada ken Juan.+ Manipud idin maidekdeklara ti pagarian ti Dios kas naimbag a damag, ket tunggal kita ti tao agregregget nga agturong iti dayta.+ 17  Kinapudnona, nalaklaka nga aglabas ti langit ken daga+ ngem ti di pannakatungpal+ ti maysa a sangkabassit a paset+ ti maysa a letra ti Linteg. 18  “Tunggal maysa a mangidiborsio iti asawana a babai ket mangasawa iti sabali makikamalala, ket ti mangasawa iti babai a naidiborsio manipud iti maysa nga asawa makikamalala.+ 19  “Ngem adda maysa a tao+ a nabaknang, ket nagkawkawes iti purpura ken lienso, nga agragragsak a siraranga+ iti inaldaw-aldaw. 20  Ngem maysa nga agpalpalama a managan Lazaro ti maikabkabil idi iti ruanganna, napno kadagiti derder 21  ket tartarigagayanna ti mabsog iti bambanag nga agtintinnag manipud iti lamisaan ti nabaknang a tao. Wen, kasta met, umay dagiti aso ket dildilanda dagiti derderna. 22  Itan iti panaglabas ti tiempo natay+ ti agpalpalama ket impan dagiti anghel iti ayan ti saklot+ ni Abraham.+ “Kasta met, natay+ ti nabaknang a tao ket naitabon. 23  Ket idiay Hades intangadna dagiti matana, yantangay isu adda iti pannakatutuok,+ ket nakitana ni Abraham nga adda iti adayo ken ni Lazaro nga adda iti ayan ti saklot a kaduana. 24  Gapuna immawag ket kinunana, ‘Ama Abraham,+ maasianka kaniak ket ibaonmo ni Lazaro tapno isawsawna ti murdong ti ramayna iti danum ket palamiisanna ti dilak,+ agsipud ta matutuokak iti daytoy gumilgil-ayab nga apuy.’+ 25  Ngem kinuna ni Abraham, ‘Anak, laglagipem nga inawatmon a naan-anay ti naimbag a bambanagmo bayat ti panagbiagmo, ngem ken Lazaro met ti makadangran a bambanag. Ita, nupay kasta, isu maliwliwa ditoy ngem sika matutuokka.+ 26  Ket malaksid kadagitoy amin a banag, maysa a dakkel a yuyeng+ ti naipasdek iti nagbaetanmi ken dakayo,+ tapno dagidiay agtarigagay nga umallatiw manipud ditoy nga agturong kadakayo saanda a mabalin, saan met a makaballasiw manipud dita dagiti tattao nga agturong kadakami.’+ 27  Idin kinunana, ‘No kasta kiddawek kenka, ama, nga ibaonmo iti balay ni amak, 28  ta adda lima a kakabsatko, tapno iti kasta ipaayanna ida iti naan-anay a pangsaksi, tapno saanda met a makagteng iti daytoy a disso ti tuok.’ 29  Ngem kinuna ni Abraham, ‘Adda kadakuada ni Moises+ ken dagiti Mammadto;+ bay-am ida nga umimdeng kadagitoy.’+ 30  Idin kinunana, ‘Ay, saan, ama Abraham, ngem no adda maysa manipud kadagiti natay a mapan kadakuada agbabawidanto.’ 31  Ngem kinunana kenkuana, ‘No saanda nga imdengan ni Moises+ ken dagiti Mammadto, saandanto met a maguyugoy no adda maysa a bumangon manipud kadagiti natay.’”

Footnotes