Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Lucas 1:1-80

1  Yantangay adu ti nanggayagay a manggupgop iti pakaipalawagan dagiti kinapudno+ a naan-anay a pinati iti nagtetengngaantayo,  kas kadagidiay nangyawat kadagitoy kadakami isuda a nanipud idi damo+ nagbalinda a manangsaksi+ ken agserserbi iti mensahe,+  inkeddengko met, gapu ta natuntonkon ti amin a bambanag manipud iti pangrugian buyogen ti kinaumiso, nga isurat kenka dagita iti naurnos a panagsasaganad,+ katan-okan+ a Teofilo,+  tapno naan-anay a maammuam ti kinapudno ti bambanag a berbal a naisuro kenka.+  Iti kaaldawan ni Herodes,+ ari ti Judea, adda idi ti maysa a padi a managan Zacarias iti benneg ni Abias,+ ket adda asawana manipud iti annak a babbai ni Aaron,+ ket Elisabet ti naganna.  Agpadpadada a nalinteg+ iti sanguanan ti Dios gapu iti pannagnada nga awan pakababalawanna+ maitunos kadagiti amin a bilin+ ken legal+ a kalikaguman ni Jehova.+  Ngem awan anakda, agsipud ta lupes ni Elisabet,+ ket agpadpadada nga aduan unayen iti tawen.  Itan bayat nga agak-akem a kas padi iti annong ti bennegna+ iti sanguanan ti Dios,  sigun iti nadaeg nga annuroten iti akem a kinapadi nagbalin a batangna ti mangidaton iti insienso+ idi simrek iti santuario ni Jehova;+ 10  ket ti intero nga umariwekwek dagiti tattao nagkarkararagda idiay ruar iti oras a panagidaton iti insienso.+ 11  Nagparang kenkuana ti anghel ni Jehova, nga agtaktakder iti makannawan a sikigan ti altar ti insienso.+ 12  Ngem nariribukan ni Zacarias iti nakitana, ket immapay kenkuana ti buteng.+ 13  Nupay kasta, kinuna kenkuana ti anghel: “Dika agbuteng, Zacarias, agsipud ta siaanamong a naimdengan ti ararawmo,+ ket ni asawam nga Elisabet agbalinto nga ina ti maysa nga anak a lalaki kenka, ket panaganamto iti Juan.+ 14  Ket addaankanto iti rag-o ken dakkel a ragsak, ken adunto ti agrag-o+ iti pannakayanakna; 15  ta isu naindaklanto iti sanguanan ni Jehova.+ Ngem masapul a saan a pulos uminum iti arak ken naingel nga inumen,+ ket mapnonto iti nasantuan nga espiritu manipud a mismo iti aanakan ni inana;+ 16  ket adu iti annak ti Israel ti pasubliennanto ken Jehova+ a Diosda. 17  Kasta met, mapanto iti masanguananna buyogen ti espiritu ken pannakabalin ni Elias,+ tapno ti puspuso dagiti amma pasublienna+ iti annak ket dagiti nasukir pasublienna iti praktikal a kinasirib dagiti nalinteg, tapno mangisagana maipaay ken Jehova+ iti ili a sisasagana.”+ 18  Ket kinuna ni Zacarias iti anghel: “Kasano a makasiguradoak iti daytoy? Ta lakayakon+ ket ni asawak aduan unayen iti tawen.” 19  Kas sungbat kinuna kenkuana ti anghel: “Siak ni Gabriel,+ nga agtaktakder iti asideg ti sanguanan ti Dios, ket naibaonak a makisao+ kenka ken mangideklara kenka iti naimbag a damag dagitoy a banag. 20  Ngem, adtoy! agulimekkanto+ ket saankanto a makapagsao agingga iti aldaw a maaramid dagitoy a banag, agsipud ta saanmo a pinati ti sasaok, a matungpalto iti naituding a tiempoda.” 21  Kabayatanna nagtultuloy dagiti umili a nagur-uray ken Zacarias,+ ket nangrugida nga agsiddaaw iti panagbayagna idiay santuario. 22  Ngem idi rimmuar saan a makapagsao kadakuada, ket naawatanda nga isu nakakita iti karkarna+ a buya idiay santuario; ket nagsensenias kadakuada, ngem nagtalinaed nga umel. 23  Itan, idi a natungpalen dagiti aldaw ti publiko a panagserbina,+ nagawid iti pagtaenganna. 24  Ngem kalpasan dagitoy nga aldaw nagsikog+ ni Elisabet nga asawana; ket imputputongna ti bagina iti lima a bulan, a kunkunana: 25  “Kastoy ti pannakilangen kaniak ni Jehova kadagitoy nga aldaw idi impaayna kaniak ti panangasikasona tapno ikkatenna ti pakaumsiak kadagiti tattao.”+ 26  Iti maikanem a bulanna naibaon ni anghel Gabriel+ manipud iti Dios a mapan iti maysa a siudad ti Galilea a managan Nazaret, 27  iti maysa a birhen a naikari a mayasawa iti maysa a lalaki nga agnagan Jose iti balay ni David; ket Maria+ ti nagan ti birhen.+ 28  Ket idi simrek a mapan iti sanguananna kinunana: “Naimbag nga aldawmo,+ maysa a naparaburan unay, ni Jehova+ adda kenka.”+ 29  Ngem nariribukan unay iti dayta a sasao ket nangrugi nga agrason no ania a kita ti kablaaw daytoy. 30  Gapuna kinuna kenkuana ti anghel: “Dika agbuteng, Maria, ta nakasarakka ti pabor+ iti Dios; 31  ket, adtoy! iyinawmonto iti aanakam ken ipasngaymonto ti maysa nga anak a lalaki,+ ket panaganamto iti Jesus.+ 32  Daytoy ket naindaklanto+ ken maawaganto iti Anak ti Kangatuan;+ ket ni Jehova a Dios itednanto kenkuana ti trono+ ni David nga amana,+ 33  ket agturayto kas ari iti balay ni Jacob iti agnanayon, ket awanto ti panungpalan ti pagarianna.”+ 34  Ngem kinuna ni Maria iti anghel: “Kasano a mapasamak daytoy, yantangay saanak a makidendenna+ iti lalaki?” 35  Kas sungbat kinuna kenkuana ti anghel: “Ti nasantuan nga espiritu+ umayto kenka, ket ti pannakabalin ti Kangatuan salinongannakanto. Iti dayta met a rason ti mayanak maawaganto iti nasantuan,+ Anak ti Dios.+ 36  Ket, adtoy! ni Elisabet a kabagiam nangyinaw met a mismo iti anak a lalaki, iti kinabaketna, ket daytoy ti maikanem a bulanna, ti maaw-awagan lupes a babai;+ 37  agsipud ta iti Dios awan ti deklarasion a saanto a mabalin.”+ 38  Idin kinuna ni Maria: “Adtoy! Ti adipen a babai ni Jehova!+ Maaramid koma kaniak sigun iti deklarasionmo.” Iti kasta pimmanaw kenkuana ti anghel. 39  Gapuna timmakder ni Maria kadagitoy nga aldaw ket napan a sigaganat iti nakabambantay a pagilian, iti maysa a siudad ti Juda, 40  ket simrek iti pagtaengan ni Zacarias ket kinablaawanna ni Elisabet. 41  Ala ket, idi mangngeg ni Elisabet ti kablaaw ni Maria, limmagto ti maladaga iti aanakanna; ket ni Elisabet napno iti nasantuan nga espiritu, 42  ket nagpukkaw a buyogen ti natbag nga ikkis ket kinunana: “Benditoka kadagiti babbai, ket bendito+ ti bunga ti aanakam! 43  Gapuna kasano a naadda kaniak daytoy a pribilehio, a ti ina ti Apok+ umay kaniak? 44  Ta, adtoy! bayat a ti aweng ti kablaawmo dimteng kadagiti lapayagko, ti maladaga iti aanakak limmagto a buyogen ti dakkel a ragsak.+ 45  Naragsak met daydiay namati, agsipud ta addanto naan-anay a pannakaaramid+ dagidiay banag a naisao kenkuana manipud ken Jehova.”+ 46  Ket kinuna ni Maria: “Ti kararuak itan-okna ni Jehova,+ 47  ket ti espirituk saanna a maliklikan ti agrag-o iti napalalo+ iti Dios a Manangisalakanko;+ 48  agsipud ta kinitana ti nababa a kasasaad ti adipenna a babai.+ Ta, adtoy! manipud ita amin a kaputotan kunaendanto a naragsakak;+ 49  agsipud ta Daydiay a nabileg nangaramid maipaay kaniak iti naindaklan nga ar-aramid, ket nasantuan ti naganna;+ 50  ket kadagiti kinapkaputotan adda asina kadagidiay agbuteng kenkuana.+ 51  Nagaramid a sibibileg babaen iti takiagna,+ inwarawarana a sisasaknap dagidiay natangsit ti panagem ti puspusoda.+ 52  Impababana manipud kadagiti trono dagiti lallaki ti pannakabalin+ ket intan-okna dagiti nababa;+ 53  pinennekna a naan-anay iti naimbag a bambanag dagidiay mabisbisin+ ket pinapanawna nga ima-ima dagidiay addaan iti kinabaknang.+ 54  Immay timmulong iti Israel nga adipenna,+ tapno lagipenna ti asi,+ 55  kas iti imbagana kadagidi ammatayo, ken Abraham ken iti bin-ina, iti agnanayon.”+ 56  Iti kasta nakipagtaeng kenkuana ni Maria iti agarup tallo a bulan, ket nagsubli iti bukodna a pagtaengan. 57  Nadanonanen ti tiempo a panagpasngay ni Elisabet, ket nagbalin nga ina ti maysa nga anak a lalaki. 58  Ket dagiti kaarruba ken kakabagianna nangngegda a pinadakkel ni Jehova ti asina+ kenkuana, ket nangrugida a makipagrag-o+ kenkuana. 59  Ket iti maikawalo nga aldaw immayda tapno kugitenda ti ubing,+ ket panagananda koma iti nagan ni amana, a Zacarias. 60  Ngem simmungbat ti inana ket kinunana: “Ay, saan! no di ket isu maawagan iti Juan.” 61  Gapu itoy kinunada kenkuana: “Awan maysa kadagiti kakabagianyo a naawagan iti daytoy a nagan.” 62  Idin nagimtuodda ken amana babaen kadagiti senias no ania ti kayatna a maipanagan iti dayta. 63  Ket dimmawat iti maysa a tapi ket insuratna: “Juan+ ti naganna.” Gapu itoy nagsiddaawda amin. 64  Giddato a naluktan ti ngiwatna+ ken naluk-atan ti dilana ket nangrugi nga agsao, a bembendituenna ti Dios. 65  Ket ti buteng immapay kadagidiay amin nga agnanaed iti sangakaarrubaanda; ket iti intero a nakabambantay a pagilian ti Judea amin dagitoy a banag nangrugi a maisarsarita, 66  ket amin a nakangngeg impasagepsepda dayta kadagiti pusoda,+ a kunkunada: “Anianto ngata a pudpudno ti pagbalinan daytoy nga ubing?” Ta ti ima+ ni Jehova pudno unay nga adda kenkuana. 67  Ket ni Zacarias nga amana napno iti nasantuan nga espiritu,+ ket nagipadto,+ a kunkunana: 68  “Bendito ni Jehova a Dios ti Israel,+ agsipud ta inturongna ti asikasona ket inaramidna ti panangispal+ iti ilina.+ 69  Ket nangpatanor iti sara+ ti pannakaisalakan maipaay kadatayo iti balay ni David nga adipenna, 70  kas iti sinaona, babaen iti ngiwat dagiti nasantuan a mammadtona idi ugma,+ 71  maipapan iti pannakaisalakan manipud kadagiti kabusortayo ken manipud iti ima dagidiay amin a manggurgura kadatayo;+ 72  tapno aramidenna ti asi mainaig kadagidi ammatayo ken tapno lagipenna ti nasantuan a tulagna,+ 73  ti sapata nga insapatana ken Abraham nga amatayo,+ 74  tapno itedna kadatayo, kalpasan a naispaltayon manipud iti im-ima dagiti kabusor,+ ti pribilehio nga awanan buteng a panangipaay iti sagrado a panagserbi kenkuana+ 75  buyogen ti kinasungdo ken kinalinteg iti sanguananna iti amin nga al-aldawtayo.+ 76  Ngem no maipapan kenka, nga ubing, maawagankanto iti mammadto ti Kangatuan, ta mapankanto nga umun-una iti sanguanan ni Jehova tapno isaganam dagiti dalanna,+ 77  tapno mangtedka iti pannakaammo ti pannakaisalakan iti ilina babaen ti pannakapakawan dagiti basolda,+ 78  gapu iti nadungngo a panangngaasi ti Diostayo. Babaen itoy a panangngaasi sarungkarannatayto ti anaraar+ manipud ngato,+ 79  tapno mangted ti lawag kadagidiay agtugtugaw iti sipnget ken iti anniniwan ni patay,+ tapno iturongna a sirarang-ay dagiti sakatayo iti dalan ti talna.” 80  Ket ti ubing nagtultuloy a dimmakkel+ ken bimmileg iti espiritu, ket nagtalinaed kadagiti desierto agingga iti aldaw a panangiparangna a sipapanayag ti bagina iti Israel.

Footnotes