Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Levitico 4:1-35

4  Ket intultuloy ni Jehova ti agsao ken Moises, a kunkunana:  “Agsaoka iti annak ti Israel, a kunaem, ‘No kas pagarigan ti maysa a kararua+ di inranranta a makabasol+ iti aniaman kadagiti banag nga ibilin ni Jehova a di aramiden, ket pudno a maaramidna ti maysa kadakuada:  “‘No ti padi, daydiay napulotan,+ agbasol+ iti kasta mangyeg iti panagbasol iti ili, ngarud masapul a mangidatag maipaay iti basol+ nga inaramidna iti maysa a nasalun-at nga urbon a toro ken Jehova kas daton gapu iti basol.  Ket masapul nga ipanna ti toro iti pagserkan ti tolda ti gimong+ iti sanguanan ni Jehova ket masapul nga ipatayna ti imana iti ulo ti toro,+ ket masapul a partienna ti toro iti sanguanan ni Jehova.  Ket ti padi, daydiay napulotan,+ masapul nga alaenna ti dadduma iti dara ti toro ket ipanna dayta iti tolda ti gimong;  ket masapul nga isawsaw ti padi ti ramayna+ iti dara ket iparsiakna ti dadduma iti dara iti mamimpito+ iti sanguanan ni Jehova iti sango ti kortina ti nasantuan a disso.  Ket masapul nga ikabil ti padi ti dadduma iti dara kadagiti sara+ ti altar ti napabanglo nga insienso iti sanguanan ni Jehova, nga adda iti tolda ti gimong, ket ti isuamin a natedda iti dara ti toro ibukboknanto iti puon+ ti altar ti daton a mapuoran, nga adda iti pagserkan ti tolda ti gimong.  “‘No maipapan iti isuamin a taba ti toro ti daton gapu iti basol, ikkatennanto iti dayta ti taba a mangalupkop kadagiti bagis, uray ti isuamin a taba nga adda iti rabaw dagiti bagis,+  ken ti dua a bekkel ken ti taba nga adda iti rabawda, kas met laeng iti daydiay adda iti rabaw dagiti lomo. Ket no maipapan iti kulanit iti rabaw ti dalem, ikkatennanto agraman dagiti bekkel.+ 10  Kaslanto met laeng dayta iti maikkat iti maysa a toro ti pakikaykaysa a sakripisio.+ Ket masapul a pagasuken ida ti padi iti rabaw ti altar ti daton a mapuoran.+ 11  “‘Ngem no maipapan iti lalat ti toro ken isuamin a lasagna agraman ti ulona ken dagiti kukodna ken dagiti bagisna ken ti iblengna,+ 12  kasapulan nga iruarna ti intero a toro iti wayaway ti pakarso+ iti maysa a nadalus a lugar a pakaibukbokan ti nataba a dapdapo,+ ket masapul a puoranna dayta iti rabaw ti kayo iti apuy.+ Iti pakaibukbokan ti nataba a dapdapo rebbeng a mapuoran dayta. 13  “‘Ita no ti intero a gimong ti Israel makaaramid iti biddut+ ket ti banag nailemmeng kadagiti mata ti kongregasion a nakaaramidda iti maysa kadagiti amin a banag nga ibilin ni Jehova a di aramiden ket iti kasta nakabasolda,+ 14  ket naammuan ti basol a naaramidanda a maikaniwas iti dayta,+ ngarud ti kongregasion masapul a mangidatag iti urbon a toro a maipaay a daton gapu iti basol ket masapul nga ipan dayta iti sanguanan ti tolda ti gimong. 15  Ket dagiti lallakay iti gimong masapul nga ipatayda ti im-imada iti ulo ti toro+ iti sanguanan ni Jehova, ket masapul a maparti ti toro iti sanguanan ni Jehova. 16  “‘Kalpasanna ti padi, daydiay napulotan,+ masapul nga ipanna ti dadduma iti dara ti toro iti tolda ti gimong.+ 17  Ket masapul nga isawsaw ti padi ti ramayna iti dadduma iti dara ket iparsiakna a mamimpito iti sanguanan ni Jehova iti sango ti kortina.+ 18  Ket ikabilnanto ti dadduma iti dara kadagiti sara ti altar+ nga adda iti sanguanan ni Jehova, nga adda iti tolda ti gimong; ket ti isuamin a natedda iti dara ibukboknanto iti puon ti altar ti daton a mapuoran,+ nga adda iti pagserkan ti tolda ti gimong. 19  Ket ikkatennanto iti dayta ti amin a tabana, ket masapul a pagasukenna iti altar.+ 20  Ket masapul nga aramidenna iti toro kas iti inaramidna iti sabali pay a toro ti daton gapu iti basol. Kasta ti aramidennanto iti dayta; ket ti padi masapul a mangaramid iti panangabbong+ maipaay kadakuada, ket iti kasta mapakawanto dayta kadakuada. 21  Ket kasapulan nga iruarna ti toro iti wayaway ti pakarso ket masapul a puoranna dayta, kas ti panangpuorna iti umuna a toro.+ Maysa dayta a daton gapu iti basol maipaay iti kongregasion.+ 22  “‘No makabasol ti maysa a panguluen+ ket maaramidna a di inggagara ti maysa kadagiti amin a banag nga ibilin ni Jehova a Diosna a di aramiden,+ ket iti kasta nakabasol, 23  wenno ti basol a naaramidanna a maikaniwas iti bilin naipakaammon kenkuana,+ ngarud masapul a mangyeg kas datonna iti maysa a kalakian+ nga urbon dagiti kalding, daydiay nasalun-at. 24  Ket masapul nga ipatayna ti imana iti ulo+ ti urbon a kalding ket partienna iti disso a kankanayon a pamarpartian iti sanguanan ni Jehova ti daton a mapuoran.+ Maysa dayta a daton gapu iti basol.+ 25  Ket masapul nga alaen ti padi ti dadduma iti dara ti daton gapu iti basol babaen ti ramayna ket ikabilna dayta kadagiti sara+ ti altar ti daton a mapuoran, ket ibukboknanto ti natedda iti darana iti puon ti altar ti daton a mapuoran. 26  Ket pagasukennanto ti isuamin a tabana iti altar a kas iti taba ti pakikaykaysa a sakripisio;+ ket ti padi masapul a mangaramid iti panangabbong maipaay kenkuana iti basolna,+ ket iti kasta mapakawanto kenkuana. 27  “‘Ket no ti asinoman a kararua kadagiti tattao iti daga agbasol a di inggagara babaen ti panangaramidna iti maysa kadagiti banag nga ibilin ni Jehova a rebbeng a di aramiden ket makabasol,+ 28  wenno ti basol a naaramidanna naipakaammon kenkuana, ngarud masapul a mangyeg kas datonna iti maysa a kabaian+ nga urbon dagiti kalding, daydiay nasalun-at, maipaay iti basolna a naaramidanna. 29  Ket masapul nga ipatayna ti imana iti ulo+ ti daton gapu iti basol ket partienna ti daton gapu iti basol iti isu met laeng a lugar a kas iti daton a mapuoran.+ 30  Ket masapul nga alaen ti padi ti dadduma iti dara dayta babaen ti ramayna ket ikabilna kadagiti sara+ ti altar ti daton a mapuoran, ket ibukboknanto ti isuamin a natedda iti dara dayta iti puon ti altar.+ 31  Ket ikkatennanto ti isuamin a tabana,+ kas iti pannakaikkat ti taba iti pakikaykaysa a sakripisio;+ ket ti padi masapul a pagasukenna dayta iti altar kas makabang-ar a sayamusom ken Jehova;+ ket ti padi masapul a mangaramid iti panangabbong maipaay kenkuana, ket iti kasta mapakawanto dayta kenkuana.+ 32  “‘Ngem no mangyeg iti kordero+ kas datonna a maipaay a daton gapu iti basol, maysa a nasalun-at+ a kabaian a kordero ti rebbeng nga iyegna. 33  Ket masapul nga ipatayna ti imana iti ulo ti daton gapu iti basol ket partienna dayta a kas daton gapu iti basol iti disso a kankanayon a pamarpartian iti daton a mapuoran.+ 34  Ket masapul nga alaen ti padi ti dadduma iti dara ti daton gapu iti basol babaen ti ramayna ket ikabilna dayta kadagiti sara ti altar ti daton a mapuoran,+ ket ibukboknanto ti isuamin a natedda iti dara dayta iti puon ti altar. 35  Ket ikkatennanto ti isuamin a tabana a kas met laeng iti kankanayon a pannakaikkat ti taba ti urbon a kalakian a karnero ti pakikaykaysa a sakripisio, ket ti padi masapul a pagasukenna ida iti altar iti rabaw dagiti naipuor a daton ni Jehova;+ ket ti padi masapul a mangaramid iti panangabbong+ maipaay kenkuana iti basolna a naaramidanna, ket iti kasta mapakawanto dayta kenkuana.+

Footnotes