Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Levitico 25:1-55

25  Ket ni Jehova nagsao pay ken Moises idiay Bantay Sinai, a kunkunana:  “Agsaoka iti annak ti Israel, ket masapul a kunaem kadakuada, ‘Inton sumrekkayo kamaudiananna iti daga nga itedko kadakayo,+ ngarud ti daga masapul a mangngilin iti sabbath ken Jehova.+  Innem a tawen a mulaam ti talonmo iti bin-i, ket innem a tawen nga arbasam ti kaubasam, ket masapul nga ummongem ti bunga ti daga.+  Ngem iti maikapito a tawen rebbeng nga adda maaramid a sabbath ti naan-anay a panaginana maipaay iti daga,+ maysa a sabbath ken Jehova. Ti talonmo dika mulaan iti bin-i, ket ti kaubasam dika arbasan.  Ti tumubo manipud naregreg a binukel ti anim dika apiten, ket dagiti ubas ti di naarbasan a puon ti ubasmo dika burasen. Rebbeng nga adda maaramid a maysa a tawen ti naan-anay a panaginana maipaay iti daga.  Ket ti sabbath ti daga agserbinto a maipaay a taraon kadakayo, maipaay kenka ken iti adipenmo a lalaki ken iti adipenmo a babai ken iti patangtangdanan a trabahadormo ken iti makipaggigian kenka, dagidiay makipagtataeng kas ganggannaet kenka,  ken maipaay iti naamo nga animalmo ken maipaay iti atap nga animal nga adda iti dagam. Isuamin a bungana rebbeng nga agserbi a kanen.  “‘Ket masapul nga ibilangam ta bagim iti pito a sabbath dagiti tawen, mamimpito a pito a tawen, ket dagiti aldaw ti pito a sabbath dagiti tawen masapul nga agdagupda iti uppat a pulo ket siam a tawen maipaay kenka.  Ket masapul a paguniem ti tangguyob ti natbag nga aweng+ iti maikapito a bulan iti maikasangapulo ti bulan;+ iti aldaw ti panangabbong+ rebbeng a pagunienyo ti tangguyob iti intero a dagayo. 10  Ket masapul a santipikarenyo ti maikalimapulo a tawen ket iwaragawagyo ti wayawaya iti daga kadagiti amin nga agnanaed iti dayta.+ Agbalinto a Jubileo+ maipaay kadakayo, ket masapul nga isubliyo tunggal maysa iti kukuana ken rebbeng nga isubliyo tunggal maysa iti pamiliana.+ 11  Maysa a Jubileo ti pagbalinanto kadakayo dayta a maikalimapulo a tawen.+ Dikay agimula iti bin-i wenno apiten ti tumubo iti daga manipud iti naregreg a binukel wenno burasen dagiti ubas ti di naarbasan a lanlanotna.+ 12  Ta Jubileo dayta. Rebbeng nga agbalin a nasantuan a banag kadakayo. Manipud iti talon mabalinyo ti mangan iti patauden ti daga.+ 13  “‘Iti daytoy a tawen ti Jubileo rebbeng nga isubliyo tunggal maysa iti kukuana.+ 14  Ita no kas pagarigan aglakokayo iti tagilako iti katimpuyogmo wenno gumatangka manipud iti ima ti katimpuyogmo, dikay agiinnallilaw.+ 15  Sigun iti bilang ti tawtawen kalpasan ti Jubileo gumatangka manipud iti katimpuyogmo; sigun iti bilang ti tawtawen dagiti apit isu aglako kenka.+ 16  Kas mairukod iti adu a bilang ti tawtawen rebbeng nga iyad-aduna ti panggatang a pategna,+ ket kas mairukod iti kinabassit ti tawtawen rebbeng a pabassitenna ti panggatang a pategna, agsipud ta ti bilang dagiti apit isu ti ilakona kenka. 17  Ket dikay allilawen asinoman kadakayo ti katimpuyogna,+ ket masapul nga agbutengka iti Diosmo,+ agsipud ta siak ni Jehova a Diosyo.+ 18  Gapuna masapul nga itungpalyo dagiti paglintegak ken rebbeng a salimetmetanyo dagiti hudisial a pangngeddengko ket masapul nga itungpalyo ida. Iti kasta sigurado nga agnaedkayto a sitatalged iti daga.+ 19  Ket pudno nga itdento ti daga ti bungana,+ ket sigurado nga agpennekkayto a mangan ken agnaedkayo a sitatalged iti dayta.+ 20  “‘Ngem no kas pagarigan kunaenyo: “Ania ti kanenmi iti maikapito a tawen yantangay saanmi a mabalin ti agimula iti bin-i wenno agummong kadagiti apitmi?”+ 21  iti dayta a kaso pudno unay a bilinekto ti bendisionko maipaay kadakayo iti maikanem a tawen, ket mangipaayto iti apitna maipaay iti tallo a tawen.+ 22  Ket agimulakayto iti bin-i iti maikawalo a tawen ket mangankayto manipud iti baak nga apit agingga iti maikasiam a tawen. Agingga iti iyaay ti apitna kanenyonto ti baak. 23  “‘Gapuna ti daga rebbeng a saan a mailako iti agnanayon,+ agsipud ta kukuak ti daga.+ Ta ganggannaetkayo nga agnanaed ken makipaggigiankayo iti panangmatmatko.+ 24  Ket iti intero a daga a sanikuayo rebbeng nga itedyo iti daga ti kalintegan a manggatang a mangbawi.+ 25  “‘No kas pagarigan pumanglaw ti kabsatmo ket kasapulan a mangilako iti sanikuana, ti maysa a manangsaka nga asideg ti pannakikabagianna kenkuana masapul met nga umay ket gatangenna a bawyen ti inlako ti kabsatna.+ 26  Ket no kas pagarigan ti asinoman awananto iti manangsaka ket ti bukodna nga ima makategged ket makasapul iti umanay a maipaay iti pannakasakana, 27  masapul met a pattapattaenna dagiti tawen manipud idi inlakona dayta ket masapul nga isublina ti kuarta a matda iti tao a nangilakuanna, ket agsublinto iti kukuana.+ 28  “‘Ngem no saan a makasapul ti imana iti umanay nga isublina kenkuana, ti inlakona masapul met nga agtalinaed iti ima ti gimmatang iti dayta agingga iti tawen a Jubileo;+ ket masapul a mapalusposan dayta iti Jubileo, ket masapul nga agsubli iti kukuana.+ 29  “‘Ita no kas pagarigan ti maysa a tao mangilako iti pagnanaedan a balay iti napaderan a siudad, ti kalinteganna a mangsaka masapul met nga agtultuloy agingga nga agleppas ti tawen manipud iti tiempo ti panangilakona; ti kalinteganna a mangsaka+ rebbeng nga agtultuloy iti intero a makatawen. 30  Ngem no saan a magatang a mabawi sakbay a ti intero a tawen dimteng iti pannakaan-anay maipaay kenkuana, ti balay nga adda iti siudad nga addaan pader masapul met nga agtalinaed nga agnanayon a kas kukua ti gimmatang iti dayta bayat dagiti kaputotanna. Rebbeng a saan a mapalusposan iti Jubileo. 31  Nupay kasta, dagiti balay ti purpurok nga awanan pader iti aglawlawda rebbeng a maibilang kas paset ti talon ti pagilian. Ti kalintegan a mangsaka+ agtultuloy maipaay iti dayta, ket iti Jubileo+ rebbeng a mapalusposan. 32  “‘No maipapan kadagiti siudad dagiti Levita agraman ti balbalay kadagiti siudad ti sanikuada,+ ti kalintegan a mangsaka rebbeng nga agtultuloy agingga iti tiempo a di nakedngan maipaay kadagiti Levita.+ 33  Ket no ti sanikua dagiti Levita saan a magatang a mabawi, ti balay a nailako iti siudad ti kukuana masapul met a mapalusposan iti Jubileo;+ agsipud ta ti balbalay kadagiti siudad dagiti Levita kukuada iti tengnga ti annak ti Israel.+ 34  Mainayon pay, saan a mabalin nga ilako ti talon ti pagpaaraban+ dagiti siudadda, agsipud ta maysa dayta a sanikua agingga iti tiempo a di nakedngan maipaay kadakuada. 35  “‘Ket no kas pagarigan pumanglaw ti kabsatmo ket ngarud kumapuy iti pinansial iti sibaymo,+ masapul met a saranayem.+ Kas ganggannaet nga agnanaed ken makipaggigian,+ agtalinaedto a sibibiag a kaduam. 36  Dika mangala kenkuana iti patubo ken am-am,+ no di ket masapul nga agbutengka iti Diosmo;+ ket ti kabsatmo masapul nga agtalinaed a sibibiag a kaduam. 37  Dika ited kenkuana ti kuartam iti panagpatubo,+ ket dika ited ti taraonmo iti panagam-am. 38  Siak ni Jehova a Diosyo, a nangiruar kadakayo manipud daga ti Egipto tapno itdek kadakayo ti daga ti Canaan,+ tapno agbalinak a Diosyo.+ 39  “‘Ket no kas pagarigan pumanglaw ti kabsatmo iti sibaymo ket kasapulan nga ilakona kenka ti bagina,+ dika usaren kas trabahador iti mangadipen a panagserbi.+ 40  Rebbeng nga adda kenka a kas patangtangdanan a trabahador,+ kas makipaggigian. Rebbeng nga agserbi kenka agingga iti tawen a Jubileo. 41  Ket masapul a pumanaw kenka, isu ken ti annakna a maikuyog kenkuana, ket masapul nga agsubli iti pamiliana, ket rebbeng nga agsubli iti kukua dagidi ammana.+ 42  Ta ad-adipenko ida nga inruarko manipud daga ti Egipto.+ Masapul a saanda nga ilako ti bagbagida iti wagas a pannakailako ti maysa nga adipen. 43  Dika ibaddebaddek buyogen ti panangikuspil,+ ket masapul nga agbutengka iti Diosmo.+ 44  No maipapan iti adipenmo a lalaki ken iti adipenmo a babai nga agbalin a kukuam manipud nasnasion nga adda iti aglikmutyo, manipud kadakuada mabalinmo ti gumatang iti adipen a lalaki ken adipen a babai. 45  Ken kasta met manipud iti annak dagiti makipaggigian a makipagtataeng kas ganggannaet kadakayo,+ manipud kadakuada mabalinyo ti gumatang, ken manipud kadagiti pamiliada nga adda kadakayo isuda nga impasngayda kadakuada iti dagayo; ket agbalindanto a kukuayo. 46  Ket masapul nga iyawatyo ida a kas tawid iti annakyo a sumaruno kadakayo tapno tawidenda a kas sanikua agingga iti tiempo a di nakedngan.+ Mabalinyo nga usaren ida a kas trabahador, ngem ti kakabsatyo nga annak ti Israel, dikay ibaddebaddek, ti maysa iti sabali, buyogen ti panangikuspil.+ 47  “‘Ngem no kas pagarigan bumaknang ti ima ti ganggannaet nga agnanaed wenno ti makipaggigian kenka, ket ti kabsatmo pimmanglaw iti sibayna ket masapul nga ilakona ti bagina iti ganggannaet nga agnanaed wenno iti makipaggigian kenka, wenno iti maysa a kameng ti pamilia ti ganggannaet nga agnanaed, 48  kalpasan ti panangilakona ti bagina,+ ti kalintegan a mangsaka agtultuloyto iti kasasaadna.+ Isu mabalin a gatangen a bawyen ti maysa iti kakabsatna.+ 49  Wenno ti ulitegna wenno ti anak ti ulitegna isu mabalinna a gatangen a bawyen, wenno asinoman a kabagian iti dara ti lasagna,+ maysa iti pamiliana, isu mabalinna a gatangen a bawyen. “‘Wenno no ti bukodna nga ima bimmaknang, masapul met a gatangenna a bawyen ti bagina.+ 50  Ket masapul a makibinnilang iti gimmatang kenkuana manipud iti tawen a panangilakona kenkuana ti bagina agingga iti tawen a Jubileo,+ ket ti kuarta a nakailakuanna masapul a maitupag iti bilang dagiti tawen.+ Iti pamay-an a pannakabilang ti al-aldaw ti panagtrabaho ti maysa a patangtangdanan a trabahador rebbeng nga isu agtalinaed kenkuana.+ 51  No adda pay adu a tawen, kas mairukod kadagita rebbeng a bayadanna ti gatad ti pannakasakana manipud iti kuarta ti pannakagatangna. 52  Ngem no sumagmamano laengen ti mabati iti tawtawen agingga iti tawen a Jubileo,+ masapul ngarud nga ipattapattaanna ti bagina. Kas mairukod kadagiti tawenna rebbeng a bayadanna ti gatad ti pannakasakana. 53  Rebbeng nga isu agtalinaed kenkuana a kas iti patangtangdanan a trabahador+ iti tinawentawen. Saanna koma nga ibaddebaddek buyogen ti panangikuspil+ iti imatangmo. 54  Nupay kasta, no saanna a kabaelan a gatangen a bawyen ti bagina kadagitoy a katulagan, mapalusposanto ngarud iti tawen a Jubileo,+ isu ken ti annakna a maikuyog kenkuana. 55  “‘Ta ad-adipen kaniak ti annak ti Israel. Ad-adipenko ida+ nga inruarko manipud daga ti Egipto.+ Siak ni Jehova a Diosyo.+

Footnotes