Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Levitico 23:1-44

23  Ket intultuloy ni Jehova ti nagsao ken Moises, a kunkunana:  “Agsaoka iti annak ti Israel, ket masapul a kunaem kadakuada, ‘Dagiti naipanapanawen a piesta+ ni Jehova a rebbeng nga iwaragawagyo+ nasantuanda a kombension. Dagitoy ti naipanapanawen a piestak:  “‘Innem nga aldaw a mabalin nga aramiden ti trabaho, ngem iti maikapito nga aldaw maysa a sabbath ti naan-anay a panaginana,+ maysa a nasantuan a kombension. Dikay aramiden ti aniaman a kita ti trabaho. Sabbath dayta ken Jehova kadagiti amin a lugar a pagnaedanyo.+  “‘Dagitoy ti naipanapanawen a piesta+ ni Jehova, nasantuan a kombension,+ a rebbeng nga iwaragawagyo kadagiti naituding+ a tiempoda:  Iti umuna a bulan, iti maikasangapulo ket uppat nga aldaw ti bulan,+ iti nagbaetan ti dua a rabii isu ti paskua+ ken Jehova.  “‘Ket iti maikasangapulo ket lima nga aldaw daytoy a bulan isu ti piesta dagiti di pinaalsa a tinapay ken Jehova.+ Pito nga aldaw a rebbeng a mangankayo kadagiti di pinaalsa a tinapay.+  Iti umuna nga aldaw maaddaankayto iti nasantuan a kombension.+ Dikay aramiden ti aniaman a kita ti napagel a trabaho.  No di ket masapul a mangidatagkayo iti naipuor a daton ken Jehova iti pito nga aldaw. Iti maikapito nga aldaw addanto maysa a nasantuan a kombension. Dikay aramiden ti aniaman a kita ti napagel a trabaho.’”  Ket intuloy ni Jehova ti agsao ken Moises, a kunkunana: 10  “Agsaoka iti annak ti Israel, ket masapul a kunaem kadakuada, ‘Inton sumrekkayo kamaudiananna iti daga nga itedko kadakayo, ket inapityon ti anina, masapul met a mangyegkayo iti padi iti sangabettek ti umuna a bungbunga+ ti aniyo. 11  Ket ti bettek masapul nga ililina nga agsublisubli+ iti sanguanan ni Jehova tapno magun-odan ti anamong maipaay kadakayo. Madagdagus iti aldaw a kalpasan ti sabbath rebbeng a ti padi ililina nga agsublisubli dayta. 12  Ket iti aldaw a panangipaililiyo nga agsublisubli iti bettek masapul a mangidatagkayo iti nasalun-at nga urbon a kalakian a karnero, a tumawenen, maipaay a mapuoran a daton ken Jehova; 13  ket kas datonna a bukbukel dua nga apagkapullo ti maysa nga efa a nasayaat nga arina a nababasa iti lana, kas naipuor a daton ken Jehova, maysa a makabang-ar a sayamusom; ket kas datonna nga inumen kakapat ti maysa a hin nga arak. 14  Ket dikay mangan iti tinapay wenno uray kinirog a bukel wenno uray baro a bukel agingga iti daytoy met laeng nga aldaw,+ agingga iti panangyegyo ti daton ti Diosyo. Paglintegan dayta agingga iti tiempo a di nakedngan maipaay kadagiti kaputotanyo kadagiti amin a lugar a pagnaedanyo. 15  “‘Ket masapul nga ibilanganyo ti bagbagiyo manipud iti aldaw a kalpasan ti sabbath, manipud iti aldaw a panangyegyo iti bettek ti daton a mailili, iti pito a sabbath.+ Rebbeng a maan-anayda. 16  Agingga iti aldaw a kalpasan ti maikapito a sabbath rebbeng a bumilangkayo, iti limapulo nga aldaw,+ ket masapul a mangidatagkayo iti baro a bukbukel a daton+ ken Jehova. 17  Manipud kadagiti disso a pagnanaedanyo rebbeng a mangyegkayo iti dua a tinapay+ kas daton a mailili. Rebbeng a naaramid dagita manipud dua nga apagkapullo ti maysa nga efa a nasayaat nga arina. Rebbeng a nalutoda a nalebaduraan,+ kas umuna a naluom a bungbunga ken Jehova.+ 18  Ket masapul a mangidatagkayo a mairaman kadagiti tinapay iti pito a nasalun-at a kalakian a kordero,+ a saggaysa ti tawenda, ken maysa nga urbon a toro ken dua a kalakian a karnero. Rebbeng nga agserbida kas mapuoran a daton ken Jehova a mairaman iti datonda a bukbukel ken kadagiti datonda nga inumen kas naipuor a daton, ti makabang-ar a sayamusom ken Jehova. 19  Ket masapul a mangidatagkayo iti maysa nga urbon dagiti kalding+ kas daton gapu iti basol ken dua a kalakian a kordero, a saggaysa ti tawenda, kas pakikaykaysa a sakripisio.+ 20  Ket ti padi masapul nga ililina ida nga agsublisubli+ a mairaman kadagiti tinapay ti umuna a naluom a bungbunga, kas daton a mailili iti sanguanan ni Jehova, a mairaman iti dua a kalakian a kordero. Rebbeng nga agserbida kas nasantuan a banag ken Jehova a maipaay iti padi.+ 21  Ket masapul a mangaramidkayo iti waragawag+ iti daytoy met laeng nga aldaw; addanto maysa a nasantuan a kombension maipaay iti bagbagiyo. Dikay aramiden ti aniaman a kita ti napagel a trabaho. Paglintegan dayta agingga iti tiempo a di nakedngan kadagiti amin a lugar a pagnanaedanyo maipaay kadagiti kaputotanyo. 22  “‘Ket inton apitenyo ti ani ti dagayo, dika naan-anay nga anien ti igid ti talonmo no agap-apitka, ket ti maadas iti anim dika piduten.+ Rebbeng a baybay-am ida a maipaay iti daydiay naparigatan+ ken iti ganggannaet nga agnanaed.+ Siak ni Jehova a Diosyo.’” 23  Ket intultuloy ni Jehova ti nagsao ken Moises, a kunkunana: 24  “Agsaoka iti annak ti Israel, a kunaem, ‘Iti maikapito a bulan,+ iti umuna ti bulan, rebbeng a maaramid kadakayo ti naan-anay a panaginana, maysa a panglaglagip babaen ti panaguni ti trumpeta,+ maysa a nasantuan a kombension.+ 25  Dikay aramiden ti aniaman a kita ti napagel a trabaho, ket masapul a mangidatagkayo iti naipuor a daton ken Jehova.’” 26  Ket ni Jehova nagsao pay ken Moises, a kunkunana: 27  “Nupay kasta, iti maikasangapulo daytoy maikapito a bulan isu ti aldaw ti panangabbong.+ Rebbeng a maaramid kadakayo ti maysa a nasantuan a kombension, ket masapul a parigatenyo dagiti kararuayo+ ket mangidatagkayo iti naipuor a daton+ ken Jehova. 28  Ket dikay agaramid iti aniaman a kita ti trabaho iti daytoy met laeng nga aldaw, agsipud ta aldaw dayta ti panangabbong tapno mangaramid iti panangabbong+ maipaay kadakayo iti sanguanan ni Jehova a Diosyo; 29  agsipud ta tunggal kararua a saanto a maparigatan iti daytoy met laeng nga aldaw masapul a magessat kadagiti kailianna.+ 30  No maipapan iti asinoman a kararua nga agaramidto iti aniaman a kita ti trabaho iti daytoy met laeng nga aldaw, masapul a dadaelek dayta a kararua iti tengnga dagiti kailianna.+ 31  Dikay agaramid iti aniaman a kita ti trabaho.+ Maysa dayta a paglintegan agingga iti tiempo a di nakedngan maipaay kadagiti kaputotanyo iti amin a luglugar a pagnaedanyo. 32  Sabbath dayta ti naan-anay a panaginana maipaay kadakayo,+ ket masapul a parigatenyo+ dagiti kararuayo iti maikasiam ti bulan iti rabii. Manipud rabii agingga iti rabii rebbeng a ngilinenyo ti sabbathyo.” 33  Ket intuloy ni Jehova ti agsao ken Moises, a kunkunana: 34  “Agsaoka iti annak ti Israel, a kunaem, ‘Iti maikasangapulo ket lima nga aldaw daytoy maikapito a bulan isu ti piesta dagiti abong-abong iti pito nga aldaw ken Jehova.+ 35  Iti umuna nga aldaw isu ti nasantuan a kombension. Dikay aramiden ti aniaman a kita ti napagel a trabaho. 36  Pito nga aldaw a rebbeng a mangidatagkayo iti naipuor a daton ken Jehova. Iti maikawalo nga aldaw rebbeng nga addanto maaramid a nasantuan a kombension maipaay kadakayo,+ ket masapul a mangidatagkayo iti naipuor a daton ken Jehova. Nadaeg nga asamblea dayta. Dikay aramiden ti aniaman a kita ti napagel a trabaho. 37  “‘Dagitoy ti naipanapanawen a piesta+ ni Jehova a rebbeng nga iwaragawagyo kas nasasantuan a kombension,+ a panangidatag iti naipuor a daton+ ken Jehova: ti daton a mapuoran+ ken ti daton a bukbukel+ ti sakripisio ken dagiti daton nga inumen+ sigun iti inaldaw nga urnos, 38  malaksid kadagiti sabbath ni Jehova+ ken malaksid kadagiti amin a sagutyo+ ken malaksid kadagiti amin a kari a datonyo+ ken malaksid kadagiti amin a boluntario a datonyo,+ a rebbeng nga ipaayyo ken Jehova. 39  Nupay kasta, iti maikasangapulo ket lima nga aldaw ti maikapito a bulan, inton naurnongyon ti apit ti daga, rebbeng a rambakanyo ti piesta+ ni Jehova iti pito nga aldaw.+ Iti umuna nga aldaw isu ti naan-anay a panaginana ket iti maikawalo nga aldaw isu ti naan-anay a panaginana.+ 40  Ket masapul nga iyalaanyo ti bagbagiyo iti umuna nga aldaw iti bunga dagiti nangayed a kayo, iti bulbulong dagiti kayo a palma+ ken iti kangrunaan a sangsanga dagiti nasanga a kayo ken dagiti alamo ti naapres a ginget, ket masapul nga agrag-okayo+ iti sanguanan ni Jehova a Diosyo iti pito nga aldaw. 41  Ket masapul a rambakanyo dayta kas maysa a piesta ken Jehova iti pito nga aldaw iti makatawen.+ Kas paglintegan agingga iti tiempo a di nakedngan bayat dagiti kaputotanyo, rebbeng a rambakanyo dayta iti maikapito a bulan. 42  Rebbeng nga agnaedkayo kadagiti abong-abong iti pito nga aldaw.+ Amin dagiti katutubo iti Israel rebbeng nga agnaedda kadagiti abong-abong,+ 43  tapno maammuan dagiti kaputotanyo+ a kadagiti abong-abong a pinagnaedko ti annak ti Israel idi iruruarko ida manipud daga ti Egipto.+ Siak ni Jehova a Diosyo.’” 44  Iti kasta sinao ni Moises ti maipapan iti naipanapanawen a pipiesta+ ni Jehova iti annak ti Israel.

Footnotes