Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Kanta ni Solomon 5:1-16

5  “Immayak iti minuyongak,+ O kabsatko a babai,+ nobiak.+ Rinurosko ti mirrak+ agraman ti rekadok. Kinnanko ti rarak agraman ti dirok;+ ininumko ti arakko agraman ti gatasko.” “Mangankayo, O kakadua! Uminumkayo ket agbartekkayo kadagiti ebkas ti pammateg!”+  “Nakaturogak, ngem ti pusok siririing.+ Isu daydiay ti timek ti patpatgek nga agtuktuktok!”+ “Ilukatannak,+ O kabsatko a babai, kaduak a babai, kalapatik, awan pakababalawanna!+ Ta ti ulok napno iti linnaaw, dagiti tirintas ti buokko kadagiti taredted ti rabii.”+  “‘Inuksobkon ti nagayad a pagan-anayko. Kasano nga isublik nga ikawes dayta? Binugguakon dagiti sakak. Kasano a murengak ida?’  Ni met laeng patpatgek inuksotna dagiti imana iti abut ti ruangan, ket dagiti met laeng makin-uneg a pasetko+ nagariwawada iti unegko.  Timmakderak, mismo a siak, tapno ilukatak daydiay patpatgek, ket dagiti bukodko nga ima nagitedtedda iti mirra ket dagiti ramayko iti likido a mirra, kadagiti lungog ti panulbekan.  Inlukatak, mismo a siak, daydiay patpatgek, ngem daydiay met laeng patpatgek pimmanawen, isu nakalabasen. Ti mismo a kararuak rimmuar kaniak idi isu nagsao. Isu sinapulko, ngem saanko a nasarakan.+ Isu inawagak, ngem saannak a sinungbatan.  Dagiti managwanawan+ nga agpagnapagna iti siudad nasarakandak. Kinabildak, sinugatandak. Dagiti managwanawan kadagiti pader+ inikkatda kaniak ti akaba a kagayko.  “Pinagsapatakayo,+ O annak a babbai ti Jerusalem,+ a, no masarakanyo daydiay patpatgek,+ ibagayo kenkuana a masakitak iti ayat.”+  “Kasano a daydiay patpatgem nangnangruna ngem iti asinoman a sabali pay a patpatgen,+ O sika a kapipintasan kadagiti babbai?+ Kasano a daydiay patpatgem nangnangruna ngem iti asinoman a sabali pay a patpatgen, iti kasta pinagsapatanaka a kas itoy?”+ 10  “Ni patpatgek makasisirap ken lumabbasit, ti kalalatakan iti sangapulo a ribu.+ 11  Ti ulona balitok, napasudi a balitok. Dagiti tirintas ti buokna raraay ti datiles. Ti nangisit a buokna umasping iti wak. 12  Dagiti matana umaspingda kadagiti kalapati iti igid dagiti pagayusan ti danum, a mangdigdigus iti bagbagida iti gatas, nga agtugtugawda kadagiti ngarab. 13  Dagiti pingpingna umaspingda iti maysa nga aray ti minuyongan ti rekado,+ tortorre dagiti nabanglo a yerba. Dagiti bibigna lirlirio, nga agitedtedted iti likido a mirra.+ 14  Dagiti imana tubtubong a balitok, a napno iti krisolito. Ti pus-ongna ket plata a marfil a nakalupkopan kadagiti safiro. 15  Dagiti luppona ket ad-adigi a marmol a naisaad kadagiti sulluop a batay a napasudi a balitok. Ti langana umasping iti Libano, napili a kas kadagiti sedro.+ 16  Ti ngadasna bin-ig a kinasam-it, ket ti isuamin a maipapan kenkuana bin-ig a makaay-ayo.+ Daytoy isu ti patpatgek, ket daytoy ti kaduak a lalaki, O annak a babbai ti Jerusalem.”

Footnotes