Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Juan 7:1-53

7  Itan kalpasan dagitoy a banag intultuloy ni Jesus a sinursor ti Galilea, ta saanna a kinayat a sursoren ti Judea, agsipud ta isu inkagkagumaan a papatayen+ dagiti Judio.  Nupay kasta, asideg idin ti piesta dagiti Judio, ti piesta dagiti tabernakulo.+  Gapuna kinuna kenkuana ti kakabsatna:+ “Umaliska manipud ditoy ket mapanka idiay Judea, tapno dagiti adalam makitada met dagiti trabaho nga aramidem.  Ta awan ti asinoman nga agaramid iti aniaman a banag iti nalimed bayat a tartarigagayanna ti maammuan a silalatak. No aramidem dagitoy a banag, iparangarangmo ti bagim iti lubong.”  Ti kakabsatna,+ iti kinapudnona, saanda a winatwat ti pammati kenkuana.+  Gapuna kinuna kadakuada ni Jesus: “Saan pay a dimteng ti naikeddeng a tiempok,+ ngem ti naikeddeng a tiempoyo kankanayon a nakasagana.  Ti lubong awan ti rasonna a manggura kadakayo, ngem guraennak dayta, agsipud ta saksiak ti maipapan iti dayta a dagiti aramidna nadangkes.+  Sumang-atkayo idiay piesta; saanak pay a sumang-at iti daytoy a piesta, agsipud ta saan pay a naan-anay a dimteng+ ti naikeddeng a tiempok.”+  Gapuna kalpasan nga imbagana kadakuada dagitoy a banag, isu nagtalinaed idiay Galilea. 10  Ngem idi nakasang-aten ti kakabsatna idiay piesta, idin isu a mismo simmang-at met, saan a sipapanayag no di ket kas sililimed.+ 11  Gapuna rinugian dagiti Judio ti nangsapul+ kenkuana idiay piesta ket kinunkunada: “Sadino ti ayan dayta a lalaki?” 12  Ket adu idi ti dayamudom dagiti bunggoy+ maipapan kenkuana. Ti sumagmamano kunada: “Isu naimbag a tao.” Dadduma kunada: “Saan, no di ket iyaw-awanna ti bunggoy.” 13  Awan, siempre, ti agsao a silalatak maipapan kenkuana gapu iti panagbuteng kadagiti Judio.+ 14  Idi a ngalayen ti piesta, simmang-at ni Jesus idiay templo ket nangrugi a nangisuro.+ 15  Gapuna nagsidsiddaaw dagiti Judio, a kunkunada: “Kasano nga addaan daytoy a tao iti pannakaammo kadagiti surat,+ idinto ta saan a nagadal kadagiti eskuelaan?”+ 16  Ni Jesus, kalpasanna, simmungbat kadakuada ket kinunana: “Ti isursurok saanko a kukua, no di ket kukua daydiay nangibaon kaniak.+ 17  No ti asinoman agtarigagay a mangaramid iti pagayatanna, maammuannanto maipapan iti sursuro no dayta ket aggapu iti Dios+ wenno no agsasaoak manipud iti bukodko a parnuay. 18  Ti agsao manipud iti bukodna a parnuay sapsapulenna ti bukodna a dayag; ngem ti mangsapul iti dayag+ daydiay nangibaon kenkuana, daytoy ket pudno, ket awan kenkuana ti kinakillo. 19  Saan kadi a ni Moises intedna kadakayo ti Linteg?+ Ngem awan maysa kadakayo ti mangtungtungpal iti Linteg. Apay nga ikagkagumaandak a papatayen?”+ 20  Ti bunggoy simmungbat: “Adda sairom.+ Siasino ti mangikagkagumaan a mangpapatay kenka?” 21  Kas sungbat kinuna kadakuada ni Jesus: “Maysa nga aramid ti inaramidko,+ ket agsidsiddaawkayo amin. 22  Gapu itoy a rason inted kadakayo ni Moises ti pannakakugit+—saan a gapu ta naggapu dayta ken Moises, no di ket naggapu kadagidi amma+—ket kugitenyo ti maysa a lalaki iti sabbath. 23  No ti maysa a lalaki umawat iti pannakakugit iti sabbath tapno saan a masalungasing ti linteg ni Moises, makaungetkayo aya unay kaniak agsipud ta pinasayaatko a naan-anay ti salun-at ti maysa a tao iti sabbath?+ 24  Isardengyo ti manguk-ukom manipud iti makinruar a langa, no di ket mangukomkayo a buyogen ti nalinteg a panangukom.”+ 25  Gapuna rinugian a kunaen ti sumagmamano kadagiti agnanaed idiay Jerusalem: “Saan kadi a daytoy ti tao nga ikagkagumaanda a papatayen?+ 26  Ket kaskasdi, kitaenyo! agsasao iti publiko,+ ket awan maikunada kenkuana. Naammuan kadi a sigurado dagiti agturay nga isu daytoy ti Kristo?+ 27  Iti kasupadina, ammotayo no sadino ti naggapuan daytoy a tao;+ ngem inton umay ti Kristo, awan maysa a makaammo no sadino ti paggapuanna.”+ 28  Gapuna nagpukkaw ni Jesus bayat a mangisursuro idiay templo ket kinunana: “Agpadpada nga am-ammodak ken ammoyo no sadino ti naggapuak.+ Kasta met, saanak nga immay iti bukodko a nakem,+ no di ket daydiay nangibaon kaniak napudno,+ ket saanyo nga am-ammo.+ 29  Isu am-ammok,+ agsipud ta maysaak a pannakabagi manipud kenkuana, ket Daydiay imbaonnak.”+ 30  Gapuna rinugianda nga inkagumaan a tiliwen,+ ngem awan maysa a nangyunnat iti imana kenkuana, agsipud ta saan pay a dimteng ti orasna.+ 31  Kaskasdi, adu iti bunggoy ti naaddaan iti pammati kenkuana;+ ket rinugianda a kinuna: “Inton dumteng ti Kristo, agaramidto kadi iti ad-adu a pagilasinan+ ngem iti naaramid daytoy a tao?” 32  Dagiti Fariseo nangngegda ti bunggoy a mangitantanabutob kadagitoy a banag maipapan kenkuana, ket ti panguluen a papadi ken dagiti Fariseo nangibaonda kadagiti opisial tapno isu tiliwenda.+ 33  Gapuna kinuna ni Jesus: “Agtalinaedak iti bassit pay a kanito a makikadua kadakayo sakbay a mapanak iti daydiay nangibaon kaniak.+ 34  Sapulendakto,+ ngem saandakto a masarakan, ket no sadino ti ayanko saanyo a mabalin ti umay.”+ 35  Gapuna kinuna dagiti Judio iti nagtetengngaanda: “Sadino ti panggep daytoy a tao a papanan, iti kasta saantayo a masarakan? Panggepna aya ti mapan kadagiti Judio a naiwarawara+ kadagiti Griego ket isurona dagiti Griego? 36  Ania ti kaipapananna daytoy sasao a kinunana, ‘Sapulendakto, ngem saandakto a masarakan, ket no sadino ti ayanko saanyo a mabalin ti umay’?” 37  Ita iti kamaudianan nga aldaw, ti dakkel nga aldaw ti piesta,+ ni Jesus sitatakder ket nagpukkaw, a kunkunana: “No adda asinoman a mawaw,+ umay koma kaniak ket uminum. 38  Ti maaddaan iti pammati kaniak,+ kas iti kinuna ti Kasuratan, ‘Manipud iti kaunggan a pasetna agayusto dagiti waig ti nabiag a danum.’”+ 39  Nupay kasta, kinunana daytoy maipapan iti espiritu a ngannganin awaten dagidiay addaan iti pammati kenkuana; ta awan pay idi ti espiritu,+ agsipud ta saan pay a naipadayag ni Jesus.+ 40  Gapuna sumagmamano iti bunggoy a nakangngeg kadagitoy a sasao rinugianda a kinuna: “Sigurado a daytoy Ti Mammadto.”+ 41  Dadduma kunkunada: “Daytoy ti Kristo.”+ Ngem ti sumagmamano kunkunada: “Iti kinaagpaysuanna ti Kristo+ aggapu aya iti Galilea?+ 42  Saan aya a kinuna ti Kasuratan a ti Kristo umay manipud iti kaputotan ni David,+ ken manipud Betlehem+ iti purok a nagyanan ni David?”+ 43  Gapuna timmaud ti panagsusupadi gapu kenkuana iti nagtetengngaan ti bunggoy.+ 44  Nupay kasta, isu kayat idi a tiliwen ti sumagmamano kadakuada, ngem awan maysa a nangipatay kenkuana kadagiti imana. 45  Gapuna dagiti opisial nagsublida iti panguluen a papadi ken kadagiti Fariseo, ket kinuna kadakuada dagitoy naud-udi a nadakamat: “Apay a saanyo nga inyeg?” 46  Insungbat dagiti opisial: “Awan pay a pulos sabali a tao a nagsao iti kastoy.”+ 47  Simmungbat met dagiti Fariseo: “Nayaw-awankay kadi met? 48  Adda aya maysa kadagiti agtuturay wenno kadagiti Fariseo ti naaddaan iti pammati kenkuana?+ 49  Ngem daytoy a bunggoy a saan a makaammo iti Linteg nailunodda a tattao.”+ 50  Ni Nicodemo, nga immay kenkuana iti napalabas, ken maysa idi kadakuada, kinunana kadakuada: 51  “Ukomen aya ti lintegtayo ti maysa a tao malaksid no umuna a dimngeg+ kenkuana ken inammona ti ar-aramidenna?” 52  Kas sungbat kinunada kenkuana: “Naggapuka kadi met idiay Galilea? Sukimatem ket kitaem nga awan mammadto+ a maibangon manipud Galilea.”* * Dagiti manuskrito a Codex Sinaiticus, Codex Vaticanus, ken ti Sinaitic Syriac codex ikkatenda ti bersikulo 53 inggana ti kapitulo 8, bersikulo 11, a mabasa (agraman sumagmamano a panagduduma iti nadumaduma a teksto ken patarus iti Griego) kas iti sumaganad: 53  Gapuna napanda tunggal maysa iti pagtaenganna.

Footnotes