Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Juan 6:1-71

6  Kalpasan dagitoy a banag napan ni Jesus idiay ballasiw ti baybay ti Galilea, wenno Tiberias.+  Ngem simmursurot kenkuana ti maysa a dakkel a bunggoy, agsipud ta makitkitada dagiti pagilasinan nga inar-aramidna kadagidiay a masaksakit.+  Gapuna simmang-at ni Jesus iti maysa a bantay,+ ket sadiay nagtugtugaw a kadua dagiti adalanna.  Ita asideg idin ti paskua,+ ti piesta dagiti Judio.  Ngarud, idi intannawag ni Jesus dagiti matana ket napaliiwna nga um-umay kenkuana ti maysa a dakkel a bunggoy, kinunana ken Felipe: “Sadino ti panggatangantayo kadagiti tinapay a kanen dagitoy?”+  Nupay kasta, kinunana daytoy tapno pangsubok kenkuana, ta isu ammona no ania ti dandaninan aramiden.  Ni Felipe simmungbat kenkuana: “Ti tinapay a dua gasut a denario ti pategda saan nga umanay a maipaay kadakuada, tapno tunggal maysa makaala iti bassit.”+  Maysa kadagiti adalanna, ni Andres a kabsat ni Simon Pedro, kinunana kenkuana:  “Adtoy ti maysa nga ubing a lalaki nga addaan lima a tinapay a sebada+ ken dua a babassit nga ikan. Ngem ania dagitoy no kadagiti adu unay?”+ 10  Kinuna ni Jesus: “Pagdalupisakenyo dagiti tattao a kas iti pannangan.”+ Ita adda adu a ruot iti daydi a disso. Ngarud nagdalupisak dagiti tattao, agarup lima ribu ti bilangda.+ 11  Gapuna innala ni Jesus dagiti tinapay ket, kalpasan a nakapagyaman, imbunongna ida kadagidiay sidadalupisak, kasta met dagiti babassit nga ikan kas ti kaadu ti kinayatda.+ 12  Ngem idi nabsogdan+ kinunana kadagiti adalanna: “Urnongenyo a sangsangkamaysa dagiti pispisi a natedda, tapno awan ti masayang.” 13  Ngarud inurnongda ida a sangsangkamaysa, ket napunnoda ti sangapulo ket dua a labba kadagiti pispisi manipud iti lima a tinapay a sebada, a natedda dagidiay nangan.+ 14  Gapuna idi a dagiti tattao nakitada dagiti pagilasinan nga inaramidna, rinugianda a kunaen: “Sigurado a daytoy ti mammadto+ nga umay iti lubong.” 15  Gapuna ni Jesus, idi naammuanna nga umayda koman ket kemmegenda tapno pagbalinenda nga ari, napan+ manen nga agmaymaysa idiay bantay. 16  Idi dimteng ti rabii, simmalog dagiti adalanna idiay baybay,+ 17  ket, idi limmuganda iti maysa a barangay, nagrubbuatda a bumallasiw iti baybay nga agturong idiay Capernaum. Ala ket, itan simmipngeten ket saan pay nga immay kadakuada ni Jesus. 18  Kasta met, ti baybay nangrugi nga agdawel agsipud ta sumipsiplog ti napigsa nga angin.+ 19  Nupay kasta, idi nakapaggauddan iti agarup lima wenno innem a kilometro, nakitada ni Jesus a magmagna iti rabaw ti baybay ken umas-asideg iti barangay; ket nagbutengda.+ 20  Ngem kinunana kadakuada: “Siak daytoy; dikay agbuteng!”+ 21  Gapuna sitatallugodda a nangawat kenkuana iti barangay, ket iti apagbiit addan ti barangay iti daga a pinadpadasda a papanan.+ 22  Iti sumaganad nga aldaw, ti bunggoy a sitatakder iti sabali a bangir ti baybay nakitada nga awan barangay sadiay malaksid iti maysa a bassit, ken saan a simrek ni Jesus iti barangay a naikuyog kadagiti adalanna no di ket dagiti laeng adalanna ti pimmanaw; 23  ngem dagiti barangay manipud Tiberias dimtengda iti asideg ti disso a nangananda iti tinapay kalpasan a nakapagyaman ti Apo. 24  Gapuna idi a ti bunggoy nakitada nga awan sadiay ni Jesus wenno uray dagiti adalanna, limmuganda kadagiti babassit a barangayda ket immayda idiay Capernaum tapno sapulenda+ ni Jesus. 25  Gapuna idi nasarakanda idiay ballasiw ti baybay kinunada kenkuana: “Rabbi,+ kaano a nakagtengka ditoy?” 26  Sinungbatan ida ni Jesus ket kinunana: “Pudno unay kunak kadakayo, Sapsapulendak, saan a gapu ta nakakitayo kadagiti pagilasinan, no di ket gapu ta nangankayo kadagiti tinapay ket napnekkayo.+ 27  Agtrabahokayo, saan a maipaay iti taraon a madadael,+ no di ket maipaay iti taraon a mataginayon maipaay iti biag nga agnanayon,+ nga itedto kadakayo ti Anak ti tao; ta inkabil iti daytoy ti Ama, ti mismo a Dios, ti selio ti anamongna.”+ 28  Gapuna kinunada kenkuana: “Ania ti aramidenmi tapno maaramidmi dagiti trabaho ti Dios?” 29  Kas sungbat kinuna kadakuada ni Jesus: “Daytoy ti trabaho ti Dios, a watwatenyo ti pammati+ kenkuana nga imbaon Daydiay.”+ 30  Gapuna kinunada kenkuana: “Ania, ngarud, ti aramidem kas pagilasinan,+ tapno makitami dayta ket patiendaka? Ania a trabaho ti ar-aramidem? 31  Dagidi ammatayo kinnanda ti manna+ idiay let-ang, kas iti adda a naisurat, ‘Nangted kadakuada iti tinapay manipud langit tapno kanenda.’”+ 32  Gapuna kinuna kadakuada ni Jesus: “Pudno unay kunak kadakayo, Saan nga inted kadakayo ni Moises ti tinapay manipud langit, no di ket ni Amak itedna kadakayo ti pudno a tinapay manipud langit.+ 33  Ta ti tinapay ti Dios isu daydiay bumaba manipud langit ken mangted ti biag iti lubong.” 34  Gapuna kinunada kenkuana: “Apo, itedmo kadakami a kankanayon daytoy a tinapay.”+ 35  Kinuna kadakuada ni Jesus: “Siak ti tinapay ti biag. Ti umay kaniak saanton a pulos agbisin, ket ti mangwatwat iti pammati kaniak saanton a pulos mawaw.+ 36  Ngem kinunak kadakayo, Nakitadak ket kaskasdi a saankayo a mamati.+ 37  Amin a banag nga ited kaniak ti Ama umayto kaniak, ket daydiay umay kaniak saankonto a pulos pagtalawen;+ 38  agsipud ta bimmabaak manipud langit+ tapno aramidek, saan a ti pagayatak, no di ket ti pagayatan daydiay nangibaon kaniak.+ 39  Daytoy ti pagayatan daydiay nangibaon kaniak, nga awan koma ti mapukawko manipud iti amin nga intedna kaniak no di ket pagungarek+ koma dayta iti kamaudianan nga aldaw. 40  Ta daytoy ti pagayatan ni Amak, a tunggal maysa a makakita iti Anak ken mangwatwat iti pammati kenkuana maaddaan koma iti agnanayon a biag,+ ket pagungarekto iti kamaudianan nga aldaw.”+ 41  Gapuna nangrugi nga agtanabutob kenkuana dagiti Judio agsipud ta kinunana: “Siak ti tinapay a bimmaba manipud langit”;+ 42  ket rinugianda a kinuna:+ “Saan aya a daytoy ni Jesus nga anak ni Jose,+ a ti ama ken inana am-ammotayo? Kasano nga ita kunaenna, ‘Bimmabaak manipud langit’?” 43  Kas sungbat kinuna kadakuada ni Jesus: “Sumardengkayo nga agtantanabutob iti nagbabaetanyo. 44  Awan ti tao a makaumay kaniak malaksid no ti Ama, a nangibaon kaniak, ti mangyasideg kenkuana;+ ket pagungarekto iti kamaudianan nga aldaw.+ 45  Adda a naisurat kadagiti Mammadto, ‘Ket sursuruanto amin ida ni Jehova.’+ Tunggal maysa a dimngeg iti Ama ken nakasursuro umay kaniak.+ 46  Saan a ti asinoman a tao nakitana ti Ama,+ malaksid daydiay naggapu iti Dios; daytoy ti nakakita iti Ama.+ 47  Pudno unay kunak kadakayo, Ti mamati addaan iti agnanayon a biag.+ 48  “Siak ti tinapay+ ti biag. 49  Dagidi ammayo kinnanda ti manna+ idiay let-ang ket kaskasdi a natayda. 50  Daytoy ti tinapay a bumaba manipud langit, iti kasta mabalin ti asinoman ti mangan iti dayta ket saan a matay. 51  Siak ti sibibiag a tinapay a bimmaba manipud langit; no ti asinoman mangan iti daytoy a tinapay isu agbiagto iti agnanayon; ket, iti kinapudnona, ti tinapay nga itedko isu ti lasagko+ maigapu iti biag ti lubong.”+ 52  Gapuna nangrugi a nagsusupiat dagiti Judio iti maysa ken maysa, a kunkunada: “Kasano a maited kadatayo daytoy a tao ti lasagna tapno kanentayo?” 53  Ngarud kinuna kadakuada ni Jesus: “Pudno unay kunak kadakayo, Malaksid no kanenyo ti lasag+ ti Anak ti tao ken inumenyo ti darana,+ awanankayo ti biag+ iti bagbagiyo. 54  Ti agtaraon iti lasagko ken uminum iti darak addaan iti agnanayon a biag, ket pagungarekto+ iti kamaudianan nga aldaw; 55  ta ti lasagko pudno a taraon, ken ti darak pudno nga inumen. 56  Ti agtaraon iti lasagko ken uminum iti darak agtalinaed a naikaykaysa kaniak, ket naikaykaysaak kenkuana.+ 57  No kasano a ti sibibiag+ nga Ama imbaonnak ken agbiagak gapu iti Ama, kasta met a ti agtaraon kaniak, uray dayta ket agbiagto gapu kaniak.+ 58  Daytoy ti tinapay a bimmaba manipud langit. Saan a kas idi nangan dagidi ammayo ket kaskasdi a natayda. Ti agtaraon iti daytoy a tinapay agbiagto nga agnanayon.”+ 59  Kinunana dagitoy a banag bayat a nangisursuro iti gimong iti publiko idiay Capernaum. 60  Gapuna adu kadagiti adalanna, idi nangngegda daytoy, kinunada: “Makapakigtot daytoy a sasao; siasino ti makapagimdeng iti dayta?”+ 61  Ngem ni Jesus, yantangay ammona iti bagina nga agtantanabutob dagiti adalanna maipapan itoy, kinunana kadakuada: “Itibkolnakay+ aya daytoy? 62  Ania, ngaruden, no makitayo ti Anak ti tao nga umul-uli sadiay ayanna idi?+ 63  Ti espiritu isu ti mangted-biag;+ ti lasag awan a pulos ti usarna. Ti sasao nga insaok kadakayo ket espiritu+ ken biag.+ 64  Ngem adda sumagmamano kadakayo a saan a mamati.” Ta manipud idi damo ammo ni Jesus no siasino dagidiay saan a mamati ken no siasino daydiay mangliput kenkuana.+ 65  Gapuna kinunana: “Daytoy ti makagapu a kinunak kadakayo, Awan ti makaumay kaniak malaksid no ipalubos kenkuana ti Ama.”+ 66  Maigapu itoy adu kadagiti adalanna ti napan iti bambanag a nalikudan+ ket saandan a makipagna kenkuana.+ 67  Gapuna kinuna ni Jesus iti sangapulo ket dua: “Kayatyo kadi met ti mapan?” 68  Simmungbat kenkuana ni Simon Pedro:+ “Apo, iti siasino ti papananminto?+ Addaanka iti sasao ti agnanayon a biag;+ 69  ket namatikami ken naammuanmi a sika Daydiay Santo ti Dios.”+ 70  Simmungbat kadakuada ni Jesus: “Saan kadi a pinilikayo a sangapulo ket dua?+ Kaskasdi a maysa kadakayo ti manangpardaya.”+ 71  Iti kinapudnona, isu agsasao idi maipapan ken Judas nga anak ni Simon Iscariote; ta daytoy a tao ti mangliputto+ kenkuana, nupay maysa kadagiti sangapulo ket dua.

Footnotes