Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Juan 5:1-47

5  Kalpasan dagitoy a banag adda idi piesta+ dagiti Judio, ket ni Jesus simmang-at idiay Jerusalem.  Ita idiay Jerusalem iti ruangan dagiti karnero+ adda maysa a ban-aw a naawagan iti Hebreo a Bethzatha, nga addaan lima a kolonada.  Kadagitoy siiidda ti maysa nga umariwekwek dagiti masakit, bulsek, pilay ken dagidiay addaan nagango a kamkameng.  ——  Ngem adda idi sadiay ti maysa a lalaki a masaksakit iti tallopulo ket walo a tawenen.  Idi makitana daytoy a lalaki a siiidda, ken yantangay ammona nga agsaksakit iti nabayagen a tiempo,+ kinuna kenkuana ni Jesus: “Kayatmo kadi a sumayaat ti salun-atmo?”+  Ti masaksakit a lalaki simmungbat kenkuana: “Apo, awananak iti tao a mangikabil kaniak iti ban-aw no makibur ti danum; ngem bayat nga um-umayak adda sabali a bumaba nga umun-una ngem siak.”  Kinuna kenkuana ni Jesus: “Bumangonka, bagkatem ta langkapim ket magnaka.”+  Iti kasta ti lalaki dagus a simmayaat ti salun-atna, ket binagkatna ti langkapina ket nangrugi a magna. Ita sabbath idi iti dayta nga aldaw.+ 10  Gapuna rinugian dagiti Judio a kunaen iti lalaki a naagasan: “Sabbath ita, ket di nainkalintegan+ nga awitem ta langkapi.” 11  Ngem insungbatna kadakuada: “Kinuna kaniak daydiay mismo a nangpasayaat iti salun-atko, ‘Bagkatem ta langkapim ket magnaka.’” 12  Inimtuodda kenkuana: “Siasino ti tao a nangibaga kenka, ‘Bagkatem dayta ket magnaka’?” 13  Ngem ti napaimbag a lalaki saanna nga ammo no siasino, ta nagpakni ni Jesus, gapu ta adda maysa a bunggoy iti dayta a lugar. 14  Kalpasan dagitoy a banag isu nasarakan ni Jesus idiay templo ket kinunana kenkuana: “Kitaem, simmayaaten ti salun-atmo. Dika agbasolen, tapno saan a mapasamak kenka ti maysa a banag a dakdakes.” 15  Pimmanaw ti lalaki ket imbagana kadagiti Judio a ni Jesus ti nangpasayaat iti salun-atna. 16  Iti kasta maigapu itoy dagiti Judio indadanesda+ ni Jesus, agsipud ta inar-aramidna dagitoy a banag kabayatan ti Sabbath. 17  Ngem insungbatna kadakuada: “Ni Amak agtultuloy nga agar-aramid agingga ita, ket agtultuloyak nga agar-aramid.”+ 18  Pudno unay, maigapu itoy, isu rinugian dagiti Judio nga ad-adda pay nga ikagumaan a papatayen,+ agsipud ta saanna laeng a sinalungasing ti Sabbath no di ket inawaganna pay ti Dios a bukodna nga Ama,+ a pagbalbalinenna ti bagina a makipada+ iti Dios. 19  Gapuna, kas sungbat, kinuna kadakuada ni Jesus: “Pudno unay kunak kadakayo, Ti Anak saanna a kabalinan nga aramiden ti maysa a banag iti bukodna a nakem, no di laeng ti makitana nga ar-aramiden ti Ama.+ Ta aniaman a bambanag ti aramiden Daydiay, dagitoy a banag ti aramiden met ti Anak iti umasping a pamay-an. 20  Ta ti Ama addaan panagayat iti Anak+ ket isu ipakitana kenkuana ti amin a bambanag nga aramidenna, ket mangipakitanto kenkuana iti ar-aramid a dakdakkel ngem dagitoy, tapno agsiddaawkayo.+ 21  Ta no kasano a ti Ama ibangonna dagiti natay ken pagbiagenna ida,+ kasta met a ti Anak pagbiagenna dagidiay kayatna.+ 22  Ta awan a pulos ukomen ti Ama, no di ket ti isuamin a panangukom impabiangna iti Anak,+ 23  tapno ti isuamin padayawanda ti Anak+ a kas iti panangpadayawda iti Ama. Ti di mangpadayaw iti Anak saanna a padayawan ti Ama a nangibaon kenkuana.+ 24  Pudno unay kunak kadakayo, Ti dumngeg iti saok ken mamati iti daydiay nangibaon kaniak addaan iti agnanayon a biag,+ ket saan nga umay iti pannakaukom no di ket bumallasiw manipud ken patay nga agturong iti biag.+ 25  “Pudno unay kunak kadakayo, Um-umayen ti oras, ket itan dayta, a dagiti natay+ mangngegdanto ti timek+ ti Anak ti Dios ket agbiagto dagidiay nangipangag.+ 26  Ta no kasano a ti Ama adda biag kenkuana met laeng,+ kasta met nga impaayna iti Anak a maaddaan biag kenkuana met laeng.+ 27  Ket inikkanna iti autoridad a mangukom,+ agsipud ta isu Anak ti tao.+ 28  Dikay agsiddaaw iti daytoy, agsipud ta um-umayen ti oras nga amin dagidiay adda kadagiti pakalaglagipan a tanem+ mangngegdanto ti timekna 29  ket rummuarda, dagidiay nagaramid iti naimbag a bambanag iti panagungar iti biag,+ dagidiay nangyugali iti nakadakdakes a bambanag iti panagungar iti pannakaukom.+ 30  Diak kabalinan nga aramiden ti maysa a banag iti bukodko a nakem; kas iti mangngegko, mangukomak; ket ti panangukom nga ipaayko nalinteg,+ agsipud ta sapulek, saan a ti bukodko a pagayatan, no di ket ti pagayatan+ daydiay nangibaon kaniak. 31  “No siak laeng ti mangsaksi+ maipapan ti bagik, ti pangsaksik saan a pudno.+ 32  Adda sabali a mangsaksi maipapan kaniak, ken ammok a pudno ti pangsaksina+ maipapan kaniak. 33  Nangibaonkayo kadagiti tattao ken Juan, ket sinaksianna ti kinapudno.+ 34  Nupay kasta, diak awaten ti pangsaksi nga aggapu iti tao, ngem kunaek dagitoy a banag tapno maisalakankayo.+ 35  Dayta a tao maysa idi a sumsumged ken agsilsilnag a pagsilawan, ket iti apagbiit a tiempo sitatallugodkayo nga agrag-o iti kasta unay iti lawagna.+ 36  Ngem addaanak iti pangsaksi a dakdakkel ngem iti pangsaksi ni Juan, ta ti mismo nga ar-aramid nga intuding kaniak ni Amak nga itungpalko, dagiti mismo a trabaho nga ar-aramidek,+ saksianda ti maipapan kaniak a ti Ama imbaonnak. 37  Kasta met, ti Ama a nangibaon kaniak sinaksianna a mismo ti maipapan kaniak.+ Saanyo a nangngeg ti timekna iti aniaman a tiempo wenno uray nakita ti langana;+ 38  ket saan nga agtaltalinaed kadakayo ti saona, agsipud ta daydiay mismo nga imbaonna saanyo a patien. 39  “Suksukimatenyo dagiti Kasuratan,+ agsipud ta pagarupenyo a babaen kadakuada maaddaankayto iti agnanayon a biag; ket dagitoy a mismo saksianda ti maipapan kaniak.+ 40  Ket kaskasdi a saanyo a kayat ti umay kaniak tapno maaddaankay koma iti biag.+ 41  Diak awaten ti dayag nga aggapu kadagiti tattao,+ 42  ngem pagaammok unay nga awan kadakayo ti ayat iti Dios.+ 43  Immayak iti nagan ni Amak,+ ngem saandak nga awaten; no adda sabali a dimteng iti bukodna a nagan, awatenyo dayta. 44  Kasano a mabalinyo ti mamati, idinto ta aw-awatenyo ti dayag+ manipud iti maysa ken maysa ket saanyo a sapsapulen ti dayag nga aggapu iti maymaysa a Dios?+ 45  Dikay pagarupen nga idarumkayto iti Ama; adda maysa a mangidarum kadakayo, ni Moises,+ a nangisaadanyo ti namnamayo. 46  Iti kinapudnona, no pinatiyo ni Moises patiendak koma, ta dayta a tao nagsurat maipapan kaniak.+ 47  Ngem no saanyo a patien dagiti surat dayta a tao,+ kasano a patienyonto ti sasaok?”

Footnotes