Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Juan 4:1-54

4  Itan, idi a naammuan ti Apo a dagiti Fariseo nangngegda a ni Jesus nangar-aramid ken nangbabautisar+ iti ad-adu nga adalan ngem ni Juan—  nupay, iti kinapudnona, ni Jesus a mismo saan a nangbabautisar no di ket dagiti adalanna—  pinanawanna ti Judea ket napan manen idiay Galilea.  Ngem nasken idi nga isu lumabas idiay Samaria.+  Ngarud dimteng iti maysa a siudad ti Samaria a maawagan Sicar iti asideg ti talon nga inted ni Jacob ken Jose nga anakna.+  Iti kinapudnona, adda sadiay ti bubon ni Jacob.+ Itan ni Jesus, a nabannog iti panagbaniagana, situtugaw a kastana idi iti bubon. Ti oras ket agarup maikanem.  Immay ti maysa a babai a taga Samaria tapno sumakdo iti danum. Kinuna kenkuana ni Jesus: “Ikkannak ti inumen.”  (Ta napan dagiti adalanna idiay siudad tapno gumatangda kadagiti pagtaraon.)  Gapuna kinuna kenkuana ti babai a Samaritana: “Kasano a sika, nupay maysaka a Judio, dumawatka kaniak iti inumen, idinto ta maysaak a babai a Samaritana?” (Ta saan a makilanglangen dagiti Judio kadagiti Samaritano.)+ 10  Kas sungbat kinuna kenkuana ni Jesus: “No naammuam koma ti awan bayadna a sagut+ ti Dios ken no siasino+ ti agkunkuna kenka, ‘Ikkannak ti inumen,’ nagdawatka koma kenkuana, ket inikkannaka koma iti nabiag a danum.”+ 11  Kinunana kenkuana: “Apo, awananka uray timba a pagsakdo iti danum, ket ti bubon nauneg. Manipud iti ania a gubuayan, ngarud, nga addaanka iti daytoy nabiag a danum? 12  Dakdakkelka+ aya ngem ni amami a Jacob, a nangited kadakami iti bubon ken isu a mismo agraman ti annakna ken ti an-animalna imminumda manipud iti dayta?” 13  Kas sungbat kinuna kenkuana ni Jesus: “Tunggal maysa nga umin-inum itoy a danum mawawto manen. 14  Siasinoman nga uminum manipud iti danum nga itedkonto kenkuana saanton a pulos mawaw,+ ngem ti danum nga itedkonto kenkuana agbalinto kenkuana nga ubbog ti danum+ nga agburburayok a mangipaay iti agnanayon a biag.”+ 15  Kinuna kenkuana ti babai: “Apo, ikkannak iti daytoy a danum, tapno iti kasta saanakon a mawaw wenno agtultuloy nga umay iti daytoy a lugar tapno sumakdo iti danum.” 16  Kinunana kenkuana: “Mapanka, ayabam ti asawam ket umaykayo iti daytoy a lugar.” 17  Kas sungbat kinuna ti babai: “Awan asawak.” Kinuna kenkuana ni Jesus: “Naimbag ti panangikunam, ‘Awan asawak.’ 18  Ta naaddaanka iti lima nga assawa, ket ti lalaki nga adda ita kenka saanmo nga asawa. Daytoy ket sinaom a sipupudno.” 19  Kinuna kenkuana ti babai: “Apo, makitak a maysaka a mammadto.+ 20  Nagdaydayaw dagidi ammami iti daytoy a bantay;+ ngem kunaenyo nga idiay Jerusalem ti lugar a rebbeng a pagdaydayawan dagiti tattao.”+ 21  Kinuna kenkuana ni Jesus: “Mamatika kaniak, babai, Um-umayen ti oras a saankayton nga agdayaw+ iti Ama iti daytoy a bantay wenno idiay Jerusalem.+ 22  Agdaydayawkayo iti saanyo nga am-ammo;+ agdaydayawkami iti am-ammomi, agsipud ta ti pannakaisalakan mamunganay kadagiti Judio.+ 23  Nupay kasta, um-umayen ti oras, ket itan dayta, a dagiti pudno a managdaydayaw agdayawdanto iti Ama buyogen ti espiritu+ ken kinapudno,+ ta, pudno unay, ti Ama sapsapulenna dagiti kasta nga agdayaw kenkuana.+ 24  Ti Dios maysa nga Espiritu,+ ket dagidiay agdaydayaw kenkuana masapul nga agdayawda a buyogen ti espiritu ken kinapudno.”+ 25  Kinuna kenkuana ti babai: “Ammok nga umay ti Mesias,+ a maawagan Kristo.+ Inton dumteng daydiay, sipapanayag nga ideklarananto kadatayo ti amin a bambanag.” 26  Kinuna kenkuana ni Jesus: “Siak nga agsasao kenka isu dayta.”+ 27  Ita iti daytoy a punto dimteng dagiti adalanna, ket nangrugida nga agsiddaaw agsipud ta nakisasao iti maysa a babai. Siempre, awan maysa a nagkuna: “Ania ti sapsapulem?” wenno, “Apay a makisasaoka kenkuana?” 28  Ti babai, ngarud, pinanawanna ti karambana ket napan idiay siudad ket imbagana kadagiti tattao: 29  “Umaykayo ditoy, kitaenyo ti maysa a tao a nangibaga kaniak ti amin a bambanag nga inaramidko. Saan ngata nga isu daytoy ti Kristo?”+ 30  Rimmuarda iti siudad ket rinugianda ti immay kenkuana. 31  Kabayatanna ginuyguyugoy dagiti adalan, a kunkunada: “Rabbi,+ manganka.” 32  Ngem kinunana kadakuada: “Adda taraonko a dikay ammo.” 33  Gapuna rinugian dagiti adalan a kunaen iti maysa ken maysa: “Adda aya nangyeg kenkuana iti aniaman a makan?” 34  Kinuna kadakuada ni Jesus: “Ti taraonko+ isu ti panangaramidko iti pagayatan+ daydiay nangibaon kaniak ken panangturposko iti trabahona.+ 35  Saan aya a kunayo nga adda pay uppat a bulan sakbay a dumteng ti panagani? Adtoy! Kunak kadakayo: Itannawagyo dagiti matayo ket matmatanyo dagiti talon, ta purawdan a maipaay iti pannakaani.+ Itan 36  ti managani umaw-awaten kadagiti tangdan ken agur-urnongen iti bunga a maipaay iti agnanayon a biag,+ iti kasta ti managmula+ ken ti managani makapagrag-oda nga agpadpada.+ 37  Iti daytoy a banag, kinapudnona, ti pagsasao pudno, Maysa ti managmula ket sabali ti managani. 38  Imbaonkayo tapno anienyo ti saanyo a nagbannogan. Dagiti sabali ti nagbannog,+ ket simrekkayo iti gunggona ti panagbannogda.” 39  Itan adu kadagiti Samaritano manipud iti dayta a siudad naaddaanda iti pammati+ kenkuana maigapu iti sao ti babai a nagkuna kas pangsaksi: “Imbagana kaniak ti amin a bambanag nga inaramidko.”+ 40  Gapuna idi immay kenkuana dagiti Samaritano, rinugianda a kiddawen kenkuana a makipagyan kadakuada; ket nagyan sadiay iti dua nga aldaw.+ 41  Gapu itoy ad-adu pay ti namati gapu iti kinunana,+ 42  ket rinugianda a kunaen iti babai: “Saankamin a mamati laeng gapu iti saom; ta dakami a mismo nangngegmi+ ket ammomi a daytoy a tao sigurado nga isu ti manangisalakan+ ti lubong.” 43  Kalpasan daydi dua nga aldaw pimmanaw sadiay a mapan idiay Galilea.+ 44  Ni Jesus a mismo, nupay kasta, sinaksianna a ti maysa a mammadto awan dayawna iti bukodna a pagtaengan a daga.+ 45  Ngarud, idi dimteng idiay Galilea, isu inawat dagiti taga Galilea, agsipud ta nakitada ti amin a bambanag nga inaramidna idiay Jerusalem iti piesta,+ ta napanda met iti piesta.+ 46  Iti kasta immay manen idiay Cana+ ti Galilea, a sadiay ti danum pinagbalinna nga arak.+ Ita adda maysa a katulongan ti ari a ti anakna a lalaki masakit idiay Capernaum.+ 47  Idi nangngeg daytoy a tao nga immay ni Jesus idiay Galilea manipud Judea, napan kenkuana ket rinugianna a kiniddaw kenkuana a sumalog ket paimbagenna ti anakna, ta dandanin matay. 48  Nupay kasta, kinuna kenkuana ni Jesus: “Malaksid no makakitakayo kadagiti pagilasinan+ ken datdatlag,+ saankayto a pulos mamati.” 49  Kinuna kenkuana ti katulongan ti ari: “Apo, sumalogka sakbay a matay ti anakko.” 50  Kinuna kenkuana ni Jesus: “Mapankan;+ agbiag ti anakmo.”+ Ti tao namati iti sao a sinao kenkuana ni Jesus ket napanen. 51  Ngem bayat a sumalsalogen isu sinabet dagiti adipenna tapno ibagada a sibibiag ti baritona.+ 52  Gapuna inimtuodna kadakuada ti oras a simmayaat ti salun-atna. Ngarud kinunada kenkuana: “Idi kalman iti maikapito nga oras pimmanaw kenkuana ti gurigor.”+ 53  Gapuna naammuan ti ama a dayta ket idi mismo nga oras+ a kinuna kenkuana ni Jesus: “Agbiag ti anakmo.” Ket isu ken ti intero a sangakabbalayanna namatida.+ 54  Manen daytoy idi ti maikadua a pagilasinan+ nga inaramid ni Jesus idi immay idiay Galilea manipud Judea.

Footnotes