Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Juan 20:1-31

20  Iti umuna nga aldaw+ ti lawas nasapa nga immay ni Maria Magdalena iti pakalaglagipan a tanem, bayat a nasipnget pay laeng, ket nakitana a naikkaten ti bato manipud iti pakalaglagipan a tanem.+  Gapuna nagtaray ket immay ken Simon Pedro ken iti daydi sabali nga adalan,+ a dinungdungngo ni Jesus, ket kinunana kadakuada: “Impanawda ti Apo manipud iti pakalaglagipan a tanem,+ ket saanmi nga ammo no sadino ti nangikabilanda kenkuana.”  Idin ni Pedro+ ken daydi sabali nga adalan rimmuarda ket nagturongda iti pakalaglagipan a tanem.  Wen, isuda a dua rinugianda ti tumaray; ngem daydi sabali nga adalan nagtaray a naparpartak nga inun-unaanna ni Pedro ket immuna a nakadanon iti pakalaglagipan a tanem.  Ket, idi nagrukob, nakitana dagiti patapat a nakadisso,+ ngem isu saan a simrek.  Idin ni Simon Pedro dimteng met a simmaruno kenkuana, ket simrek iti pakalaglagipan a tanem. Ket nakitana dagiti patapat a nakadisso,+  kasta met ti lupot nga adda idi iti rabaw ti ulona a saan a nakadisso a naitipon kadagiti patapat no di ket naisina a nalukot iti maysa a disso.  Iti dayta a tiempo, ngarud, simrek met daydi sabali nga adalan a nakagteng nga immun-una iti pakalaglagipan a tanem, ket nakitana ken namati.  Ta saanda pay a natarusan ti kasuratan nga isu masapul a bumangon manipud kadagiti natay.+ 10  Ket iti kasta nagsubli dagiti adalan kadagiti pagtaenganda. 11  Ni Maria, nupay kasta, nagtalinaed a sitatakder idiay ruar iti asideg ti pakalaglagipan a tanem, nga agsangsangit. Idin, bayat nga agsangsangit, nagrukob tapno kitaenna ti pakalaglagipan a tanem 12  ket nakitana ti dua nga anghel+ a nakapuraw nga agtugtugaw, maysa iti uluanan ken maysa iti sakaanan ti nakaipaiddaan ti bagi ni Jesus. 13  Ket kinunada kenkuana: “Babai, apay nga agsangsangitka?” Kinunana kadakuada: “Impanawda ni Apok, ket diak ammo no sadino ti nangikabilanda kenkuana.” 14  Kalpasan ti panangisaona kadagitoy a banag, timmaliaw iti likudan ket nakitana ni Jesus nga agtaktakder, ngem saanna a nailasin nga isu ni Jesus.+ 15  Kinuna kenkuana ni Jesus: “Babai, apay nga agsangsangitka? Siasino ti sapsapulem?”+ Yantangay impagarupna nga isu ti hardinero, kinunana kenkuana: “Apo, no innalam, ibagam kaniak no sadino ti nangikabilam kenkuana, ket alaekto.” 16  Kinuna kenkuana ni Jesus: “Maria!”+ Idi timmaliaw, kinunana kenkuana, iti Hebreo: “Rabboni!”+ (a kayatna a sawen “Mannursuro!”) 17  Kinuna kenkuana ni Jesus: “Isardengmo ti kumpet kaniak. Ta saanak pay nga immuli iti Ama. Ngem mapanka iti kakabsatko+ ket kunaem kadakuada, ‘Umuliak ken Amak+ ken Amayo ken iti Diosko+ ken Diosyo.’”+ 18  Immay ni Maria Magdalena ket inyegna ti damag kadagiti adalan: “Nakitak ti Apo!” ken kinunana kenkuana dagitoy a banag.+ 19  Gapuna, idi rumabiin iti dayta nga aldaw, ti umuna iti lawas,+ ken, nupay napunitan dagiti ridaw sadiay ayan dagiti adalan gapu iti panagbuteng+ kadagiti Judio, immay ni Jesus+ ket nagtakder iti tengngada ket kinunana kadakuada: “Maaddaankay koma iti talna.”+ 20  Ket kalpasan a naisaona daytoy agpadpada nga impakitana kadakuada dagiti imana ken ti bakrangna.+ Idin nagrag-o+ dagiti adalan iti pannakakitada iti Apo. 21  Ni Jesus, ngarud, kinunana kadakuada manen: “Maaddaankayo koma iti talna. Kas iti panangibaon kaniak ti Ama,+ kasta met nga ibaonkayo.”+ 22  Ket kalpasan a naisaona daytoy pimmuyot kadakuada ket kinunana kadakuada: “Awatenyo ti nasantuan nga espiritu.+ 23  No pakawanenyo ti basbasol ti asinoman a tattao,+ napakawandan kadakuada; no pagtalinaedenyo ti basbasol ti asinoman a tattao, mapagtalinaedda.”+ 24  Ngem ni Tomas,+ maysa kadagiti sangapulo ket dua, a naawagan Ti Singin, awan kadakuada idi immay ni Jesus. 25  Iti kasta ti dadduma nga adalan kunaenda kenkuana: “Nakitami ti Apo!” Ngem kinunana kadakuada: “Malaksid no makitak kadagiti imana ti nagdalanan dagiti lansa ket maiserrekko ti ramayko iti nagdalanan dagiti lansa ken maiserrekko ti imak iti bakrangna,+ pudno unay a saanakto a mamati.”+ 26  Ala ket, walo nga aldaw kalpasanna adda manen dagiti adalanna iti uneg, ket adda kadakuada ni Tomas. Immay ni Jesus, nupay napunitan dagiti ridaw, ket nagtakder iti tengngada ket kinunana: “Maaddaankay koma iti talna.”+ 27  Sumaganad kinunana ken Tomas: “Ikabilmo dagiti ramaymo ditoy, ket kitaem dagiti imak, ket iyegmo ta imam+ ket iserrekmo dayta iti bakrangko, ket sumardengka a di mamatpati no di ket mamatika.” 28  Kas sungbat kinuna kenkuana ni Tomas: “Apok ken Diosko!”+ 29  Kinuna kenkuana ni Jesus: “Gapu kadi ta nakitanak namatikan? Naragsak dagidiay saan a makakita ket kaskasdi a mamatida.”+ 30  Iti kinaagpaysuanna, nagaramid met ni Jesus iti adu a sabsabali pay a pagilasinan iti sanguanan dagiti adalan, a saan a naisurat iti daytoy a lukot.+ 31  Ngem naisurat dagitoy+ tapno patienyo koma a ni Jesus isu ti Kristo nga Anak ti Dios, ket, gapu iti panamati,+ maaddaankay iti biag babaen iti naganna.

Footnotes