Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Juan 16:1-33

16  “Sinaok kadakayo dagitoy a banag tapno saankay koma a maitibkol.+  Paruarendakayto dagiti tattao manipud iti sinagoga.+ Kinapudnona, um-umayen ti oras inton tunggal maysa a mangpapatay kadakayo pagarupennanto a nakaipaay iti sagrado a panagserbi iti Dios.+  Ngem aramidendanto dagitoy a banag agsipud ta saanda a naam-ammo uray ti Ama wenno siak.+  Nupay kasta, sinaok kadakayo dagitoy a banag tapno, inton dumteng ti orasda, malagipyo koma nga imbagak ida kadakayo.+ “Dagitoy a banag, nupay kasta, saanko nga imbaga kadakayo idi damo, agsipud ta addaak kadakayo.  Ngem ita mapanak iti daydiay nangibaon kaniak,+ ket kaskasdi awan maysa kadakayo ti mangimtuod kaniak, ‘Sadino ti papanam?’  Ngem agsipud ta dagitoy a banag sinaok kadakayo ti ladingit+ pinunnona ti puspusoyo.  Nupay kasta, ibagbagak kadakayo ti kinapudno, Agpaay a pagimbaganyo a pumanawak. Ta no saanak a pumanaw, saanto a pulos umay kadakayo ti katulongan;+ ngem no mapanak, isu ibaonkonto kadakayo.  Ket inton dumteng dayta isu mangipaayto iti makaallukoy a pammaneknek iti lubong maipapan iti basol ken maipapan iti kinalinteg ken maipapan iti panangukom:+  umuna unay, maipapan iti basol,+ agsipud ta saanda a watwatwaten ti pammati kaniak;+ 10  kalpasanna maipapan iti kinalinteg,+ agsipud ta mapanak iti Ama ket dakayo saandakton a makita; 11  kalpasanna maipapan iti panangukom,+ agsipud ta naukomen ti agturay daytoy a lubong.+ 12  “Adu pay a banag ti sawek kadakayo, ngem saanyo a kabaelan nga awiten ida iti agdama.+ 13  Nupay kasta, inton dumteng dayta, ti espiritu ti kinapudno,+ idalannakayto iti isuamin a kinapudno, ta saanto nga agsao iti bukodna a pannakatignay, no di ket sawennanto ti bambanag a mangngegna, ket ideklarananto kadakayo ti bambanag nga um-umay.+ 14  Ipadayagnakto dayta,+ agsipud ta umawatto manipud iti kukuak ket ideklarananto dayta kadakayo.+ 15  Amin a bambanag nga adda iti Ama ket kukuak.+ Dayta ti makagapu a kinunak nga isu umawat manipud iti kukuak ket ideklarana dayta kadakayo. 16  Iti bassit a kanito saandakton a makita,+ ket, manen, iti bassit a kanito makitadakto.” 17  Gapuna sumagmamano kadagiti adalanna kinunada iti maysa ken maysa: “Ania ti kaipapanan daytoy a kunana kadatayo, ‘Iti bassit a kanito saandakton a makita, ket, manen, iti bassit a kanito makitadakto,’ ken, ‘agsipud ta mapanak iti Ama’?” 18  Gapuna kinunkunada: “Ania ti kaipapananna daytoy a kunana, ‘bassit a kanito’? Saantay nga ammo no ania ti sarsaritaenna.” 19  Ammo ni Jesus+ a kayatda ti agsaludsod kenkuana, gapuna kinunana kadakuada: “Agiinnimtuodkayo aya maipapan iti daytoy, agsipud ta kinunak, Iti bassit a kanito saandakton a makita, ket, manen, iti bassit a kanito makitadakto? 20  Pudno unay kunak kadakayo, Agsangit ken agdung-awkayto, ngem agrag-onto ti lubong; agladingitkayto,+ ngem ti ladingityo mapagbalinto a rag-o.+ 21  Ti maysa a babai, no agpaspasngay, addaan ladingit, agsipud ta dimtengen ti orasna;+ ngem no maipasngaynan ti ubing, saannan a malagip ti rigat gapu iti rag-o a nayanak ti maysa a tao iti lubong. 22  Ngarud, dakayo met ita, iti kinapudnona, addaankayo iti ladingit; ngem makitakayto manen ket agrag-onto dagiti pusoyo,+ ket ti rag-oyo awanto ti mangikkat manipud kadakayo. 23  Ket iti dayta nga aldaw+ awanto a pulos ti saludsod nga iyimtuodyo kaniak. Pudno unay kunak kadakayo, No dumawatkayo iti Ama iti aniaman a banag+ itednanto dayta kadakayo iti naganko.+ 24  Agingga itoy agdama a tiempo saankayo a dimmawat iti maysa a banag iti naganko. Dumawatkayo ket umawatkayto, tapno maan-anay koma ti rag-oyo.+ 25  “Sinaok kadakayo dagitoy a banag kadagiti panangidilig.+ Um-umayen ti oras inton saanakon nga agsao kadakayo kadagiti panangidilig, ngem ipakaammokto kadakayo buyogen ti kinalawag maipapan iti Ama. 26  Iti dayta nga aldaw dumawatkayto iti naganko, ket saanko a kunaen kadakayo nga agkiddawakto iti Ama maipapan kadakayo. 27  Ta ti Ama a mismo addaan panagayat kadakayo, agsipud ta naaddaankayo iti panagayat kaniak+ ken namatikayo nga immayak kas pannakabagi ti Ama.+ 28  Naggapuak iti Ama ket immayak iti lubong. Kanayonanna, panawak ti lubong ket mapanak iti Ama.”+ 29  Kinuna dagiti adalanna: “Kitaem! Ita agsasaokan a silalawag, ket awanen ti isasaom a panangidilig. 30  Ita ammomi nga ammom amin a bambanag+ ket saanmo a kasapulan a saludsodannaka ti asinoman.+ Babaen iti daytoy mamatikami a naggapuka iti Dios.”+ 31  Simmungbat kadakuada ni Jesus: “Mamatikayo kadi ita? 32  Adtoy! Um-umayen ti oras, kinapudnona, dimtengen dayta, inton maiwarawarakayo tunggal maysa iti bukodna a balay+ ket baybay-andakto nga agmaymaysa; ket kaskasdi a saanak nga agmaymaysa, agsipud ta adda kaniak ti Ama.+ 33  Sinaok kadakayo dagitoy a banag tapno babaen kaniak maaddaankayo koma iti talna.+ Iti lubong addaankayo iti rigat, ngem bumilegkayo! Pinarmekko ti lubong.”+

Footnotes