Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Juan 11:1-57

11  Ita adda idi maysa a lalaki a masakit, ni Lazaro a taga Betania, iti purok ni Maria ken ni Marta+ a kabsatna.  Iti kinapudnona, isu daydi Maria a nangsapsapo iti Apo iti bangbanglo a lana+ ken nangpunas a nangpamaga kadagiti sakana babaen iti buokna,+ a ti kabsatna a Lazaro masakit idi.  Gapuna ti kakabsatna a babbai nangipatulodda kenkuana iti sao, a kunkunada: “Apo, kitaem! masakit daydiay dungdungnguem.”+  Ngem idi nangngeg ni Jesus dayta kinunana: “Daytoy a sakit ket saan nga ipapatay ti panggepna, no di ket maipaay iti dayag ti Dios,+ tapno ti Anak ti Dios maipadayag babaen iti dayta.”  Ita ni Jesus inayatna ni Marta ken ti kabsatna a babai ken ni Lazaro.  Nupay kasta, idi nangngegna a masakit, iti kasta nagtalinaed pay iti dua nga aldaw iti lugar nga ayanna idi.  Idin kalpasan daytoy kinunana kadagiti adalanna: “Mapantayo manen idiay Judea.”  Kinuna kenkuana dagiti adalan: “Rabbi,+ itay laeng nabiit inkagkagumaandaka nga uboren+ dagiti taga Judea, ket mapanka aya manen sadiay?”  Simmungbat ni Jesus: “Saan kadi nga adda sangapulo ket dua nga oras iti lawag ti aldaw? No ti asinoman magna iti lawag ti aldaw+ isu saan a maidungpar iti aniaman a banag, agsipud ta makitana ti lawag daytoy a lubong. 10  Ngem no ti asinoman magna iti rabii,+ isu maidungpar iti maysa a banag, agsipud ta awan kenkuana ti lawag.” 11  Sinaona dagitoy a banag, ket kalpasan daytoy kinunana kadakuada: “Ni Lazaro a gayyemtayo napan naginana, ngem agbaniagaak sadiay tapno riingek manipud pannaturogna.”+ 12  Gapuna kinuna kenkuana dagiti adalan: “Apo, no isu napan naginana, umimbagto.” 13  Nupay kasta, nagsao ni Jesus maipapan ti ipapatayna. Ngem impagarupda a nagsasao maipapan ti panaginana iti pannaturog. 14  Iti dayta a tiempo, ngarud, sipaprangka a kinuna kadakuada ni Jesus: “Ni Lazaro natayen,+ 15  ket agrag-oak gapu kadakayo ta awanak sadiay, tapno mamatikayo. Ngem mapantayo kenkuana.” 16  Gapuna ni Tomas, a naawagan Ti Singin, kinunana kadagiti padana nga adalan: “Mapantayo met, tapno mataytayo a maikanunong kenkuana.”+ 17  Iti kasta idi dimteng ni Jesus, nasarakanna nga uppat nga aldawnan iti pakalaglagipan a tanem.+ 18  Ita ti Betania adda idi iti asideg ti Jerusalem a ti kaadayona ket agarup tallo a kilometro. 19  Mayanatup unay adu kadagiti Judio ti immay kada Marta ken Maria tapno liwliwaenda+ ida maipapan ti kabsatda. 20  Gapuna ni Marta, idi nangngegna nga um-umayen ni Jesus, simmabat kenkuana; ngem ni Maria+ nagtalinaed a situtugaw idiay pagtaengan. 21  Gapuna ni Marta kinunana ken Jesus: “Apo, no addaka koma idi ditoy saan koma a natay ti kabsatko.+ 22  Ngem nupay kasta iti agdama ammok nga amin a bambanag a dawatem iti Dios,+ itdento kenka ti Dios.” 23  Kinuna kenkuana ni Jesus: “Bumangonto ni kabsatmo.”+ 24  Kinuna kenkuana ni Marta: “Ammok a bumangonto inton panagungar+ iti kamaudianan nga aldaw.” 25  Kinuna kenkuana ni Jesus: “Siak ti panagungar ken ti biag.+ Ti mangwatwat iti pammati kaniak, uray no matay, agbiagto;+ 26  ket tunggal maysa a sibibiag ken mangwatwat iti pammati kaniak saanto a pulos matay.+ Patiem kadi daytoy?” 27  Kinunana kenkuana: “Wen, Apo; namatiak a sika ti Kristo nga Anak ti Dios, Daydiay umay iti lubong.”+ 28  Ket idi naisaonan daytoy, napan ket inayabanna ni Maria a kabsatna, a sililimed a kunkunana: “Adda ti Mannursuro+ ket ay-ayabannaka.” 29  Ti naud-udi a nadakamat, idi nangngegna daytoy, timmakder a sidadaras ket napan kenkuana. 30  Iti kinapudnona, saan pay a dimteng ni Jesus iti purok, no di ket adda pay laeng iti lugar a nangsabatan kenkuana ni Marta. 31  Gapuna dagiti Judio a kaduana idi iti balay+ ken nangliwliwa kenkuana, idi makitada a ni Maria timmakder a sidadaras ket rimmuar, sinurotda, nga impapanda a mapan idiay pakalaglagipan a tanem+ tapno agsangit sadiay. 32  Ket ngarud ni Maria, idi dimteng iti ayan ni Jesus ket nakitana, nagruknoy iti sakaananna, a kunkunana kenkuana: “Apo, no addaka koma idi ditoy, saan koma a natay ti kabsatko.”+ 33  Ni Jesus, ngarud, idi nakitana nga isu agsangsangit ket dagiti Judio nga immay a nakikuyog kenkuana agsangsangitda, nagsennaay iti espirituna ket nariribukan;+ 34  ket kinunana: “Sadino ti nangikabilanyo kenkuana?” Kinunada kenkuana: “Apo, umayka ket kitaem.” 35  Nagarubos dagiti lua+ ni Jesus. 36  Gapuna rinugian a kunaen dagiti Judio: “Kitaenyo, anian a panangdungngona kenkuana!”+ 37  Ngem sumagmamano kadakuada ti nagkuna: “Saan aya a daytoy a tao a nanglukat kadagiti mata+ daydi bulsek a lalaki nabaelanna koma a lapdan daytoy manipud ipapatay?” 38  Gapuna ni Jesus, kalpasan a nagsennaay manen iti unegna, dimteng iti pakalaglagipan a tanem.+ Iti kinapudnona, maysa dayta a rukib, ket maysa a bato+ ti nakaserra iti dayta. 39  Kinuna ni Jesus: “Ikkatenyo ti bato.”+ Ni Marta, ti kabsat ti pimmusay, kinunana kenkuana: “Apo, itan nabuyoken, ta uppat nga aldawen.” 40  Kinuna kenkuana ni Jesus: “Saanko aya nga imbaga kenka a no mamatika makitam ti dayag ti Dios?”+ 41  Gapuna inikkatda ti bato. Ita intangad ni Jesus dagiti matana sadi langit+ ket kinunana: “Ama, agyamanak kenka ta dinengngegnak.+ 42  Pudno, ammok a kankanayon a denggennak; ngem maigapu iti bunggoy+ nga agtaktakder iti aglawlaw nagsaoak, tapno patienda koma nga imbaonnak.”+ 43  Ket idi naisaonan dagitoy a banag, nagpukkaw iti natbag a timek: “Lazaro, rummuarka!”+ 44  Ti tao a natayen rimmuar a dagiti saka ken im-imana sipapatapat kadagiti bedbed,+ ket ti rupana napatapatan iti lupot. Kinuna kadakuada ni Jesus: “Warwaranyo ket bay-anyo a mapan.” 45  Gapuna adu kadagiti Judio nga immay ken Maria ken nakakita iti inaramidna naaddaanda iti pammati kenkuana;+ 46  ngem sumagmamano kadakuada ti napan kadagiti Fariseo ket imbagada kadakuada ti bambanag nga inaramid ni Jesus.+ 47  Iti kasta ti panguluen a papadi ken dagiti Fariseo inurnongda a sangsangkamaysa ti Sanhedrin+ ket rinugianda a kunaen: “Ania ti aramidentayo, agsipud ta daytoy a tao agar-aramid iti adu a pagilasinan?+ 48  No isu baybay-antayo a kastoy, maaddaandanto amin iti pammati kenkuana,+ ket umayto dagiti Romano+ ket ikkatendanto agpadpada ti lugartayo+ ken ti nasiontayo.” 49  Ngem ti maysa kadakuada, ni Caifas, a nangato a padi iti dayta a tawen,+ kinunana kadakuada: “Awan a pulos ti aniaman nga ammoyo, 50  ket dikay pampanunoten a pagimbaganyo a matay ti maysa a tao+ maigapu kadagiti umili ket saan a madadael ti intero a nasion.”+ 51  Daytoy, nupay kasta, saanna a kinuna iti bukodna a parnuay; no di ket agsipud ta isu ti nangato a padi iti dayta a tawen, impadtona a ni Jesus naikeddeng a matay maipaay iti nasion, 52  ket saan a maipaay iti nasion laeng, no di ket tapno ti annak ti Dios a naiwarawara+ maurnongna met a pagmaymaysaen.+ 53  Gapuna manipuden iti dayta nga aldaw nagnunumuanda nga isu papatayenda.+ 54  Gapuna ni Jesus saanen a nagpagpagna a silalatak+ iti tengnga dagiti Judio,+ no di ket pimmanaw sadiay a nagturong iti pagilian nga asideg iti let-ang, iti siudad a naawagan Efraim,+ ket sadiay nagtalinaed a kadua dagiti adalan. 55  Ita asideg idin ti paskua+ dagiti Judio, ket adu a tattao manipud iti pagilian ti simmang-at idiay Jerusalem sakbay ti paskua tapno dalusanda ti bagbagida babaen iti seremonia.+ 56  Gapuna sinapsapulda ni Jesus ket kunaenda iti maysa ken maysa bayat a nagtaktakderda iti aglawlaw idiay templo: “Ania ti kapanunotanyo? A saanto a pulos umay iti piesta?” 57  Kas iti sigud, ti panguluen a papadi ken dagiti Fariseo nangtedda kadagiti bilin a no adda asinoman a makaammo no sadino ti ayanna, ibutaktakna koma dayta, tapno isu makemmegda.

Footnotes