Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Juan 1:1-51

1  Idi punganay+ adda ti Sao,+ ket ti Sao adda a kadua ti Dios,+ ket ti Sao maysa a dios.+  Daytoy ket adda idi punganay+ a kadua ti Dios.+  Napaadda ti amin a bambanag babaen kenkuana,+ ket no isu awan saan a napaadda ti uray maysa a banag. Ti napaadda  babaen kenkuana isu ti biag,+ ket ti biag isu idi ti silaw+ dagiti tattao.  Ket ti silaw agsilsilnag iti sipnget,+ ngem saan a naringbawan dayta ti sipnget.  Dimteng ti maysa a lalaki a naibaon kas pannakabagi ti Dios:+ ti naganna ket Juan.+  Daytoy a lalaki immay a kas pangsaksi,+ tapno saksianna ti maipapan ti silaw,+ tapno amin a kita ti tattao mamatida koma babaen kenkuana.+  Saan nga isu idi dayta a silaw,+ no di ket nairanta a mangsaksi+ iti maipapan iti dayta a silaw.  Ti pudno a silaw+ a mangted lawag+ iti tunggal kita ti tao+ dandanin umay iti lubong. 10  Isu adda idi iti lubong,+ ket ti lubong napaadda babaen kenkuana,+ ngem saan nga am-ammo ti lubong. 11  Immay iti bukodna a pagtaengan, ngem saan nga inawat dagiti mismo a kailianna.+ 12  Nupay kasta, kadagiti amin nga immawat kenkuana,+ nangted kadakuada iti autoridad nga agbalin nga annak ti Dios,+ agsipud ta winatwatwatda ti pammati iti naganna;+ 13  ken nayanakda, saan a manipud iti dara wenno manipud iti nainlasagan a pagayatan wenno manipud iti pagayatan ti tao, no di ket manipud iti Dios.+ 14  Gapuna ti Sao nagbalin a lasag+ ken nakipagnaed kadatayo, ket naimatangantayo ti dayagna, maysa a dayag a kas iti kukua ti maysa a bugbugtong nga anak+ manipud iti maysa nga ama; ket napno iti di kaikarian a kinamanangngaasi ken kinapudno.+ 15  (Sinaksian ni Juan ti maipapan kenkuana, wen, nagikkis pay ketdi—isu daytoy ti nangisao iti dayta—a kunkunana: “Daydiay um-umay iti likudak immun-una iti sanguanak, agsipud ta naadda nga immun-una ngem siak.”)+ 16  Ta immawattayo amin manipud iti kinanaan-anayna,+ ti mismo a di kaikarian a kinamanangngaasi a mainayon iti di kaikarian a kinamanangngaasi.+ 17  Agsipud ta ti Linteg naited baeten ken Moises,+ ti di kaikarian a kinamanangngaasi+ ken ti kinapudno+ dimteng baeten ken Jesu-Kristo. 18  Awan ti tao a nakakita iti Dios uray kaano;+ ti bugbugtong a dios+ nga adda iti saklot a saad+ iti Ama isu ti nangilawlawag kenkuana.+ 19  Ita daytoy ti pangsaksi ni Juan idi a dagiti Judio nangibaonda kenkuana iti papadi ken kadagiti Levita manipud Jerusalem tapno imtuodenda kenkuana: “Siasinoka?”+ 20  Ket impudnona ken saanna nga inlibak, no di ket impudnona: “Saan a siak ti Kristo.”+ 21  Ket inimtuodda kenkuana: “Ania, ngarud? Sika kadi ni Elias?”+ Ket kinunana: “Saan a siak.” “Sika kadi Ti Mammadto?”+ Ket simmungbat: “Saan!” 22  Gapuna kinunada kenkuana: “Siasinoka? tapno makaitedkami ti sungbat kadagidiay nangibaon kadakami. Ania ti maikunam maipapan iti bagim?”+ 23  Kinunana: “Maysaak a timek ti maysa a mangipukpukkaw idiay let-ang, ‘Palintegenyo ti dalan ni Jehova,’ kas iti kinuna ni Isaias a mammadto.”+ 24  Ita dagidiay naibaon naggapuda kadagiti Fariseo. 25  Gapuna sinaludsodanda ket kinunada kenkuana: “Apay, ngarud, a mangbautisarka+ no saan a sika ti Kristo wenno ni Elias wenno Ti Mammadto?” 26  Ni Juan simmungbat kadakuada, a kunkunana: “Mangbautisarak iti danum. Iti tengngayo+ adda maysa nga agtaktakder a saanyo nga am-ammo,+ 27  daydiay um-umay iti likudak, ngem ti galut ti pallokana saanak a maikari a mangwarwar.”+ 28  Naaramid dagitoy a banag idiay Betania iti ballasiw ti Jordan, a pangbabautisaran ni Juan.+ 29  Iti sumaganad nga aldaw nakitana ni Jesus nga um-umay nga agturong kenkuana, ket kinunana: “Kitaenyo, ti Kordero+ ti Dios a mangikkat iti basol+ ti lubong!+ 30  Daytoy daydiay a maipapan kenkuana kinunak, Iti likudak umay ti maysa a tao nga immun-una iti sanguanak, agsipud ta naadda nga immun-una ngem siak.+ 31  Uray pay saanko a naam-ammo, ngem ti rason no apay nga immayak mangbautisar iti danum ket tapno isu maiparangarang koma iti Israel.”+ 32  Sinaksian met ni Juan, a kunkunana: “Naimatangak ti espiritu a bumabbaba a kas kalapati manipud langit, ket nagtalinaed kenkuana.+ 33  Uray pay saanko a naam-ammo, ngem Daydiay mismo a nangibaon kaniak+ tapno mangbautisarak iti danum kinunana kaniak, ‘Siasinoman dayta makitam a bumabbabaan ken pagtalinaedan ti espiritu, isu daytoy ti mangbautisar iti nasantuan nga espiritu.’+ 34  Ket nakitak dayta, ken sinaksiak a daytoy isu ti Anak ti Dios.”+ 35  Manen iti sumaganad nga aldaw agtaktakder ni Juan agraman ti dua kadagiti adalanna, 36  ket idi a kimmita ken Jesus a magmagna kinunana: “Kitaenyo, ti Kordero+ ti Dios!” 37  Ket ti dua nga adalan nangngegda a nagsao, ket simmurotda ken Jesus. 38  Idin timmaliaw ni Jesus ket, idi makitana ida a sumursurot, kinunana kadakuada: “Ania ti sapsapulenyo?” Kinunada kenkuana: “Rabbi, (kayatna a sawen, no maipatarus, Mannursuro,) sadino ti paggigianam?” 39  Kinunana kadakuada: “Umaykayo, ket makitayonto.”+ Iti kasta napanda ket nakitada no sadino ti paggigiananna, ket nakipagyanda kenkuana iti dayta nga aldaw; agarup maikasangapulo nga oras idi. 40  Ni Andres+ a kabsat ni Simon Pedro ket maysa kadagiti dua a nakangngeg iti kinuna ni Juan ken simmurot ken Jesus. 41  Umuna nasarakan daytoy a tao ti bukodna a kabsat, ni Simon, ket kinunana kenkuana: “Nasarakanmi ti Mesias”+ (kayatna a sawen, no maipatarus, Kristo).+ 42  Isu inturongna ken Jesus. Idi a minatmatan ni Jesus+ kinunana: “Sika ni Simon+ nga anak ni Juan;+ maawagankanto iti Cefas” (a naipatarus a Pedro).+ 43  Iti sumaganad nga aldaw tinarigagayanna ti pumanaw a mapan idiay Galilea. Gapuna ni Jesus nasarakanna ni Felipe+ ket kinunana kenkuana: “Agbalinka a pasurotko.”+ 44  Ita ni Felipe naggapu idiay Betsaida,+ manipud iti siudad da Andres ken Pedro. 45  Ni Felipe nasarakanna ni Natanael+ ket kinunana kenkuana: “Nasarakanmi daydiay nga iti Linteg,+ ni Moises ken dagiti Mammadto+ insuratda, ni Jesus, ti anak ni Jose,+ a taga Nazaret.” 46  Ngem kinuna kenkuana ni Natanael: “Mabalin aya a tumaud manipud Nazaret ti aniaman a banag a naimbag?”+ Kinuna kenkuana ni Felipe: “Umayka ket kitaem.” 47  Ni Jesus nakitana ni Natanael nga um-umay nga agturong kenkuana ket kinunana maipapan kenkuana: “Kitaenyo, sigurado a maysa nga Israelita, a kenkuana awan ti allilaw.”+ 48  Kinuna kenkuana ni Natanael: “Kasano a sika am-ammonak?” Kas sungbat kinuna kenkuana ni Jesus: “Sakbay nga inayabannaka ni Felipe, bayat nga addaka iti sirok ti kayo a higos, nakitaka.” 49  Simmungbat kenkuana ni Natanael: “Rabbi, sika ti Anak ti Dios,+ sika ti Ari+ ti Israel.” 50  Kas sungbat kinuna kenkuana ni Jesus: “Gapu aya ta imbagak kenka a nakitaka iti sirok ti kayo a higos isu a mamatika? Makakitakanto iti bambanag a dakdakkel ngem dagitoy.” 51  Kinunana pay kenkuana: “Pudno unay kunak kadakayo, Makitayonto ti langit a maluktan ken dagiti anghel+ ti Dios nga umul-uli ken bumabbaba a mapan iti Anak ti tao.”+

Footnotes