Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Josue 8:1-35

8  Idin ni Jehova kinunana ken Josue: “Dika agbuteng wenno agkullayaw.+ Alaem a kumuyog kenka amin dagiti tattao ti gubat ket tumakderka, sumang-atka idiay Ai. Kitaem, intedko ita imam ti ari ti Ai ken dagiti umilina ken ti siudadna ken ti dagana.+  Ket masapul nga aramidem iti Ai ken iti arina ti kas ti inaramidmo iti Jerico ken iti arina.+ Isuna laeng ta mabalinyo a samsamen ti ginam-udna ken dagiti naamo nga animalna maipaay kadakayo.+ Mangisaadka iti pagsanebmo a maibusor iti siudad iti likudanna.”+  Iti kasta timmakder ni Josue ken amin dagiti tattao+ ti gubat tapno sumang-atda idiay Ai, ket ni Josue pimmili iti tallopulo a ribu a lallaki, dagidiay mamaingel a nabileg,+ ket imbaonna ida iti rabii.  Ket binilinna ida, a kunkunana: “Kitaenyo, agsanebkayo+ a maibusor iti siudad iti likudan ti siudad. Dikay umad-adayo unay iti siudad, ket dakayo amin masapul nga agtalinaedkayo a sisasagana.  No maipapan kaniak ken iti amin a tattao a kimmuyog kaniak, umasidegkamto iti siudad. Ket mapasamakto a, no kas pagarigan rummuarda a sumabet kadakami kas idi damo,+ iti kasta agtalawkamto iti sanguananda.  Ket rummuardanto a sumurot kadakami agingga a mayadayomi ida iti siudad, ta kunadanto, ‘Agtaltalawda iti sanguanantayo kas idi damo.’+ Ket masapul nga agtalawkami iti sanguananda.  Kalpasanna dakayo—tumakderkayto iti pagsaneban, ket masapul a tagikuaenyo ti siudad; ket ni Jehova a Diosyo sigurado nga itednanto dayta kadagita imayo.+  Ket mapasamakto nga apaman a naalayon ti siudad, rebbeng nga uramenyo ti siudad.+ Rebbeng nga aramidenyo ti maitunos iti sao ni Jehova. Kitaenyo, siak imbilinko kadakayo.”+  Kalpasan dayta imbaon ida ni Josue ket nagmartsada nga agturong iti pagsaneban ket nagkuartelda iti nagbaetan ti Bethel ken Ai iti laud ti Ai, bayat a nagtultuloy a nagdagus ni Josue iti dayta a rabii iti tengnga dagiti umili. 10  Idin ni Josue bimmangon a nasapa iti bigat+ ket sinukimatna dagiti umili ket simmang-atda, isu ken dagiti lallakay ti Israel, iti sanguanan dagiti umili agingga idiay Ai. 11  Ket amin dagiti tattao ti gubat+ a kimmuyog kenkuana simmang-atda, tapno makaasidegda ken makagtengda iti sanguanan ti siudad, ket nagpakarsoda iti amianan ti Ai, a ti ginget adda iti nagbaetanda ken ti Ai. 12  Kabayatanna isu nangala iti agarup lima ribu a lallaki ket insaadna ida a kas pagsaneb+ iti nagbaetan ti Bethel+ ken Ai, iti laud ti siudad. 13  Iti kasta dagiti umili impasdekda ti kangrunaan a pakarso nga adda iti agpaamianan ti siudad+ ken ti adayo a likudan dayta nga adda iti agpalaud ti siudad,+ ket ni Josue napan iti tengnga ti nababa a tanap bayat dayta a rabii. 14  Ket naaramid nga, apaman a nakita dayta ti ari ti Ai, iti kasta dagiti lallaki ti siudad nagdardarasda ket bimmangonda a nasapa ket rimmuarda tapno sabtenda ti Israel iti bakal, isu ken amin a tattaona, iti naituding a tiempo, iti sanguanan ti desierto a tanap. No maipapan kenkuana, saanna nga ammo nga adda panagsaneb a maibusor kenkuana iti likudan ti siudad.+ 15  Idi a ni Josue ken ti intero nga Israel nagsagabada iti pannakakabil iti sanguananda,+ iti kasta nagtalawda a dumalan iti let-ang.+ 16  Iti kasta dagiti amin nga umili nga adda iti siudad naayabanda tapno kumamatda kadakuada, ket kinamkamatda ni Josue ket nayadayoda iti siudad.+ 17  Ket awan ti lalaki a nabati iti Ai ken Bethel a saan a rimmuar a nangsurot iti Israel, iti kasta pinanawanda ti siudad a nakalukat a silalayang ket kinamkamatda ti Israel. 18  Ni Jehova kinunana itan ken Josue: “Iyunnatmo ta gayang nga adda ita imam iti turong iti Ai,+ ta itedkonto dayta ita imam.”+ Iti kasta inyunnat ni Josue ti gayang nga adda iti imana iti turong ti siudad. 19  Ket ti agsaneb rimkuas a madagdagus iti lugarna, ket nangrugida nga agtaray apaman nga inyunnatna ti imana, ket sinerrekda ti siudad ket kinautiboda.+ Kalpasanna nagdardarasda ket inuramda ti siudad.+ 20  Ket dagiti lallaki ti Ai nagbaw-ingda ken kimmitada, ket sadiay ti asuk ti siudad nagpangato iti langlangit, ket saanda idi a nabaelan ti agtalaw iti daytoy a dalan wenno iti dayta. Ket dagiti tattao nga agtaltalaw nga agturong iti let-ang bimmaw-ingda kadagiti agkamkamat. 21  Ket ni Josue ken ti intero nga Israel nakitada a ti agsaneb+ nakautibona ti siudad, ken ti asuk ti siudad nagpangato, ket iti kasta nagbueltada ket pinapatayda dagiti lallaki ti Ai. 22  Ket dagitoy dadduma rimmuarda iti siudad tapno sumabetda kadakuada, iti kasta naaddada iti nagbaetan ti Israel, dagitoy iti daytoy a sikigan ken dagidiay iti dayta a sikigan, ket pinapatayda ida agingga nga awan nabati kadakuada uray maysa a nakalasat wenno maysa a nakatalaw.+ 23  Ket ti ari+ ti Ai natiliwda a sibibiag ket inyasidegda ken Josue. 24  Ket naaramid a bayat a lepleppasen ti Israel ti panangpapatay kadagiti amin nga agnanaed iti Ai idiay tay-ak, iti let-ang a nangkamatanda kadakuada, nagtultuloy a napasagda, isuda amin, babaen ti tadem ti kampilan agingga a dimtengda iti pagnguduanda. Kalpasan dayta ti intero nga Israel nagsublida iti Ai ket kinabilda dayta babaen ti tadem ti kampilan. 25  Ket amin dagidiay napasag iti dayta nga aldaw, manipud iti lalaki agingga iti babai, nagdagupda iti sangapulo ket dua a ribu, amin dagiti umili ti Ai. 26  Ket saan nga insanud ni Josue ti imana a pinangyunnatna iti gayang+ agingga a naipaayna amin dagiti agnanaed ti Ai iti pannakadadael.+ 27  Dagiti laeng naamo nga animal ken ti ginam-ud dayta a siudad ti sinamsam ti Israel maipaay iti bagbagida, maitunos iti sao ni Jehova nga impasdekna kas bilin ken Josue.+ 28  Idin ni Josue pinuoranna ti Ai ket pinagbalinna a munturod a di nakedngan ti kapautna,+ kas maysa a langalang agingga itoy nga aldaw. 29  Ket imbitayna ti ari ti Ai+ iti kayo agingga iti tiempo ti rabii;+ ket idi dandani lumneken ti init inted ni Josue ti bilin, ket kalpasanna imbabada ti natay a bagina+ manipud iti kayo ket impalladawda idiay pagserkan ti ruangan ti siudad ket nangibangonda iti rabawna ti dakkel a gabsuon dagiti bato, agingga itoy nga aldaw. 30  Iti daydin a ni Josue nangbangon iti altar+ ken Jehova a Dios ti Israel, idiay Bantay Ebal,+ 31  kas iti imbilin ni Moises nga adipen ni Jehova iti annak ti Israel, kas adda a naisurat iti libro ti linteg+ ni Moises: “Maysa nga altar a sibubukel a batbato, nga iti dayta awan rimienta a landok a naaramat”;+ ket nagidatdatonda ken Jehova kadagiti daton a mapuoran iti rabaw dayta ken nagisaksakripisioda kadagiti sakripisio a pakikaykaysa.+ 32  Idin insuratna sadiay iti rabaw dagiti bato ti maysa a kopia+ ti linteg ni Moises nga insuratna iti sanguanan ti annak ti Israel.+ 33  Ket ti intero nga Israel ken dagiti lallakayda+ ken dagiti opisial ken dagiti ukomda agtaktakderda idi iti daytoy a sikigan ken iti dayta a sikigan ti Lakasa iti sanguanan ti papadi,+ dagiti Levita, a mangaw-awit iti lakasa ti tulag ni Jehova,+ ti ganggannaet nga agnanaed kasta met ti katutubo,+ kagudua kadakuada iti sanguanan ti Bantay Gerizim+ ket ti sabali a kagudua kadakuada iti sanguanan ti Bantay Ebal,+ (kas iti imbilin ni Moises nga adipen ni Jehova,)+ tapno umuna iti amin bendisionanda+ dagiti umili ti Israel. 34  Ket kalpasan daytoy binasana a sipipigsa ti amin a sasao ti linteg,+ ti bendision+ ken ti lunod,+ sigun iti amin a naisurat iti libro ti linteg. 35  Awan idi ti maysa a sao iti amin nga imbilin ni Moises a di imbasa ni Josue a sipipigsa iti sanguanan ti intero a kongregasion ti Israel,+ agraman kadagiti babbai+ ken kadagidiay ubbing+ ken kadagiti ganggannaet nga agnanaed+ a nagna iti tengngada.

Footnotes