Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Josue 7:1-26

7  Ket nagaramid ti annak ti Israel iti tignay a di kinamatalek maipapan iti banag a naikeddeng iti pannakadadael ta ni Acan+ nga anak ni Carmi, nga anak ni Zabdi, nga anak ni Zera, iti tribu ni Juda, nangala iti sumagmamano iti banag a naikeddeng iti pannakadadael.+ Gapu itoy bimmara ti unget ni Jehova iti annak ti Israel.+  Idin ni Josue nangibaon kadagiti lallaki manipud Jerico a mapan idiay Ai,+ nga adda iti asideg ti Bet-aven,+ iti daya ti Bethel,+ ket kinunana kadakuada: “Sumang-atkayo ket simisimenyo ti daga.” Iti kasta dagiti lallaki simmang-atda ket sinimisimda ti Ai.+  Kalpasan dayta nagsublida ken Josue ket kinunada kenkuana: “Saanmo koma a pasang-aten amin nga umili. Pasang-atem ti agarup dua ribu a lallaki wenno agarup tallo ribu a lallaki ket kabilenda ti Ai. Dika pakilen ti amin nga umili iti ipapan sadiay, ta bassitda.”  Iti kasta simmang-at sadiay ti agarup tallo ribu a lallaki kadagiti umili, ngem nagtatarayda iti sanguanan dagiti lallaki ti Ai.+  Ket dagiti lallaki ti Ai nangkabilda kadakuada iti agarup tallopulo ket innem a lallaki, ket kinamkamatda+ ida manipud sanguanan ti ruangan agingga iti Sebarim ket intuloyda a kinabil ida idiay sasalugan. Iti kasta nangrugi a marunaw ti puso dagiti umili ket nagbalin a kas danum.+  Gapu itoy rinay-ab ni Josue dagiti kagayna ket inruknoyna ti rupana+ agingga iti daga iti sanguanan ti lakasa ni Jehova agingga iti rabii, isu ken dagiti lallakay ti Israel, ket nagtultuloyda a nangikabil iti tapok kadagiti uloda.+  Ket kinuna ni Josue: “Ay, Soberano nga Apo Jehova, apay nga inyegmo daytoy nga ili agingga iti ballasiw ti Jordan, tapno laeng iyawatnakami iti ima dagiti Amoreo tapno dadaelendakami? Ket impabiangmi koma laengen dayta iti bagbagimi ket intuloymi ti nagnaed iti ballasiw ti Jordan!+  Dispensarennak, O Jehova, ngem ania ti maikunak kalpasan a ti Israel timmallikud iti sanguanan dagiti kabusorna?  Ket dagiti Canaanita ken amin nga agnanaed iti daga mangngegdanto maipapan iti dayta, ket sigurado a likmutendakamto ken gessatendanto ti naganmi manipud iti daga;+ ket anianto ti aramidem maipaay iti naindaklan a naganmo?”+ 10  Kalpasanna ni Jehova kinunana ken Josue: “Tumakderka! Apay nga irukruknoymo ta rupam? 11  Ti Israel nagbasol, ket sinalungasingda met ti tulagko+ nga impasdekko a kas bilin kadakuada; ket nangalada met iti sumagmamano iti banag a naikeddeng iti pannakadadael+ ken nagtakawda pay+ ket inlimedda met dayta+ ken inkabilda pay kadagiti bukodda nga aruaten.+ 12  Ket ti annak ti Israel saandanto a makapagtakder maibusor kadagiti kabusorda.+ Ti bukot isunto ti isangoda kadagiti kabusorda, agsipud ta nagbalinda a banag a naikeddeng iti pannakadadael. Diakto kumuyog manen kadakayo malaksid no talipuposenyo manipud iti tengngayo ti banag a naikeddeng iti pannakadadael.+ 13  Tumakderka! Santipikarem dagiti umili,+ ket masapul a kunaem, ‘Santipikarenyo ti bagbagiyo inton bigat, ta daytoy ti kinuna ni Jehova a Dios ti Israel: “Adda iti tengngam ti maysa a banag a naikeddeng iti pannakadadael, O Israel.+ Saankanto a makapagtakder a maibusor kadagiti kabusormo agingga a maikkatyo iti tengngayo ti banag a naikeddeng iti pannakadadael. 14  Ket masapul a dumatagkayo inton bigat, tumunggal tribu, ket mapasamakto a ti tribu a piliento ni Jehova+ umasidegto, tumunggal pamilia, ket ti pamilia a piliento ni Jehova umasidegto, tumunggal sangakabbalayan, ket ti sangakabbalayan a piliento ni Jehova umasidegto, tumunggal nabaneg a lalaki. 15  Ket mapasamakto a daydiay napili nga addaan iti banag a naikeddeng iti pannakadadael mapuoranto iti apuy,+ isu ken amin a kukuana, agsipud ta sinalungasingna ti tulag+ ni Jehova ken agsipud ta nakaaramid iti nakababain a kinamaag iti Israel.”’”+ 16  Idin ni Josue bimmangon a nasapa iti bigat ket pinaasidegna ti Israel, tumunggal tribuna, ket napili ti tribu ni Juda. 17  Sumaganad pinaasidegna dagiti pamilia ni Juda ket pinilina ti pamilia dagiti Zeraita,+ kalpasanna pinaasidegna ti pamilia dagiti Zeraita, tumunggal nabaneg a lalaki, ket napili ni Zabdi. 18  Kamaudiananna pinaasidegna ti sangakabbalayanna, tumunggal nabaneg a lalaki, ket ni Acan nga anak ni Carmi, nga anak ni Zabdi, nga anak ni Zera, iti tribu ni Juda, ti napili.+ 19  Idin ni Josue kinunana ken Acan: “Anakko, ipaaymo, pangngaasim, ti dayag ken Jehova a Dios ti Israel+ ket agpudnoka kenkuana,+ ket ibagam kaniak,+ pangngaasim, Ania ti inaramidmo? Dika ilimed+ dayta kaniak.” 20  Gapu itoy ni Acan simmungbat ken Josue ket kinunana: “Iti kinapudnona siak—nagbasolak a maikaniwas ken Jehova a Dios ti Israel,+ ket kastoy ken kasdiay ti inaramidko. 21  Idi nakakitaak+ iti tengnga ti samsam iti maysa nga opisial a kawes manipud Sinar,+ napintas, ken dua gasut a siklo a pirak ken maysa a barra a balitok, a limapulo a siklo ti dagsenna, iti kasta tinarigagayak ida,+ ket innalak ida;+ ket, adtoy! nailemmengda iti daga iti tengnga ti toldak agraman ti kuarta iti babana.”+ 22  Madagdagus a nangibaon ni Josue kadagiti mensahero, ket nagtatarayda a napan iti tolda, ket, adtoy! nailemmeng dayta iti toldana agraman ti kuarta iti babana. 23  Gapuna innalada ida manipud iti tengnga ti tolda ket inyegda ken Josue ken kadagiti amin nga annak ti Israel ket imbukbokda iti saklang ni Jehova. 24  Ni Josue, ken ti intero nga Israel a naikuyog kenkuana, innalada itan ni Acan+ nga anak ni Zera ken ti pirak ken ti opisial a kawes ken ti barra a balitok+ ken ti annakna a lallaki ken ti annakna a babbai ken ti torona ken ti asnona ken ti arbanna ken ti toldana ken ti isuamin a kukuana ket inyegda ida iti nababa a tanap ti Acor.+ 25  Idin kinuna ni Josue: “Apay nga inyegmo kadakami ti pannakailaksid?+ Iyegto kenka ni Jehova ti pannakailaksid itoy nga aldaw.” Gapuna isu binarbarsak ti intero nga Israel iti batbato,+ kalpasanna pinuoranda ida iti apuy.+ Iti kasta inuborda ida iti batbato. 26  Ket nangibangonda iti rabawna iti maysa a dakkel a gabsuon dagiti bato, agingga itoy nga aldaw.+ Gapu itoy ni Jehova nagbaw-ing manipud nabara nga ungetna.+ Dayta ti makagapu a ti nagan dayta a lugar naawagan iti Nababa a Tanap ti Acor,+ agingga itoy nga aldaw.

Footnotes