Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Josue 5:1-15

5  Ket naaramid nga apaman nga amin nga ar-ari dagiti Amoreo,+ nga adda iti bangir ti Jordan iti agpalaud, ken amin nga ar-ari dagiti Canaanita,+ nga adda iti igid ti baybay, nangngegda a pinagmaga ni Jehova ti dandanum ti Jordan manipud sanguanan ti annak ti Israel agingga a nakaballasiwda, iti kasta nangrugi a marunaw dagiti pusoda,+ ket awanen idi a pulos ti kinasaranta kadakuada gapu iti annak ti Israel.+  Iti dayta met laeng a tiempo kinuna ni Jehova ken Josue: “Mangaramidka maipaay kenka kadagiti imuko a pamulinawen ket kugitem+ manen ti annak ti Israel, iti maikadua a daras.”  Iti kasta nangaramid ni Josue kadagiti imuko a pamulinawen maipaay iti bagina ket kinugitna ti annak ti Israel idiay Gibeat-haaralot.+  Ket daytoy idi ti rason no apay nga inaramid ni Josue ti panangkugit: amin dagiti tattao a rimmuar manipud Egipto, dagiti lallaki, amin dagiti lallaki ti gubat, natayda+ idiay let-ang iti dalan idi a rumrummuarda manipud Egipto.  Ta nakugit amin dagiti tattao a rimmuar, ngem amin dagiti tattao a nayanak idiay let-ang iti dalan idi rumrummuarda manipud Egipto saanda a kinugit.  Ta nagna ti annak ti Israel iti uppat a pulo a tawen+ idiay let-ang, agingga a naibus ti intero a nasion dagiti lallaki ti gubat isuda a rimmuar manipud Egipto a saan a nagimdeng iti timek ni Jehova, isuda a nangisapataan ni Jehova a saannanto a pulos palubosan a makitada ti daga+ nga insapata ni Jehova kadagidi ammada nga ited kadatayo,+ maysa a daga a pagay-ayusan ti gatas ken diro.+  Ket imbangonna ti annakda imbes nga isuda.+ Dagitoy ti kinugit ni Josue, agsipud ta saanda idi a nakugit, ta saanda ida a kinugit iti dalan.  Ket naaramid nga idi nalpasda a kinugit ti intero a nasion, nagtalinaedda a situtugaw iti lugarda idiay pakarso agingga a naungaranda.+  Idin ni Jehova kinunana ken Josue: “Ita nga aldaw intulidko manipud kadakayo ti panangumsi ti Egipto.”+ Gapuna ti nagan dayta a lugar naawagan iti Gilgal+ agingga itoy nga aldaw. 10  Ket intuloy ti annak ti Israel ti agpakarso idiay Gilgal, ket intungpalda ti paskua iti maikasangapulo ket uppat nga aldaw ti bulan,+ iti rabii, iti desierto a tantanap ti Jerico. 11  Ket nangrugida a mangan iti sumagmamano a bunga ti daga iti aldaw kalpasan ti paskua, iti di pinaalsa a tintinapay+ ken kinirog a bukbukel, iti daytoy met laeng nga aldaw. 12  Idin ti manna nagsardeng iti sumaruno nga aldaw idi nakapangandan iti sumagmamano a bunga ti daga, ket ti manna saanen a dimteng uray kaanoman maipaay iti annak ti Israel,+ ket nangrugida a mangan iti sumagmamano kadagiti apit ti daga ti Canaan iti dayta a tawen.+ 13  Ket naaramid idi adda ni Josue iti asideg ti Jerico nga intangadna dagiti matana ket kimmita, ket sadiay adda maysa a lalaki+ a sitatakder iti sangona a siiiggem iti naasut a kampilanna.+ Gapuna ni Josue nagna nga immasideg kenkuana ket kinunana kenkuana: “Dumasigka kadi kadakami wenno dumasigka kadagiti kabusormi?” 14  Iti daytoy kinunana: “Saan, ngem siak—kas prinsipe ti buyot ni Jehova nga immayak ita.”+ Gapuna impasag ni Josue ti rupana iti daga ket inruknoyna+ ti bagina ket kinunana kenkuana: “Ania ti kunkunaen ni apok iti adipenna?” 15  Kalpasanna ti prinsipe ti buyot ni Jehova kinunana ken Josue: “Uksotem dagiti pallokam kadagita sakam, agsipud ta ti disso a pagtaktakderam ket nasantuan.” Madagdagus nga inaramid ni Josue ti kasta.+

Footnotes