Mapan iti linaonna

Mapan iti segundario a pagpilian

Mapan iti listaan dagiti linaonna

Dagiti Saksi ni Jehova

Iloko

Online a Biblia | BARO A LUBONG A PATARUS TI NASANTUAN A KASURATAN

Josue 22:1-34

22  Iti dayta a tiempo inayaban ni Josue dagiti Rubenita ken dagiti Gadita ken ti kagudua a tribu ni Manases+  ket kinunana kadakuada: “Iti biangyo, sinalimetmetanyo dagiti amin nga imbilin kadakayo ni Moises nga adipen ni Jehova,+ ket nagtulnogkayo iti timekko iti isuamin nga imbilinko kadakayo.+  Saanyo a binaybay-an ti kakabsatyo kadagitoy adu nga aldaw+ agingga itoy nga aldaw, ket sinalimetmetanyo ti pagrebbengan ti bilin ni Jehova a Diosyo.+  Ket ita ni Jehova a Diosyo impaayanna iti inana ti kakabsatyo, kas iti inkarina kadakuada.+ Gapuna agsublikayo ita ket mapankayo kadagiti toldayo iti daga a tagikuaenyo, nga inted kadakayo ni Moises nga adipen ni Jehova iti ballasiw ti Jordan.+  Isuna laeng ta agannadkayo unay a mangitungpal iti bilin+ ken ti linteg nga imbilin kadakayo ni Moises nga adipen ni Jehova babaen ti panagayat ken Jehova a Diosyo+ ken babaen ti pannagna iti amin a daldalanna+ ken babaen ti panangsalimetmet kadagiti bilinna+ ken babaen ti ikakapet kenkuana+ ken babaen ti panagserbi+ kenkuana buyogen ti isuamin a pusoyo+ ken buyogen ti isuamin a kararuayo.”+  Gapuna binendisionan+ ida ni Josue ket pinalubosanna ida tapno mapanda kadagiti toldada.  Ket iti kagudua a tribu ni Manases nangisagut ni Moises idiay Basan,+ ket iti sabali a kagudua dayta nangisagut ni Josue agraman iti kakabsatda idiay bangir ti Jordan iti agpalaud.+ Gapuna, idi a ni Josue pinalubosanna met ida nga agturong kadagiti toldada, binendisionanna ida.  Ket kinunana kadakuada: “Agsublikayo kadagiti toldayo agraman ti adu a kinabaknang ken agraman ti adu unay a dinguen, agraman ti pirak ken balitok ken gambang ken landok ken kawes a nakaad-adu unay.+ Alaenyo ti binglayyo iti samsam+ dagiti kabusoryo a kaduayo ti kakabsatyo.”  Kalpasan dayta nagsubli ti annak ni Ruben ken ti annak ni Gad ken ti kagudua a tribu ni Manases ket pimmanawda iti dadduma nga annak ti Israel, manipud Silo, nga adda iti daga ti Canaan, tapno mapanda iti daga ti Galaad,+ iti daga a tagikuaenda a nagyananda kas imbilin ni Jehova babaen ken Moises.+ 10  Idi dimtengda kadagiti rehion ti Jordan nga adda iti daga ti Canaan, ngarud ti annak ni Ruben ken ti annak ni Gad ken ti kagudua a tribu ni Manases nangbangonda sadiay ti maysa nga altar iti sibay ti Jordan, maysa nga altar+ a kasta unay ti kinalatakna. 11  Idi agangay nangngeg+ ti dadduma nga annak ti Israel a naikuna: “Adtoy! Ti annak ni Ruben ken ti annak ni Gad ken ti kagudua a tribu ni Manases nangibangonda iti maysa nga altar iti lindoras ti daga ti Canaan kadagiti rehion ti Jordan iti deppaar a kukua ti annak ti Israel.” 12  Idi nangngeg dayta ti annak ti Israel, ti intero a gimong ti annak ti Israel+ naummongda kalpasanna idiay Silo+ tapno sumang-atda maipaay iti namilitariaan a tignay maibusor kadakuada.+ 13  Idin ti annak ti Israel imbaonda+ iti annak ni Ruben ken iti annak ni Gad ken iti kagudua a tribu ni Manases iti daga ti Galaad ni Finehas+ nga anak ni Eleazar a padi, 14  ken sangapulo a panguluen a naikuyog kenkuana, maysa a panguluen iti tunggal balay ti amma dagiti amin a tribu ti Israel, ket isuda tunggal maysa pannakaulo iti balay dagiti ammada iti rinibu ti Israel.+ 15  Idi agangay dimtengda iti annak ni Ruben ken iti annak ni Gad ken iti kagudua a tribu ni Manases iti daga ti Galaad ket rinugianda ti makisao kadakuada,+ a kunkunada: 16  “Daytoy ti kinuna ti intero a gimong ni Jehova,+ ‘Ania daytoy tignay a di kinamatalek+ nga inaramidyo maibusor iti Dios ti Israel iti panagtallikudyo+ ita nga aldaw manipud isusurot ken Jehova babaen ti panangibangonyo maipaay iti bagbagiyo iti maysa nga altar,+ tapno agrebeldekayo ita nga aldaw maibusor ken Jehova? 17  Nakabasbassit aya kadatayo daydi biddut ti Peor,+ a manipud iti dayta saantayo pay a dinalusan ti bagbagitayo agingga itoy nga aldaw, nupay ti saplit dimteng iti gimong ni Jehova?+ 18  Ket dakayo—tumallikudkayo ita nga aldaw manipud isusurot ken Jehova; ket mapasamakto a no dakayo, iti biangyo, agrebeldekayo ken Jehova ita nga aldaw, ngarud inton bigat isu agrurodto maibusor iti intero a gimong ti Israel.+ 19  Ita no pudno a ti daga a tagikuaenyo ket narugit,+ bumallasiwkayo iti daga a kukua ni Jehova+ a sadiay a nagtaeng ti tabernakulo ni Jehova,+ ket agyankayo iti tengngami; ket dikay agrebelde ken Jehova ket dikay pagbalinen a dakami ti agrebelde babaen ti panangibangonyo maipaay iti bagbagiyo iti maysa nga altar a mainayon iti altar ni Jehova a Diostayo.+ 20  Saan aya a ni Acan+ nga anak ni Zera ti nangaramid iti tignay a di kinamatalek iti banag a naipaay iti pannakadadael, ket saan aya a maibusor iti intero a gimong ti Israel nga immay ti rurod?+ Ket saan laeng nga isu ti lalaki a nauyos ti biagna gapu iti biddutna.’”+ 21  Gapu itoy simmungbat+ ti annak ni Ruben ken ti annak ni Gad ken ti kagudua a tribu ni Manases ket nakisaoda kadagiti pannakaulo ti rinibu ti Israel:+ 22  “Nadibinuan,+ Dios,+ a Jehova, Nadibinuan, Dios, a Jehova,+ isu ammona,+ ket ti Israel, isu maammuannanto met.+ No dayta ket panagrebelde+ ken no dayta ket di kinamatalek a maibusor ken Jehova,+ saannakamto nga isalakan iti daytoy nga aldaw. 23  No dayta ket panangibangon maipaay iti bagbagimi iti maysa nga altar tapno tumallikudkami manipud isusurot ken Jehova, ken no dayta ket tapno pagidatonanmi kadagiti daton a mapuoran ken kadagiti daton a bukbukel,+ ken no dayta ket tapno pagidataganmi kadagiti pakikaykaysa a sakripisio, sukimatento a mismo ni Jehova;+ 24  wenno no dayta ket saan ketdi a gapu iti panagdanag maipaay iti sabali a banag nga inaramidmi daytoy, a kunaenmi, ‘Iti masanguanan nga aldaw kunaento ti annakyo iti annakmi: “Ania ti pakaibianganyo ken Jehova a Dios ti Israel? 25  Ket adda beddeng nga inkabil ni Jehova iti nagbaetanmi ken dakayo, ti annak ni Ruben ken ti annak ni Gad, awan sabali, ti Jordan. Awan binglayyo ken Jehova.”+ Ket ti annakyo sigurado a pagsardengendanto ti annakmi nga agbuteng ken Jehova.’+ 26  “Gapuna kinunami, ‘Agtignaytayo maigapu kadatayo, pangngaasiyo, babaen ti panangibangon iti altar, saan nga agpaay iti daton a mapuoran wenno agpaay iti sakripisio, 27  no di ket tapno agbalin koma a saksi iti nagbaetanmi+ ken dakayo ken kadagiti kaputotantayo a sumaruno kadatayo nga ipaaytayto ti panagserbi ken Jehova iti sanguananna babaen kadagiti datontayo a mapuoran ken kadagiti sakripisiotayo ken kadagiti sakripisiotayo a pakikaykaysa,+ tapno ti annakyo saandanto a kunaen iti masanguanan nga aldaw iti annakmi: “Awan binglayyo ken Jehova.”’ 28  Gapuna kinunami, ‘Ket mapasamakto a no kas pagarigan kunaendanto dayta kadakami ken kadagiti kaputotanmi iti masanguanan nga aldaw, kunaenminto met: “Kitaenyo ti ladawan ti altar ni Jehova nga inaramid dagidi ammami, saan nga agpaay iti daton a mapuoran wenno agpaay iti sakripisio, no di ket maysa dayta a saksi iti nagbaetanmi ken dakayo.”’ 29  Narigat a pagarupen, iti biangmi, nga agrebeldekami a kabukbukodanmi maibusor ken Jehova ken tumallikudkami ita nga aldaw manipud isusurot ken Jehova+ babaen ti panangibangon iti altar nga agpaay iti daton a mapuoran, daton a bukbukel ken sakripisio malaksid iti altar ni Jehova a Diostayo nga adda iti sanguanan ti tabernakulona!”+ 30  Ita idi a ni Finehas+ a padi ken dagiti panguluen ti gimong+ ken dagiti pannakaulo ti rinibu ti Israel a naikuyog kenkuana nangngegda ti sasao a sinao ti annak ni Ruben ken ti annak ni Gad ken ti annak ni Manases, naimbag dayta kadagiti matada. 31  Gapuna ni Finehas nga anak ni Eleazar a padi kinunana iti annak ni Ruben ken iti annak ni Gad ken iti annak ni Manases: “Ita nga aldaw ammomi a ni Jehova adda iti tengngatayo,+ agsipud ta saanyo nga inaramid maibusor ken Jehova daytoy tignay a di kinamatalek. Ita inispalyo ti annak ti Israel manipud iti ima ni Jehova.”+ 32  Gapu itoy ni Finehas nga anak ni Eleazar a padi ken dagiti panguluen nagsublida+ manipud iti annak ni Ruben ken iti annak ni Gad iti daga ti Galaad nga agturong iti daga ti Canaan iti dadduma nga annak ti Israel ket nangyegda iti sao kadakuada.+ 33  Ket ti sao naimbag idi kadagiti mata ti annak ti Israel; ket ti annak ti Israel binenditoda ti Dios,+ ket saanda a nagsao maipapan iti isasang-atda nga agserbi iti buyot maibusor kadakuada tapno dadaelenda ti daga a pagnanaedan ti annak ni Ruben ken ti annak ni Gad. 34  Ket ti annak ni Ruben ken ti annak ni Gad rinugianda a panaganan ti altar, agsipud ta “maysa dayta a saksi iti nagbabaetantayo a ni Jehova ti pudno a Dios.”+

Footnotes