Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Josue 1:1-18

1  Ket naaramid kalpasan ti ipapatay ni Moises nga adipen ni Jehova a ni Jehova kinunana ken Josue+ nga anak ni Nun, ti ministro+ ni Moises:  “Ni Moises nga adipenko natayen;+ ket ita tumakderka, ballasiwem daytoy Jordan, sika ken daytoy intero nga ili, nga agturong iti daga nga itedko kadakuada, iti annak ti Israel.+  Tunggal disso a baddekento ti dapan ti sakayo, sigurado nga itedkonto kadakayo, kas iti inkarik ken Moises.+  Manipud iti let-ang ken iti daytoy a Libano agingga iti dakkel a karayan, ti karayan Eufrates, awan sabali, ti intero a daga dagiti Heteo,+ ken agingga iti Dakkel a Baybay nga agpalelennekan ti init ti agbalinto a teritoriayo.+  Awanto ti asinoman nga agtakder a sititibker iti sanguanam iti amin nga al-aldaw ti panagbiagmo.+ No kasano nga addaak idi ken Moises addaakto kenka.+ Saankanto a baybay-an wenno panawan a naan-anay.+  Bumilegka ken pumigsaka,+ ta sika daydiay mamagtawidto+ iti daytoy nga ili iti daga nga insapatak kadagidi ammada nga itedko kadakuada.+  “Isuna laeng ta bumilegka ken pumigsaka unay tapno annadam nga aramiden ti maitunos iti isuamin a linteg nga imbilin kenka ni Moises nga adipenko.+ Dika sumiasi iti dayta nga agpakannawan wenno agpakannigid,+ tapno makapagtignayka a sisisirib iti sadinoman a papanam.+  Daytoy a libro ti linteg saan koma a sumina iti ngiwatmo,+ ket masapul nga iti nababa a timek agbasaka iti dayta iti aldaw ken rabii, tapno maannadam nga aramiden ti maitunos iti isuamin a naisurat iti dayta;+ ta iti kasta pagballigiemto ti dalanmo ket iti kasta agtignaykanto a sisisirib.+  Saan aya a binilinka?+ Bumilegka ken pumigsaka. Dika mapakigtotan wenno agkullayaw,+ ta ni Jehova a Diosmo adda kenka iti sadinoman a papanam.”+ 10  Ket binilin ni Josue dagiti opisial ti ili, a kunkunana: 11  “Lumasatkayo iti tengnga ti pakarso ket bilinenyo dagiti umili, a kunaenyo, ‘Isaganaanyo ti bagbagiyo iti pagtaraon, agsipud ta tallo nga aldaw manipud ita ballasiwenyo daytoy Jordan tapno sumrekkayo ket tagikuaenyo ti daga nga ited kadakayo ni Jehova a Diosyo tapno tagikuaenyo.’”+ 12  Ket kinuna ni Josue kadagiti Rubenita ken kadagiti Gadita ken iti kagudua a tribu ni Manases: 13  “Adda koma pananglaglagip iti sao nga imbilin kadakayo ni Moises nga adipen ni Jehova,+ a kunkunana, ‘Ni Jehova a Diosyo ipaayannakayo iti inana ket intedna kadakayo daytoy a daga. 14  Agnaedto dagiti assawayo, dagiti ubbingyo ken dagiti dinguenyo iti daga nga inted kadakayo ni Moises iti daytoy a bangir ti Jordan;+ ngem bumallasiwkayto iti urnos ti pannakibakal+ iti sanguanan ti kakabsatyo, amin dagiti mamaingel a nabileg a lallaki,+ ket masapul a tulonganyo ida. 15  Umuna inton mangipaay ni Jehova iti inana iti kakabsatyo a kas met laeng kadakayo ket kasta met a tinagikuadan ti daga nga ited kadakuada ni Jehova a Diosyo,+ masapul met nga agsublikayo iti daga a pannakasanikuayo ket tagikuaenyo dayta,+ daydiay inted kadakayo ni Moises nga adipen ni Jehova iti bangir ti Jordan nga agpaleleggakan ti init.’”+ 16  Iti kasta simmungbatda ken Josue, a kunkunada: “Amin nga imbilinmo kadakami aramidenminto, ket sadinoman a pangibaonam kadakami mapankamto.+ 17  Kas iti panagimdengmi idi ken Moises iti isuamin a banag, kastanto ti panagimdengmi kenka. Isuna laeng ta ni Jehova a Diosmo adda koma kenka+ no kasano nga adda idi ken Moises.+ 18  Asinoman a tao nga agtignay a sirerebelioso maibusor iti bilinmo+ ken saan nga agimdeng kadagiti saom iti isuamin nga ibilinmo kenkuana mapapatayto.+ Isuna laeng ta bumilegka ken pumigsaka.”+

Footnotes