Accessibility setting

Agpili iti lengguahe

Mapan iti segundario a pagpilian

Mapan iti listaan dagiti linaonna

Mapan iti linaonna

Dagiti Saksi ni Jehova

Iloko

Online a Biblia

BARO A LUBONG A PATARUS TI NASANTUAN A KASURATAN

Jeremias 7:1-34

7  Ti sao a dimteng ken Jeremias manipud ken Jehova, a kunkunana:  “Agtakderka iti ruangan ti balay ni Jehova, ket masapul nga iwaragawagmo sadiay daytoy a sao,+ ket masapul a kunaem, ‘Denggenyo ti sao ni Jehova, dakayo amin iti Juda, a sumsumrek kadagitoy a ruangan tapno agruknoy ken Jehova.  Daytoy ti kinuna ni Jehova ti buybuyot, ti Dios ti Israel: “Pasayaatenyo ti daldalanyo ken dagiti pannakilangenyo, ket pagtalinaedenkayto nga agtaeng iti daytoy a disso.+  Dikay agtalek iti natiri a sasao,+ a kunkunayo, ‘Ti templo ni Jehova, ti templo ni Jehova, isuda ti templo ni Jehova!’  Ta no sigurado a pasayaatenyo ti daldalanyo ken dagiti pannakilangenyo, no di bumurong nga itungpalyonto ti kinahustisia iti nagbaetan ti maysa a lalaki ken ti kaduana,+  no awan ti ganggannaet nga agnanaed, awan ti ubing nga awanan ama ken awan ti balo a babai nga irurumenyonto,+ ket iti daytoy a disso saankayto a mangibukbok iti dara nga awanan basol,+ ket saankayto a sumurot kadagiti sabali a didios maipaay a pakadidigraanyo,+  siak, kalpasanna, pudno unay a pagtalinaedenkayto nga agtaeng iti daytoy a disso, iti daga nga intedko kadagidi ammayo, manipud iti tiempo a di nakedngan agingga a mismo iti tiempo a di nakedngan.”’”+  “Adtoy ikabkabilyo ti panagtalekyo iti natiri a sasao—sigurado a saanto a pulos makagunggona dayta.+  Mabalin aya nga adda panagtakaw,+ pammapatay+ ken pannakikamalala+ ken panagsapata a siuulbod+ ken panangpataud iti asuk a sakripisio ken Baal+ ken isusurot kadagiti sabali a didios a saanyo a naam-ammo,+ 10  ket masapul nga umaykayo ken agtakderkayo iti sanguanak iti daytoy a balay a nakayawagan ti naganko,+ ket masapul a kunaenyo, ‘Sigurado a maispalkamto,’ agpapan pay ti panangaramidyo amin kadagitoy a nakarimrimon a banag? 11  Daytoy a balay a nakayawagan ti naganko+ nagbalin aya a maysa laeng a rukib dagiti mannanakaw kadagiti matayo?+ Adtoy nakitak met a mismo dayta,” kuna ni Jehova.+ 12  “‘Nupay kasta, mapankayo, ita, iti lugarko idi idiay Silo,+ a sadiay pinagtaengko ti naganko idi damo,+ ket kitaenyo no ania ti inaramidko iti dayta gapu iti kinadakes ti ilik nga Israel.+ 13  Ket ita gapu ta inar-aramidyo amin dagitoy nga aramid,’ kuna ni Jehova, ‘ket nagsasaoak kadakayo, a bimmangonak a nasapa ket nagsaoak,+ ngem saankayo nga immimdeng,+ ken immaw-awagak kadakayo, ngem saankayo a simmungbat,+ 14  aramidekto met iti balay a nakayawagan ti naganko,+ a pagtaltalkanyo,+ ken iti lugar nga intedko kadakayo ken kadagidi ammayo, kas iti inaramidko iti Silo.+ 15  Ket ipalladawkayto manipud iti sanguanan ti rupak,+ kas iti panangipalladawko iti amin a kakabsatyo, ti intero a kaputotan ni Efraim.’+ 16  “Ket no maipapan kenka, dika ikararagan daytoy nga ili, saanka met a mangipigsa maigapu kadakuada iti maysa nga agpakpakaasi nga ikkis wenno maysa a kararag wenno uray agdawat kaniak,+ ta saanakto nga umimdeng kenka.+ 17  Saanmo kadi a makitkita ti ar-aramidenda kadagiti siudad ti Juda ken kadagiti kalsada ti Jerusalem?+ 18  Ti annak agpidpidutda kadagiti ruting ti kayo, ket dagiti amma paspasgedanda ti apuy, ket ti assawa a babbai aggamgamayda iti bellaay nga arina tapno mangaramidda kadagiti tinapay a sakripisio iti ‘reyna ti langlangit’;+ ket adda panagibuyat iti datdaton nga inumen+ kadagiti sabali a didios iti panggep a panangrurod kaniak.+ 19  ‘Siak aya ti rurrurodenda?’ kuna ni Jehova.+ ‘Saan aya a ti bagbagida met laeng, iti panggep a panangibabain kadagiti rupada?’+ 20  Gapuna daytoy ti kinuna ti Soberano nga Apo Jehova, ‘Adtoy! Ti ungetko ken pungtotko maibuybuyat iti daytoy a disso,+ iti sangatauan ken iti naamo nga animal, ken iti kayo ti tay-ak+ ken iti bungbunga ti daga; ket masapul a sumged dayta, ket saanto a maiddep.’+ 21  “Daytoy ti kinuna ni Jehova ti buybuyot, ti Dios ti Israel, ‘Dagidiay sibubukel a datonyo a mapuoran inayonyo kadagiti sakripisioyo ket mangankayo iti lasag.+ 22  Ta saanak a nakisao kadagidi ammayo, saanko met a binilin ida idi aldaw a panangiruarko kadakuada manipud iti daga ti Egipto maipapan iti bambanag a mainaig iti sibubukel a daton a mapuoran ken sakripisio.+ 23  Ngem daytoy a sao inyebkasko kas bilin kadakuada, a kinunak: “Agtulnogkayo iti timekko,+ ket agbalinakto a Diosyo,+ ket dakayo agbalinkayto nga ilik; ket masapul a magnakayo iti isuamin a dalan+ nga ibilinkonto kadakayo, tapno aglak-amkayo iti naimbag.”’+ 24  Ngem saanda nga immimdeng, saanda met nga inyallingag ti lapayagda,+ no di ket nagnada kadagiti panagem iti kinasungit ti dakes a pusoda,+ iti kasta nagpasanud ti turongda ket saan a nagpasango,+ 25  manipud idi aldaw a rimmuar dagidi ammayo manipud iti daga ti Egipto agingga itoy nga aldaw;+ ket imbabaonko kadakayo dagiti amin nga adipenko a mammadto, nga inaldaw a bimmangonak a nasapa ket imbaonko ida.+ 26  Ngem saandak nga inimdengan, ket saanda nga inyallingag ti lapayagda,+ no di ket pinatpatangkenda ti lengngesda.+ Nagtignayda a dakdakes ngem kadagidi ammada!+ 27  “Ket amin dagitoy a sasao sawemto kadakuada,+ ngem saandakanto nga imdengan; ket umawagkanto kadakuada, ngem saandakanto a sungbatan.+ 28  Ket kunaemto kadakuada, ‘Daytoy ti nasion a dagiti umilina saan a nagtulnog iti timek ni Jehova a Diosna,+ ken saan nga immawat iti disiplina.+ Ti kinamatalek napukaw, ket nagessaten iti ngiwatda.’+ 29  “Pukisam ti di naputdan a buokmo ket ibellengmo,+ ket kadagiti kalbo a turod mangipigsaka iti dung-aw,+ ta ni Jehova linaksidna+ ken baybay-annanto ti kaputotan a pagrungrungsotanna.+ 30  ‘Ta ti annak ni Juda inaramidda ti dakes kadagiti matak,’ kuna ni Jehova. ‘Insaadda ti makarimon a bambanagda iti balay a nakayawagan ti naganko, tapno tulawanda dayta.+ 31  Ket imbangonda dagiti nangato a disso ti Tofet,+ nga adda iti ginget ti anak ni Hinnom,+ tapno puoranda ti annakda a lallaki ken ti annakda a babbai iti apuy,+ banag a saanko nga imbilin ken saan a timpuar iti pusok.’+ 32  “‘Gapuna, adtoy! um-umayen dagiti aldaw,’ kuna ni Jehova, ‘inton saanen a makuna dayta a Tofet ken ti ginget ti anak ni Hinnom, no di ket ti ginget ti panangpapatay;+ ket kasapulan nga agitabondanto idiay Tofet uray awan umdas a lugar sadiay.+ 33  Ket dagiti natay a bagi daytoy nga ili agbalindanto a taraon maipaay kadagiti agtaytayab a parsua iti langlangit ken maipaay kadagiti animal iti daga, nga awan asinoman a mamagpigerger kadakuada.+ 34  Ket pasardengekto kadagiti siudad ti Juda ken kadagiti kalsada ti Jerusalem ti timek ti panagragsak ken ti timek ti panagrag-o, ti timek ti nobio ken ti timek ti nobia;+ ta ti daga agbalinto laengen a walangwalang a disso.’”+

Footnotes